Luvaiku 34:1-35
34 I bosi, Yave ovovese Mose vo: “Vala babu yole ya matadi nze ina yantete,+ isoneka muna babu e mvovo mina miakala muna babu yantete,+ ina wawula.+
2 Uyikubika muna mene, kadi kuna Mongo a Sinai otomboka muna mene, otelama vana ndose ame vana mbat’a mongo.+
3 Kansi, kutomboki yo muntu ko, ke vafwete moneka muntu ko vana ndambu a mongo. Kana nkutu mameme yovo ngombe ke zifwete dila vana ndambu a mongo ko.”+
4 Muna diadi, Mose ovadidi babu yole ya matadi nze ina yantete, osikamene muna mene-mene yo tomboka kuna Mongo a Sinai, wauna Yave kankanikina, onete babu yole ya matadi vana moko.
5 I bosi, Yave okulumukini+ muna tuti, oningamene vana ndambu andi, o Yave unzayisi e nkumbu andi.+
6 Yave oviokele vana ndose andi, ovovele vo: “Yave, Yave, Nzambi a nkenda+ ye ngemba,*+ ke funganga makasi mu nzaki ko,+ ozele yo walakazi+ ye ludi,*+
7 osonganga walakazi kwa mafunda ma mbandu,+ ololokanga e mbi yo makuzuka ye sumu,+ kansi ke yambula tumba nkwa kuma ko,+ oyambula vo wana ye atekolo bamona e mpasi mu kuma kia masumu ma mase mau yamuna mbandu ina yantatu yamuna mbandu ina ya nyá.”+
8 Vana vau Mose ofukamene yo bokeka lose.
9 I bosi, ovovele vo: “E Yave, avo mbweneno e dienga vana meso maku, e Yave, dodokolo, wenda yeto kumosi vana kati kweto,+ kana una vo tu nkangu a ntu miangolo,*+ loloka o bi weto ye sumu dieto,+ ututambula se vua diaku.”
10 Ovutwidi vo: “Nkangidi yaku e kangu: Masivi mvanga vana ndose a nkangu aku awonso,+ mana ke mavangamene ko ova ntoto wawonso yovo muna zula yawonso, e nkangu miawonso muna ozingila bemona mavangu ma Yave, kadi e diambu mvanga kwa ngeye diansisi.+
11 “Sia sungididi mu mana ikukanikina o unu.+ Yinga iyinga Aneyamore, Anekenani, Anekete, Aneperese, Anekivi ye Aneyebuse oku ntwal’aku.+
12 Nukeba kimana nualembi kanga e kangu ye awana bezingilanga muna nsi ina nukwenda,+ kimana dialembi kala se sokolo ova kati kweno.+
13 Kansi, nubangula maziku mau, nukosomona malunzi mau mavauka, nubwisa mavindi mau mavauka.*+
14 Kufwete fukamena nzambi ankaka ko,+ kadi Yave ozayakene vo i Nzambi ona ovavanga vo wantu basambila kaka yandi.* Elo, oyandi i Nzambi ona ovavanga vo wantu basambila kaka yandi.+
15 Keba walembi kanga e kangu ye awana bezingilanga muna nsi, kadi vava betá e zumba ye nzambi zau muna kubasambila yo kela kimenga kwa nzambi zau,+ o mosi okubokela, ongeye odia e kimenga kiandi.+
16 I bosi, ongeye obonga kieleka wan’au amakento mu kuma kia wan’aku amakala,+ o wan’au amakento betá zumba ye nzambi zau yo fila wan’aku amakala batá zumba ye nzambi zau.+
17 “Kuvangi nzambi za sengwa ko zafulwa vana tiya.+
18 “Ofwete kembela o Nkinzi a Mbolo Zakondwa Mfuna.+ Odia mbolo zakondwa mfuna, wauna yakanikina; lumbu nsambwadi ovanga wo, muna ntangwa yasikidiswa, muna ngonde ya Abibi,*+ kadi mu ngonde ya Abibi wavaika muna Engipito.
