Ɛzɩmtaa tɔm susuu tʋmɩyɛ kaɣ sɩʋ tɩnaɣ?

Yesu yɔɔdaa se: «Pakaɣ susuu Kewiyaɣ tɔm kɩbandʋ tʋnɛ tɛtʋ kpeekpe yɔɔ se pɩkɛnɩ ajɛɛ kpeekpe aseɣɖe, nɛ ɖɩnɛ ɛlɛ ɛjaɖɛ tɛm kaɣ kɔm.» (Mat. 24:14) Grɛɛkɩ tɔm piye nɖɩ pɛɖɛzaa se «ɛjaɖɛ tɛm» mayaɣ kanɛ, mayaɣ 6 nɛ mayaɣ 13 taa yɔ ŋga lɛ teʹlos. Alɩwaatʋ ndʋ Sataŋ ɛjaɖɛ tɛŋ kpaagbaa tɛm yaa paɖɩzɩɣ-ɖɩ Armaagedɔɔ you taa yɔ, tɩ-tɔm tɔm piye nɖɩ ɖɩyɔɔdʋʋ. (Natʋ 16:​14, 16) Pʋyɔɔ lɛ, ɖɩkaɣ wobu pɩ-yɔɔ nɛ ɖisusuu tɔm kɩbandʋ pɩkɔɔ pɩsɩɩnɩ alɩwaatʋ ndʋ pɩkazɩɣ pazɩ se Armaagedɔɔ you ɛpaɣzɩ yɔ. Tɔm tʋnɛ tɩlɛɣzɩɣ ɛzɩma ɖɩnɩɣaɣ tɔm ndʋ tɩ-taa yɔ.

Ðooo lɛ, ɖɩɩnɩ pɩ-taa se ɖɩkaɣ yebu tɔm kɩbandʋ susuu alɩwaatʋ ndʋ paɖɩzɩɣ Babilɔɔnɩ Sɔsɔʋ nɛ kʋñɔŋ sɔsɔʋ paɣzɩ yɔ. (Natʋ 17:​3, 5, 15, 16) Ðɩmaɣzaɣ se alɩwaatʋ ndʋ kʋñɔŋ sɔsɔʋ paɣzɩɣ yɔ, Yehowa ɛɛtasɩɣ haʋ ɛyaa waɖɛ se pamʋ tɔm kɩbandʋ. (Iza. 61:2) Ðɩmaɣzaɣ ɖɔɖɔ se mba pakaɣ hiɣu ñʋʋ yabʋ kʋñɔŋ sɔsɔʋ taa yɔ, pɩwɛɛ se pawɩlɩ se paañɔnɩ Yehowa pʋcɔ nɛ kʋñɔŋ sɔsɔʋ paɣzɩ. Ðɩkpakaɣ-wɛ nɛ ɖɩmaɣzɩɣnɩ Yuuda ñɩma mba paahiɣ ñʋʋ yabʋ alɩwaatʋ ndʋ pɔyɔkɩ Yeruzalɛm pɩnaɣ 607 P.P.Y. yɔ. Ɛyaa mba, paatɛm labʋ yʋsaɣ pe-kila taa se mba kaɣnɩ hiɣu ñʋʋ yabʋ mbʋ pʋyɔɔ yɔ paasɛ Yehowa nɛ papaɖɩ kɩdɛkɛdɩm. (Ezek. 5:11; 9:4) Ɛlɛ kpaɣʋ nɛ kɛdɩnʋʋ mbʋ, pɩtɩla nɔɔ kʋɖʋmaɣ nɛ tɔm ndʋ Yesu yɔɔdɩ Maatiyee 24:14 taa yɔ. Yesu tɔm wɩlɩɣ se ɛyaa pɩzɩɣ nɛ pehiɣ waɖɛ nɛ pamʋ tɔm kɩbandʋ pɩkɔɔ pɩsɩɩnɩ alɩwaatʋ ndʋ pɩkazɩɣ pazɩ se ɛjaɖɛ ɛtɛ kpaagbaa tɛm Armaagedɔɔ you taa yɔ.

Ɛzɩma ɖɩnɩ Maatiyee 24:14 taa nɛ pɩkɩlɩ yɔ, piyeba ɖɔɖɔ nɛ ɖɩla lɛɣzɩtʋ ɛzɩma ɖɩnɩɣaɣ tɔm ndʋ tɩwɛ Natʋ 16:21 taa yɔ tɩ-yɔɔ. Mayaɣ ŋga kɔyɔɔdʋʋ ɖɔmbɛɛ sɔsɔna tɔm. Ðɩtazɩ tɔm taa nɛ pɩkɩlɩ lɛ, ɖiɖiɣzina se nɔɔ kʋɖʋmaɣ nakɛyɛ wɛ masɩ nzɩ sɩ-naalɛ sɩ-hɛkʋ taa. Ɛzɩma tɩyɛ? Mbʋ pɩsɩɣnɩ-ɖʋ se ɖicosi tɔm ndʋ tɩ-yɔɔ yɔ lɛ ɛzɩma ɛyaa lakɩ alɩwaatʋ ndʋ posusuu-wɛ Kewiyaɣ tɔm yɔ. Apostoloo Pɔɔlɩ yɔɔdaa se «ɛyaa mba peɖiɣni hiɣu ñʋʋ yabʋ» yɔ pɛ-ɛsɩndaa lɛ, Kewiyaɣ tɔm kɛ tɔm kɩbandʋ, pʋ-tɔbʋʋ se «wezuu sɔzɩŋ.» Ɛlɛ, Ɛsɔ koyindinaa ɛsɩndaa lɛ tɩkɛ tɔm kɩdɛkɛdɩtʋ, pʋ-tɔbʋʋ se «sɩm sɔŋ.» (2 Kɔr. 2:​15, 16) Papaɖɩɣ Kewiyaɣ tɔm mbʋ pʋyɔɔ yɔ tɩwɩlɩɣ se ɛjaɖɛ nɖɩ pɔsɔɔlaa yɔ ɖɩkɛ kɩdɛkɛdɩyɛ, Sataŋ ɖiyiɣni-ɖɩ, nɛ pɩkazɩ pazɩ lɛ pakaɣ-ɖɩ ɖɩzʋʋ.—Yoh. 7:7; 1 Yoh. 2:17; 5:19.

