Mapan iti linaonna

Mapan iti listaan dagiti linaonna

“Agsilnag Koma ti Silawyo” Tapno Maidayaw ni Jehova

“Agsilnag Koma ti Silawyo” Tapno Maidayaw ni Jehova

“Agsilnag koma ti silawyo iti sanguanan ti tattao, tapno . . . idayawda ti Amayo.”​—MAT. 5:16.

KANTA: 77, 59

1. Ania ti naisangsangayan a rason nga agrag-otayo?

MAKAPARAGSAK a maammuan ti irarang-ay ti ili ni Jehova! Idi napan a tawen, regular a nangikonduktatayo iti nasurok a 10,000,000 a panangyadal iti Biblia. Ipakita daytoy nga isilsilnag dagiti adipen ti Dios ti silawda! Panunotentayo met ti minilion nga interesado nga immatender iti Memorial. Gapu iti dayta, maammuanda ti ayat ti Dios idi impaayna ti subbot.​—1 Juan 4:9.

2, 3. (a) Ania a panagduduma ti saan a makalapped iti ‘panagsilnagtayo kas silsilaw’? (b) Iti imbaga ni Jesus iti Mateo 5:14-16, ania ti usigentayo?

2 Iti intero a lubong, adu a nagduduma a lengguahe ti us-usaren ti ili ni Jehova. Ngem saan a lapped dayta iti panagkaykaysatayo a mangidayaw iti Amatayo, ni Jehova. (Apoc. 7:9) Aniaman ti lengguahe wenno lugartayo, makapagsilnagtayo “kas silsilaw iti lubong.”​—Fil. 2:15.

3 Ti panagrang-ay, panagkaykaysa, ken panangikagumaantayo nga agbantay ket makatulong iti panangidayawtayo ken Jehova. Iti daytoy nga artikulo, usigentayo no kasano a maaramidtayo dagita.​—Basaen ti Mateo 5:14-16.

 IDANON TI AWIS

4, 5. (a) Malaksid iti panangasaba, kasano a maisilnagtayo ti silawtayo? (b) Ania ti pagimbaganna no makita dagiti tattao a nasingpettayo? (Kitaen ti ladawan iti rugi ti artikulo.)

4 “Awan ti makapagmatalek iti Apo kadagitoy nabatbati nga aldaw . . . malaksid no pagsilnagenna ti silawna,” kuna ti artikulo iti “Light in the Darkness” iti The Watch Tower a Hunio 1, 1925. Inlawlawag pay ti artikulo: “Maaramidna dayta no ibagana ti naimbag a damag kadagiti tattao ditoy daga, ken agbiag maitunos iti lawag.” Nabatad a maisilnagtayo ti silawtayo no ikasabatayo ti naimbag a damag ken agaramidtayo iti ad-adalan. (Mat. 28:19, 20) Maidaydayawtayo met ni Jehova iti konduktatayo kas Kristiano. Palpaliiwen dagiti bumalay ken dagiti aglabas ti kababalintayo. Ipakita ti mannakigayyem nga isem ken nabara a kablaawtayo no siasinotayo ken no ania a kita a Dios ti pagdaydayawantayo.

5 Imbaga ni Jesus kadagiti adalanna: “No sumrekkayo iti balay, kablaawanyo ti sangakabbalayan.” (Mat. 10:12) Iti lugar a nangaskasabaan ni Jesus ken dagiti apostolna, gagangay a pastreken dagiti bumalay dagiti estranghero. Saan a kasta ita ti kostumbre iti adu a lugar. Ngem no nasayaat ken nainggayyeman ti panangilawlawagmo no apay a bimmisitaka, mabalin a makissayan ti danag wenno suron ti bumalay. Masansan a ti naimpusuan nga isem ti kasayaatan nga introduksion. Pudno met dayta no mangasabatayo iti publiko babaen ti cart. Mabalin a madlawmo a masansan a positibo ti reaksion dagiti tattao iti naimpusuan nga isem ken kablaaw. Mabalin a dayta ti pakatignayanda nga umasideg ken mangala iti publikasiontayo. Nalaklaka met a makairugika iti saritaan no makitada a nasayaat ti kababalinmo.

