“Pɩtaakɛ ɛyaa ɖeke Aseɣɖe Tɩnaa mba palakaɣ camɩyɛ lakasɩ, ɛlɛ palakaɣ camɩyɛ lakasɩ ma-hasɩ ɖɔɖɔ. Kɩyakʋ nakʋyʋ, mɛyɛlaɣnɩ ma-hasɩ lɛ, Elaine sɩŋ présentoir cɔlɔ, nɛ ɛha ma-hasɩ nzɩ sɩ-naalɛ bisikuwitiwaa. Pʋwayɩ, alɩwaatʋ ndʋ payɩ ɖɩñɔtʋʋnɩ présentoir yɔ, ma-hasɩ sɔɔlɩ ñɔtɩnʋʋ Aseɣɖe Tɩnaa mba se paha-sɩ bisikuwitiwaa.

“Pɩlabɩ mbʋ fenasɩ sakɩyɛ. Ma-hasɩ kaatɔkɩ sɩ-tɛ bisikuwitiwaa lɛ, ma nɛ Aseɣɖe Tɩnaa mba ɖɩkpakɩɣ alɩwaatʋ pazɩ nɛ ɖɩlakɩ kɛdaɣ. Ɛlɛ mantaasɔɔlɩ se mankɩlɩ-wɛ ɖʋʋnɩ taabalɩyɛ. Man-pɩnzɩ kaacɛzɩ 70 yɔɔ, nɛ man-taa taatɛmnɩ tɔm ndʋ tɩ-yɔɔ Aseɣɖe Tɩnaa tisiɣ yɔ. Krɩstʋ ñɩma coocinaa sakɩyɛ kaayeba nɛ pitibi-m yɔɔɔ, pʋyɔɔ lɛ, mamaɣzaɣ se pɩkɩlɩɣ ɖeu se mɛnkpɛlɩkɩ Bibl man-tɩ yɔɔ.

“Alɩwaatʋ ndʋ tɩ-taa, manaɣaɣ Aseɣɖe Tɩnaa lalaa Oreegɔɔ tɛtʋ hɔɔlɩŋ lɛɛŋ ndɩ ndɩ taa, pasɩŋaɣ présentoir waa cɔlɔ. Paba ɖɔɖɔ paawɛnɩ wɛtʋ kɩbandʋ paa ɛzɩmtaa. Palakaɣnɩ tʋmɩyɛ Bibl nɛ pocosuu tɔm ndʋ mɔnpɔzaɣ yɔ tɩ-yɔɔ, nɛ piiyeba nɛ manpaɣzɩ-wɛ taʋ liu nɛ pɩkɩlɩɣ.

“Kɩyakʋ nakʋyʋ, Elaine pɔzɩ-m se: ‘Ŋtisiɣ se kpɩna kɛ kʋjɔʋ ŋgʋ kɩlɩnɩ Ɛsɔ cɔlɔ yɔ?’ Moncosi-i se: ‘Ɛɛɛ, mentisiɣ tɔm ndʋ tɩ-yɔɔ kiya!’ Pʋwayɩ lɛ, Elaine kalɩ-m Izaayii 11:6-9. Kpaɣnɩ puwiye lɛ, maasɔɔlaa se mɛnkpɛlɩkɩ Bibl taa tɔm nɛ pɩkɩlɩ, ɛlɛ mantaasɔɔlɩ se mamʋ takayaɣ nakɛyɛ Aseɣɖe Tɩnaa cɔlɔ nɛ mankalɩ.

“Kɩyakɩŋ weyi ɩtɩŋ pʋwayɩ yɔ ɩ-taa, ma nɛ Elaine nɛ ɛ-walʋ Brent ɖɩkpaɣ alɩwaatʋ pazɩ nɛ ɖɩla kɛdɛsɩ kɩbanzɩ. Patasɩ-m lɔŋ se mankalɩ kpaɣnɩ Maatiyee puwolo Tama Labʋ nɛ mantɩlɩ mbʋ pɩpɔzʋʋ se ɛyʋ ɛla nɛ ɛkɛ toovenim Krɩstʋ tʋ yɔ. Mbʋ malaba. Alɩwaatʋ pazɩ wayɩ lɛ, mentisi se ma nɛ Brent nɛ Elaine ɖɩkpɛlɩkɩ Bibl. Pɩnaɣ 2016 kaatayɩ kɩmaŋ.

“Manɖaŋaɣ alɩwaatʋ ndʋ tɩ-yɔɔ ɖɩkpɛlɩkaɣ Bibl kpɩtaʋ taa yɔ kpam, nɛ manɖaŋaɣ ɖɔɖɔ kediɣzisi nzɩ ɖɩlakaɣ Kewiyaɣ Kpaaŋ taa yɔ kpam. Mamaɣzaa se pɩkɛnɩ-m wazaɣ nɛ man-taa kaawɛ leleŋ se mɛwɛɛ nɛ mɛnkpɛlɩkɩɣ tɔm ndʋ Bibl yɔɔdʋʋ toovenim taa yɔ. Pɩlabɩ pɩnaɣ kʋɖʋmaɣ nɛ pɩcɛzɩ pɩ-yɔɔ pazɩ lɛ, maha man-tɩ nɛ pamɩyɩsɩ-m lɩm nɛ manpɩsɩ Yehowa Aseɣɖe Tʋ. Lɛɛlɛɛyɔ mɛwɛnɩ pɩnzɩ 79, nɛ manawa se mɛwɛ nʋmɔʋ kɩbaŋʋ taa. Yehowa wazɩ-m mbʋ pʋyɔɔ yɔ, ɛha-m waɖɛ se mɛwɛɛ ɛ-sɛyaa hɔʋ taa.”