Sakaria 7:1-14
7 Nomomudo omutine wohamba Darius, ondjovo yaJehova oye uya kuSakaria+ mefiku etine lomwedi omutimuwoi, sha hala okutya, omwedi Kislev.*
2 Ovanhu vomuBetel ova tuma Shareser naRegem-melek nosho yo ovalumenhu vaye va ka indile efilonghenda* kuJehova,
3 tava ti kovapristeri vomeumbo* laJehova womatangakwaita nosho yo kovaprofeti: “Mbela ondi na okulila momwedi omutitano+ nokulidilika oikulya, ngaashi nda li nde shi ninga omido dihapu?”
4 Ondjovo yaJehova womatangakwaita oye uya vali kwaame tai ti:
5 “Lombwela ovanhu aveshe vomedu nosho yo ovapristeri to ti: ‘Mbela omwa li shili mwe lidilika omolwange, eshi mwa li mwe lidilika nokulila momwedi omutitano nosho yo momwedi omutiheyali+ oule weedula 70?+
6 Naashi mwa li mwa lya nokunwa, mbela kamwa li tamu li omolweni vene nokunwa omolweni vene?
7 Mbela kamu na okudulika keendjovo daJehova, odo a popya okupitila movaprofeti vonale,+ ofimbo Jerusalem noilando, oyo ye mu dingilila, ya li hai kalwa, noi na ombili, nofimbo Negeb nosho yo Shefela ya li hai kalwa?’”
8 Ondjovo yaJehova oye uya vali kuSakaria tai ti:
9 “Eshi osho Jehova womatangakwaita ta ti, ‘Tokoleni pauyuki shili,+ nokuungaungafana nohole i na oudiinini+ nosho yo nonghenda.
10 Inamu kengelela omufiyekadi, ile okaana kehe na xe,*+ omunailongo,+ ile ohepele;+ noinamu pangelelafana eemhangela dii momitima deni.’+
11 Ashike ova kala tava anye okuyandja elitulemo,+ nokutangalala va pilamena ko+ nova fitika omatwi avo vaha ude ko.+
12 Ova kukutika omitima davo, di kale ngaashi okawe,*+ nokava li tava dulika komhango* nosho yo keendjovo, odo Jehova womatangakwaita a tuma nomhepo yaye okupitila movaprofeti vonale.+ Onghee oko okwe uya ehandu linene la dja kuJehova womatangakwaita.”+
13 “‘Ngaashi ashike vali inava pwilikina, eshi nde* va ifana,+ naame itandi ka pwilikina, eshi tava ka ifana nge,’+ Jehova womatangakwaita osho ta ti.
14 ‘Nonda li nde va halakanifa noshikungulu shomhepo mokati koiwana aishe oyo inava shiiva,+ nedu ola li la fiwa eputu konima yavo, pehe na nande oumwe ta ende mo, ile ta alukile mo;+ osheshi ova lundululila edu, olo la li la halika, moshinima shitilifa.’”
