Ejipiti Lɩʋ 12:1-51
12 Nɛ Yehowa heyi Moyizi nɛ Aarɔɔnɩ Ejipiti ɛjaɖɛ taa se:
2 «Fenaɣ kanɛ kakaɣ-mɩ kɛʋ fenasɩ ɖɩbazɩyɛ. Kakaɣ-mɩ kɛʋ pɩnaɣ taa kajalaɣ fenaɣ.+
3 Yɔɔdɩnɩ Izrayɛɛlɩ ɛgbɛyɛ kpeekpe nɛ ŋheyi-ɖɩ se: “Fenaɣ kanɛ ka-kɩyakʋ 10 ñɩŋgʋ wiye lɛ, pɩwɛɛ se pa-taa paa weyi lɛ, ɛkpaɣ heu+ ɛ-caa ɖɩɣa hɩɖɛ taa, paa ɖɩɣa ŋga lɛ, heu kʋɖʋm.
4 Ɛlɛ ye ɖɩɣa taa mba ɩtɩɖɔɔ nɛ paatɛŋ heu kʋɖʋm yɔ, pɩwɛɛ se pa nɛ mba pɛwɛ pɔ-cɔlɔ* kpam yɔ patayɩ ɖama heu kʋɖʋm pa-ɖɩɣa taa nɛ pɩmʋnɩ ɛyaa* ɖɔ ɖɔʋ mbʋ yɔ. Ɩɩlakɩ akɔnta lɛ, ɩtazɩ nɛ ɩna nandʋ ɛzɩma paa weyi lɛ, ɛkaɣ tɔɔʋ yɔ.
5 Pɩwɛɛ se heu ɛnʋ ɛtaawɛɛnɩ ɛjandʋ natʋyʋ,+ ɛkɛ abalɩñɩnʋ weyi ɛwɛnɩ pɩnaɣ kʋɖʋmaɣ yɔ. Ɩpɩzɩɣ ɩlɩzɩ heu yaa pʋnʋ.
6 Pɩwɛɛ se ɩcɔnɩ ɛ-yɔɔ nɛ pɩkɔɔ nɛ pɩtalɩ fenaɣ kanɛ ka-kɩyakʋ 14 ñɩŋgʋ wiye,+ nɛ wɩsɩ ɖʋʋ* lɛ+ pɩwɛɛ se paa Izrayɛɛlɩ samaɣ kpeekpe taa hɔʋ ŋgʋ lɛ, kɩkʋ kpɩnɛ nɖɩ.
7 Pɩwɛɛ se pocozi calɩm nɛ pamɩzɩ-pʋ ɖɩsɩ nzɩ sɩ-taa pɔtɔkɩ-ɖɩ yɔ,+ sɩ-nɔnɔsɩ tilima 2 yɔɔ nɛ sɩ-nɔnɔsɩ ñʋŋ yɔɔ.
8 «“Pɩwɛɛ se pɔtɔɔ nandʋ ndʋ ɖoo ana.+ Pɩwɛɛ se pawɩsɩ-tʋ miŋ yɔɔ nɛ pɔtɔɔ-tʋ nɛ kpɔnɔ ŋgʋ kɩ-taa patɩɖʋ lɔlɔm yɔ+ nɛ ñɩtʋ ñaŋ ñɩndʋ.+
9 Ɩtaatɔɔ nandʋ natʋyʋ nɛ tɩ-lɛŋ yaa ndʋ patɩzɩnɩ lɩm yɔ, ɛlɛ ɩwɩsɩ kpɩnɛ nɖɩ miŋ yɔɔ: ɖɩ-ñʋʋ nɛ ɖɩ-nɩŋgbanzɩ nɛ ɖɩ-taa wondu.
