[Naimbag a Kalak-aman].

  1. Anak ni Jacob babaen ken Zilpa nga adipen a babai ni Lea, a nangipasngay met iti adingen ni Gad a ni Aser. Idi naipasngay ni Gad idiay Padan-aram agarup 1770 K.K.P., inyebkas ni Lea: “Buyogen ti naimbag a kalak-aman!”; ditoy ti nakaalaan ti nagan a Gad. (Ge 30:9-13; 35:26) Namindua a kimmuyog ni Gad iti kakabsatna a nagdaliasat nga agturong idiay Egipto tapno mangalada iti bukbukel manipud ken Jose. (Ge 42:3; 43:15) Agarup 42 ti tawenna idi immakar a kadua ti pamiliana idiay Egipto a kakuyog ni amana a Jacob idi 1728 K.K.P. (Ge 46:6, 7, 16) Sangapulo ket pito a tawen kalpasanna, idi dandanin matay ni Jacob, binendisionanna ti 12 nga annakna, a kunkunana ken Gad: “No maipapan ken Gad, rubbuotento ti maysa a buyot dagiti tulisan, ngem rubbuotennanto ti adayo a likudan.”​—Ge 49:1, 2, 19.

  2. Ti tribu a nagtaud kadagiti pito nga annak ni Gad. Idi maikadua a tawen kalpasan ti Ipapanaw iti Egipto agdagupen iti 45,650 dagiti mannakigubat ti tribu. (Ge 46:16; Nu 1:1-3, 24, 25) Ti Gad ket kameng iti tallo a tribu a benneg a kadua ti Ruben ken Simeon. Ti disso ti pakarsoda ket iti abagatan ti tabernakulo. (Nu 2:10-16) No agmartsada, ti benneg ti Juda ti umuna, sarunuen dagiti Levita iti pamilia da Gerson ken Merari nga agaw-awit iti tabernakulo, ket sumaruno kadakuada ti benneg a nakaikamengan ti Gad. Ni Eliasaf nga anak ni Deuel ti panguluen ti buyotda. (Nu 10:14-20) Idi nagngudon ti panagdaliasat iti let-ang, dagiti mannakigubat a lallaki ti Gad ket agdagup laengen iti 40,500, a 5,150 ti bimmabaanna.​—Nu 26:15-18.

 Teritoria. Ti trabaho dagiti lallaki iti tribu ti Gad ket kas met laeng trabaho dagiti ammada nga agtartaraken iti dinguen. (Ge 46:32) Gapu itoy, kiniddawda nga agbalin a bingayda a teritoria ti pagpastoran a rehion nga adda iti daya ti Jordan. Pinatgan dayta ni Moises babaen ti panangitudingna kadagitoy a teritoria iti Gad, Ruben, ken iti kagudua ti tribu ni Manases, nga aduan met iti dinguen. Nupay kasta, nangted ni Moises iti kondision a tumulong dagitoy a tribu iti dadduma a mangparmek iti teritoria nga adda iti laud ti Jordan. Immanamongda a dagus, ket kalpasan ti panagibangonda kadagiti bato a kulongan a maipaay kadagiti dinguenda ken kadagiti siudad a maipaay kadagiti ubbingda, impaayda ti nakalikaguman kadakuada a bilang dagiti mannakigubat a bumallasiw iti Jordan tapno parmekenda ti daga. (Nu 32:1-36; Jos 4:12, 13) Ti teritoria ti Gad ket sigud a sakup dagiti Amoreo, nga inabak dagiti Israelita babaen ti panangidaulo ni Moises.​—Nu 32:33; De 2:31-36; 3:8-20.

 Ti pagilian a sakup ti Gad ket saklawenna dagiti nababa a lugar iti kaaduan a paset iti makindaya nga igid ti Karayan Jordan, iti abagatan a gistay agingga iti Natay a Baybay, ken iti amianan agingga iti asideg ti Baybay ti Kinneret. Saklawen met ti teritoria ti Gad dagiti nangatngato a tantanap, agraman ti naapres a ginget ti Jaboc. Isu a ti dakkel a paset ti Galaad ket sakup ti bingay ti Gad. (De 3:12, 13) Iti amianan, ti kabinneddeng ti Gad ket Manases ket Ruben iti abagatan.​—Jos 13:24-28.

  Kalpasan ti pannakaparmek ti daga, imbingayan ni Josue ti Gad iti samsam ket pinagawid ida. Kalpasanna, ti Gad ket nakikadua iti Ruben ken Manases iti panangbangon iti dakkel nga altar iti igid ti Jordan. Nagdanag ti dadduma a tribu gapu iti daytoy ngem nagkalmada idi nailawlawag a ti altar ket naibangon kas pangsaksi a ni Jehova laeng ti pagdaydayawanda, a kas kadagiti tribu iti laud ti Jordan. Daytoy nga altar ti mangpatalged nga awan ti panaglalasin kadagiti tribu iti daya ken laud ti Jordan.​—Jos 22:1-34.

