Sakaria 5:1-11
5 Onda tala vali pombada, nonda mona omushangwatonywa tau tuka.
2 Okwa pula nge a ti: “Ou wete shike?”
Onda nyamukula: “Ondi wete omushangwatonywa tau tuka, oo u na oule womukokomoko womaludimbo* 20 nosho yo ounene womaludimbo 10.”
3 Opo nee okwa tya kwaame: “Eli efingo olo tali i kombada yedu alishe, molwaashi keshe oo ha vake,+ ngaashi sha shangwa kombinga imwe yao, ka li a handukilwa; nakeshe oo a ninga eano,+ ngaashi sha shangwa kombinga ikwao yao, ka li a handukilwa.
4 ‘Onde li tuma,’ Jehova womatangakwaita osho ta ti, ‘notali ka ya meumbo lombudi nosho yo meumbo laao ta ningi eano loipupulu medina lange; notali ka kala meni leumbo olo, noku li lungwinifa po nosho yo oiti yalo nomamanya alo.’”
5 Opo nee omweengeli, oo a li ta popi naame, okwe uya vali kwaame, ndele ta ti kwaame: “Alikana, tala pombada, nokutala osho tashi di mo.”
6 Onghee onda pula: “Oshike osho?”
Okwa nyamukula: “Eshi oshikwatelwa shoefa* osho tashi di mo.” Okwa twikila ko ta ti: “Eli eholokepo lasho kombada yedu alishe.”
7 Nonda mona kutya oshituviko shongonga shoholo osha tuulwa ko, nomwa li omukainhu e li omutumba meni loshikwatelwa.
8 Onghee okwa ti: “Ou Oukolokoshi.” Opo nee okwe mu ekela vali moshikwatelwa shoefa, nokonima yaasho, okwa tuvika ko diva komulungu washo noshituviko shoholo shidjuu.
9 Opo nee onda tala pombada, nonda mona ovakainhu vavali tave uya, nova li tava telaana momhepo. Ova li ve na omavava a fa omavava exuwashi. Nova tumba po oshikwatelwa nokuya nasho pokati kedu neulu.
10 Onghee hano onda pula omweengeli, oo a li ta popi naame, nda ti: “Otava twala peni oshikwatelwa shoefa?”
11 Okwa nyamukula a ti: “Okedu laSinar*+ ve ke mu tungile eumbo; nongeenge ola longekidwa, ota ka ekelwa oko, monhele yaye ye mu wapalela.”
Omashangelo opedu
^ Oludimbo limwe oli fike peesendimeta 44,5. Tala Oshiw. B14.
^ Eln., “oefa” apa otai ulike koshikwatelwa, ile koshimbaba osho hashi longifwa okuyeleka oefa. Oefa imwe oi fike peelita 22. Tala Oshiw. B14.
^ Sha hala okutya, Babilonia.