6. Ania ti inaramid ti nataengan nga agassawa tapno makapangasabada?

6 Idiay England, adda nakapuyen a nataengan nga agassawa a saanen a makapangasaba iti binalaybalay. Inkeddengda a pagsilnagen ti silawda iti ruar ti balayda. Agidispleyda kadagiti naibatay-Biblia a publikasion iti lamisaan no tiempon nga alaen dagiti nagannak ti annakda iti asideg nga eskuelaan. Adu ti naginteres isu a nangalada kadagiti broshur ken libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 1 ken 2. Nakiraman iti panangasabada ti maysa a sister a kakongregasionda. Gapu ta mannakigayyem ti sister ken naimpusuan ti panagregget dagiti agassawa, natignay nga agpayadal iti Biblia ti maysa kadagiti nagannak.

7. Ania ti maitulongmo kadagiti refugee iti lugaryo?

7 Iti napalabas a tawtawen, adu a refugee ti nagkamang iti adu a pagilian. Kasanom a matulongan ida a mangam-ammo ken Jehova ken iti panggepna? Kas pagarigan, mabalinmo a sursuruen ti maysa a gagangay a kablaaw iti lengguaheda, ket makatulong kenka ti JW Language app. Kasta met, mabalinmo a sursuruen ti sumagmamano a sasao a mangtukay iti interesda. Iti kasta, maiturongmo ida iti jw.org ket maipakitam dagiti video ken publikasion a naipatarus iti lengguaheda.​—Deut. 10:19.

8, 9. (a) Ania ti maitulong kadatayo dagiti gimong iti tengnga ti lawas? (b) Kasano a matulongan dagiti nagannak ti annakda nga agkomento kadagiti gimong?

8 Impaay ni Jehova ti Gimong a Panagbiag ken Ministerio tapno ad-adda nga epektibotayo iti ministerio. Makatulong dagiti instruksion iti daytoy a gimong tapno manayonan ti kompiansatayo nga agsarungkar ken mangyadal iti Biblia.

 9 Napaliiw ti adu a bisita nga agkomkomento dagiti ubbing kadagiti gimongtayo. Nagannak, tulonganyo dagiti annakyo a mangisilnag iti silawda babaen ti panangisuroyo iti panagkomentoda iti bukodda a sasao. Ti simple ken naimpusuan a komentoda ti nangtignay iti dadduma nga aginteres iti kinapudno.​—1 Cor. 14:25.

PABILGEN TI PANAGKAYKAYSA

10. Ania ti maitulong ti panagdaydayaw ti pamilia tapno bumileg ti panagkaykaysa?

10 Maisilnagmo pay ti silawmo no pabilgem ti panagkaykaysa ti pamiliam ken ti kongregasionmo. Maaramid dayta dagiti nagannak babaen ti kaadda ti regular a Panagdaydayaw ti Pamiliada. Adu a pamilia ti agbuya iti binulan a JW Broadcasting. Apay a diyo pagsasaritaan no kasano a mayaplikaryo dagiti nasursuroyo kalpasan ti panagbuyayo? Bayat ti panagdaydayaw ti pamilia, laglagipen koma ti nagannak a mabalin nga agduma ti panangisuro a kasapulan ti bassit nga ubing ken ti maysa a tin-edyer. Ilawlawagmo no kasano a mayaplikar ti tunggal miembro ti pamilia ti inadalyo tapno magunggonaanda.​—Sal. 148:12, 13.

Makaparegta unay ti panangipakita iti interes kadagiti nataengan (Kitaen ti parapo 11)

11-13. Kasano a mapabileg ti amin ti panagkaykaysa ti kongregasion ken matulonganda ti sabsabali a mangisilnag iti silawda?

