Ebanghelio ni Marcos 2:1-28

  • Napaimbag ni Jesus ti paralitiko (1-12)

  • Awisen ni Jesus ni Levi (13-17)

  • Saludsod maipapan iti panagayunar (18-22)

  • Ni Jesus, ‘Apo ti Sabbath’ (23-28)

2  Ngem kalpasan ti sumagmamano nga aldaw, nagsubli ni Jesus idiay Capernaum ket nagdinamag nga adda isuna iti maysa a balay.+  Nakaad-adu ti immay nga uray la awanen ti paglugaran ken awanen ti makastrek iti ridaw, ket rinugianna ida a kasabaan.+  Inyegda kenkuana ti maysa a paralitiko a binagkat ti uppat a lallaki.+  Ngem saanda a mayasideg ken Jesus gapu iti kaadu ti tao isu nga inikkatda ti atep iti batogna, ket kalpasan nga inabutanda, imbabada ti paralitiko a naikabil iti pagiddaan.  Idi nakita ni Jesus ti pammatida,+ kinunana iti paralitiko: “Anak, napakawanen dagiti basolmo.”+  Agtugtugaw idi sadiay ti sumagmamano nga eskriba ket ibagbagada iti un-unegda:+  “Apay a kastoy ti ibagbaga daytoy a tao? In-insultuenna ti Dios. Adda kadi sabali a makapakawan iti basol no di laeng ti Dios?”+  Ngem ammo a dagus ni Jesus ti adda iti panunotda isu a kinunana: “Apay a kasta ti pampanunotenyo?+  Ania ti nalaklaka nga ibaga iti paralitiko, ‘Napakawanen dagiti basolmo,’ wenno, ‘Bumangonka ken bagkatem ta pagiddaam ket magnaka’? 10  Ngem tapno maammuanyo nga adda autoridad ti Anak ti tao+ a mangpakawan kadagiti basol ditoy daga—​”+ imbagana iti paralitiko: 11  “Bumangonka, bagkatem ta pagiddaam, ket agawidkan.” 12  Bimmangon ti lalaki ken dagus a binagkatna ti nagiddaanna sa nagna iti sanguananda amin. Nasdaawda ket indaydayawda ti Dios, nga ibagbagada: “Ita pay laeng a nakakitatayo iti kastoy.”+ 13  Napan manen iti igid ti baybay ngem sinurot ti amin, ket insurona ida. 14  Bayat a magmagna, nakitana ni Levi nga anak ni Alfeo a nakatugaw iti opisina a pagbayadan iti buis. Kinunana: “Agbalinka a pasurotko.” Dagus a timmakder ket simmurot kenkuana.+ 15  Idi mangmangan* ni Jesus iti balay ni Levi, immay ti adu nga agsingsingir iti buis ken managbasol ket nanganda* a kaduana dagiti adalan ta adu kadakuada ti sumursurot kenkuana.+ 16  Ngem idi nakita dagiti eskriba dagiti Fariseo a makipangpangan kadagiti managbasol ken agsingsingir iti buis, imbagada kadagiti adalanna: “Apay a makipangpangan daytoy a tao kadagiti managbasol ken agsingsingir iti buis?” 17  Nangngeg ida ni Jesus ket kinunana: “Dagiti masakit ti agkasapulan iti doktor, saan a dagiti napigsa. Immayak tapno ayabak dagiti managbasol, saan a dagiti nalinteg.”+ 18  Gapu ta agay-ayunar* dagiti adalan ni Juan ken dagiti Fariseo, insaludsodda ken Jesus: “Apay nga agay-ayunar dagiti adalan ni Juan ken dagiti adalan dagiti Fariseo ngem saan nga agay-ayunar dagiti adalam?”+ 19  Insungbat ni Jesus: “Agayunar kadi dagiti gagayyem ti nobio bayat a kaduada ti nobio?+ Saanda nga agayunar bayat a kaduada ti nobio. 20  Ngem dumtengto ti tiempo a maipanaw kadakuada ti nobio,+ ket agayunardanto iti dayta nga aldaw. 21  Awan ti asinoman a mangitakup iti baro a tela iti daan a lupot. Ta no kasta ti aramidenna, inton kumsen ti naitakup a baro a tela, mabennat ti daan a lupot ket dumakkel ti pigisna.+ 22  Awan met ti mangikabil iti baro nga arak iti daan a lalat a pagkargaan. Ta no aramidenna dayta, bettaken ti baro nga arak ti daan a lalat a pagkargaan ket masayang ti arak ken ti lalat. Maikarga ketdi ti baro nga arak iti baro a lalat a pagkargaan.” 23  Iti aldaw ti Sabbath, bayat a magmagna ni Jesus ken dagiti adalanna iti kataltalonan, nangruros dagiti adalanna kadagiti dawa.+ 24  Isu a kinuna kenkuana dagiti Fariseo: “Kitaem! Apay nga ar-aramidenda ti saan a maipalubos iti Sabbath?” 25  Ngem kinunana kadakuada: “Diyo kadi nabasa ti inaramid ni David ken dagiti kakaduana idi mabisinda?+ 26  Iti salaysay maipapan iti panguluen a padi a ni Abiatar,+ saan kadi a simrek ni David iti balay ti Dios ket kinnanna dagiti daton a tinapay,* a saan koma a maipalubos a kanen ti asinoman no di laeng dagiti papadi,+ sa inikkanna met dagiti kakaduana?” 27  Ket kinunana kadakuada: “Naaramid ti Sabbath a pagsayaatan ti tao,+ ngem saan a naparsua ti tao tapno ngilinenna ti Sabbath. 28  Isu a ti Anak ti tao ket Apo uray pay ti Sabbath.”+

Footnotes

Wenno “nagsadag iti lamisaan.”
Wenno “nagsadagda iti lamisaan.”
Kitaem ti Glosario.
Wenno “pamarang a tinapay.”