 Amin dagitoy a banag ket maitunos iti pamendision ni Jacob ken Gad: “No maipapan ken Gad, rubbuotento ti maysa a buyot dagiti tulisan, ngem rubbuotennanto ti adayo a likudan.” (Ge 49:19) Saan a nagbutngan ti tribu a ti maysa a deppaar (ti daya) ti beddengda ket nalaka a serken dagiti buyot dagiti tulisan. Saanda a pinili ti agnaed iti makindaya a kabambantayan tapno laeng maliklikanda koma ti makidangadang maipaay iti daga ti Canaan. Ti sasao ni Jacob a pammakadana ken Gad ket kasla bilin nga addaan panagtalek a balsenna dagiti tulisan a mangdarup kenkuana ken lumbes kadagiti beddengna. Mainayon pay, rinubbuot dagiti Gadita dagiti manangrubbuot, a nakaigapuan ti panagtatarayda, ket kalpasanna kinamat dagiti Gadita dagiti adda iti kutit.

 Dinakamat met ni Moises dagiti nasayaat a kualidad ni Gad idi kinunana: “Bendito daydiay mangpalpalawa kadagiti ketegan ni Gad. Agtaengto a kas leon, ket lapgisennanto ti takiag, wen, ti kuppokuppo. Ket piliennanto ti umuna a paset maipaay iti bagina, ta sadiay nailasin ti bingay ti manangted-paglintegan. Ket aguurnongto dagiti pannakaulo dagiti umili. Ti kinalinteg ni Jehova sigurado nga ipakatnanto ken dagiti hudisial a pangngeddengna iti Israel.”​—De 33:20, 21.

 Ti Ramot idiay Galaad, nga adda iti teritoria ti Gad, ket maysa kadagiti intuding ni Moises a siudad a pagkamangan. (De 4:41-43) Ti dadduma pay a siudad dagiti Levita nga adda iti teritoriada ket ti Mahanaim, Hesbon, ken Jazer. (Jos 21:38, 39) Ti siudad ti Dibon, a nakasarakan iti nalatak a Bato a Moabita idi 1868 K.P., ket maysa kadagiti sumagmamano a siudad a binangon manen dagiti Gadita idi sinakupda ti teritoria.​—Nu 32:1-5, 34, 35.

 Timmulong ti Gad ken David. Idi mapengpengdan pay laeng ni David gapu ken Saul, bimmallasiw iti Karayan Jordan ti sumagmamano a panguluen ti buyot manipud iti annak ti Gad bayat nga agliblibbiang daytoy tapno dumasigda ken David idiay Siclag iti Juda. Nadeskribirda kas “mamaingel, nabileg a lallaki, lallaki ti buyot maipaay iti gubat, mamagtalinaed a nakasagana ti dakkel a kalasag ken ti gayang, a dagiti rupada ruprupa dagiti leon, ket kaslada kadagiti gasela iti rabaw dagiti bantay no iti kapardas. . . . Daydiay kababassitan katupagna ti sangagasut, ket ti kadadakkelan katupagna ti sangaribu.” (1Cr 12:1, 8-15) Idi nakirupakda kadagiti Hagrita ken kadagiti kaaliansa dagitoy, naikuna maipapan kadakuada (a pakairamanan ti Ruben ken Manases): “Ta ti Dios ti immasuganda iti tulong iti gubat, ket impalubosna nga isu mapagpakaasian iti pabor kadakuada agsipud ta nagtalekda kenkuana.” Kas resultana, natnag iti im-imada ti nakaad-adu a kautibo ken adu a dinguen.​—1Cr 5:18-22.

 Simmurotda ken Jeroboam. Idi nabingay ti pagarian, sinuportaran ti tribu ti Gad ti makin-amianan a dasig nga iturturayan ni Jeroboam. Tawtawen kalpasanna, idi a “rinugian ni Jehova a gupedgupeden ti Israel” idi kaaldawan ni Jehu, ti Gad a nalaka a serken ti makindaya a beddengna ket nagbalin a karaman iti disso a pagbabakalan iti nagbaetan ti makin-amianan a pagarian ti Israel ken Siria. (2Ar 10:32, 33) Idi agangay, ti Gad ket pinarmek ni Tiglat-pileser III nga ari ti Asiria, ket innalana kas kautibo dagiti agnanaed sadiay. Nangted daytoy iti gundaway tapno matagikua dagiti Ammonita daytoy a teritoria.​—2Ar 15:29; 1Cr 5:26; Jer 49:1.

 Iti naimpadtuan a sirmata ni Ezequiel maipapan iti pannakabingaybingay ti daga, ti bingay a naituding iti Gad ket isu ti kaabagatanan. (Eze 48:27, 28) Iti listaan dagiti tribu ti Israel iti Apocalipsis kapitulo 7, ti Gad ti maikatlo a nadakamat.

  3. Maysa a mammadto ken managsirmata. Binalakadanna ni David nga agsubli idiay Juda idi agnanaed “iti di madanon a disso” iti rukib ti Adullam kas maysa a pugante manipud ken Saul. (1Sm 22:1-5) Idi sidudursok a nagsensus ni David bayat ti naud-udi a paset ti panagturayna, babaen ken Gad nangidatag ni Jehova iti tallo a dusa a pagpilian ni David. Idi agangay, ni Gad binalakadanna ni David a mangbangon iti maysa nga altar agpaay ken Jehova iti pagirikan ni Arauna (Ornan). (2Sm 24:10-19; 1Cr 21:9-19) Nakipaset ni Gad iti pannakaorganisar dagiti musikero agpaay iti santuario. (2Cr 29:25) Kaaduanna a maikunkuna a da Natan ken Gad ti nangileppas iti Umuna a Samuel ken nangisurat iti intero a Maikadua a Samuel.​—1Cr 29:29.