11 Kasano a mapabileg dagiti agtutubo ti panagkaykaysa ti kongregasion ket maparegtada ti dadduma a mangisilnag iti silawda? No agtutuboka a Kristiano, apay a dimo ikagumaan a gayyemen dagiti nataengan? Mabalin a damagem ti kapadasanda iti nabayagen a panagserbida. Makitamto a makaparegta dayta, ket agpadakayo a matignay a mangisilnag iti lawag ti kinapudno. Ken nasayaat no ikagumaantayo amin a kablaawan dagiti makigimong iti Kingdom Hall. Iti kasta, makatulongka iti panagkaykaysa ken mabalin a matignay dagiti bisita a mangisilnag iti silawda. Mabalin a kablaawam dagiti bisita babaen ti nainggayyeman nga isem, wenno isapulam pay ketdi ida iti pagtugawan. Iyam-ammom ida iti dadduma tapno saanda a mababain.

12 No nadutokanka a mangidaulo iti taripnong sakbay ti panangasaba, dakkel ti maitulongmo kadagiti nataengan tapno makaramanda iti ministerio. Adda kadi teritoria a maibagay kadakuada? No dadduma, mabalin nga ikaduam ida iti  ub-ubing a kabsat a makaasistir kadakuada. Ikabilangam met koma dagidiay limitadon ti maaramidanda gapu iti sakit wenno kasasaadda. Wen, no nakonsiderar ken mannakaawatka, matulongam dagiti kakabsat a sireregta a mangikasaba iti naimbag a damag, aniaman ti edadda wenno kasanoman kabayagdan iti kinapudno.​—Lev. 19:32.

13 Natignay ti salmista a mangibaga: “Anian a makaay-ayo a dagiti agkakabsat agnaedda a sangsangkamaysa buyogen ti panagtutunos!” (Basaen ti Salmo 133:1, 2.) Bayat ti panagkakadua dagiti Israelita, nagunggonaanda iti nasayaat nga impluensia dagiti padada nga agdaydayaw ken Jehova. Mayarig dayta iti pangpulot a lana a nabanglo ken makapagin-awa. Determinadoka koma nga agbalin a nasayaat nga impluensia tapno makatulongka iti panagkaykaysa dagiti kakabsat. Makomendaranka no kasta ti ar-aramidem. Mabalin kadi a ‘lumawaka,’ kayatna a sawen, nayonam pay ti panagreggetmo?​—2 Cor. 6:11-13.

14. Kasanom a maisilnag ti silawmo iti lugaryo?

14 Mabalin kadi a nayonam ti panagreggetmo a mangisilnag iti kinapudno ti Biblia iti lugaryo? Baka aginteres iti kinapudno ti maysa a kaarrubam gapu iti nasayaat a sasao ken ar-aramidmo. Isaludsodmo iti bagim: ‘Ania ti reputasionko kadagiti kaarrubak? Nadalus ken naurnos kadi ti balay ken paraangak, a mangnayon iti pintas ti lugarmi? Agbolboluntarioak kadi a tumulong kadagiti kaarrubak?’ No makisarsaritaka kadagiti padam a Saksi, apay a dimo damagen ti epekto ti kinaimbag ken nasayaat a kababalinda kadagiti kabagian, kaarruba, katrabahuan, wenno kaeskuelaanda? Makangngegka la ketdi kadagiti nasayaat a kapadasan.​—Efe. 5:9.

AGTULTULOY NGA AGBANTAY

15. Apay a nagpateg ti panagtultuloy nga agbantay?

15 Makita ti kababalintayo bayat nga ikagkagumaantayo nga ad-adda pay a pagsilnagen ti silawtayo. Maulit-ulit nga imparegta ni Jesus kadagiti adalanna: “Agtultuloykayo nga agbantay.” (Mat. 24:42; 25:13; 26:41) No ipapantayo nga adayo pay ken saantayon a makita ti “dakkel a rigat,” ditay marikna ti kinaganat ti panangasaba. (Mat. 24:21) Imbes nga agsilnag ti silawtayo iti lugartayo, agkuridemdem dayta ken mabalin pay ketdi a maiddep.