10 Pɩtɩpɔzɩ se ɩkazɩ nabʋyʋ nɛ tɛʋ kɔɔ nɛ kife, ɛlɛ mbʋ pɩkazaa nɛ tɛʋ fe yɔ pɩwɛɛ se ɩñaɣzɩ-pʋ miŋ.+
11 Nɛ ɛzʋnɔ pɩwɛɛ se ɩtɔɔ nandʋ ndʋ: Paa weyi lɛ, ɛta ɛ-tambaɖɛ,* naataŋgbala ɩwɛɛ ɛ-nɩŋgbanzɩ tɛɛ, ɛɖɔkɩ ɛ-ɖaʋ e-nesi taa; nɛ pɩwɛɛ se ɩtɔɔ-tʋ lɛɛ lɛɛ. Pɩkɛ Yehowa tɛ Paska.
12 Mbʋ pʋyɔɔ yɔ, mankaɣ tɩŋnʋʋ Ejipiti ɛjaɖɛ taa ɖoo anɛ nɛ mankʋ paa kajalaɣ pɩɣa ŋga Ejipiti ɛjaɖɛ taa, kpaɣnɩ ɛyaa nɛ piwolo kpɩna;+ nɛ mankaɣ hʋnʋʋ Ejipiti ɛsɔnaa tɩŋa tɔm.+ Ma lɛ Yehowa.
13 Calɩm kaɣ kɛʋ yʋsaɣ ɖɩsɩ nzɩ sɩ-taa ɩwɛɛ yɔ; nɛ mankaɣ naʋ calɩm nɛ mamaa mɩ-yɔɔ nɛ mɛnɖɛɛ, nɛ asɛyʋʋ ɛɛkaɣ mɩ-yɔɔ kɔm se kɩɖɩzɩ-mɩ alɩwaatʋ ndʋ mɔhɔŋ Ejipiti ɛjaɖɛ nɩŋgbaŋʋʋ yɔ.+
14 «“Pɩwɛɛ se ɩtɔzʋʋ kɩyakʋ kʋnɛ kɩ-yɔɔ, nɛ pɩwɛɛ se kɩkɛ kazandʋ ndʋ ɩtɔkɩ se ɩɖʋnɩ hɩɖɛ Yehowa mɩ-kpaɖɩŋ kpeekpe taa yɔ. Pɩwɛɛ se ɩtɔkɩ-tʋ; pɩkɛnɩ tamtam paɣtʋ.
15 Pɩwɛɛ se ɩtɔɔ kpɔnɔ ŋgʋ kɩ-taa patɩɖʋ lɔlɔm yɔ kɩyakɩŋ 7.+ Ɛɛɛ, kajalaɣ kɩyakʋ wiye lɛ, pɩwɛɛ se ɩlɩzɩ kpɔnɔ mʋtʋ ndʋ tɩñɩŋaa yɔ mɩ-ɖɩsɩ taa, mbʋ pʋyɔɔ yɔ kpaɣnɩ kajalaɣ kɩyakʋ nɛ piwolo kɩyakʋ 7 ñɩŋgʋ wiye lɛ, weyi ɛtɔkɩ mbʋ pɩ-taa paɖʋ lɔlɔm yɔ, ɛyʋ* ɛnʋ pɩwɛɛ se palɩzɩ-ɩ* Izrayɛɛlɩ mba hɛkʋ taa.
16 Ɩkaɣ labʋ kigbeɣluu kiɖeɖeu kajalaɣ kɩyakʋ wiye, nɛ kɩyakʋ 7 ñɩŋgʋ wiye lɛ ɩla kigbeɣluu kiɖeɖeu lɛɛkʋ. Pɩfɛyɩ se ɩla tʋmɩyɛ naɖɩyɛ kɩyakɩŋ ɛnɩ i-wiye.+ Tɔɔnaɣ ŋga pɩpɔzʋʋ paa ɛyʋ* weyi se ɛtɔɔ yɔ, ke-ɖeke ɩpɩzɩɣ nɛ ɩla.
