Daniel 1:1-21

  • Linakub dagiti taga-Babilonia ti Jerusalem (1, 2)

  • Espesial a pannakasanay dagiti agtutubo nga innala ti ari (3-5)

  • Nasubok ti kinamatalek ti uppat a Hebreo (6-21)

1  Iti maikatlo a tawen ti panagturay ni Ari Jehoiakim+ ti Juda, immay ni Nabucodonosor nga ari ti Babilonia iti Jerusalem ket linakubna dayta.+  Idi agangay, inted ni Jehova ni Ari Jehoiakim ti Juda iti ima ni Nabucodonosor,+ agraman ti dadduma nga alikamen iti balay* ti pudno a Dios. Impanna dagita iti balay* ti diosna idiay Sinar*+ sana inkabil iti pagidulinan iti gameng ti diosna.+  Kalpasanna, imbilin ti ari ken ni Aspenaz a panguluen nga opisial iti palasiona a mangala iti sumagmamano nga Israelita,* agraman dagidiay naggapu iti pamilia ti ari ken dagiti natan-ok.+  Masapul nga agtutuboda* nga awan a pulos ti depekto ti bagida, nataer, masirib, nalaing, mannakaawat,+ ken kabaelanda ti agserbi iti palasio ti ari. Masapul nga isurona ida iti panagsurat ken iti lengguahe dagiti Caldeo.  Imbilin pay ti ari nga inaldaw a maikkanda kadagiti espesial a taraon ti ari ken iti arak nga in-inumenna. Agsanayda* iti tallo a tawen ket kalpasanna, agserbidan iti ari.  Karaman kadakuada ti dadduma manipud iti tribu* ni Juda: Da Daniel,*+ Hananias,* Misael,* ken Azarias.*+  Inikkan ida ti panguluen nga opisial iti palasio iti naganda;* Beltesazar+ ti impanaganna ken Daniel, Sidrak ti impanaganna ken Hananias, Mesak ti impanaganna ken Misael, ken Abednego+ ti impanaganna ken Azarias.  Ngem inkeddeng ni Daniel a saan a mangan kadagiti espesial a taraon ti ari wenno uminum iti arakna ta karaman dagita kadagiti narugit a banag sigun iti linteg ti Dios. Isu a kiniddawna iti panguluen nga opisial iti palasio a saan a mangan ken uminum kadagita tapno saan a marugitan ti bagina.  Tinignay ti pudno a Dios ti panguluen nga opisial iti palasio tapno paboran* ken kaasianna ni Daniel.+ 10  Ngem kinuna ti panguluen nga opisial iti palasio ken Daniel: “Mabutengak iti apo ari. Isu ti nangibilin iti rumbeng a kanen ken inumenyo. Kasanon no makitanakayto a saan a kas kasalun-at dagiti katawenanyo nga agtutubo?* Siakto* la ketdi ti pabasolen ti ari.” 11  Ngem imbaga ni Daniel iti pinili ti panguluen nga opisial iti palasio a mangaywan kenkuana ken kada Hananias, Misael, ken Azarias: 12  “Pangngaasim ta subokennakami nga adipenmo iti 10 nga aldaw. Ikkannakami laeng iti natnateng a kanenmi ken iti danum nga inumenmi; 13  sa ikomparamto ti langami kadagiti agtutubo* a mangmangan kadagiti espesial a taraon ti ari, ket agdesisionkanto sigun iti makitam a langami.” 14  Isu a pinatganna ti kiddawda ket sinubokna ida iti 10 nga aldaw. 15  Idi nalpas ti 10 nga aldaw, nasaysayaat ti langada ken nasalsalun-atda* ngem iti amin nga agtutubo* a mangmangan kadagiti espesial a taraon ti ari. 16  Manipud idin, intultuloyna ida nga inikkan iti natnateng imbes a kadagiti espesial a taraon ken arak. 17  Impaayan ti pudno a Dios dagitoy nga uppat nga agtutubo* iti sirib, pannakaammo, ken pannakatarus iti amin a kita ti sursurat; ken impaayanna ni Daniel iti pannakaawat iti amin a kita ti sirmata ken tagtagainep.+ 18  Idi nalpasen ti tiempo nga inkeddeng ti ari a panagsanayda,+ impan ida ti panguluen nga opisial iti palasio iti sango ni Nabucodonosor. 19  Idi kasarita ida ti ari, awan iti intero a grupo ti kas kada Daniel, Hananias, Misael, ken Azarias;+ ket intultuloyda ti nagserbi iti ari. 20  Aniaman a saludsoden ti ari kadakuada nga agkasapulan iti sirib ken pannakaawat, nakitana a maminsangapulo a nalalaingda ngem iti amin a salamangkero a papadi ken madyikero+ iti intero a pagturayanna. 21  Nagtalinaed sadiay ni Daniel agingga iti umuna a tawen ti panagturay ni Ari Ciro.+

Footnotes

Wenno “templo.”
Wenno “templo.”
Kayatna a sawen, ti Babilonia.
Lit., “annak a lallaki ti Israel.”
Lit., “ubbingda.”
Wenno mabalin a, “Maaywananda.”
Lit., “annak a lallaki.”
Kaipapananna, “Ti Dios ti Ukomko.”
Kaipapananna, “Nangipakita ni Jehova iti Pabor.”
Mabalin a kaipapannanna, “Asino ti kas iti Dios?”
Kaipapananna, “Timmulong ni Jehova.”
Kayatna a sawen, naganda idiay Babilonia.
Wenno “ipakitaanna iti kinaimbag.”
Lit., “ubbing.”
Lit., “Ti ulokto.”
Lit., “ubbing.”
Lit., “naluklukmegda.”
Lit., “ubbing.”
Lit., “ubbing.”