Luvaiku 5:1-23

  • Mose yo Arone vana ntadisi a Faro (1-5)

  • Lubangamu lusakidi (6-18)

  • Isaele ifungidi Mose yo Arone makasi (19-23)

5  Kuna kwalanda, Mose yo Arone bakotele yo vova kwa Faro vo: “I wau wuwu kavovele o Yave wa Nzambi a Isaele: ‘Sindika o nkangu ame kimana benda kumvangila nkinzi muna makanga.’”  Kansi, Faro ovovele vo: “Nani i Yave,+ yanlemvokela yo sindika Isaele?+ Kizeye Yave ko, vana ntandu, kisindika Isaele ko.”+  Kansi, Mose yo Arone bavovele vo: “O Nzambi a Ayibere wamokene yeto. Dodokolo, utuyambula twavanga nkangalu wa lumbu tatu muna makanga mu kelela Yave wa Nzambi eto kimenga;+ avo ke wau ko, okututumbila muna vuku yovo muna nsosolo.”  O ntinu a Engipito ubavutwidi vo: “E Mose yo Arone, ekuma nukatudila wantu muna salu yau? Nuvutuka muna salu yeno!”*+  Faro okudikidi vo: “Tala, o nkangu eno se wingi omu nsi yayi, kansi oyeno nuzolele vo bavunda muna salu yau yangolo!”  Muna lumbu kiakina, Faro okanikini e mbuta za salu ye akengi a Aneyisaele vo:  “Ke nuvani diaka titi yayuma yavangila bilikisi kwa nkangu ko.+ Nuyambula benda kutika e titi yayuma yau kibeni.  Kansi, nufwete kubakomekena balungisa lutangu lwau lumosi lwa bilikisi bavanganga. Ke nukulula lutangu ko, kadi bakitukidi se miolo. Ekiaki i kuma bekazilanga vo: ‘Utuyambula twenda, utuyambula twenda kelela Nzambi eto kimenga!’  Nubakudikila e salu yangolo, ke nubavundisa ko kimana balembi sia e sungididi muna mvovo mialuvunu.” 10  Muna kuma kiaki, e mbuta za salu+ ye akengi a Aneyisaele bavaikidi, bavovele kwa nkangu vo: “I wau wuwu kavovele o Faro: ‘Kikunuvana diaka titi yayuma ko. 11  Nuenda kuyibongela e titi yayuma konso kuna nusololwela yo, kansi e salu kieno ke kikululwa ko.’” 12  Muna diadi, o nkangu umwanganene muna nsi yawonso ya Engipito mu kutika minga vana fulu kia titi yayuma. 13  E mbuta za salu bakwamanene kubakomekena, oku vo: “Nufokola konso muntu e salu kiandi kia lumbu ke lumbu, wauna nuavangidinge vava nuavanuanga e titi yayuma.” 14  Vana ntandu, akengi a Aneyisaele ana batumbikwa kwa mbuta za salu za Faro mu fila o nkangu, bawendo.+ E mbuta za salu babayuvuidi vo: “Ekuma o zono yo unu ke nulungisidi lutangu lwa bilikisi ko luna nuvanganga?” 15  Muna diadi, akengi a Aneyisaele bakotele yo yidima kwa Faro vo: “Ekuma ovangilanga e ntaudi zaku e diambu dia mpila yayi? 16  E ntaudi zaku ke zivewanga diaka titi yayuma ko, kansi batuvovese vo: ‘Nuvanga e bilikisi!’ E ntaudi zaku mu wandwa zina, kansi o nkangu aku i akwa kuma.” 17  Kansi, Faro ovutwidi vo: “Oyeno se nu miolo, oyeno se nu miolo!+ Ikuma nuvovelanga vo: ‘Utuyambula twenda, utuyambula twenda kelela Yave kimenga.’+ 18  Owau nuenda, nuvutuka muna salu! Ke nuvewa titi yayuma ko, kansi nufwete lungisa lutangu lweno lwa bilikisi.” 19  Akengi a Aneyisaele bamwene vo mu mpasi bena wau bakanikinu vo: “Ke nufwete kulula lutangu lwa bilikisi ko nuvanganga konso lumbu.” 20  Vava bavaikidi vana ndose a Faro, bawananene yo Mose yo Arone, ana babavingilanga. 21  Vana vau bavovese Mose yo Arone vo: “Yambula Yave katala e vangu dieno yo kunufundisa, wau nutukitwidi se lekwa kia luvezo* kwa Faro ye kwa selo yandi, nusidi nsosolo vana moko mau kimana batuvonda.”+ 22  I bosi, Mose ovilukidi kwa Yave yo vova vo: “E Yave, ekuma otwasidi e mpasi kwa nkangu wau? Ekuma wantumina? 23  Tuka yakisunzulwidi kwa Faro kimana yavovela muna nkumbu aku,+ Faro owokese lubangamu lwa nkangu wau,+ ongeye kuvulwizi nkangu aku ko.”+

Mvovo vana yand'a lukaya

Yovo “mazitu meno.”
Yovo “nutukitwidi se nsudi.”