17 «“Pɩwɛɛ se ɩtɔkɩ Kpɔnɔ ŋgʋ kɩ-taa patɩɖʋ lɔlɔm yɔ kɩ-kazandʋ,+ mbʋ pʋyɔɔ yɔ kɩyakʋ ŋgʋ ki-wiye ɖeyi ɖeyi mankaɣ lɩzʋʋ mɩ-samaɣ sɔsɔɔ* Ejipiti ɛjaɖɛ taa. Nɛ pɩwɛɛ se ɩtɔkɩ kazandʋ ndʋ mɩ-kpaɖɩŋ kpeekpe taa nɛ pɩkɛnɩ tamtam paɣtʋ.
18 Kajalaɣ fenaɣ taa, kɩyakʋ 14 ñɩŋgʋ wiye ɖanaɣ yɔɔ, pɩwɛɛ se ɩtɔɔ kpɔnɔ ŋgʋ kɩ-taa patɩɖʋ lɔlɔm yɔ nɛ pɩkɔɔ pɩtalɩ fenaɣ ŋga ka-kɩyakʋ 21 ñɩŋgʋ wiye ɖanaɣ yɔɔ.+
19 Kɩyakɩŋ 7, pɩtɩpɔzɩ se pana kpɔnɔ mʋtʋ ndʋ tɩñɩŋaa yɔ mɩ-ɖɩsɩ taa, mbʋ pʋyɔɔ yɔ weyi ɛtɔkɩ mbʋ pɩ-taa paɖʋ lɔlɔm yɔ, paa ɛkɛ ɛgɔm yaa Izrayɛɛlɩ tʋ yɔ,+ ɛyʋ* ɛnʋ, pɩwɛɛ se palɩzɩ-ɩ* Izrayɛɛlɩ ɛgbɛyɛ taa.+
20 Mbʋ payɩ pɩ-taa paɖʋ lɔlɔm yɔ, pɩtɩpɔzɩ se ɩtɔɔ-pʋ. Pɩwɛɛ se ɩtɔɔ kpɔnɔ ŋgʋ kɩ-taa patɩɖʋ lɔlɔm yɔ mɩ-ɖɩsɩ kpeekpe taa.”»
21 Kpaagbaa mbʋ lɛ, Moyizi yaa Izrayɛɛlɩ tɛtʋ taa sɔsaa+ nɛ eheyi-wɛ se: «Iwolo nɛ paa hɔʋ ŋgʋ lɛ kɩñɩnɩ kpɩnɛ,* nɛ ɩkʋ-ɖɩ nɛ ɖɩkɛ Paska kɩlaʋ.
22 Pʋwayɩ lɛ, pɩwɛɛ se ɩkpaɣ ñɩtʋ ndʋ payaɣ se izɔɔpʋ yɔ nɛ ɩhɔkɩ-tʋ cobi nɛ ilii calɩm mbʋ ɩpɩyɩ ñanaɣ taa yɔ pɩ-taa nɛ ilodi nɔnɔɔ ñʋʋ yɔɔ nɛ nɔnɔɔ tilima 2 yɔɔ; nɛ pɩtɩpɔzɩ se nɔɔyʋ ɛlɩɩ ɛ-ɖɩɣa taa pɩkɔɔ pɩtalɩ tanaŋ tɛɛ.
