Deuteronomio 10:1-22

  • Adda manen maaramid a dua a tapi (1-11)

  • Ti kiddawen ni Jehova (12-22)

    • Pagbutngan ken ayatenyo ni Jehova (12)

10  “Kinuna idi kaniak ni Jehova, ‘Mangaramidka iti dua a tapi a bato a kas kadagiti immuna,+ ket sumang-atka iti bantay. Mangaramidka met iti lakasa* a kayo.  Isuratkonto kadagita a tapi ti linaon dagiti tapi a binurakmo, ket ikabilmo dagita iti lakasa.’  Gapuna, nangaramidak iti lakasa nga akasia* ken dua a tapi a bato a kas kadagiti immuna ket iggemko dagita a simmang-at iti bantay.+  Kalpasanna, insuratna kadagita a tapi ti sasao nga insuratna kadagiti immuna,+ ti Sangapulo a Bilin,*+ nga imbaga kadakayo ni Jehova idiay bantay manipud iti apuy+ idi aldaw a naguummongkayo,+ ket inted dagita ni Jehova kaniak.  Simmalogak iti bantay+ ket inkabilko dagita a tapi iti lakasa nga inaramidko, ket agtalinaedda iti dayta, kas imbilin kaniak ni Jehova.  “Kalpasanna, pimmanaw dagiti Israelita idiay Beerot Bene-jaakan ket nagturongda idiay Mosera. Natay ken naitabon sadiay ni Aaron,+ ket ni Eleazar nga anakna ti simmukat kas padi.+  Manipud sadiay, nagturongda idiay Gudgoda, ket manipud Gudgoda, nagturongda idiay Jotbata,+ a maysa a daga a pagay-ayusan ti danum.  “Iti daydi a tiempo, pinili ni Jehova ti tribu ni Levi+ tapno bagkatenda ti lakasa ti tulag ni Jehova,+ agserbida iti sanguanan ni Jehova, ken mangbendisionda iti naganna,+ kas iti ar-aramidenda agingga ita.  Dayta ti makagapu nga awan ti bingay ni Levi iti tawid dagiti kakabsatna. Ni Jehova ti tawidna, kas imbaga kenkuana ni Jehova a Diosyo.+ 10  Nagtalinaedak idiay bantay iti 40 nga aldaw ken 40 a rabii+ kas iti immuna nga inaramidko, ket impangagnak manen ni Jehova.+ Inkeddeng ni Jehova a saannakayo a dadaelen. 11  Kalpasanna, kinuna kaniak ni Jehova, ‘Idauluam ti panagluas dagiti tattao tapno makastrek ken matagikuada ti daga nga inkarik kadagidi ammada nga itedko kadakuada.’+ 12  “Ita, O Israel, ania ti kidkiddawen kadakayo ni Jehova a Diosyo?+ Daytoy laeng: agbutengkayo ken Jehova a Diosyo,+ magnakayo iti amin a dalanna,+ ayatenyo, ken agserbikayo ken Jehova a Diosyo iti amin a puso ken iti amin a kararuayo,*+ 13  ken tungpalenyo dagiti bilin ken linteg ni Jehova nga itedko kadakayo ita, agpaay a pagimbaganyo.+ 14  Kukua ni Jehova a Diosyo ti langit, uray ti kangangatuan a langit,* ken ti daga agraman ti amin nga adda iti dayta.+ 15  Ngem inay-ayat ni Jehova dagidi ammayo isu a pinilinakayo a kaputotanda+ manipud iti amin a nasion, a kas ita nga aldaw. 16  Masapul a dalusanyo* dagiti pusoyo+ ita ken isardengyon ti agsukir.*+ 17  Ta ni Jehova a Diosyo ket Dios dagiti dios+ ken Apo dagiti apo, ti Dios a naindaklan, mannakabalin, ken nakaskasdaaw, a saan a mangidumduma+ ken saan a mapasuksokan. 18  Ipakatna ti hustisia iti awanan ama nga ubing* ken balo a babai+ ken ay-ayatenna dagiti ganggannaet a residente,+ nga ikkanna ida iti taraon ken bado. 19  Masapul nga ayatenyo met dagiti ganggannaet a residente, ta kastakay met idi idiay Egipto.+ 20  “Rumbeng a pagbutngan ken pagserbianyo ni Jehova a Diosyo,+ kumpetkayo kenkuana, ken agsapatakayo laeng iti naganna. 21  Isu laeng ti rumbeng a pagdayawanyo.+ Isu ti Diosyo, a nangaramid iti amin a naindaklan ken nakaskasdaaw a banag a nakitayo.+ 22  Idi napan dagidi ammayo idiay Egipto,+ 70 laeng ti bilangda, ngem ita pinagbalinnakayo ni Jehova a kas kaadu dagiti bituen ti langit.+

Footnotes

Wenno “baul.”
Klase ti akasia a siitan nga agtubo iti desierto.
Lit., “ti Sangapulo a Sasao.” Naawagan met iti Dekalogo.
Kitaem ti Glosario.
Lit., “langit dagiti langit.”
Lit., “kugitenyo ti kudil.”
Lit., “diyon patangkenen ti teltelyo.”
Wenno “ulila.”