Yʋsɩ ɖɔɖɔ se ɖɔmbɛɛ wena a-tɔm pɔyɔɔdɩ Natʋ 16:21 taa yɔ ‘apaɣlaa pɩfɛyɩ yɔɔdʋʋ.’ Tɔm ndʋ tɩpɩzɩɣ nɛ tɩwɩlɩ se tɔm ndʋ ɖɩkaɣ susuu kʋñɔŋ sɔsɔʋ alɩwaatʋ taa yɔ tɩɩkaɣ kɛdɩnʋʋ ɛyaa, nɛ tɩkaɣ yebu nɛ patɩlɩ Yehowa hɩɖɛ kpem nɛ pɩkɩlɩ. (Ezek. 39:7) Alɩwaatʋ ndʋ tɩ-taa, paɖɩzɩɣ Babilɔɔnɩ Sɔsɔʋ nɛ pɩtɛ lɛ, ɛzɩ ɛyaa nabɛyɛ kaɣ sɔɔlʋʋ tɔm ndʋ ɖisusuu yɔ ɛzɩ pɔsɔɔlʋʋ sɔzɩŋ kɩbaŋ nɩɩyɩ yɔ? Pɩpɩzɩɣ nɛ pɩla mbʋ. Pɩtɩla pakaɣ nɩʋ yaa pakaɣ tɔzʋʋ se Yehowa Aseɣɖe Tɩnaa wɛʋ nɛ posusuu se pakaɣ ɖɩzʋʋ cɛtɩm Ɛsɔ sɛtʋ agbaa yɔ pɩlakɩ pɩnzɩ sakɩyɛ yɔ.

Tɔm ndʋ tɩnɩɣzɩnɩ mbʋ pɩɩlabɩ caanaʋ taa Ejipiti ɛjaɖɛ taa asɛyɩŋ 10 wayɩ yɔ. Yehowa «[hʋnɩ] Ejipiti ɛsɔnaa tɩŋa tɔm» nɛ pɩtɛ lɛ, «ɛyaa ndɩ ndɩ» mba pataakɛ Izrayɛɛlɩ mba yɔ pɛkpɛndɩ ɛ-samaɣ yɔɔ. (Ejl. 12:​12, 37, 38) Pɩtɩla agɔma mba, papɩsɩnɩ Yehowa yɔɔ alɩwaatʋ ndʋ panawa se asɛyɩŋ 10 weyi ɩ-tɔm Moyizi kaayɔɔdaa yɔ ɩlaba yɔ.

Paɖɩzɩɣ Babilɔɔnɩ Sɔsɔʋ nɛ pɩtɛ lɛ, mba payɩ papɩsɩɣnɩ Yehowa yɔɔ yɔ pakaɣ hiɣu waɖɛ nɛ paɖʋ nesi Krɩstʋ koobiya mba pakaɣ wɛʋ tɛtʋ yɔɔ alɩwaatʋ ndʋ tɩ-taa yɔ. (Mat. 25:​34-36, 40) Ɛyaa kaɣ wɛnʋʋ waɖɛ se pakpaɣ-wɛ ɛzɩ heŋ yɔ; nɛ waɖɛ nɖɩ, ɖɩkaɣ sɩʋ tɩnaɣ alɩwaatʋ pazɩ pʋcɔ nɛ Armaagedɔɔ you paɣzɩ. Alɩwaatʋ ndʋ tɩ-taa patam numwaa kɛdɛzaɣ ñɩma kaɣ mʋʋ pa-kɩhɛyʋʋ nɛ pakpa ɛsɔdaa.

Ɛzɩma ɖɩnɩ tɔm ndʋ tɩ-taa kpayɩ kpayɩ nɛ pɩkɩlɩ yɔ, pɩsɩɣnɩ-ɖʋ se ɖɩnɩɩ Yehowa sɔɔlɩm sɔsɔm nɛ ɛ-pʋtɔdɩyɛ naʋ taa. Toovenim taa lɛ, «ɛtɩsɔɔlɩ se paɖɩzɩ nɔɔyʋ; ɛlɛ ɛsɔɔlaa se ɛyaa tɩŋa ikpiɖi pa-kɩwɛɛkɩm yɔɔ.»—2 Pɩy. 3:9.