Ebanghelio ni Marcos 5:1-43

  • Ibaon ni Jesus dagiti demonio kadagiti baboy (1-20)

  • Anak ni Jairo; sagiden ti maysa a babai ti makinruar a bado ni Jesus (21-43)

5  Ket nakaballasiwda iti rehion dagiti Geraseno.+  Apagdissaag ni Jesus iti bangka, sinabat ti maysa a lalaki a naggapu iti sementerio* a linuganan ti dakes nga espiritu.  Aggigian iti sementerio ken awan a pulos ti makabael a mangreppet wenno mangkawar kenkuana agingga iti dayta a tiempo.  Namin-adun a kinawaranda dagiti ima ken sakana ngem pugsapugsaten ken daddadaelenna dagita. Awan ti makabael a mangkontrol kenkuana.  Aldaw ken rabii nga agririaw iti sementerio ken iti bambantay sa sugatsugatenna ti bagina iti batbato.  Adayo pay ni Jesus idi makitana ngem nagtaray tapno agparintumeng iti sangona.+  Impukkawna: “Apay nga immayka ditoy, Jesus nga Anak ti Kangatuan a Dios? Ikarim iti Dios a dinak koma dusaen.”+  Ta ibagbaga ni Jesus: “Sika a dakes nga espiritu, rummuarka iti daytoy a tao.”+  Dinamag ni Jesus: “Ania ti naganmo?” Insungbat ti lalaki: “Lehion, ta adukami.” 10  Namin-adu nga impakpakaasina ken Jesus a dina koma papanawen dagiti demonio iti dayta a lugar.+ 11  Iti bantay, adda idi adu a baboy+ a mangmangan.+ 12  Gapuna, impakaasi kenkuana dagiti demonio: “Ibaonnakami a lumugan kadagiti baboy.” 13  Ket pinalubosanna ida. Rimmuar dagiti dakes nga espiritu iti lalaki ket linugananda dagiti baboy. Idi kuan, nagtataray ti agarup 2,000 a baboy a timpuak iti teppang ket nalmesda iti baybay. 14  Nagtataray dagiti agtartaraken ken impadamagda dayta iti siudad ken iti aw-away, ket immay kinita dagiti tattao ti napasamak.+ 15  Napanda ken Jesus ket nakitada ti lalaki a linuganan ti demonio, daydiay dati nga addaan iti lehion. Agtugtugawen, nakabadon, ken nasayaaten ti panunotna. Ket nagbuteng dagiti tattao. 16  Dagiti met nakakita iti dayta inestoriada kadagiti tattao ti napasamak kadagiti baboy ken iti lalaki a naluganan iti demonio. 17  Isu nga impakaasida ken Jesus a pumanaw iti lugarda.+ 18  Idi agluganen ni Jesus iti bangka, nagpakaasi a sumurot kenkuana ti lalaki a dati a naluganan iti demonio.+ 19  Ngem saanna nga impalubos. Imbagana ketdi: “Agawidkan ken ipadamagmo kadagiti kabagiam ti amin nga inaramid kenka ni Jehova* ken ti panangngaasina kenka.” 20  Pimmanaw ti lalaki ken impakaammona idiay Decapolis* ti amin nga inaramid kenkuana ni Jesus, ket nagsiddaaw ti amin a tattao. 21  Idi nakaballasiw manen ni Jesus iti bangir ti baybay, inaribungbongan ti adu a tattao iti igid ti baybay.+ 22  Immay ni Jairo a maysa kadagiti mangidadaulo nga opisial iti sinagoga. Idi makitana ni Jesus, nagparintumeng iti sangona.+ 23  Namin-adu nga impakpakaasina: “Nakaron ti sakit ti balasitangko.* Pangngaasim ta umayka ken iparabawmo dagiti imam kenkuana+ tapno umimbag ket agbiag pay.” 24  Kimmuyog ngarud ni Jesus kenkuana ket sinurot ti nagadu nga aglilinnetlet a tattao. 25  Adda met idi maysa a babai a 12 a tawenen+ nga agpadpadara.+ 26  Adun ti rigatna* iti ima ti adu a nagpapaagasanna. Nagastona payen ti amin a kuartana ngem saan nga immimbag no di ket kimmaro pay ti sakitna. 27  Idi nadamagna dagiti inar-aramid ni Jesus, nakilinnetlet kadagiti tattao agingga a nakadanon iti likudan ni Jesus ket sinagidna ti makinruar a badona,+ 28  ta pampanunotenna: “Uray masagidko laeng koma ti makinruar a badona, umimbagakon.”+ 29  Ket dagus a simmardeng ti panagpadarana, ken nariknana nga immimbagen ti nakaro a sakitna. 30  Nadlaw a dagus ni Jesus nga adda pannakabalin+ a rimmuar kenkuana isu a kinitana dagiti sumursurot a tattao ken insaludsodna: “Asino ti nangsagid iti makinruar a badok?”+ 31  Ngem kuna dagiti adalanna: “Apo, agdidinnuron dagiti tattao iti likudam, isu a dika koma masdaaw no adda nangsagid iti badom.” 32  Ngem kinitana ti aglawlaw tapno maammuanna no asino ti nangaramid iti dayta. 33  Ammo ti babai ti napasamak kenkuana, isu a madandanagan ken agpigpigerger nga immasideg ken nagparintumeng ken Jesus sa imbagana ti agpayso. 34  Kinunana iti babai: “Anakko, pinaimbagnaka ti pammatim. Inkan ket mapanka a sitatalna,+ nasalun-atkan ken awanen ti nakaro a sakitmo.”+ 35  Agsasao pay laeng ni Jesus idi simmabat ti sumagmamano a lallaki a naggapu idiay balay ni Jairo ket kinunada: “Natayen ti anakmo! Apay nga istorbuem pay laeng ti Mannursuro?”+ 36  Ngem nangngeg ni Jesus ti panagsasaritada isu nga imbagana ken Jairo: “Dika agbuteng, mamatika laeng.”+ 37  Dina impalubos nga adda sabali a sumurot kenkuana malaksid ken Pedro ken ti agkabsat a da Santiago ken Juan.+ 38  Idi nakadanonda iti balay ni Jairo, nakita ni Jesus a kumaribuso dagiti tattao sa agsasangit ken nakapigpigsa ti dung-awda.+ 39  Simrek ni Jesus ket kinunana: “Apay nga agsasangit ken kumaribusokayo? Saan a natay ti ubing no di ket matmaturog laeng.”+ 40  Ngem kinatkatawaanda. Kalpasan a pinaruarna amin ida, inayabanna ti ama ken ti ina ti ubing ken dagiti adalan a kaduana, sa napanda iti ayan ti ubing. 41  Iniggaman ni Jesus ti ima ti ubing, sa kinunana: “Talʹi·tha cuʹmi,” a kayatna a sawen, no maipatarus: “Anakko, ibagak kenka, bumangonka!”+ 42  Dagus a bimmangon ti ubing sa nagna. (Agtawen idi iti 12.) Kasta unay ti siddaawda ken napalalo ti ragsakda. 43  Ngem inyunay-unayna* nga awan ti pangibagbagaanda iti dayta,+ ken imbagana nga ikkanda ti ubing iti kanenna.

Footnotes

Wenno “pakalaglagipan a tanem.”
Kitaem ti App. A5.
Wenno “Rehion a Sangapulo ti Siudadna.”
Wenno “Matmatayen ti anakko.”
Wenno “ut-ot nga inib-ibturanna.”
Wenno “siiinget nga imbilinna.”