Umuna a Surat ni Juan 5:1-21
5 Annak ti Dios ti amin a mamati a ni Jesus ket isu ti Kristo,+ ken ti amin nga agayat iti Dios ayatenda met dagiti annak ti Dios.
2 Babaen iti daytoy, maammuantayo nga ay-ayatentayo dagiti annak ti Dios,+ no ay-ayatentayo ti Dios ken tungtungpalentayo dagiti bilinna.
3 Ta daytoy ti kaipapanan ti panagayat iti Dios, a tungpalentayo dagiti bilinna;+ ket kaskasdi a saan a makapadagsen dagiti bilinna,+
4 ta amin nga annak ti Dios parmekenda ti lubong.+ Ket ti pammatitayo ti makatulong kadatayo a mangparmek iti lubong.+
5 Asino ti makaparmek iti lubong?+ Saan aya a daydiay mamati a ni Jesus ti Anak ti Dios?+
6 Ni Jesu-Kristo ket isu daydiay immay babaen iti danum ken dara; saan nga iti danum laeng,+ no di ket iti danum ken iti dara.+ Ti espiritu ti saksi,+ ta ti espiritu ket ti kinapudno.
7 Ta adda tallo a mangsaksi:
8 ti espiritu+ ken ti danum+ ken ti dara;+ ket agtutunos dagita a tallo.
9 Awatentayo ti panangsaksi dagiti tattao, ngem dakdakkel ti panangsaksi ti Dios. Ta ti Dios a mismo ti mangsaksi maipapan iti Anakna.
10 Ti tao a mamati iti Anak ti Dios ipakpakitana nga impapusona ti insuro kenkuana ti Dios. Ti tao a saan a mamati iti Dios pinagbalinna a naulbod ti Dios,+ ta dina pinati ti panangsaksi ti Dios maipapan iti Anakna.
11 Ket daytoy ti naited a panangsaksi, nga inikkannatayo ti Dios iti biag nga agnanayon,+ ken daytoy a biag ket adda iti Anakna.+
12 Daydiay mangakseptar iti Anak ket addaan iti daytoy a biag. Daydiay saan a mangakseptar iti Anak ti Dios ket awan kenkuana daytoy a biag.+
13 Isursuratko kadakayo dagitoy tapno maammuanyo nga addaankayo iti biag nga agnanayon,+ dakayo a mamati iti nagan ti Anak ti Dios.+
14 Ket agtalektayo* kenkuana,+ nga uray ania ti dawatentayo maitunos iti pagayatanna, denggennatayo.+
15 Ket no ammotayo a denggenna ti aniaman a dawdawatentayo, ammotayo a maaddaantayo iti bambanag a dinawattayo yantangay dinawattayo dagita kenkuana.+
16 No makita ti asinoman a ti kabsatna ket agar-aramid iti basol a saan nga agturong ken patay, ikararaganna tapno ikkan ti Dios iti biag,+ wen, kadagidiay agar-aramid iti basol a saan nga agturong ken patay. Adda basol a talaga nga agturong ken patay.+ Maipapan iti dayta a basol ti ibagbagak a dina ikararagan.
17 Amin a kinakillo ket basol,+ ngem adda basol a saan nga agturong ken patay.
18 Ammotayo a saan nga iyugali ti amin nga annak ti Dios ti agbasol, no di ket bambantayan ida ti Anak ti Dios,* ket saan ida a madangran* daydiay managdakdakes.+
19 Ammotayo a nagtaudtayo iti Dios, ngem ti intero a lubong ket adda iti pannakabalin daydiay managdakdakes.+
20 Ngem ammotayo nga immayen ti Anak ti Dios,+ ket inikkannatayo iti pannakaawat* tapno maammuantayo daydiay pudno. Ket naikaykaysatayo iti daydiay pudno,+ babaen ti Anakna a ni Jesu-Kristo. Daytoy ti pudno a Dios ken biag nga agnanayon.+
21 Ay-ayatek nga annak, adaywanyo dagiti idolo.+
Footnotes
^ Wenno “adda wayawayatayo a makisarita.”
^ Wenno “matengngel.”
^ Kayatna a sawen, ni Jesu-Kristo, ti Anak ti Dios.
^ Lit., “kapasidad nga agpanunot; kinalaing.”
