Umuna a Surat ni Juan 4:1-21

  • Panangsubok no ti pannursuro ket naggapu iti Dios wenno saan (1-6)

  • Panangammo ken panangayat iti Dios (7-21)

    • “Ti Dios ket ayat” (8, 16)

    • Awan ti buteng iti ayat (18)

4  Patpatgek a kakabsat, diyo patien ti tunggal pannursuro* a kasla naggapu iti Dios,+ no di ket subokenyo dagiti pannursuro* a kasla naggapu iti Dios tapno makitayo no nagtaud dagita iti Dios,+ ta adu nga ulbod a propeta ti addan ditoy lubong.+  Daytoy ti pangibatayanyo no naggapu iti Dios ti maysa a pannursuro: No bigbigen dayta a ni Jesu-Kristo ket immay ditoy daga kas tao, nagtaud dayta iti Dios.+  Ngem no dina bigbigen ni Jesus, dayta ket saan a nagtaud iti Dios.+ Kanayonanna, dayta ti pannursuro ti antikristo a nangngegyo nga um-umay,+ ket ita, adda daytan ditoy lubong.+  Ay-ayatek nga annak, nagtaudkayo iti Dios, ket naparmekyo idan,+ ta dakdakkel ti pannakabalin daydiay naikaykaysa kadakayo+ ngem daydiay naikaykaysa iti lubong.+  Nagtaudda iti lubong;+ isu nga agsaoda iti nagtaud iti lubong ket denggen ida ti lubong.+  Nagtaudtayo iti Dios. Dumngeg kadatayo ti asinoman a nakaam-ammo iti Dios;+ ngem saan a dumngeg kadatayo ti asinoman a saan a nagtaud iti Dios.+ Babaen iti dayta, mailasintayo no ania ti pudno a pannursuro* ken ti ulbod a pannursuro.*+  Patpatgek a kakabsat, itultuloytayo ti agiinnayat,+ ta ti ayat ket nagtaud iti Dios. Asinoman nga agayat ket anak ti Dios ken am-ammona ti Dios.+  Asinoman a saan nga agayat ket dina am-ammo ti Dios, ta ti Dios ket ayat.+  Babaen iti daytoy a naipalgak ti ayat ti Dios iti kasasaadtayo, nga imbaonna ti bugbugtong nga Anakna+ ditoy lubong tapno magun-odtayo koma ti biag babaen kenkuana.+ 10  Kastoy ti kaipapanan dayta nga ayat: saan a gapu ta inayattayo ti Dios, no di ket gapu ta inayatnatayo ken imbaonna ti Anakna kas pakikappia a daton*+ para kadagiti basoltayo.+ 11  Patpatgek a kakabsat, no kasta ti panagayat ti Dios kadatayo, obligasiontayo met ti agiinnayat.+ 12  Awan a pulos ti nakakita iti Dios.+ No itultuloytayo ti agiinnayat, agtalinaed ti Dios kadatayo ket agbalin a naan-anay ti ayatna kadatayo.+ 13  Babaen iti daytoy a maammuantayo nga agtalinaedtayo a naikaykaysa kenkuana ken naikaykaysa kadatayo, ta intedna kadatayo ti espirituna. 14  Kanayonanna, nakitami ken saksaksianmi nga imbaon ti Ama ti Anakna a mangisalakan iti lubong.+ 15  Asinoman a mangbigbig a ni Jesus ket Anak ti Dios,+ agtalinaed ti Dios a naikaykaysa kenkuana ken agtalinaed isuna a naikaykaysa iti Dios.+ 16  Naammuantayo nga ay-ayatennatayo ti Dios ket mamatitayo iti dayta.+ Ti Dios ket ayat.+ Daydiay agtultuloy nga agayat ket agtalinaed a naikaykaysa iti Dios ken agtalinaed ti Dios a naikaykaysa kenkuana.+ 17  Gapu iti dayta, ti ayat ket naan-anay a naipakita kadatayo, tapno adda wayawayatayo nga agsao*+ inton aldaw ti panangukom, ta kas kenkuana,* kastatayo met iti daytoy a lubong. 18  Ti buteng ti manglapped kadatayo.+ Ngem awan ti buteng iti ayat, ta ti naan-anay nga ayat ti mangparmek* iti buteng. Kinapudnona, no mabuteng ti maysa, saan a naan-anay ti ayatna.+ 19  Agayattayo ta isu ti immuna a nagayat kadatayo.+ 20  No adda mangibaga: “Ay-ayatek ti Dios,” ngem kagurgurana ni kabsatna, isu ket ulbod.+ Ta ti saan nga agayat iti kabsatna+ a nakitana, saanna a mabalin nga ayaten ti Dios a saanna a nakita.+ 21  Imbilinna kadatayo nga asinoman a mangay-ayat iti Dios masapul nga ayatenna met ti kabsatna.+

Footnotes

Lit., “espiritu.”
Lit., “espiritu.”
Lit., “espiritu.”
Lit., “espiritu.”
Wenno “pangabbong a daton; pamay-an a pangay-ayo.”
Wenno “adda kompiansatayo.”
Kayatna a sawen, ni Jesu-Kristo.
Wenno “mangipanaw.”