Sakaria 8:1-23
8 Ondjovo yaJehova womatangakwaita oye uya vali kwaame tai ti:
2 “Eshi osho Jehova womatangakwaita ta ti, ‘Ohandi ka popila Sion nouladi, heeno, nouladi munene,+ nomolwehandu linene, ohandi ka katuka nouladi omolwaye.’”
3 “Eshi osho Jehova ta ti, ‘Ohandi ka alukila kuSion,+ nokukala muJerusalem,+ na Jerusalem ota ka ifanwa oshilando shoshili*+ nosho yo omhunda yaJehova womatangakwaita, omhunda iyapuki.’”+
4 “Eshi osho Jehova womatangakwaita ta ti, ‘Ovalumenhu novakainhu ovanamido otava ka kala vali omutumba momapandavanda aJerusalem, keshe umwe e kwete onhaili yaye meke laye omolweedula davo dihapu.*+
5 Nomomapandavanda oshilando otamu ka kala mu yadi oumati noukadona tava danaukile omo.’”+
6 “Eshi osho Jehova womatangakwaita ta ti, ‘Nonande otashi monika shidjuu neenghono kooluxupe vovanhu ava momafiku oo, mbela oshidjuu yo nokwaame?’ Jehova womatangakwaita osho ta ti.”
7 “Eshi osho Jehova womatangakwaita ta ti, ‘Ohandi xupifa ovanhu vange momadu okoushilo nosho yo okouninginino.*+
8 Nohandi ke va eta mo, notava ka kala muJerusalem;+ notava ka ninga ovanhu vange, nohandi ka ninga Kalunga kavo+ moshili* nomouyuki.’”
9 “Eshi osho Jehova womatangakwaita ta ti, ‘Omake eni naa kale e na eenghono,*+ nye ovo mu udite eendjovo tadi di mokanya kovaprofeti,+ eendjovo da faafana naado da popilwe mefiku, omo ekanghameno leumbo laJehova womatangakwaita la li la dikwa po, opo otembeli i tungwe.
10 Osheshi ofimbo efimbo olo inali fika, kapa li ondjabi ya li hai futwa omunhu, ile oshinamwenyo;+ nosha li sha nyika oshiponga okuuya mo nokudja mo omolwomutondi, osheshi onda ningifa ovanhu aveshe ve lipilukile po.’
11 “‘Ashike paife itandi ka ungaunga nooluxupe vovanhu ava ngaashi momafiku onale,’+ Jehova womatangakwaita osho ta ti.
12 ‘Osheshi ombuto yombili otai ka kunwa; omundjebele otau ka ima oiimati yao, nedu otali ka menifa oimeno yalo,+ neulu* otali ka yandja omume yalo; nohandi ka ningifa ooluxupe vovanhu ava va fyuulule oinima aishe oyo.+
13 Ndele ngaashi ashike mwa ninga oshinima shefingo mokati koiwana,+ nye eumbo laJuda nosho yo eumbo laIsrael, osho yo handi ke mu xupifa, notamu ka kala enangeko noupuna.+ Inamu kala mwa tila!+ Omake eni naa kale e na eenghono.’*+
14 “Eshi osho Jehova womatangakwaita ta ti, ‘“Ngaashi ashike nda li nda tokola oku mu etela ehanauno omolwooxokulululwa, ovo va handukifa nge,” Jehova womatangakwaita ta ti, “noinandi lialuluka,+
15 onghee pomhito ei, onda tokola okuningila ouwa Jerusalem nosho yo eumbo laJuda.+ Inamu kala mwa tila!”’+
16 “‘Oinima ei oyo mu na okuninga: Lombwelafaneni oshili,+ nomatokolo opoivelo yeni naa xumife komesho oshili nosho yo ombili.+
17 Inamu pangelelafana owii momitima deni,+ noinamu kala mu hole eano keshe loipupulu,+ osheshi oinima aishe ei oyo ndi tonde,’+ Jehova osho ta ti.”
18 Ondjovo yaJehova womatangakwaita oye uya vali kwaame tai ti:
19 “Eshi osho Jehova womatangakwaita ta ti, ‘Okulidilika kwomomwedi omutine,+ okulidilika kwomomwedi omutitano,+ okulidilika kwomomwedi omutiheyali+ nosho yo okulidilika kwomomwedi omutimulongo+ otaku ka kala eemhito denyaku nosho yo dehafo keumbo laJuda, oivilo yehafo.+ Onghee holeni oshili nosho yo ombili.’
20 “Eshi osho Jehova womatangakwaita ta ti, ‘Natango ovanhu nosho yo ovakalimo vomoilando ihapu otave ke uya;
21 novakalimo vomoshilando shimwe otava ka ya kwaavo ve li kushikwao, ndele tava ti: “Ileni, ituyeni tu ka indile efilonghenda* kuJehova nokukonga Jehova womatangakwaita twa mana mo. Naame ohandi i.”+
22 Novanhu vahapu nosho yo oiwana inaenghono otai ke uya okukonga Jehova womatangakwaita muJerusalem+ nokwiindila efilonghenda* laJehova.’
23 “Eshi osho Jehova womatangakwaita ta ti, ‘Momafiku oo, ovalumenhu omulongo va dja momalaka aeshe omoiwana+ otava ka kwata, heeno, otava ka kwata va diinina oshikutu* shOmujuda* tava ti: “Otwa hala okuya pamwe nanye,+ osheshi otwa uda kutya Kalunga oku li pamwe nanye.”’”+
Omashangelo opedu
^ Ile “shoudiinini.”
^ Eln., “omolwouhapu womafiku avo.”
^ Ile “okudja kedu oko haku piti etango nosho yo kedu oko haku ningine etango.”
^ Ile “moudiinini.”
^ Ile “Kaleni mu na ouladi.”
^ Ile “nomaulu.”
^ Ile “Kaleni mu na ouladi.”
^ Ile “pule ekwafo.”
^ Ile “nokupula ekwafo.”
^ Ile “va kanyatela oshikutu.”
^ Eln., “shomulumenhu Omujuda.”
