Luvaiku 17:1-16
17 O nkangu awonso wa Isaele ukatukidi tuka muna makanga ma Sini,+ uvangidi nkangalu wa tinitini mun’owu wa lutumu lwa Yave,+ usikidisi e ndo kuna Refidimi.+ Kansi, okwakuna ke kukedi maza ko kimana o nkangu wanua.
2 Muna diadi, o nkangu uyantikidi zonzesa Mose,+ uvovele vo: “Utuvana maza twanua.” Kansi, Mose ubavovese vo: “Ekuma nukunzonzeselanga? Ekuma nukwamanenanga tontela Yave?”+
3 Kansi okwakuna, o nkangu umwene vuina diayingi dia maza, ukwamanene yidimina Mose,+ oku vo: “Ekuma utuvaikisidi muna Engipito watuvondela muna vuina kumosi yo wan’eto ye twelezi yeto?”
4 Muna kuma kiaki, Mose obokele kwa Yave vo: “Adieyi ivanga kwa nkangu wau? Fioti fisidi bekuntuba matadi!”
5 I bosi, Yave ovovese Mose vo: “Wenda kuna ntwal’a nkangu, bonga ankaka muna akuluntu a Isaele, nata mpe nkau aku una wawandila e Nzadi a Nile.+ Nata wo vana koko, wenda.
6 Tala, itelama vana ntadisi aku kwakuna, vana tadi, kuna Korebe. Ofwete wanda e tadi, maza mevaika muna tadi, o nkangu unua maza momo.”+ Mose ovangidi wo vana meso ma akuluntu a Isaele.
7 Muna diadi, oyikidi e fulu kiokio vo Masa*+ ye Meriba,*+ mu kuma kia nzonzi mia Aneyisaele ye wau batontele Yave+ muna vova vo: “Nga o Yave wina ova kati kweto yovo kena ko?”
8 Aneyamaleke+ bezidi nuanisa Isaele kuna Refidimi.+
9 Muna diadi, Mose ovovese Yosua vo:+ “Sola ankaka muna wan’amakala, wenda nuana ye Aneyamaleke. O mbazi itelama vana mbat’a mongo yo nkau a Nzambi aludi vana koko kwame.”
10 I bosi, Yosua onuene ye Aneyamaleke wauna Mose kankanikini.+ O Mose, Arone yo Kure+ batombokele kuna mbat’a mongo.
11 Ekolo Mose kakedi yo moko mazanguka, Aneyisaele basundanga; kansi vava moko mandi makulukanga, Aneyamaleke basundanga.
12 Vava moko ma Mose mayoyele, babongele e tadi, batudidi dio kuna nsi andi, ovuende dio. I bosi, Arone yo Kure basikini moko ma Mose, o mosi ku ndambu eyi, wankaka ku ndambu ina; muna diadi, o moko ma Mose makedi mazanguka yavana kiadimuka e ntangwa.
13 Muna mpila yayi, Yosua osundidi Amaleke yo nkangu andi muna nsosolo.+
14 Yave ovovese Mose vo: “Soneka e diambu diadi mu nkanda, diakala se luyindulu, zayisa dio mpe kwa Yosua oku vo: ‘Ivunzuna emvimba o luyindulu lwa Amaleke oku nsi a zulu.’”+
15 I bosi, Mose otungidi e ziku, oyikidi dio vo Yave-nisi,*
16 ovovele vo: “Wau vo koko kwa Amaleke kutelamene kunda kia kimfumu kia YA,+ o Yave onuana yo Amaleke muna mbandu zandi zawonso.”+
Mvovo vana yand'a lukaya
^ Ina ye nsasa vo: “Ntonta.”
^ Ina ye nsasa vo: “Nzonzi.”
^ Ina ye nsasa vo: “Yave i Lunzi Diame dia Sinsu.”
