Kapitulo Dise Sais

“Maaddaankayo iti Nasged nga Ayat iti Maysa ken Maysa”

1. Ania ti masansan a mangtukay iti rikna dagiti damo a tumabuno kadagiti gimong dagiti Saksi ni Jehova?

NO DAMO a tumabuno dagiti tattao kadagiti gimong dagiti Saksi ni Jehova, masansan a matukay ti riknada iti ayat a maipakita sadiay. Mapaliiwda dayta iti panangabrasa kadakuada ken iti nabara a panaglalangen. Dayta nga ayat ti madlaw met dagiti bisita kadagiti kombension. Maysa a reporter ti nagsurat maipapan iti maysa a kombension: ‘Awan ti nakadroga wenno nakainum iti arak. Awan ti agbibinnugkaw. Awan ti agdidinnuron. Awan ti agsisinnalapon. Awan ti agsapata wenno agilunod. Awan dagiti narugit nga angaw wenno naalas a sasao. Awan ti agsigsigarilio. Awan ti agtaktakaw. Awan ti agiwarwara kadagiti lata iti arubayan. Talaga a karkarna.’ Amin dagitoy ket pammaneknek iti kita ti ayat a “saan a naalas ti panagtigtignayna, saanna a sapulen dagiti bukodna a pagimbagan.”​—1 Corinto 13:4-8.

2. (a) Iti panaglabas ti tiempo, ania koma ti agminar no maipapan iti panangipakitatayo iti ayat? (b) Kas panangtulad ken Kristo, ania a kita ti ayat ti masapul a sukayentayo?

² Ti nainkabsatan nga ayat ti pagilasinan iti pudno a Kristiano. (Juan 13:35) Bayat a rumangrang-aytayo iti naespirituan, masursurotayo nga iyebkas a naan-anay ti ayat. Inkararag ni apostol Pablo nga “umadu koma nga ad-adda pay” ti ayat ti padana a Kristiano. (Filipos 1:9) Impakita ni apostol Juan a nasken a managsakripisio ti ayattayo. Insuratna: “Babaen itoy naammuantayo ti ayat, agsipud ta [ti Anak ti  Dios] insukona ti kararuana maipaay kadatayo; ket pagrebbengantayo nga isuko dagiti kararuatayo maipaay kadagiti kakabsattayo.” (1 Juan 3:16; Juan 15:12, 13) Talaga kadi nga isakripisiotay ti biagtayo para kadagiti kakabsat? Nupay saan a kalikaguman dayta ti kaaduan a kasasaad, kasano kadakkel ti panangikagumaantayo a tumulong kadakuada ita, uray saan a kombiniente kadatayo?

3. (a) Iti ania a wagas a mabalintay nga iyebkas a naan-anay ti ayattayo? (b) Apay a napateg ti nasged a panagayat iti maysa ken maysa ita?

³ Malaksid iti kababalin a mangyanninaw iti kinamanagsakripisio, masapul a pudpudno a nadungngotayo kadagiti kakabsat. Idagadag kadatayo ti Sao ti Dios: “Iti nainkabsatan nga ayat maaddaankayo iti kinalailo iti maysa ken maysa.” (Roma 12:10) Kasta ti panagriknatayo iti dadduma a tattao. Ngem mabalin kadi nga agbalintayo pay a nadungngo iti sabsabali? Bayat nga umad-adani ti panungpalan daytoy daan a sistema, napateg a nasingedtayo kadagiti pada a Kristiano. Kuna ti Biblia: “Ti panungpalan ti amin a bambanag immasidegen. . . . Kangrunaan iti amin, maaddaankayo iti nasged nga ayat iti maysa ken maysa, agsipud ta ti ayat abbonganna ti nakaad-adu a basol.”​—1 Pedro 4:7, 8.

No Tumaud Dagiti Parikut

4. (a) Apay a tumaud ti parikut iti nagbabaetan dagiti kameng ti kongregasion? (b) Ania ti pagimbaganna no iyaplikartayo ti balakad ti Biblia, nupay saan a kanayon a kasta ti pagannayasantayo?

⁴ Siempre, bayat nga imperpektotayo, makaaramidtay latta kadagiti banag a makasair iti dadduma. Makabasol met kadatayo dagiti kakabsat iti nadumaduma a wagas. (1 Juan 1:8) No maipasangokayo iti kasta a kasasaad, ania ti nasken nga aramidenyo? Ipaay ti Kasuratan ti kasapulan a panangiwanwan. Ngem mabalin a naiduma dayta iti pagannayasantayo nga aramiden kas imperpekto a tattao. (Roma  7:21-23) Kaskasdi, ti panangikagumaantayo a mangyaplikar iti balakad ti Biblia paneknekanna a desididotayo a mangay-ayo ken Jehova. Parayrayenna pay ti ayattayo iti sabsabali.

