Mapan iti linaonna

Mapan iti listaan dagiti linaonna

Astrolohia ken Panagpadles—Ipakitada ti Masanguanan?

Astrolohia ken Panagpadles—Ipakitada ti Masanguanan?

ASTROLOHIA

Ti astrolohia ket maysa a kita ti panagpadles a naibatay iti pammati a dakkel ti epekto dagiti bituen, planeta, ken bulan iti biag dagiti tattao ditoy daga. Ibagbaga dagiti astrologo a ti posision dagita iti panawen a pannakayanak ti maysa a tao apektaranna ti personalidad ken masanguananna.

Nupay nangrugi ti astrolohia iti nagkauna a Babilonia, nalatak pay laeng dayta ita. Iti maysa a surbey idiay United States idi 2012, kakatlo ti nangibaga a ti astrolohia ket “medio maitunos iti siensia,” ken 10 a porsiento ti nangibaga a “maitunos unay iti siensia.” Agpayso kadi dayta? Saan. Dagitoy ti makagapu.

  • Awan ti pannakabalin dagiti planeta ken bituen a mangapektar kadagiti tattao a kas iti ibagbaga dagiti astrologo.

  • Masansan a nalawa ti saklawen dagiti prediksion ken mabalin nga agaplikar iti asinoman.

  • Dagiti prediksion ti astrolohia ita ket naibatay iti kadaanan a pammati a ti daga ket rikrikusen dagiti planeta. Ngem ti agpayso, dagiti planeta ti mangrikrikus iti init.

  • Saan nga agpapada ti prediksion ti agduduma nga astrologo iti maymaysa a tao.

  • Iti astrolohia, napaglalasin dagiti tattao iti 12 a kategoria, wenno zodiac sign, sigun iti petsa ti pannakayanakda. Gapu ta nagbaliw ti posision ti daga iti law-ang iti panaglabas ti ginasut a tawen, dagiti petsa a nainaig kadagiti zodiac sign ket saanen a maitunos iti ilalabas ti init kadagiti konstelasion a nakaipanaganan dagita.

Naikuna a dagiti zodiac sign ipakitada ti kababalin ti maysa a tao. Ngem ti agpayso, saan nga agpada ti kababalin dagiti tattao nga agpada ti petsa ti pannakayanakda; awan ti pakainaigan ti personalidad ti maysa a tao iti petsa ti pannakayanakna. Imbes a kitaen dagiti astrologo ti pudpudno a kinatao ti maysa, husgaranda ti ugali ken kababalinna sigun iti pagarupda. Saan kadi a panangidumduma dayta?

 PANAGPADLES

Nabayagen nga agkonkonsulta dagiti tattao kadagiti mammadles. Dadduma a mammadles ti mangipapaulog iti kaipapanan ti lalaem ti animal ken tao wenno iti panangtuktok ti kawitan iti kanenna. Adda met dagiti agipadles maibatay iti itsura ti bulong ti tsaa wenno nagiling a bukel ti kape. Ita, agus-usarda iti tarot card, bola a kristal, dice, ken dadduma pay tapno “basaenda” ti masanguanan ti maysa. Mapagtalkan kadi ti panagpadles a mangammo iti masanguanan? Saan. Kitaentayo no apay.

Kas pagarigan, masansan nga agkokontra ti prediksion ti nagduduma a pamay-an ti panagpadles. Uray no agpapada a pamay-an ti mausar, agduduma latta ti prediksionda. Kas pagarigan, no agsaludsod ti maysa a tao iti dua a mammadles maipapan iti masanguanan maibatay iti “panangbasada” iti agpada a kard, agpada koma ti sungbatda. Ngem masansan nga agduma dagita.

Mapagduaduaan ti pamay-an wenno motibo dagiti mammadles. Ibagbaga dagiti kritiko a props laeng dagiti kard wenno bola a kristal ta saan a dagita ti pangibatayanda iti prediksionda no di ket iti reaksion ti maysa a tao. Kas pagarigan, agdamag ti eksperto a mammadles kadagiti gagangay a saludsod sa obserbaranna a naimbag ti ibaga ken reaksion ti kliente. Agparang nga ammonton ti mammadles dagiti impormasion ken situasion a saan a napupuotan ti kliente nga impaayna. Gapu ta maal-ala ti dadduma a mammadles ti panagtalek ti klienteda, dakkel a kuarta ti maaw-awatda kadakuada.

NO ANIA TI KUNA TI BIBLIA

Pagparparangen ti astrolohia ken panagpadles a naikeddengen ti masanguanantayo. Agpayso kadi? Ibaga ti Biblia a mapilitayo no ania ti kayattayo a patien wenno aramiden ken adda epekto dagita iti masanguanantayo.​—Josue 24:15.

Likliklikan met dagiti agdaydayaw iti Dios ti astrolohia ken panagpadles ta kagura ti Dios ti amin a kita dagita. Kuna ti Biblia: “Awan koma ti masarakan kenka nga asinoman . . . a mangaramat iti panagpadles, maysa a managsalamangka wenno asinoman nga agsapul kadagiti partaan wenno maysa a mangkukulam, wenno maysa a mangkayaw iti sabsabali babaen ti pagilabeg wenno asinoman nga umuman iti mannakiuman iti espiritu wenno maysa a propesional a managipadles kadagiti pasamak wenno asinoman nga agimtuod iti natay. Ta isuamin nga agar-aramid kadagitoy a banag ket nakarimrimon ken Jehova.” *​—Deuteronomio 18:10-12.

^ par. 17 Ti nagan “ti Kangatuan iti intero a daga.”​—Salmo 83:18.