23 Nɛ alɩwaatʋ ndʋ Yehowa tɩŋɩɣnɩ Ejipiti taa se ɛkɔnɩ asɛyʋʋ Ejipiti mba yɔɔ nɛ ɛna calɩm nɔnɔɔ ñʋʋ yɔɔ nɛ nɔnɔɔ tilima 2 yɔɔ yɔ, pɩtʋʋ fɛyɩ se Yehowa kaɣ ɖɛʋ nɔnɔɔ ŋga kɔ-yɔɔ nɛ ɛɛkaɣ yebu nɛ asɛyʋʋ ŋgʋ kɩkɔŋnɩ sɩm* yɔ kɩsʋʋ mɩ-ɖɩsɩ taa.+
24 «Pɩwɛɛ se ɩlakɩ kazandʋ ndʋ nɛ pɩkɛnɩ tamtam paɣtʋ mɩ nɛ mɩ-pɩyalaa.+
25 Nɛ alɩwaatʋ ndʋ ɩsʋʋ tɛtʋ ndʋ Yehowa kaɣ-mɩ cɛlʋʋ ɛzɩ ɛɛyɔɔdʋʋ yɔ tɩ-taa yɔ, pɩwɛɛ se ɩwɛɛ nɛ ɩlakɩ sɔnzɩ nzɩ.+
26 Nɛ ye mɩ-pɩyalaa ɩpɔzɩ-mɩ se: “Sɔnzɩ sɩnɛ sɩ-tɔbʋʋ lɛ suwe?” yɔ,+
27 pɩwɛɛ se icosi se: “Pɩkɛnɩ Paska kɩlaʋ ŋgʋ palakɩ Yehowa, weyi ɛɛɖɛ Izrayɛɛlɩ mba ɖɩsɩ ñʋŋ yɔɔ Ejipiti, alɩwaatʋ ndʋ ɛkɔnɩ asɛyʋʋ Ejipiti mba yɔɔ, nɛ ɛfɛɛ ɖa-ɖɩsɩ yɔ.”»
Peeɖe samaɣ luŋaa nɛ kapa kɛ-ɛsa nɛ tɛtʋ.
28 Nɛ Izrayɛɛlɩ mba ɖɛɛ nɛ pala ɖeyi ɖeyi ɛzɩ Yehowa kaaɖʋʋ paɣtʋ Moyizi nɛ Aarɔɔnɩ yɔ.+ Palabɩ mbʋ ɖeyi ɖeyi.
29 Nɛ ɖoo hɛkʋ taa lɛ, Yehowa kʋ Ejipiti ɛjaɖɛ taa paa kajalaɣ pɩɣa ŋga,+ kpaɣnɩ Farawɔɔ weyi ɛcaɣ e-kewiyaɣ kpelaɣ yɔɔ yɔ ɛ-kajalaɣ pɩɣa nɛ piwolo pɩtalɩ yom weyi ɛwɛ salaka* taa yɔ ɛ-kajalaɣ pɩɣa, nɛ kpɩna kajalaɣ piya kpeekpe.+
30 Farawɔɔ fe ɖoo ana ɛ nɛ ɛ-lɩmɖʋyaa nɛ Ejipiti mba lalaa, nɛ Ejipiti mba wɛɛ nɛ pamakɩ kʋñɔwiye kubusi sɔsɔsɩ, mbʋ pʋyɔɔ yɔ pɩtɩkazɩ ɖɩɣa nakɛyɛ se ka-taa ɛyʋ tɩsɩ.+
31 Peeɖe peeɖe lɛ, ɛyaa Moyizi nɛ Aarɔɔnɩ+ ɖoo ana nɛ eheyi-wɛ se: «Ɩkʋyɩ, ɩlɩɩ man-samaɣ taa, mɩ nɛ Izrayɛɛlɩ mba lalaa. Iwolo nɛ ɩsɛɛ Yehowa ɛzɩ ɩyɔɔdʋʋ yɔ.+
32 Ɩkpɛndɩnɩ ɖɔɖɔ mi-heŋ nɛ mɩ-naŋ nɛ ɩɖɛɛ, ɛzɩ ɩyɔɔdʋʋ yɔ.+ Ɛlɛ pɩwɛɛ se ɩwazɩ-m ɖɔɖɔ.»