19 “Konso mwan’antete ayakala* i wame,+ kumosi yo wan’antete awonso amakala a makambi maku, kiakala ngombe yovo meme.+
20 O mwan’antete a buluku ofwete kunkûdila muna meme. Kansi avo kunkûdidi ko, ofwete kuntolola e nsingu. Ofwete kûla konso mwan’antete ayakala a wan’aku.+ Ke vena muntu ko okwiza vana ndose ame yo moko mankatu.
21 “Lumbu sambanu osala, kansi muna lumbu kiansambwadi ofwete vunda.*+ Ofwete vunda kana nkutu mu nsungi a vata o ntoto yovo nsungi a nkutika.
22 “Ofwete sadila e mbongo antete a nkutik’a witi muna Nkinzi a Tumingu, ovanga Nkinzi a Nkutika* kuna mfoko a mvu.+
23 “Nkumbu tatu muna mvu, o wan’aku amakala awonso bekwiza vana ndose a Yave wa Mfumu aludi, wa Nzambi a Isaele.+
24 Kadi yinga iyinga e zula vana ndose aku,+ iwokesa e zunga kiaku, ke vekala muntu ko olokokela e nsi aku ekolo otomboka nkumbu ntatu konso mvu mu mona e ndose a Yave wa Nzambi aku.
25 “Kutambika menga ma bulu kia kimenga kiame ko kumosi ye konso lekwa kiasiwa mfuna.+ E bulu kia kimenga kia nkinzi a Nduta ke kifwete lundwa ko tuka fuku yamuna mene.+
26 “Ofwete twasa muna nzo a Yave wa Nzambi aku eyi isundidi o wete muna mbongo antete ya ntoto aku.+
“Kulambila mwan’a nkombo muna kimvumina kia ngudi andi ko.”+
27 Yave ovovese diaka Mose vo: “Soneka e mvovo miami,+ kadi nkangidi e kangu yo ngeye ye Isaele mun’owu wa mvovo miami.”+
28 Okedi kwakuna yo Yave mu lumbu 40, fuku yo mwini. Kadidi kima ko ngatu nua maza.+ Oyandi* osonekene mvovo mia kangu muna babu ya matadi, i sia vo, Nsiku Kumi.*+
29 I bosi, Mose okulumukini tuka kuna Mongo a Sinai ye babu yole ya Kimbangi vana moko mandi.+ Vava kakulumikini tuka kuna mongo, Mose kazaya wo ko vo lose lwandi kezima lwakezimanga wau kamokena yo Nzambi.
30 Vava Arone ye Aneyisaele awonso batadidi Mose, bamwene vo lose lwandi kezima lwakezimanga, bamwene wonga wa kumfinama.+
31 Kansi, o Mose ubabokele, Arone ye akuluntu awonso a nkangu bezidi kwa yandi, Mose omokene yau.
32 I bosi, Aneyisaele awonso bamfinamene, oyandi ubazayisi e nkanikinu miawonso mina Yave kamvana kuna Mongo a Sinai.+
33 Konso ntangwa Mose kafokolanga mokena yau, wasianga e fukwa vana lose lwandi.+
34 Kansi, konso ntangwa o Mose kayendanga vana ndose a Yave kamokena yandi, wakatulanga e fukwa yavana kevaika.+ I bosi, wavaikanga yo zayisa kwa Aneyisaele e nkanikinu mina katambulanga.+
35 Aneyisaele bamonanga vo lose lwa Mose kezima lwakezimanga; i bosi Mose wasianga diaka e fukwa vana lose lwandi yavana kakotanga mu mokena yo Nzambi.*+
Mvovo vana yand'a lukaya
^ Yovo “kwikizi.”
^ Yovo “walakazi.”
^ Mvovo wa sina: “nsingu zangolo.”
^ Tala Nsas’a Mvovo.
^ Yovo “Yave ozayakene vo ke tambulwilanga mbanda ko; e nkumbu a Yave i nsongo.”
^ Mvovo wa sina: “Konso kina kiziula e vumu.”
^ Yovo “lunda e lumbu kia vundu.”
^ Uyikilwanga mpe vo Nkinzi a Sudi (Saba).
^ Mvovo wa sina: “Mvovo Kumi.” Miyikilwanga mpe vo Decálogo.
^ Ovava Yave oyikwanga. Tala tini kia 1.
^ Mvovo wa sina: “mokena yandi.”
