Sakaria 1:1-21
1 Momwedi omutihetatu, momudo omutivali waDarius,+ ondjovo yaJehova oye uya komuprofeti Sakaria,*+ omonamati waBerekia, omonamati waIddo, tai ti:
2 “Jehova okwa handukila neenghono ooxo.+
3 “Tya kuvo, ‘Eshi osho Jehova womatangakwaita ta ti: “‘Alukileni kwaame,’ Jehova womatangakwaita osho ta ti, ‘nohandi ka alukila kunye,’+ Jehova womatangakwaita osho ta ti.”’
4 “‘Inamu kala ngaashi ooxo, ovo va popiwa kovaprofeti vonale va ti: “Eshi osho Jehova womatangakwaita ta ti, ‘Alikana, efeni po* eendjila deni dii nosho yo oilonga yeni ii.’”’+
“‘Ashike inava pwilikina, noinava yandja elitulemo kwaame,’+ Jehova osho ta ti.
5 “‘Ooxo ove li peni paife? Novaprofeti mbela ova kala nomwenyo fiyo alushe?
6 Ashike eendjovo dange nosho yo omalombwelo ange, oo nda pa ovapiya vange, ovaprofeti, okwa hanga ooxo, hasho mbela?’+ Onghee ova alukila kwaame, ndele tava ti: ‘Jehova womatangakwaita okwa ungaunga nafye she likolelela keendjila detu nosho yo koilonga yetu, ngaashi ashike a li a tokola okuninga.’”+
7 Mefiku eti-24 lomwedi omuti-11, sha hala okutya omwedi Sebat,* modula onhivali yaDarius,+ ondjovo yaJehova oye uya komuprofeti Sakaria, omonamati waBerekia, omonamati waIddo, tai ti:
8 “Onda mona emoniko oufiku. Opa li omulumenhu a londa konghambe itilyana, nokwa li ofika mokati komiti domirti mefilu; nokonima yaye okwa li ku na eenghambe ditilyana, ditilyana ediya nosho yo ditoka.”
9 Onghee onda tya: “Omwene wange, oolyelye ava?”
Omweengeli, oo a li ta popi naame, okwa nyamukula a ti: “Ohandi ke ku ulikila kutya ava ovo oolyelye.”
10 Opo nee omulumenhu, oo a li ofika mokati komiti domirti, okwa ti: “Ava ovovo Jehova a tuma va ka endaende kedu.”
11 Nova tya komweengeli waJehova, oo a li ofika mokati komiti domirti: “Otwa endaenda medu olo, ndele tala! edu alishe ola mwena, noinali piyaanekwa.”+
12 Onghee omweengeli waJehova okwa tya: “Akutu! Jehova womatangakwaita, fiyo onaini ito file onghenda Jerusalem nosho yo oilando yaJuda,+ oyo wa kala wa handukila omido edi 70?”+
13 Jehova okwa nyamukula omweengeli, oo a li ta popi naame, neendjovo donghenda nosho yo dehekeleko.
14 Opo nee omweengeli, oo a li ta popi naame, okwa lombwela nge a ti: “Shiivifa kutya, ‘Eshi osho Jehova womatangakwaita ta ti: “Ohandi popile nouladi Jerusalem nosho yo Sion, heeno, nouladi munene.+
15 Onda handukila unene oiwana, oyo tai diladila kutya oya amenwa,+ molwaashi oshiwana shange onda li ashike nde shi handukila kanini,+ ashike oiwana oyo oya weda ko koudjuu.”’+
16 “Onghee hano eshi osho Jehova ta ti: ‘“Ohandi ka alukila kuJerusalem nonghenda,+ neumbo lange mwene otali ka tungilwa muye,”+ Jehova womatangakwaita osho ta ti, “Nongodi yokuyelekifa otai ka tamununwa mo muJerusalem.”’+
17 “Natango shiivifa, ndele to ti, ‘Eshi osho Jehova womatangakwaita ta ti: “Oilando yange otai ka yada ndoondoo ouwa; na Jehova ota ka hekeleka vali Sion,+ nokuhoolola vali Jerusalem.”’”+
18 Opo nee onda tala pombada, nonda mona omaluvinga ane.+
19 Onghee onda pula omweengeli, oo a li ta popi naame, nda ti: “Ei oikwashike?” Okwa nyamukula a ti: “Aa oo omaluvinga, oo a halakanifa Juda,+ Israel+ naJerusalem.”+
20 Opo nee Jehova okwa ulikila nge ovahambwidi vane.
21 Onda pula nda ti: “Otave uya okuninga shike?”
Okwa ti: “Ava ovo omaluvinga oo a halakanifa Juda fiyo oposhitwa opo pehe na nande oumwe ta dulu okuyelula omutwe waye. Makwao aa otae uya oku va tilifa, okweekelashi omaluvinga oiwana, oo a yambula po omaluvinga avo e li omhinge nedu laJuda, opo e mu halakanife.”