5. No adda mangsair kadatayo, apay a ditay koma agibales?

⁵ No masair dagiti tattao, pasaray agbirokda iti pamay-an a makabales. Ngem pakaruenna laeng ti kasasaad. No datayo man ti agrabiado, ipabiangtay laengen iti Dios. (Proverbio 24:29; Roma 12:17-21) Nalabit a liklikan ti dadduma dagiti nakabasol kadakuada. Ngem ditay koma aramiden dayta kadagiti padatayo nga agdaydayaw, yantangay makaay-ayo laeng ti panagdayawtayo no ay-ayatentayo dagiti kakabsat. (1 Juan 4:20) Gapuna, insurat ni Pablo: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo.” (Colosas 3:13) Maaramidyo kadi dayta?

6. (a) Kasano koma kasansan a pakawanentayo dagiti kakabsat? (b) Ania ti tumulong kadatayo a maaddaan iti umiso a panangmatmat no adda makabasol kadatayo?

⁶ Komusta no adda maulit-ulit nga agbasol kadatayo ngem saan a nadagsen a basol tapno mailaksid iti kongregasion? Kadagiti kasta a basol, insingasing ni apostol Pedro ti panangpakawan iti “mamimpito.” Ngem kinuna ni Jesus: “Saan nga, Agingga iti mamimpito, no di ket, Agingga iti mamimpitopulo ket pito.” Impakitana ti kadakkel ti utangtayo iti Dios no idilig iti mabalin nga utang kadatayo ti asinoman a tao. (Mateo 18:21-35) Kada aldaw, agbasbasoltayo iti Dios iti adu a pamay-an​—no dadduma babaen ti managimbubukod nga aramid, babaen ti panagsasao wenno panagpampanunot, wenno adda ditay naaramid, ket ditayo ammo nga agbasbasoltayon. (Roma 3:23) Ngem agtultuloy  a naasi kadatayo ti Dios. (Salmo 103:10-14; 130:3, 4) Kalikagumanna a kastatayo met koma iti maysa ken maysa. (Mateo 6:14, 15; Efeso 4:1-3) Iti kasta, iparparangarangtayo ti kita ti ayat a ‘di manging-ingpen iti pannakadangran.’​—1 Corinto 13:4, 5; 1 Pedro 3:8, 9.

7. Ania ti nasken nga aramidentayo no adda sakit ti nakemna kadatayo ti kabsat?

⁷ No dadduma mabalin a madlawtayo a nupay awan ti ing-ingpentayo iti maysa a kabsat, adda sakit ti nakemna kadatayo. Kas isingasing ti 1 Pedro 4:8, nalabit kayattayo nga ‘abbongan dayta iti ayat.’ Wenno mabalin a datayo ti umuna a makitungtong kenkuana ket ikagumaantayo ti makikappia.​—Mateo 5:23, 24.

8. No ti maysa a kapammatian ket makaaramid iti makaparurod kadatayo, ania ti mabalin nga aramiden iti dayta?

⁸ Mabalin nga adda ar-aramiden ti maysa a kapammatian a makaparurod saan la a kadakayo no di ket uray iti dadduma. Saan kadi a nasaysayaat a pakisaritaan daytoy kenkuana? Nalabit. No personal nga ilawlawagyo kenkuana ti parikut iti naayat a wagas, mabalin a nasayaat dagiti resultana. Ngem saludsodanyo pay nga umuna ti bagiyo: ‘Talaga kadi a saan a nainkasuratan ti ar-aramidenna? Wenno ti kangrunaan a problema ket gapu ta agduma ti nalikudan ken nakairuamanmi?’ Agannadkayo di la ket ta mangipaspasdekkay iti bukodyo a pagannurotan sa mangukomkayo maibatay kadagita. (Santiago 4:11, 12) Awan panangidumduma nga awaten ni Jehova dagiti tattao manipud iti amin a kita ti nalikudan ken an-anusanna ida bayat nga agmatmataenganda iti naespirituan.

9. (a) Siasino ti mangtaming kadagiti nadagsen a panagbasol iti uneg ti kongregasion? (b) Kaano a ti tao a nakabasolan ti addaan iti responsabilidad nga agtignay nga umuna, ken buyogen ti ania a kalat?

⁹ No adda asinoman iti kongregasion a makaaramid iti nadagsen a basol, kas iti imoralidad, nasken a mataming a  dagus. Siasino ti mangtaming? Dagiti panglakayen. (Santiago 5:14, 15) Ngem no panagbasol dayta iti maysa a tao, nalabit iti negosio wenno iti makadangran a panangusar iti dila, ti tao a nakabasolan ti umuna koma nga umasideg iti nakabasol iti pribado a pamay-an. (Mateo 18:15) No saan a marisut ti parikut, masapul a maipakat dagiti sumaruno nga addang, kas naibalabala iti Mateo 18:16, 17. Ti ayat ken tarigagay a ‘magun-od’ ti nakabasol a kabsat tulongannatayo a mangaramid iti daytoy iti wagas a makagutugot iti pusona.​—Proverbio 16:23.

