Luvaiku 10:1-29
10 Yave ovovese Mose vo: “Wenda kwa Faro, kadi ngiambwidi vo Faro ye ntaudi zandi babadisa e ntima miau,+ kimana yasonga e sinsu yame vana ndose andi,+
2 wasamuna mpe kwa wan’aku ye atekelo aku, e mpasi mbwesese esi Engipito ye sinsu mvangidi vana kati kwau.+ Muna diadi, nuzaya kieleka vo mono i Yave.”
3 Mose yo Arone bakotele kwa Faro, bamvovese vo: “I wau wuwu kavovele o Yave wa Nzambi a Ayibere: ‘Yamu nkia ntangwa okwamanana kunkolamena?+ Sindika o nkangu ame kimana wenda kunsadila.
4 Avo okwamanene simbinina o nkangu ame, o mbazi makonko ikutwasila omu zunga kiaku.
5 Makonko mefuka o ntoto, ka ulenda moneka ko. Makonko media ina ivukidi muna mvul’a matadi, ina nusisilu, media e nti miawonso mimenanga muna kiana.+
6 Makonko mezala muna nzo zaku, muna nzo za ntaudi zaku ye muna nzo za Engipito yawonso. Mezala mu mpila ina mase maku ye nkaka zaku ke basidi mona ko, tuka bawutukila mu nsi yayi yamu wau.’”+ Muna diadi ovilukidi, okatukidi vana ntadisi a Faro.
7 I bosi, e ntaudi za Faro bamvovese vo: “Yamu nkia kolo muntu ndioyo kekwamanana kututwasila e mfwilu?* Sindika wantu benda kwau, basadila Yave wa Nzambi au. Nga kumwene ko vo Engipito mufwasuka ina?”
8 Muna kuma kiaki, Mose yo Arone batweso diaka kwa Faro, ubavovese vo: “Nuenda, nuasadila Yave wa Nzambi eno. Kansi, nani yo nani bekwenda?”
9 Mose ovutwidi vo: “Tukwenda ye aleke eto, mbuta zeto, wan’eto amakala, wan’eto amakento, mameme meto ye ngombe zeto,+ kadi Yave tuvangila o nkinzi.”+
10 O Faro ubavutwidi vo: “Nga nubenze vo ikunusindika kumosi yo wan’eno? Avo mvangidi wo, wana zevo Yave una yeno kikilu!+ Kieleka, makani mambi nuna mau.
11 Akala kaka bekwenda, basadila Yave, kadi i diau nulombele.” Muna diadi, bayingilu vana ndose a Faro.
12 Yave ovovese Mose vo: “Lambula koko kwaku muna nsi ya Engipito wabokela makonko, kimana meza muna nsi ya Engipito, yo dia e mvudi yawonso ya nsi, yawonso yasiswa kwa mvul’a matadi.”
13 Vana vau, Mose olambwidi o nkau andi muna nsi ya Engipito, Yave ofididi e tembwa kia este muna nsi muna lumbu kiakina kiawonso ye muna fuku wawonso. Vava kuma kukiele, e tembwa kia este kitwese makonko.
14 Makonko matombokele muna nsi yawonso ya Engipito, mabelele* muna zunga kiawonso kia Engipito.+ Vuku kia mpasi kikilu;+ ke mwateka kala ulolo wa makonko nze wau ko, ke mesinga mpe kala diaka ko.
15 Makonko mafukidi o ntoto wawonso wa nsi, e nsi ibukamen’e tombe mu kuma kiau. Makonko madidi e mvudi yawonso ya nsi ye bundu yawonso ya nti yasiswa kwa mvul’a matadi; ke masisidi kana lekwa kimosi kiankunzu ko muna nti yovo muna mvudi a kiana muna nsi yawonso ya Engipito.
16 Vana vau, Faro otumisi Mose yo Arone, ovovele vo: “Nsumukini Yave wa Nzambi eno yo yeno.
17 Dianu vo, dodokolo, nuloloka kaka e sumu diame o nkumbu wau, nudodokela Yave wa Nzambi eno kimana kakatula e vuku kiaki kiampondi oku ngina.”
18 Muna kuma kiaki, okatukidi* vana ndose a Faro, wele dodokela Yave.+
19 Yave ovilwidi e tembwa, kikitukidi se tembwa kiangolo kia weste, kivevomwene makonko yo tuba mo muna Mbu Ambwaki. Ke musidi kana nkutu konko dimosi ko muna zunga kiawonso kia Engipito.
20 Kansi, Yave oyambwidi vo Faro kabadisa o ntim’andi,+ kasindikidi Aneyisaele ko.
21 I bosi, Yave ovovese Mose vo: “Lambula koko kwaku kuna zulu, kimana mwabukama tombe omu nsi ya Engipito, tombe kiangolo.”
22 Vana vau, Mose olambwidi o koko kwandi kuna zulu, mukele tombe muna nsi yawonso ya Engipito mu lumbu tatu.+
23 Ke muntu ko wamonanga o nkwandi ngatu katuka vana fulu kiandi mu lumbu tatu; kansi o ntemo ukedi kuna kwakala Aneyisaele.+
24 I bosi, Faro obokele Mose, ovovele vo: “Nuenda, nuasadila Yave.+ Nusisa kaka mameme meno ye ngombe zeno. Avo i wan’eno nuenda yau.”
25 Kansi, Mose ovutwidi vo: “Ongeye okutuvana* mpe e bulu ya yimenga yo tukau twangioka, tutambika yo kwa Yave wa Nzambi eto.+
26 E twelezi yeto mpe kwenda tukwenda yau. Ke tusisa kana bulu* kimosi ko, kadi tusadila e yaka bulu mu sambila Yave wa Nzambi eto, ke tuzeye ko mpe kina tuvana muna nsambil’eto kwa Yave yavana tulwaka kwakuna.”
27 Yave oyambwidi vo Faro kabadisa o ntim’andi, katambulwidi kubasindika ko.+
28 Faro umvovese vo: “Katuka ova ndose ame! Kuvavi diaka mona ndose ame ko, kadi muna lumbu omona e ndose ame, fwa ofwa.”
29 Muna diadi, Mose ovovele vo: “Ivanga una ovovele, kivava diaka mona ndose aku ko.”
Mvovo vana yand'a lukaya
^ Mvovo wa sina: “kekala se sokolo kwa yeto.”
^ Yovo “mapelele.”
^ Nanga Mose oyikwanga.
^ Yovo “okutuyambula twanata.”
^ Mvovo wa sina: “kole dia bulu.”
