Deuteronomio 4:1-49

  • Bilin a panagtulnog (1-14)

    • Saan a pananglipat kadagiti aramid ti Dios (9)

  • Kiddawen ni Jehova ti naipamaysa a debosion (15-31)

  • Awan sabali a Dios no di ni Jehova (32-40)

  • Dagiti siudad a pagkamangan iti daya ti Jordan (41-43)

  • Introduksion iti Linteg (44-49)

4  “Denggenyo, O Israel, dagiti regulasion ken pangngeddeng nga isurok nga aramidenyo, tapno agbiagkayo+ ket makastrek ken matagikuayo ti daga nga ited kadakayo ni Jehova, a Dios dagidi ammayo.  Saanyo a nayonan wenno kissayan ti sao nga ibilinko kadakayo,+ tapno matungpalyo dagiti bilin ni Jehova a Diosyo nga ibagak kadakayo.  “Nakitayo ti inaramid ni Jehova gapu ken Baal ti Peor. Pinatay ni Jehova a Diosyo iti tengngayo ti amin a nagdaydayaw ken Baal ti Peor.+  Ngem dakayo amin a matalek ken Jehova a Diosyo ket sibibiag agingga ita.  Insurok kadakayo dagiti regulasion ken pangngeddeng,+ kas imbilin ni Jehova a Diosko, tapno tungpalenyo dagita iti daga a tagikuaenyo.  Masapul a tungpalenyo a naimbag dagitoy+ tapno makita dagiti tattao a makadamag kadagitoy a regulasion a masirib+ ken mannakaawatkayo+ ket ibagadanto, ‘Talaga a masirib ken mannakaawat daytoy a dakkel a nasion.’+  Ta ania a dakkel a nasion ti addaan kadagiti dios nga asideg kadakuada a kas iti kaasideg kadatayo ni Jehova a Diostayo tunggal umawagtayo kenkuana?+  Ken ania a dakkel a nasion ti addaan kadagiti nalinteg a regulasion ken pangngeddeng a kas iti intero a Linteg nga isursurok kadakayo ita?+  “Agannadkayo tapno saanyo a malipatan dagiti nakitayo ken tapno saan a maisina dagita iti pusoyo iti intero a panagbiagyo. Masapul met nga ipakaammoyo dagita iti annak ken appokoyo.+ 10  Idi nagtakderkayo iti sanguanan ni Jehova a Diosyo idiay Horeb, kinuna kaniak ni Jehova, ‘Ummongem dagiti tattao tapno mangngegda ti ibagak,+ ket masursuroda ti agbuteng kaniak+ bayat ti panagbiagda ken tapno maisuroda dagiti annakda.’+ 11  “Gapuna, immasideg ken nagtakderkayo iti sakaanan ti bantay, ket umap-apuy idi ti bantay agingga iti langit.* Adda kinasipnget ken napuskol a nangisit nga ulep.+ 12  Nagsao kadakayo ni Jehova manipud iti apuy.+ Nangngegyo ti imbagana ngem saanyo a nakita ti langana+—ti laeng timekna.+ 13  Imbagana ti tulagna kadakayo,+ nga imbilinna nga aramidenyo—ti Sangapulo a Bilin.*+ Kalpasanna, insuratna dagita iti dua a tapi a bato.+ 14  Binilinnak idi ni Jehova nga isurok kadakayo dagiti regulasion ken pangngeddeng, a masapul a surotenyo iti daga a serken ken tagikuaenyo. 15  “Gapuna, agannadkayo—ta awan ti nakitayo a langa ni Jehova idi nagsao kadakayo idiay Horeb iti tengnga ti apuy— 16  tapno saankayo nga agaramid iti di umiso babaen ti panangaramidyo iti aniaman a kinitikitan nga imahen a kapada ti lalaki wenno babai,+ 17  kapada ti aniaman nga animal ditoy daga wenno aniaman a billit iti tangatang,+ 18  kapada ti aniaman nga agkarkarayam iti daga wenno aniaman nga ikan nga adda iti danum.+ 19  No tumangadkayo iti langit ket makitayo ti init, bulan, ken dagiti bituen—ti intero nga armada ti langit—saankayo a masulisog nga agruknoy ken agserbi kadagita.+ Inted dagita ni Jehova a Diosyo iti amin a tattao iti baba ti langit. 20  Ngem dakayo ti innala ken inruar ni Jehova iti urno a pagtunawan iti landok, idiay Egipto, tapno agbalinkayo nga ili a kukuana,*+ a kas ita nga aldaw. 21  “Nakapungtot kaniak ni Jehova gapu kadakayo,+ ket inkarina a saanak a bumallasiw iti Jordan wenno mapan iti nasayaat a daga nga ited ni Jehova a Diosyo kas tawidyo.+ 22  Ta matayakto iti daytoy a daga. Saanak a bumallasiw iti Jordan,+ ngem bumallasiwkayo ket tagikuaenyo dayta a nasayaat a daga. 23  Agannadkayo tapno diyo malipatan ti tulag kadakayo ni Jehova a Diosyo,+ ken dikay mangaramid iti kinitikitan nga imahen a kapada ti aniaman nga imparit ni Jehova a Diosyo.+ 24  Ta ni Jehova a Diosyo ket kasla iti mangibus nga apuy,+ maysa a Dios nga agkidkiddaw iti naipamaysa a debosion.