Ebanghelio ni Marcos 8:1-38

  • Pakanen ni Jesus ti 4,000 (1-9)

  • Panagkiddaw iti pagilasinan (10-13)

  • Lebadura dagiti Fariseo ken ni Herodes (14-21)

  • Napaimbag ti maysa a bulsek idiay Betsaida (22-26)

  • Ibaga ni Pedro no asino ti Kristo (27-30)

  • Naipadto ti ipapatay ni Jesus (31-33)

  • Ti aramiden dagiti pudno nga adalan (34-38)

8  Iti dayta a tiempo, adu manen ti immay ket awan ti kanenda. Isu nga inayabanna dagiti adalan ket imbagana:  “Maasianak kadagitoy a tattao.+ Tallo nga aldawdan ditoy ket awanen ti kanenda.+  No pagawidek ida a mabisbisin,* amangan no matalimudawda iti dalan. Nagadayo pay met ti pagawidan ti dadduma.”  Ngem kinuna dagiti adalanna: “Iti daytoy awan matataona a lugar, pangalaantayo ngarud iti tinapay nga umanay a kanen dagitoy a tattao?”  Dinamagna kadakuada: “Mano a tinapay ti adda kadakayo?” Insungbatda: “Pito.”+  Binilinna dagiti tattao nga agdalupisakda. Innalana ti pito a tinapay, nagyaman iti Dios, pinispisina, ken intedna kadagiti adalanna tapno iwarasda, ket inwarasda dagita kadagiti tattao.+  Addaanda met iti sumagmamano a babassit nga ikan. Nagyaman iti Dios sa impaiwarasna met dagita kadakuada.  Isu a nanganda ket nabsogda. Innala dagiti adalan ti pito a kuribot* a napno kadagiti natedda.+  Agarup 4,000 idi dagiti lallaki. Kalpasanna, pinagawidna idan. 10  Dagus a naglugan iti bangka agraman dagiti adalanna ket nakadanonda iti rehion ti Dalmanuta.+ 11  Napan sadiay dagiti Fariseo tapno makisupiatda kenkuana. Kayatda a suboken isu nga indawatda a mangipakita iti pagilasinan manipud langit.+ 12  Immanges iti nauneg ket kinunana: “Apay nga agbirbirok daytoy a henerasion iti pagilasinan?+ Pudno kunak kadakayo, awanto ti pagilasinan a makita daytoy a henerasion.”+ 13  Kalpasanna, pinanawanna ida, sa nagbangka manen a bimmallasiw iti baybay. 14  Ngem nalipatanda ti nagbalon iti tinapay. Awan a pulos ti tinapayda malaksid iti maysa nga adda iti bangka.+ 15  Sipaprangka a pinakdaaranna ida: “Agsiputkayo; agannadkayo iti lebadura dagiti Fariseo ken iti lebadura ni Herodes.”+ 16  Isu a nagpipinnabasolda no apay nga awan man la kadakuada ti addaan iti tinapay. 17  Kinunana idi nangngegna dayta: “Apay nga agpipinnabasolkayo iti kaawan ti tinapayyo? Diyo pay la kadi maawatan ken matarusan? Marigatan pay la kadi ti pusoyo a mangtarus? 18  ‘Uray adda matayo, saankayo kadi a makakita; ken uray adda lapayagyo, saankayo kadi a makangngeg?’ Diyo kadi malagip 19  idi pinispisik ti lima a tinapay+ para iti 5,000 a lallaki, mano a basket a napno kadagiti tedda ti naurnongyo?” Kinunada: “Sangapulo ket dua.”+ 20  “Idi pinispisik ti pito a tinapay para iti 4,000 a lallaki, mano a kuribot* a napno kadagiti tedda ti naurnongyo?” Insungbatda: “Pito.”+ 21  Isu nga imbagana: “Diyo pay kadi maawatan?” 22  Idi simmangpetda idiay Betsaida, impan dagiti tattao kenkuana ti maysa a bulsek a lalaki, sa impakpakaasida a paimbagenna.+ 23  Kinibinna ti bulsek nga inruar iti purok. Kalpasan nga inyaprosna ti katayna kadagiti mata ti bulsek,+ imparabawna dagiti imana kenkuana sana dinamag: “Adda kadin makitam?” 24  Inwaras ti lalaki ti panagkitana sana kinuna: “Adda tattao a makitkitak, ngem kasda la kaykayo a magmagna.” 25  Imparabawna manen dagiti imana kadagiti mata ti lalaki, ket nagsublin ti panagkitana. Immimbagen ken nalawagen a makitana ti amin. 26  Kalpasanna, imbagana idi pagawidennan: “Saanka nga agsubli iti purok.” 27  Napan ni Jesus ken dagiti adalanna kadagiti purok iti Cesarea Filipos, ket bayat a magmagnada, insaludsodna kadagiti adalanna: “Asinoak iti panagkuna dagiti tattao?”+ 28  Kinunada: “Sika kano ni Juan a Mammautisar,+ ngem kuna met ti dadduma a sika ni Elias,+ ken adda pay dagiti agkuna a maysaka kadagiti propeta.” 29  Sinaludsodanna met ida: “Dakayo ngay, asinoak iti panagkunayo?” Insungbat ni Pedro: “Sika ti Kristo.”+ 30  Inyunay-unayna ngarud nga imbilin a dida pulos ibagbaga iti asinoman ti maipapan kenkuana.+ 31  Imbagana met kadakuada nga adu a rigat ti masapul a mapasaran ti Anak ti tao ken ilaksid dagiti panglakayen, panguluen a papadi, ken dagiti eskriba sa mapapatay+ ngem mapagungar kalpasan ti tallo nga aldaw.+ 32  Sipaprangka nga imbagana dayta. Ngem inyadayo bassit ni Pedro sa tinubngarna.+ 33  Isu a kinitana dagiti adalanna sana kinorehir ni Pedro: “Adaywannak,* Satanas! ta saan a ti pampanunot ti Dios ti pampanunotem, no di ket ti pampanunot dagiti tattao.”+ 34  Inayabanna dagiti tattao ken dagiti adalanna sana imbaga: “Asinoman a mayat a sumurot kaniak, tallikudanna koma ti bagina ket bagkatenna ti kayona a pagtutuokan* ken agtultuloy a surotennak.+ 35  Ta ti mangikagumaan a mangisalakan iti biagna,* mapukawnanto. Ngem ti makapukaw iti biagna* maigapu kaniak ken iti naimbag a damag, maisalakannanto dayta.+ 36  Adda aya magunggona ti maysa a tao no matagikuana ti intero a lubong ngem mapukawna met ti biagna?*+ 37  Adda kadi a talaga ti maisukat ti maysa a tao iti biagna?*+ 38  Ta asinoman a mangibain kaniak ken iti ibagbagak iti daytoy di matalek* ken managbasol a henerasion, ibainto met ti Anak ti tao+ inton umay iti dayag ni Amana, a kaduana dagiti nasantuan nga anghel.”+

Footnotes

Wenno “saan a nangnangan.”
Wenno “kuribot a pagyanan iti makan.”
Wenno “kuribot a pagyanan iti makan.”
Lit., “Inka iti likudak.”
Kitaem ti Glosario.
Wenno “kararuana.”
Wenno “kararuana.”
Wenno “kararuana.”
Wenno “kararuana.”
Lit., “mannakikamalala.”