Kabaelan Kadi ti Diablo a Kontrolen Dagiti Tattao?
Sungbat ti Biblia
Adda pannakabalin ti Diablo ken dagiti demonio a mangimpluensia kadagiti tattao ta kuna ti Biblia: “Iturturayan ti Managdakdakes ti entero a lubong.” (1 Juan 5:19, Ti Baro a Naimbag a Damag Biblia) Ibaga ti Biblia dagiti pamay-an a panangimpluensia ti Diablo kadagiti tattao.
Panangallilaw. Iparparegta ti Biblia kadagiti Kristiano a ‘sarangtenda dagiti pangallilaw ti Diablo.’ (Efeso 6:11, Naimbag a Damag Biblia) Maysa kadagiti pamay-anna ket allilawenna dagiti tattao tapno patienda a dagiti ahentena ket agserserbida iti pudno a Dios.—2 Corinto 11:13-15.
Espiritismo. Ti Diablo al-allilawenna dagiti tattao babaen kadagiti espiritista, mammadles, ken mammuyon wenno astrologo. (Deuteronomio 18:10-12) Maisarang dagiti tattao iti impluensia dagiti demonio babaen ti panagdroga, hipnotismo, ken panagmennamenna.—Lucas 11:24-26.
Palso a relihion. Dagiti relihion a mangisursuro kadagiti palso a doktrina guyugoyenda dagiti tattao nga agsukir iti Dios. (1 Corinto 10:20) Ti Biblia awaganna dagita a palso a doktrina a “pannursuro dagiti demonio.”—1 Timoteo 4:1.
Naluganan. Ipakita dagiti rekord ti Biblia nga adda dagiti indibidual a naluganan kadagiti dakes nga espiritu. No dadduma dagiti tattao a naluganan iti demonio ket mabulsek, agumel wenno dangranda pay ketdi ti bagbagida.—Mateo 12:22; Marcos 5:2-5.
No kasanotayo a maliklikan ti impluensia ti Diablo
Dika pagbutngan ti impluensia ti demonio ta ipakita ti Biblia no kasanom a masaranget a sibaballigi ti Diablo:
Ammuem dagiti pamay-an ti Diablo tapno dinaka maallilaw.—2 Corinto 2:11.
Gumun-od iti pannakaammo manipud iti Biblia ken iyaplikarmo ti nasursurom. No iyaplikarmo dagiti prinsipio ti Biblia salaknibannaka dayta manipud iti impluensia ti Diablo.—Efeso 6:11-18.
Dadaelen ti aniaman a mainaig kadagiti aramid ti demonio. (Aramid 19:19) Ramanen dayta dagiti musika, libro, magasin, poster, ken video a mangiparparegta iti espiritismo.