+ 25  “No maaddaankayto iti annak ken appoko ken nabayagen nga agnanaedkayo iti dayta a daga ket agtignaykayo iti di umiso ken agaramidkayo iti aniaman a kinitikitan nga imahen+ ken aramidenyo ti dakes iti imatang ni Jehova a Diosyo, ket makapungtot kadakayo,+ 26  saksik ti langit ken daga maibusor kadakayo ita nga aldaw a sigurado a madadaelkayto a dagus iti daga a tagikuaenyo iti ballasiw ti Jordan. Saanto nga agpaut ti biagyo, no di ket maibuskayto.+ 27  Iwarawaranakayto ni Jehova iti tengnga dagiti nasion,+ ket manmanonto laeng kadakayo ti makalasat+ kadagiti nasion a nangipanan kadakayo ni Jehova. 28  Agserbikayto sadiay kadagiti didiosen a kayo ken bato nga inaramid ti tao,+ dagiti didiosen a saan a makakita, makangngeg, makapangan, wenno makaangot. 29  “No sapulenyo sadiay ni Jehova a Diosyo, sigurado a masarakanyonto,+ no birokenyo iti amin a puso ken iti amin a kararuayo.*+ 30  No agsagabakayto iti nakaro a rigat ket mapasamak kadakayo amin dagitoy, agsublikayto ken Jehova a Diosyo ken denggenyo ti timekna.+ 31  Ta ni Jehova a Diosyo ket naasi a Dios.+ Saannakayto a baybay-an wenno dadaelen ken saannanto a lipaten ti tulagna kadagidi ammayo.+ 32  “Lagipenyo dagidi immuna nga aldaw, manipud idi pinarsua ti Dios ti tao iti daga; sukimatenyo ti maysa nga ungto ti daga agingga iti bangir nga ungtona. Adda kadi aniaman a nadamag wenno nangngegyo a nakaskasdaaw a pasamak a kas iti daytoy?+ 33  Adda kadi sabali a nasion a nakangngeg iti timek ti Dios nga agsasao iti tengnga ti apuy a kas iti pannakangngegyo ngem nagtalinaedkayo a sibibiag?+ 34  Wenno adda kadi sabali a nasion nga innala ti Dios iti tengnga ti maysa a nasion? Nangipakita kadi kadagiti pannusa,* pagilasinan, milagro,+ gubat,+ mannakabalin nga ima,+ nabileg* a takiag, ken nakabutbuteng nga aramid,+ a kas iti nakitayo nga inaramid ni Jehova a Diosyo idiay Egipto? 35  Naipakita amin dagitoy tapno maammuanyo a ni Jehova ti pudno a Dios,+ awanen sabali.+ 36  Impangngegna kadakayo ti timekna manipud langit tapno ilintegnakayo, ken impakitana kadakayo ditoy daga ti nakaskasdaaw nga apuyna, ket nangngegyo ti timekna manipud iti apuy.+ 37  “Gapu ta ay-ayatenna dagidi ammayo ken pinilina ti kaputotanda* a sumaruno kadakuada,+ nairuarkayo idiay Egipto iti sanguananna babaen ti dakkel a pannakabalinna. 38  Pinapanawna dagiti nasion a dakdakkel ken nabilbileg ngem dakayo tapno maiserreknakayo ken maitedna kas tawidyo ti dagada, a kas ita nga aldaw.+ 39  Ammuenyo ngarud ita nga aldaw, ken laglagipenyo a ni Jehova ti pudno a Dios iti langit ken iti daga.+ Awanen sabali.+ 40  Masapul a surotenyo dagiti regulasionna ken dagiti bilinna nga itedko kadakayo ita, tapno nasayaatto ti pagbanaganyo ken dagiti annakyo, ket makapagbayagkayto iti daga nga ited kadakayo ni Jehova a Diosyo.”+ 41  Iti dayta a tiempo, nangilasin ni Moises iti tallo a siudad iti makindaya a paset ti Jordan.+ 42  No adda di inggagara a makapatay iti padana a tao ngem saanna a kagurgura,+ masapul nga agkamang iti maysa kadagita a siudad tapno agbiag.+ 43  Dagitoy a siudad ket ti Bezer+ nga adda iti let-ang iti tanap* para kadagiti Rubenita, ti Ramot+ idiay Gilead para kadagiti Gadita, ken ti Golan+ idiay Basan para kadagiti Manasesita.+ 44  Daytoy ti Linteg+ nga inted ni Moises kadagiti Israelita. 45  Dagitoy ti palagip, regulasion, ken pangngeddeng nga inted ni Moises kadagiti Israelita kalpasan a rimmuarda idiay Egipto,+ 46  iti rehion ti Jordan, iti tanap iti sanguanan ti Bet-peor,+ iti daga ni Ari Sihon dagiti Amoreo, nga agnanaed idi idiay Hesbon,+ a pinarmek ni Moises ken dagiti Israelita kalpasan a rimmuarda idiay Egipto.+ 47  Tinagikuada ti dagana ken ti daga ni Ari Og+ ti Basan, ti dua nga ari dagiti Amoreo nga adda iti daya ti Jordan, 48  manipud Aroer,+ nga adda iti igid ti Tanap ti Arnon,* agingga iti Bantay Sion, kayatna a sawen, Hermon,+ 49  ken ti intero nga Araba iti rehion iti daya ti Jordan, agingga iti Baybay ti Araba,* iti sakaanan ti Pisga.+

Footnotes

Lit., “agingga iti puso ti langit.”
Lit., “ti Sangapulo a Sasao.” Naawagan met iti Dekalogo.
Wenno “tawidna.”
Kitaem ti Glosario.
Wenno “pannubok.”
Lit., “nakaunnat.”
Lit., “bin-ida.”
Wenno “patag a tuktok ti bantay.”
Wenno “Karayan Arnon.”
Kayatna a sawen, ti Asin a Baybay, wenno ti Natay a Baybay.