Matthew 9:1-38
9 Jesus waị arụma leiwẹrị bẹịn wó ama* amúmị.
2 Kịmịama, bara mọ bụọ mọ fịịwẹrị obine asụịntimi kịmị sibe Jesus yarịmị. Ómịnị ánị nanawẹrịemi peibulu bị ẹrị ifiemị, ómịnị gbaa akị bara mọ bụọ mọ fịịdẹ owei pịrịmị: “Tọbọụ malafakụmọ, iné seibo kọn ị́ bụọmọdẹ.”
3 Anịa zụa oloko tolumo-otuama gbaa zọzọ pịrịmị: “Bei kịmị bị opubara ka kị Ayiba diiseimọmịnị.”
4 Jesus ánị iroromịnị yebo nimiwẹrịemi duonị, gbaa á pịrịmị: “Tetuu kị duonị ámịnị ánị adụdụbo sei yeama iroromịnị a o?
5 ‘Iné seibo kọn ị́ bụọmọdẹ’ gbaamụ yọ mọ, ‘seritịẹdá wẹnị’ gbaamụ yọ mọ, te ye kị bọụbọụ dẹịn-emi a o?
6 Anịa, Kịmịtọbọụ yaị bị kiriogboma sei bụọmọmụ kụrọ nanawẹrịemi bara ị mọ mịẹ á dịa.” Jesus gbaa akị bara mọ, bụọ mọ fịịdẹ owei pịrịmị: “Seritịẹ, iné obine sibedá warị amú.”
7 Kịmị bị seritịẹwẹrị warị amúmị.
8 Kịmịbo paayemị ẹrị ifiemị, malafamị. Bá Ayiba, bịsẹ kụrọ kọn kịmịawọụ pịrịmịnị owei kpọ tokonimị.
9 Jesus bịsẹ yọma barasiinwẹrị wẹnị bọlọụ amúmịnịmị, Matthew tịịnmịnị owei tịbịsaa gbẹẹmịnị warị atịtẹ-emi bara ẹrịmị. Jesus gbaa ụ pịrịmị: “Bo ine tuuduo-owei apaa.” Ómịnị seritịẹwẹrị Jesus atuuduomị.
10 Bịsẹ ifie bụọdẹmị, Jesus Matthew warịma timi fịyaị fịtimimị, tịbịsaa bii otuama mọ, seiyaị mịẹ otuama mọ, bo Jesus mọ, wó tuuduo-otubo mọ sụọmọwẹrị fịyaị fịmị.
11 Farisi-otubo paayemị ẹrị ifiemị, ámịnị wó tuuduo-otubo biimị: “Tetuu kị duonị ánị tolumọ-oweimị tịbịsaa bii otubo mọ, seiyaị mịẹ otubo mọ fịyaị fị gbeleimịnị a o?”
12 Jesus ánị gbaa egberi naa ifiemị, ụ gbaa á pịrịmị: “Angọ kụrọemi otu dọọnzụọ-owei dọụgha, anịa dọọnmịnị otu kị dọọnzụọ-owei dọụwẹrịemi.
13 Wẹrị múdá, ‘ịmịnị ánị ịkịanbo dọụgha, anịa ámịnị dieneni mịẹdịamụ yọ kị ị mọ dọụwẹrịemi’ gbaa egberi duo yetolumọ akị.* Ịmịnị kịrịịye mịẹmịnị otu tịịn yọ abogha, anịa seiyaị mịẹ otu tịịn yọ ka bomị.”
14 John tuuduo-otubo kpọ bo Jesus laawẹrị, ụ biimị: “Tetuu kị duonị wo mọ farisi-otubo mọ, mọụnkorumịnị aba, iné tuuduo-otubo ba mọụnkorugha o?”
15 Jesus gbaa á pịrịmị: “Ayoro-yei bị wó ikie-otubo mọ emi ifiemị, ámịnị enenikẹrịmụ tuu fa. Bịsẹbara a? Anịa ifie bomịnị, ayoro-yei bị ámọ kẹrịakị daba, ámịnị mọụnkorumịnị.”
16 Oru bịdẹ kaịn daba, kẹnị kịmị kpọ aya bịdẹ kọn bịsẹ kaịn yọ gbein terigha. Tuumị, aya bịdẹ bị, oru bịdẹ duo kaịn paamịnị. Bịsẹbara paa daba, kaịn yọmị dụbadẹịnmịnị.
17 Bịsẹ kpẹkẹnị bara kị, kịmịotu aya wuru akị orudẹ wuru tụa* akpa atụagha. Bịsẹbara mịẹ daba, akpamị kaịnmịnị, bá wuru kpọ dẹsịfamịnị. Anịduonị kịmịotu aya wuru kọn aya wuru tụa akpa ka tụamịnị, anịkị akpa kpọ kaịngha fa, bá wuru kpọ dẹsịgha fa.