33 Nɛ Ejipiti mba paɣzɩ ñɩɣʋ samaɣ yɔɔ se kalɩɩ lɔŋ+ pɛ-ɛjaɖɛ taa nɛ kɛɖɛɛ nɛ pɔtɔŋ se: «Mbʋ pʋyɔɔ yɔ ɖɩsɩkɩ ɖe-kpeekpe.»+
34 Peeɖe samaɣ kpaɣ kpɔnɔ mʋtʋ ndʋ tɩ-taa patɩɖʋ lɔlɔm yɔ, pɛkpɛndɩnɩ wondu ndʋ tɩ-taa ponuutuu mʋlʋm yɔ* nɛ pɔhɔkɩ po-wondu kususutu taa nɛ pɔhɔɔlɩ pa-hazasɩ yɔɔ.
35 Izrayɛɛlɩ mba la ɛzɩ Moyizi kaaheyuu-wɛ yɔ nɛ pɔpɔzɩ Ejipiti mba liidiye wondu nɛ sika wondu nɛ pɩkpɛndɩnɩ wondu kususutu.+
36 Yehowa yele nɛ Ejipiti mba la samaɣ kɩbandʋ nɛ paha-kɛ mbʋ payɩ kɔpɔzaa yɔ, nɛ palazɩ Ejipiti mba ñɩm.+
37 Nɛ Izrayɛɛlɩ mba kʋyɩ Raamsɛɛsɩ+ se powolo Sukɔɔtɩ,+ paakpɛndɩ ɛzɩ abalaa 600 000 mbʋ yɔ, patɩkalɩnɩ piya.+
38 Nɛ ɛyaa ndɩ ndɩ kʋyɩ nɛ patɩŋ-wɛ, paakɛ samaɣ sɔsɔɔ;*+ paakpɛndɩnɩ ɖɔɖɔ heŋ nɛ naŋ, kpɩna kaaɖɔ pɩdɩɩfɛyɩ.
39 Nɛ pakpaɣ kpɔnɔ mʋtʋ ndʋ paakpɛndɩnɩ alɩwaatʋ ndʋ pakʋyaɣ Ejipiti yɔ nɛ papaɣzɩ labʋ kpɔnɔnaa mba pɛwɛ kulukulu nɛ patɩɖʋ pa-taa lɔlɔm yɔ. Patɩɖʋ pa-taa lɔlɔm, mbʋ pʋyɔɔ yɔ paaɖɔɔnɩ-wɛ Ejipiti lɛɛ lɛɛ nɛ patɩpɩzɩ nɛ pɔñɔɔzɩ pɔ-tɔɔnasɩ.+
40 Pɩnzɩ nzɩ Izrayɛɛlɩ mba, mba paawɛ Ejipiti yɔ,+ pacaɣ ɛgɔndʋ yɔ sɩkpɛndɩ 430.+
41 Pɩnzɩ 430 tɛma lɛ, kɩyakʋ ŋgʋ ki-wiye ɖeyi ɖeyi, Yehowa samaɣ sɔsɔɔ* kpeekpe lɩ Ejipiti ɛjaɖɛ taa.
42 Pɩkɛ ɖoo wena a-taa pakaɣ tɔɔʋ kazandʋ nɛ pɔtɔzɩnɩ ɛzɩma Yehowa lɩzɩ-wɛ Ejipiti ɛjaɖɛ taa yɔ pɩ-yɔɔ yɔ. Pɩkɛ ɖoo wena pɩwɛɛ se Izrayɛɛlɩ samaɣ kpeekpe ɛtɔkɩ kazandʋ Yehowa pa-kpaɖɩŋ kpeekpe taa yɔ.+
43 Pʋwayɩ lɛ, Yehowa heyi Moyizi nɛ Aarɔɔnɩ se: «Paska paɣtʋ yɔ: Ɛgɔm nɔɔyʋ ɛɛpɩzɩɣ nɛ ɛtɔɔ-kʋ.+
44 Ɛlɛ ye nɔɔyʋ ɛwɛnɩ yom abalɩñɩnʋ weyi ɛyabɩnɩ liidiye yɔ, pɩwɛɛ se ɛpɛlɩ-ɩ.+ Pi-ɖeke pɩpɩzɩɣna nɛ pɩha-ɩ nʋmɔʋ nɛ ɛtɔɔ-kʋ.
