Ebanghelio ni Marcos 7:1-37

  • Naibutaktak dagiti tradision ti tattao (1-13)

  • Agtaud iti puso ti mangrugit iti tao (14-23)

  • Pammati ti babai a taga-Fenicia iti Siria (24-30)

  • Napaimbag ti maysa a tuleng (31-37)

7  Ita, naguurnong iti ayan ni Jesus dagiti Fariseo ken ti dadduma nga eskriba a naggapu idiay Jerusalem.+  Nakitada a mangmangan ti dadduma nga adalanna a narugit dagiti imada, kayatna a sawen, saan a nabugguan ti imada.*  (Ta no mangan dagiti Fariseo ken ti amin a Judio, bugguanda nga umuna dagiti imada agingga iti sikoda kas panangsurotda iti nagkauna a tradision ti tattao,  ket no naggapuda iti tiendaan, dalusanda nga umuna ti bagida sakbay a manganda. Adu pay ti an-annurotenda a tinawidda a tradision kas iti panangitabnaw* kadagiti tasa, pitser, ken gambang a lunglongan.*)+  Gapu iti dayta, insaludsod dagiti Fariseo ken eskriba ken ni Jesus: “Apay a saan a sursuroten dagiti adalam ti nagkauna a tradision ti tattao, ket manganda lattan a narugit dagiti imada?”+  Insungbatna: “Agpayso ti impadto ni Isaias maipapan kadakayo a managinsisingpet, kas iti naisurat, ‘Daydayawendak dagitoy a tattao iti bibigda ngem adayo kaniak ti pusoda.+  Awan serserbina a daydayawendak, ta dagiti isursuroda ket bilin laeng ti tao.’+  Binaybay-anyo ti bilin ti Dios gapu ta sursurotenyo ti tradision ti tattao.”+  Innayonna: “Naglaingkayo a mangilaksid iti bilin ti Dios tapno mataginayon ti tradisionyo.+ 10  Kas pagarigan, kinuna ni Moises, ‘Dayawem da tatang ken nanangmo,’+ ken, ‘Mapapatay ti agsao iti dakes maibusor iti ama wenno inana.’+ 11  Ngem kunayo, ‘No kuna ti maysa a tao iti ama wenno inana: “Ti adda kaniak ket korban (kayatna a sawen, naikarin nga itedko iti Dios), isu a saankayon a matulongan,”’ 12  diyo metten palubosan dayta a tao a mangipaay iti aniaman a banag iti ama wenno inana.+ 13  Iti kasta, pinagbalinyo ti sao ti Dios nga awan serserbina gapu iti tradision nga impatawidyo.+ Ket adu ti kastoy nga ar-aramidenyo.”+ 14  Isu nga inayabanna manen dagiti tattao ket kinunana: “Denggendak, ket tarusanyo ti kaipapanan ti ibagbagak.+ 15  Awan ti banag iti ruar ti tao a sumrek kenkuana ti mangrugit kenkuana; ngem dagiti bambanag a rummuar iti tao ti mangrugit kenkuana.”+ 16 * —— 17  Idi simrekda iti maysa a balay nga adayon kadagiti tattao, nagdamag dagiti adalanna maipapan iti ilustrasion.+ 18  Isu a kinunana: “Saanyo met kadi a maawatan a kas kadakuada? Diyo kadi ammo nga awan ti banag iti ruar ti tao a sumrek kenkuana ti mangrugit kenkuana, 19  ta saan a sumrek dayta iti pusona, no di ket iti tianna, sa rummuar iti bagi?” Isu nga imbagana a nadalus ti amin a taraon. 20  Kinunana pay: “Ti mamagbalin a narugit iti maysa a tao ket ti agtaud a mismo kenkuana.+ 21  Ta manipud iti uneg, iti puso ti tattao,+ agtaud dagiti dakes a panagpampanunot: seksual nga immoralidad,* panagtakaw, panangpapatay, 22  pannakikamalala, kinaagum, dakes nga ar-aramid, panangallilaw, nakaal-alas a kababalin,* naapal a mata, dakes a panagsasao, kinatangsit, ken di kinanainkalintegan.* 23  Amin dagitoy a dakes a banag ket agtaud iti uneg ken mangrugit iti tao.” 24  Pimmanaw ni Jesus sadiay ket napan iti rehion ti Tiro ken Sidon.+ Simrek iti maysa a balay ta dina kayat a maammuan ti asinoman, ngem adda latta nakaammo. 25  Naammuan a dagus dayta ti maysa a babai nga addaan iti ubing nga anak a babai a naluganan iti dakes nga espiritu. Napan ken Jesus ket nagparintumeng iti sangona.+ 26  Griego daytoy a babai a taga-Fenicia iti Siria. Namin-adu a nagpakpakaasi kenkuana a paruarenna ti demonio iti anakna. 27  Ngem imbagana kenkuana: “Masapul a mabsog nga umuna dagiti ubbing, ta saan a rumbeng nga alaen ti kanen dagiti ubbing sa ipuruak kadagiti uken.”+ 28  Ngem insungbat ti babai: “Wen, Apo. Ngem kanen dagiti uken iti sirok ti lamisaan ti murkat a maregreg dagiti ubbing.” 29  Kinunana kenkuana: “Gapu iti dayta nga imbagam, agawidkan. Rimmuaren ti demonio iti anakmo.”+ 30  Isu a nagawid ti babai ket nasangpetanna ti anakna nga agid-idda ken rimmuaren ti demonio kenkuana.+ 31  Idi naggapu ni Jesus iti rehion ti Tiro, limmabas iti Sidon ken nagna iti rehion ti Decapolis* agingga iti Baybay ti Galilea.+ 32  Impanda kenkuana ti maysa a lalaki a tuleng ken marigatan nga agsao,+ ket impakpakaasida nga iparabawna ti imana iti lalaki. 33  Inyadayona kadagiti tattao sa inkabilna dagiti ramayna kadagiti lapayag ti lalaki. Kalpasan a timmupra ni Jesus, sinagidna ti dila ti lalaki.+ 34  Ket timmangad, immanges iti nauneg, sana kinuna kenkuana: “Ephʹpha·tha,” kayatna a sawen, “Makangngeg ken makasaoka koma.” 35  Ket dagus a makangngegen+ ken saanen a marigatan nga agsao. Normalen ti panagsaona. 36  Gapuna, imbilin ni Jesus a dida pulos ibagbaga dayta iti asinoman,+ ngem no kasano ti panangyunay-unayna a dida ibagbaga, ad-adda met nga ipadpadamagda.+ 37  Kinaagpaysuanna, napalalo ti siddaawda+ ket kinunada: “Nagsayaat ti amin nga ar-aramidenna. Papaimbagenna pay dagiti tuleng ken umel.”+

Footnotes

Kayatna a sawen, saanda nga inaramid ti seremonial a panagdalus.
Lit., “panangbautisar.”
Dagiti alikamen a mausar iti kosina.
Kitaem ti App. A3.
Pang-adu a porma ti Griego a por·neiʹa. Kitaem ti Glosario.
Wenno “nakababain nga aramid.” Iti Griego, a·selʹgei·a. Kitaem ti Glosario.
Wenno “saan a kinarasonable.”
Wenno “Rehion a Sangapulo ti Siudadna.”