18 Ómịnị mọkpọ bei yebo gbaa á pịrịmịnị ifiemị, kẹnị opu-owei bo wó tọrụyọma okoiwẹrị gbaamị: “Bei tịẹkirimị, iné tọbọụma fịịdẹ kpọ paaemi. Bịsẹbara kị gbaa kpọ, bodá iné bara kọn ána gbana. Amịnị waị serimịnị.”
19 Jesus seritịẹwẹrị kịmị mọ múmị, Jesus tuuduo-otubo kpọ wó atuuduomị.
20 Anịa dii! asịịn* angọ duo paatimi oi-maa kụraị-fịnị baịdẹ ere, toun duo bo Jesus mọ naịnwẹrị wó bịdẹ kirianga gbelemị.
21 Amịnị gbaa angọ pịrịtimimị: “Ịmịnị laa wó bịdẹ bẹtịbị kị gbele kpọ, ine angọmị ebimịnị.”
22 Jesus waị toun dii ifiemị, erema ẹrịwẹrị gbaa á pịrịmị: “Ịmbaụ malafakụmọ! iné peibulu bị iné dọọn zụọdẹ.” Bịsẹ tịẹkirimị erema angọ kụrọmị.
23 Ómịnị mú bịsẹ opu-owei warị laa ifiemị, kịmịama eneni-kẹrịwẹrị yeama* farị, bá biin kịmịama youkụrọmọ timi bara ụ mọ ẹrịmị.
24 Jesus gbaamị: “á wẹrị bei yọ duo seri, kala tọbọụma naa fịịgha, anịa bụnụ kị bụnụemi.” Ómịnị bịsẹbara gbaa ifiemị, ámịnị ụ kọn ayẹbẹ mịẹ dẹrịmị.
25 Kịmịbo seridẹmị, ómịnị mú kala tọbọụma laawẹrị ánị bara kẹrị ifiemị, amịnị seritịẹmị.
26 Etema emi otubosẹ bei paaye naamị.
27 Jesus bịsẹ yọ duo seriwẹrị wẹnị múmịnị ifiemị, maa tọrụbaan otuama wó atuuduowẹrị gịa* paamọmị: “David tọbọụ, dieneni akị wo ananadá baratụa wo pịrị.”
28 Jesus kẹnị warị duosụọdẹmị, tọrụbaan otubo mú ụ laawẹrị, ómịnị á biimị: “Ịmịnị laa ánị tọrụbo finimụ peibulu ámọ nanawẹrịemi?” Ámịnị ụ parụmị: “Nanaowei, omịnị nanawẹrịemi.”
29 Anịduonị, ómịnị ánị tọrụbo gbelewẹrị gbaamị: “Ánị nanawẹrịemi peibulu duonị, pebidá ánị dọụbara paa.”
30 Jesus bịsẹbara gbaasiindẹmị, ánị tọrụbo paakị finimị. Anịa Jesus kpookpoo bara gbaa á pịrịmị: “Bei paaye gbaa kẹnị ụbọ kpọ pịrịkụmọ.”
31 Anịa, ámịnị paa mú tiri laa ifiemị, egberi gbaa akị etema emi otubosẹ pịrịmị.
32 Kịmịbo bịsẹ yọ duo wẹnị serimịnị ifiemị, kịmịama ẹrẹ apaagha, bá seitẹmẹ kpọ angọemi owei kọn Jesus yarịmị.
33 Jesus seitẹmẹ duo kịmị angọ duo seridẹmị, ómịnị ẹrẹmị. Kịmịbo angọbọụwẹrị gbaamị: “Israel ibe bị bei timitimi ye naa paagha-wẹrịmị.”
34 Anịa farisi-otubo gbaamị: “Seitẹmẹbo daamịnị owei kị kụrọ akị ụ pịrịwẹrị seitẹmẹbo duopaamọmịnị.”
35 Jesus yọụ opu amabo mọ, gbenebo mọ amúmị. Ómịnị, ánị bẹnịị yetolumọmịnị yọbo* duosụọwẹrị á tolumọ, Daabụọ ebiegberi gbaa, bá dọọn apaabosẹ zụọmị.
36 Jesus biin kịmị ikpudu ẹrị ifiemị, ómịnị á dienenimị. Tuumị, ámịnị enọụn-sụọdẹ, á pịrị gbeinkoromọdẹ, bá kekere kịmị fa anịna-ama bara k’emi.
37 Anịduonị, ómịnị gbaa wó tuuduo-otubo pịrịmị: “Gbẹsịmị kirisou fịrịmị dụbaemi, anịa fịrịwẹnị otubo biingha.
38 Anịduonị, kiribou nanaowei tẹẹdá zịnị fịrịwẹnị otuama fịrịmọ bo.”
