Luvaiku 7:1-25
7 I bosi, Yave ovovese Mose vo: “Tala, ikitwidi nga Nzambi* kwa Faro, o Arone wa mpangi aku okala se ngunz’aku.+
2 Ongeye ovutukila kwa Arone mawonso ikukanikina, o Arone wa mpangi aku ovovana yo Faro. O Faro ovaikisa Aneyisaele muna nsi andi.
3 Vo i mono, iyambula vo Faro kabadisa o ntim’andi,+ iwokesa e sinsu ye masivi mame muna nsi ya Engipito.+
4 Wau vo Faro ke kunuwila ko, nlambula koko kwame muna Engipito yo vana tumbu kianene kwa esi Engipito mu vaikisa e vu yame,* o nkangu ame, Aneyisaele.+
5 Esi Engipito bezaya kieleka vo mono i Yave,+ vava ilambula koko kwame muna tumba Engipito yo katula Aneyisaele vana kati kwau.”
6 O Mose yo Arone bavangidi dina Yave kabakanikini; i una kikilu bavangidi.
7 O Mose 80 lwa mvu kakala, o Arone, mvu 83 kakala vava bamokena yo Faro.+
8 Yave ovovese Mose yo Arone vo:
9 “Avo Faro unuvovese vo: ‘Vanga e sivi,’ ongeye vovesa Arone vo: ‘Bonga o nkau aku, tuba wo vana ntoto vana ndose a Faro.’ O nkau ukituka se nioka yanene.”+
10 Mose yo Arone bakotele kwa Faro, bavangidi kikilu una bakanikinu kwa Yave. Arone otubidi o nkau andi vana ntoto vana ndose a Faro ye selo yandi, o nkau ukitukidi se nioka yanene.
11 Kansi, Faro obokele akwa ngangu, e ndoki ye nganga za nkisi za Engipito,+ bavangidi diau dimosi muna nkisi miau.*+
12 Konso muntu otubidi nkau andi vana ntoto, e nkau mikitukidi se nioka zanene; kansi o nkau a Arone uminini e nkau miau.
13 Kana una vo i wau, Faro obadisi o ntim’andi,+ kazolele kubawila ko, wauna o Yave kavova.
14 I bosi, Yave ovovese Mose vo: “O ntim’a Faro wabala.+ Kazolele sindika nkangu ko.
15 O mbazi muna mene, wenda kwa Faro. Tala, vava kevaika kenda kuna Nzadi a Nile, kala vana ndambu a maza wawanana yandi; nata o nkau una wakituka se nioka.+
16 Umvovesa vo: ‘Yave wa Nzambi a Ayibere untumini kwa ngeye.+ Owu kavovele: “Sindika o nkangu ame kimana benda kunsadila muna makanga,” kansi ongeye kulemvokele ko yamu wau.
17 I wau wuwu kavovele o Yave: “Muna diadi ozayila wo vo mono i Yave.+ Wanda iwanda maza ma Nzadi a Nile muna nkau una ova koko kwame, o maza mekituka se menga.
18 E mbizi za maza ma Nile zifwa, e Nzadi a Nile nsudi itá, esi Engipito ke belenda diaka nua maza ma Nile ko.”’”
19 I bosi, Yave ovovese Mose vo: “Zayisa Arone vo: ‘Bonga o nkau aku, lambula koko kwaku muna maza ma Engipito,+ muna nzadi, nsuku,* mayanga+ ye malundilu mandi mawonso ma maza, kimana makituka se menga.’ Mukala menga muna nsi yawonso ya Engipito, kana muna lekwa ya mabaya ye ya matadi ya lundila o maza.”
20 Vana vau, Mose yo Arone bavangidi una o Yave kabakanikini. Arone ozangwidi o nkau yo wanda maza ma Nzadi a Nile vana ntadisi a Faro ye selo yandi, maza mawonso muna nzadi makitukidi se menga.+
21 E mbizi za nzadi zifwidi,+ e Nzadi a Nile itele nsudi, esi Engipito ke balendele nkutu nua maza ma Nile ko.+ Mukedi menga muna nsi yawonso ya Engipito.
22 Kansi, e nganga za nkisi za Engipito bavangidi diau dimosi muna yimpa yau ya mpandu,+ muna kuma kiaki o Faro okwamanene badisa o ntim’andi, kabawididi ko, wauna o Yave kavova.+
23 I bosi, Faro ovutukidi kuna nzo andi, kasidi mambu mama mu ntima ko.
24 Muna diadi, esi Engipito awonso batimini mawulu muna ndambu a Nile mu vava maza ma nua, kadi ke balendele diaka nua maza ma Nile ko.
25 Lumbu nsambwadi ilungidi tuka Yave kawandila e Nzadi a Nile.
Mvovo vana yand'a lukaya
^ Mvovo wa sina: “ikitwidi se Nzambi.”
^ Yovo “ebidi diame.”
^ Yovo “yimpa yau ya mpandu.”
^ I sia vo, nsuku mia Nile.
