Luvaiku 14:1-31
14 Yave ovovese Mose vo:
2 “Zayisa Aneyisaele bavutuka, basikidisa e ndo vana ntwal’a Pi-akirote, vana kati-kati kwa Mingedole yo mbu, mantalani ye Bale-sefone. Nusikidisa e ndo vana mbel’a mbu vana ntwal’a Bale-sefone.+
3 O Faro ovova mu kuma kia Aneyisaele vo: ‘Mu yungana bena muna nsi. Ke bena ye owu bavaikila ko muna makanga.’
4 Iyambula vo Faro kabadisa o ntim’andi,+ kabalanda, ikembesa e nkumbu ame muna fwasa Faro ye vu kiandi kiawonso;+ esi Engipito bezaya kikilu vo mono i Yave.”+ Aneyisaele bavangidi una bakanikinu.
5 Kuna kwalanda, o ntinu a Engipito owilu wo vo nkangu utinini. Vana vau, Faro ye selo yandi basobele ngindu mu kuma kia nkangu,+ bavovele vo: “Ekuma tuvangidi e diambu dia mpila yayi? Nkia kizowa kia mpila yayi tuvangidi, tuyambwidi Isaele benda yo lembi kutusadila diaka se abundu?”
6 Muna kuma kiaki, okubikidi makalu mandi ma vita yo bonga makesa mandi.+
7 Obongele 600 za makalu mambote ye makalu mankaka ma vita ma Engipito ye makesa muna konso kalu.
8 Yave oyambwidi vo Faro wa ntinu a Engipito kabadisa o ntim’andi, olende Aneyisaele, ekolo bavaikanga ye vuvu kiawonso.*+
9 Esi Engipito babalakamene,+ e mvalu miawonso mia makalu ma Faro, akwa mvalu ye vu kiandi, bafinamene Aneyisaele ekolo basikidising’e ndo au vana mbel’a mbu, vana ndambu a Pi-akirote, mantalani ye Bale-sefone.
10 Vava Faro kafinamene, Aneyisaele basengwele o meso, bamwene esi Engipito bekubalandanga. Aneyisaele bamwene wonga, bayantikidi kaza kwa Yave.+
11 Bavovese Mose vo: “Nga muna Engipito ke muna ziami ko, dianu utunatini kwaku twafwila mu makanga?+ Ekuma utuvangidi e diambu dia mpila yayi? Ekuma utuvaikisidi muna Engipito?
12 Nga ke diau ko twavovesa kuna Engipito vo: ‘Utuyambula kimana twasadila esi Engipito’? Kadi diambote twasadila esi Engipito ke mu fwila omu makanga ko.”+
13 I bosi, Mose ovovese nkangu vo: “Ke numoni wonga ko.+ Nutelama ngwi yo mona e mpuluz’a Yave, eyi kekunuvuluzila o unu.+ Kadi esi Engipito ana numonang’o unu, ke nukubamona diaka ko.+
14 Yave yandi kibeni okununuanina,+ oyeno nukal’e pi-i.”
15 Yave ovovese Mose vo: “Ekuma okazilanga kwa mono? Vovesa Aneyisaele balondoka.
16 Vo i ngeye, zangula o nkau aku yo lambula o koko kwaku vana ntandu a mbu, wavambula wo, kimana Aneyisaele baviokela vana kati kwa mbu vana ntoto ayuma.
17 Omono iyambula vo esi Engipito babadisa e ntima miau, kimana bakota muna mbu kuna nim’a Aneyisaele. Muna mpila yayi ikembesa e nkumbu ame muna fwasa Faro, vu kiandi kiawonso, makalu mandi ma vita ye akwa mvalu miandi.+
18 Esi Engipito bezaya kikilu vo mono i Yave, vava ikembesa e nkumbu ame muna fwasa Faro, makalu mandi ma vita ye akwa mvalu miandi.”+
19 E mbasi a Nzambi aludi+ ina ikedi kuna ntwal’a Aneyisaele ivavukidi, yele kuna nim’au, e lunzi dia tuti dikedi kuna ntwal’au, divilukidi, diele telama kuna nim’au.+
20 E lunzi ditelamene vana kati kwa esi Engipito ye Aneyisaele.+ Kuna sambu dimosi, e lunzi ditwese tombe, kuna sambu diankaka divene ntemo muna fuku.+ Muna mpila yayi, esi Engipito ke bakedi y’owu bafinamena Aneyisaele ko muna fuku wawonso.
21 Mose olambwidi koko kwandi vana ntandu a mbu;+ Yave ovutwidi mbu manima muna tembwa kiangolo kia este muna fuku wawonso. O maza mavambanene,+ e sina dia mbu dikitukidi se ntoto ayuma.+
22 Muna mpila yayi, Aneyisaele baviokele vana kati kwa mbu vana ntoto ayuma,+ ekolo maza makedi se yaka kuna koko kwau kwalunene ye kuna koko kwau kwalumonso.+
23 Esi Engipito balende Aneyisaele, e mvalu miawonso mia Faro, makalu mandi ma vita ye akwa mvalu miandi, bayantikidi kubalanda vana kati kwa mbu.+
24 Muna mene-mene,* Yave otadidi makesa ma Engipito tuka muna lunzi dia tiya ye tuti,+ okotese mvuanga vana vena makesa ma Engipito.
25 Okolele tungungu* twa makalu mau ma vita kimana badiatisila mo mu mpasi. Esi Engipito bavovele vo: “Yambula twatina Aneyisaele, kadi Yave mu nuanisa kena esi Engipito mu kuma kiau.”+
26 I bosi, Yave ovovese Mose vo: “Lambula koko kwaku vana ntandu a mbu kimana maza mavutukila esi Engipito, makalu mau ma vita ye akwa mvalu miau.”
27 Vana vau Mose olambwidi koko kwandi vana ntandu a mbu, vava o kuma kwayantika o kiá, maza ma mbu mavutukidi una mekalanga. Ekolo esi Engipito bavava tina maza ma mbu, Yave ubatubidi vana kati kwa mbu.+
28 Maza mavutukidi, mafukidi makalu ma vita ye akwa mvalu ye vu kiawonso kia Faro kina kialanda Aneyisaele muna mbu.+ Ke mosi ko muna yau wavuluka.+
29 Kansi Aneyisaele bakangalela vana ntoto ayuma vana sina dia mbu,+ e maza makedi se yaka kuna koko kwau kwalunene ye kuna koko kwau kwalumonso.+
30 Muna mpila yayi, Yave ovulwizi Isaele muna lumbu kiakina vana moko ma esi Engipito.+ Isaele imwene mavimbu ma esi Engipito vana kumu dia mbu.
31 Isaele imwene mpe o nkum’anene* kasadidi o Yave mu fwasa esi Engipito. O nkangu uyantikidi mona Yave o wonga yo kwikila muna Yave ye muna Mose wa selo kiandi.+
Mvovo vana yand'a lukaya
^ Mvovo wa sina: “yo koko kwazanguka.”
^ I sia vo, tezo kia ola ya 2 yamuna ola ya 6 ya mene.
^ Yovo “mapine.”
^ Mvovo wa sina: “koko kwanene.”
