Luvaiku 26:1-37
26 “Vangila e saba+ mu nlele kumi mia nsinga miasietwa mia lino yambote, nsinga mia bule, nsinga mia mika mia se kia nduwa ye nsinga mia mbwaki akongola.* Ofwete mo tunga e fwaniswa+ ya akelubi.+
2 Konso nlele a saba ukala ye yinkoso* 28 muna lambuka, yinkoso 4 muna yalumuka. E nlele miawonso mia saba mifwete kala tezo kimosi.+
3 Nlele ntanu mia saba miyikakeswa yo kala se nlonga mosi, e miaka nlele tanu mia saba miyikakeswa yo kala se nlonga mosi.
4 Vanga mavundu ma nsing’a bule muna nswiku a nlele wina kuna nsuk’a nlonga; vanga diau adimosi muna nswiku a nlele wina kuna nsuk’a nlonga wankaka, vana veyikanena e nlonga miau miole.
5 Vanga mavundu 50 mu nlele umosi, mavundu 50 muna nswiku a nlele wankaka, kimana mavundu makala mantalani vana veyikanena e nlonga miau miole.
6 Vanga kangilwa 50 ya wolo, yikakesa e nlonga miole mia nlele a saba muna kangilwa, muna mpila yayi e saba kikala se lekwa kimosi.+
7 “Vanga mpe nlele muna mika mia nkombo+ mikala se fukwa vana ntandu a saba. Nlele 11 mia saba ovanga.+
8 Konso nlele a saba ukala ye yinkoso 30 muna lambuka, yinkoso 4 muna yalumuka. E nlele 11 mia saba, miawonso mifwete kala tezo kimosi.
9 Yikakesa mintanu muna nlele miami mia saba, yikakesa mpe nlele sambanu miankaka mia saba, bundika o nlele una wasambanu wina kuna ndose a saba.
10 Ofwete tobola mavundu 50 muna nswiku a nlele a saba una kuna nsuk’a nlonga, mavundu 50 muna nswiku a nlele a saba una kuna nsuk’a nlonga wankaka, vana veyikanena e nlonga miau miole.
11 Vanga kangilwa 50 ya nsongo, kotesa e kangilwa muna mavundu muna yikakesa e nlonga miau miole mia nlele, miawonso mikituka se fukwa kimosi kia saba.
12 E tini kisuva kia nlele mia saba kikala se veta. O kati-kati kwa nlele kusuva kuyengalala kuna nim’a saba.
13 Kuna konso luvati kusuva kinkoso kimosi muna lambuka kwa nlele, kiayengalala kikala mu fukila e saba.
14 “Vanga mpe fukwa kia saba muna nkanda mia mameme ma makoko miavubwa mu se kiambwaki, vana ntandu a fukwa kiokio, tenseka vo fukwa kia nkanda mia takasi.*+
15 “Vanga valanganza ya mabaya+ ya saba muna mabaya ma akasia, ina itelameswa.+
16 Konso valanganza kia mabaya kikala ye yinkoso kumi muna lá, kinkoso kimosi ye ndambu muna yalumuka.
17 Konso valanganza kia mabaya kikala ye malu mole matalana. I wau wuwu ovangila e valanganza yawonso ya mabaya ya saba.
18 Valanganza 20 ya mabaya ovanga mu kuma kia ndambu a sude ya saba.
19 “Vanga telamesenua 40 ya palata,+ ina ikala kuna nsi a valanganza 20 ya mabaya: telamesenua yole kuna nsi a valanganza kimosi kia mabaya mu kuma kia malu mandi mole, telamesenua yole kuna nsi a konso valanganza kia mabaya kilanda mu kuma kia malu mandi mole.+
20 Kuna ndambu yankaka ya saba, kuna node, vanga valanganza 20 ya mabaya
21 ye 40 ma telamesenua yau ya palata. Telamesenua yole kuna nsi a valanganza kimosi kia mabaya, telamesenua yole kuna nsi a konso valanganza kia mabaya kilanda.
22 Kuna nim’a saba, kuna weste, vanga valanganza sambanu ya mabaya.+
23 Vanga valanganza yole ya mabaya ikala se malunzi ma konko yole kuna nim’a saba.
24 E valanganza yole ya mabaya ifwete bundakeswa tuka kuna nsi yakuna ntandu, yamuna nlunga wantete. I wau wuwu ovangila yo, ikala se malunzi ma konko yole ya saba.
25 Ozevo, vekala ye valanganza nana ya mabaya ye telamesenua yau 16 ya palata. Telamesenua yole kuna nsi a valanganza kimosi kia mabaya, telamesenua yole kuna nsi a konso valanganza kia mabaya kilanda.
26 “Ovanga mbindi za mabaya ma akasia: mbindi tanu mu kuma kia valanganza ya mabaya ya ndambu eyi ya saba,+
27 mbindi tanu mu kuma kia valanganza ya mabaya ya ndambu yankaka ya saba ye mbindi tanu mu kuma kia valanganza ya mabaya kuna ndambu a weste a saba, kuna nima.
28 E mbindi ikambama vana kati kwa valanganza ya mabaya ifwete tuka oku nsuka eyi yakuna nsuka ina.
29 “E valanganza ya mabaya ofwete yo lenga e wolo,+ lamika yo e nlunga mia wolo muna muviokela e mbindi, e mbindi lenga zo e wolo.
30 Ofwete telamesa e saba muna mpila ina osongelo kuna mongo.+
31 “Vanga rido+ muna nsinga mia bule, nsinga mia mika mia se kia nduwa, nsinga mia mbwaki akongola,* nsinga miasietwa mia lino yambote. Muna rido mufwete tungwa e fwaniswa ya akelubi.
32 Yengeleka yo muna malunzi yá ma akasia malengwa e wolo. E vakikilwa muna malunzi ifwete kala ya wolo. O malunzi mafwete siwa mu telamesenua yá ya palata.
33 Oyengeleka e rido kuna nsi a kangilwa, nata e nkel’a Kimbangi+ kuna nim’a rido. E rido ivambula e Fulu Kiavauka+ ye Fulu Kisundidi o Vauka.+
34 Ofwete tula e fukwa vana ntandu a nkel’a Kimbangi, vana Fulu Kisundidi o Vauka.
35 “Sia o meza vana Fulu Kiavauka,* e zangikilwa kia minda+ kikala mantalani yo meza kuna ndambu a sude ya saba; o meza osia mo kuna ndambu a node.
36 Ovanga rido ya mwelo a saba muna nsinga mia bule, nsinga mia mika mia se kia nduwa, nsinga mia mbwaki akongola,* nsinga miasietwa mia lino yambote.+
37 Vanga malunzi tanu ma nti a akasia mu kuma kia rido, lenga mo e wolo. E vakikilwa muna malunzi ifwete kala ya wolo, ofwete vanga mpe telamesenua tanu ya nsongo mu kuma kia malunzi.
Mvovo vana yand'a lukaya
^ Yovo “mbwaki-mbwaki.”
^ Yovo “mbw’a mbu.”
^ Yovo “mbwaki-mbwaki.”
^ Mvovo wa sina: “kuna mbazi a rido.”
^ Yovo “mbwaki-mbwaki.”