45 Caɣyʋ nɛ abaa laɖʋ paapɩzɩɣ nɛ pɔtɔɔ-kʋ.
46 Ðɩɣa kʋɖʋmaɣ taa pɩwɛɛ se pɔtɔɔ kpɩnɛ nɖɩ pakʋʋ yɔ. Pɩtɩpɔzɩ se ŋlɩnɩ nandʋ ndʋ nɛ awayɩ, nɛ pɩtɩpɔzɩ se ɩpɛlɩ ɖɩ-mɔɔyɛ naɖɩyɛ.+
47 Pɩwɛɛ se Izrayɛɛlɩ ɛgbɛyɛ kpeekpe ɛtɔɔ kazandʋ ndʋ.
48 Ye ɛgɔm nɔɔyʋ ɛwɛ mɩ-hɛkʋ taa nɛ ɛsɔɔlɩ se ɛtɔɔ Paska kazandʋ Yehowa yɔ, pɩwɛɛ se pɛpɛlɩ ɛ-ɖɩɣa taa abalaa kpeekpe. Pʋbʋ lɛ papɩzɩɣ nɛ paha-ɩ nʋmɔʋ nɛ ɛtɔɔ-tʋ, nɛ ɛkaɣ wɛʋ ɛzɩ tɛtʋ taa pɩɣa yɔ. Ɛlɛ abalʋ weyi patɩpɛlɩ-ɩ yɔ ɛɛpɩzɩɣ nɛ ɛtɔɔ-kʋ.+
49 Paɣtʋ kʋɖʋmtʋ yɔɔ pɩwɛɛ se tɛtʋ taa pɩɣa nɛ ɛgɔm weyi ɛwɛ mɩ-hɛkʋ taa yɔ pɔɖɔ.»+
50 Nɛ Izrayɛɛlɩ mba la ɖeyi ɖeyi ɛzɩ Yehowa kaaɖʋʋ paɣtʋ Moyizi nɛ Aarɔɔnɩ yɔ. Palabɩ mbʋ ɖeyi ɖeyi.
51 Kɩyakʋ ŋgʋ ki-wiye ɖeyi ɖeyi, Yehowa lɩzɩ Izrayɛɛlɩ mba, pa nɛ pa-samaɣ sɔsɔɔ* Ejipiti ɛjaɖɛ taa.
Pɩ-tɛɛ tɔm
^ Piye piye, «ɛ nɛ weyi ɛwɛ ɛ-cɔlɔ.»
^ Yaa «kalɩzasɩ.»
^ Piye piye, «nɛ ɖanasɩ 2 hɛkʋ taa.»
^ Piye piye, «ɛta ɛ-tɩnaɣ taa.»
^ Yaa «kalɩzaɣ.»
^ Yaa «pakʋ-ɩ.»
^ Yaa «kalɩzaɣ.»
^ Piye piye, «mankaɣ lɩzʋʋ mi-yoyaa.»
^ Yaa «kalɩzaɣ.»
^ Yaa «pakʋ-ɩ.»
^ Pʋ-tɔbʋʋ se heɣa yaa mbeɣa.
^ Piye piye, «ɖɩzʋʋ.»
^ Piye piye, «lɔkɔ ɖɩɣa.»
^ Yaa «ñanzɩ nzɩ sɩ-taa ponuutuu mʋlʋm yɔ.»
^ Pʋ-tɔbʋʋ se ɛyaa ndɩ ndɩ mba patɩkɛ Izrayɛɛlɩ mba yɔ, pɩkpɛndɩnɩ Ejipiti mba.
^ Piye piye, «Yehowa yoyaa.»
^ Piye piye, «nɛ po-yoyaa.»