16, 17. Ania ti aramidem tapno agtalinaedka a managbantay?

16 Bayat a kumarkaro ti kasasaad ita, kasapulantayo amin ti agtultuloy nga agbantay. Sigurado nga agtignayto ni Jehova iti umiso a tiempo. (Mat. 24:42-44) Ngem kabayatanna, agan-anus ken agbantaytayo. Inaldaw a basaentayo ti Sao ti Dios, ken itultuloytayo ti agkararag. (1 Ped. 4:7) Panunotentayo dagiti nasayaat a kapadasan dagiti kakabsat a siraragsak nga agtultuloy nga agbambantay ken mangisilsilnag iti silawda. Naisalaysay ti maysa kadagita iti artikulo a “Pitopulo a Tawen a Kumkumpet iti Pandiling ti Maysa a Judio” iti Abril 15, 2012 a Ti Pagwanawanan, panid 18-21.

17 Okupadoka koma kadagiti makaparegta nga aktibidad ken panaglalangen. Dayta ti mangparagsak kenka, ket dimo mapupuotan nga aglabas ti tiempo. (Efe. 5:16) Adu ti naaramidan dagiti okupado a kakabsattayo iti napalabas a sangagasut a tawen. Ngem ad-adu nga amang ti maar-aramidantayo ita iti panangiwanwan ni Jehova. Ita pay laeng ti kalalawagan a panangisilnagtayo iti silawtayo.

Bayat ti panangipastor dagiti panglakayen, magunggonaantayo iti sirib ti Sao ti Dios (Kitaen ti parapo 18, 19)

18, 19. Kasano a makatulong dagiti panglakayen tapno agtultuloytayo nga alerto ken aktibo? Iyilustrarmo.

 18 Makaparegta a maammuan a saan a lapped ti kinaimperpektotayo tapno awaten ni Jehova ti panagserbitayo. Apresiarentayo koma dagiti impaay ni Jehova a “sagut a tattao,” dagiti panglakayen iti kongregasion. (Basaen ti Efeso 4:8, 11, 12.) No bumisita kenka dagiti panglakayen, dumngegka koma iti nainsiriban a sasao ken balakadda.

19 Adda problema ti maysa a pagassawaan idiay England, ket nagpatulongda iti dua a panglakayen. Marikna ti babai a di maar-aramidan ni lakayna ti naespirituan nga obligasionna. Inamin ti lalaki a saan a nalaing a mangisuro ken awan ti regular a panagdaydayaw ti pamiliada. Imbaga dagiti panglakayen a panunoten ti agassawa ti ulidan ni Jesus. Inaywananna dagiti adalanna ken impaayna dagiti kasapulanda. Imparegta dagiti panglakayen a tuladen ti lalaki ti ulidan ni Jesus. Pinaregtada met ti babai nga agan-anus. Insingasingda met no kasano a makapagtinnulongda para iti panagdaydayaw ti pamiliada a kaduada ti dua nga annakda. (Efe. 5:21-29) Idi agangay, kinomendaran dagiti panglakayen ti panagregget ti lalaki. Pinaregtada a di sumuksuko ken agtalek iti tulong ti nasantuan nga espiritu tapno agbalin a nasayaat a naespirituan nga ulo. Ti naayat nga interes ken suportada ti nakatulong iti daytoy a pamilia a mangisilnag iti silawda.

20. Ania ti manamnamatayo no isilnagtayo ti silawtayo?

20 Inkanta ti salmista: “Naragsak ti tunggal maysa nga agbuteng ken Jehova, a magmagna iti daldalanna.” (Sal. 128:1) No isilnagmo ti silawmo babaen ti panangawismo iti sabsabali nga agserbi iti Dios, babaen ti panangikagumaam a mangpabileg iti panagkaykaysatayo, ken babaen ti panagtalinaedmo a managbantay, ad-addanto a naragsakka. Makita ti sabsabali dagiti nasayaat nga aramidmo, ket adu ti matignay a mangidayaw iti Amatayo.​—Mat. 5:16.