10. No tumaud ti parikut, ania ti tumulong kadatayo a mangmatmat a siuumiso iti dayta?

¹⁰ No rumsua ti parikut, nadagsen man wenno simple, pagsayaatantayo no ikagumaantay a tarusan ti panangmatmat  ni Jehova iti dayta. Dina anamongan ti aniaman a kita ti basol, ket iti inkeddengna a tiempo, mailaksid manipud organisasionna dagiti agar-aramid iti nakaro a basol a di agbabawi. Ngem ditay koma liplipatan a makaaramidtayo amin iti babassit a basol isu a kasapulantayo ti mabayag a panagitured ken asina. Intuyang ngarud ni Jehova ti pagwadan a tuladentayo no adda makabasol kadatayo. No naasitayo, iyan-anninawtay ti ayatna.​—Efeso 5:1, 2.

Birokenyo Dagiti Pamay-an a ‘Lumawa’

11. Apay a pinaregta ni Pablo dagiti taga Corinto a ‘lumawada’?

¹¹ Binusbos ni Pablo ti sumagmamano a bulan a nangpabileg iti kongregasion idiay Corinto, Grecia. Inggaedna ti timmulong kadagiti kakabsat sadiay, ken inayatna ida. Ngem saan a nadungngo kenkuana ti dadduma. Manangbabalawda unay. Indagadagna kadakuada a ‘lumawada’ iti panangyebkas iti ayat. (2 Corinto 6:11-13; 12:15) Pagsayaatantay amin no usigentayo ti kadakkel ti panagreggettayo a mangyebkas iti ayat kadagiti sabsabali ken no birokentayo dagiti pamay-an a mapalawa ti ayat.​—1 Juan 3:14.

12. Kasano a rumayray ti panagayattayo iti amin nga adda iti kongregasion?

¹² Adda kadi kakabsat iti kongregasion a ditay kadutdotan? No ikagumaantayo a palabsen ti aniaman a di pagtunosan gapu iti panagduma ti personalidad​—no kasano a kayattay a kasta ti aramidenda kadatayo​—makatulong dayta tapno sumingedtayo kadakuada. Lumag-an met ti riknatayo kadakuada no biroken ken ipamaysa ti atensiontayo kadagiti nasayaat a galadda. Sigurado a parayrayenna ti panagayattayo kadakuada.​—Lucas 6:32, 33, 36.

13. Kasano a lumawatay iti panangipakita iti ayat kadagidiay kakongregasiontayo?

¹³ Aminentayo nga adda limitasionna ti maaramidtayo iti sabsabali. Nalabit a ditayo makablaawan ti amin a tumabuno  iti kada gimong. Mabalin nga imposible a maimbitarantayo ida amin no awisentayo ti gagayyem iti maysa a pannangan. Ngem mabalintayo kadi ti lumawa babaen ti panangbusbos iti sumagmamano a minuto a mangam-ammo pay kadagiti kakongregasiontayo? Mabalin kadi nga awisentayo sagpaminsan ti maysa a kabsat a ditay unay am-ammo tapno kaduatayo a mangasaba?

14. No kaduatayo dagiti Kristiano a ditay am-ammo, kasanotayo a maipakita ti nasged nga ayat iti maysa ken maysa?

¹⁴ Dagiti Nakristianuan a kombension ket mangted iti nagsayaat a gundaway tapno mapalawa ti ayattayo. Mabalin a rinibu ti tumabuno. Ditay maam-ammo ida amin, ngem mabalintay ti agtignay iti pamay-an a mangipakita nga ipangpangrunatayo ti pagimbaganda. Iti baet dagiti sesion, maipakitatay ti personal nga interes no ikagumaantayo ti makiam-ammo kadagidiay adda iti asidegtayo. Dumtengto ti aldaw inton ti amin a sibibiag ditoy daga ket agkakabsat, a sangsangkamaysa nga agdaydayaw iti pudno a Dios ken Ama ti amin. Anian a ragsak nga agiinnammonto ti tunggal maysa! Ti nasged nga ayat tignayennatayo a mangaramid iti dayta. Apay a dikay rugian itan?

Panagrepaso

• No tumaud dagiti parikut iti nagbabaetan dagiti Kristiano, kasano koma a risuten dagita, ken apay?

• Bayat nga agmatmataengantayo iti naespirituan, kadagiti ania a wagas a rumayray met koma ti ayattayo?

• Kasano a posible a maipakita ti nasged nga ayat uray kadagiti saantayo a kasinged a gagayyem?

[Salsaludsod]

[Ladawan iti panid 148]

Maiparangarang ti Nakristianuan nga ayat iti adu a wagas, kas kadagiti gimong ti kongregasion