Matthew 22:1-46
22 Jesus mọkpọ tọnmọdịayeama akị á mọ mọ́ ẹrẹwẹrị gbaamị:
2 “Agọnọ Daabụọ bị erenana oge mịẹ wó tọbọụ pịrị dọụmịnị ibe-daaowei bara k’emi.
3 Ómịnị wó odubo-otubo fịrịmọ, ogema tịịnwẹrịemi otubo tịịn yọ amúmị, anịa kẹnị ụbọ kpọ bo dọụgha.
4 Ómịnị waị zịnị odubo-otuama fịrịmọwẹrị gbaamị, ‘gbaa tịịnwẹrịemi otubo pịrị: “Dii! Ịmịnị ivin-ama mọ, ịmẹlẹtụa nama-ama mọ baawẹrị fịyaị tụọdẹ. Ịmịnị yebosẹ mịẹ tịẹmọdẹ, á wẹrị erenana ogema bo e.”’
5 Anịa, ámịnị egberimị á gbelegha bara ka kị wẹnị seriwẹrị, zịnị yeama mịẹ yọ amúmị. Kẹnị ụbọ kiribou amúmị, zịnị ụbọ ba fọụtubo yọ amúmị;
6 anịa kọọ otubo, odubo-otubo kẹrịwẹrị á vụrọ, bá á baamị.
7 “Ibe-daaowei bị bulukọn kụrọmọwẹrị wó army-otubo fịrịmọ mú wó odubo-otubo baa kịmịbosẹ baamị, bá anị ama kpọ yọụnmọmị.
8 Ibe-daaowei bị paakị gbaa wó odubo-otubo pịrịmị, ‘Erenana oge bị laadẹ, anịa tịịnwẹrị otubo bo agbẹịgha.
9 Anịduonị, wẹnị ama duo paamịnị ụwọụbo amúdá, ẹrịdẹ ụbọsẹ tịịn ogema bo.’
10 Odubo-otubo wó gbaa bara mịẹmị. Ámịnị ụwọụbirima múwẹrị, bulusei-otu o, ebi otu o, ẹrịdẹ kịmịsẹ kị tịịnmị. Anịduonị, ogema bo fịyaị fị otubo warị beinmị.
11 “Ibe-daaowei bị erenana ogema bo otubo dii yọ abo ifiemị, kẹnị owei erenana oge bịdẹ tụagha bara ụ mọ ẹrịmị.
12 Anịduonị ómịnị gbaa kịmị pịrịmị, ‘Ine kịmị, ị́mịnị tebara kị mịẹtimi erenana oge bịdẹ kpọ tụagha bara bei yọ duo sụọma?’ Kịmị bị ẹrẹmụ egberi fa.
13 Ibe-daaowei bị paakị gbaa wó odubo-otubo pịrịmị, ‘Wó barabo mọ, bụọbo mọ fịnadá, wó gbein akị duku tirima tụa. Ómịnị bịsẹ yọ ka timi you, bá wó akabo fịmịnị.’
14 “Tuumị, biin kịmịama kị tịịnmị, anịa biingha kịmịama kị sẹlẹ akịdẹ.”
15 Farisi-otubo Jesus egberi gbaa kiri daba, ámịnị bịsẹ egberi duo ụ kẹrịmụ yọ duonị, toun amú iroro tọnmị.
16 Anịduonị, ámịnị ánị tuuduo-otubo mọ, Herod tuuduo-otubo mọ fịrịmọ mú Jesus laawẹrị gbaamị: “Tolumọ-owei, ị́mịnị gesii kịmị, bá Ayiba gesii kị tolumọmịnị, ị́mịnị tokoni kpọ dọụgha, bá kịmị emibara kpọ diiwẹrị ụbọ diidụbamọgha bara wo mọ nimiwẹrịemi.
17 Anịduonị tebara kị ị́ mọ tọnma? Tịbịsaa gbẹẹ Caesar pịrịmụ yọmị ebi-emi a, anịghakpọ ebigha? Gbaa wo pịrị.”
18 Anịa, Jesus ánị tọnmịnị sei iroro nimiwẹrịemi duonị gbaamị: “Agọnọbeniyaị mịẹ otu, tetuu kị duonị ámịnị ị dadịmịnị a o?
19 Akị tịbịsaa gbẹẹmịnị ogu sịlị kọn ị dịa.” Ámịnị kẹnị denarius* kọn ụ yarịmị.
20 Ụ gbaa á pịrịmị: “Te ụbọ andẹ* mọ, bá ẹrẹ mọ kị bei sịlị bị emi a o?”
21 Ámịnị gbaa ụ pịrịmị: “Caesar andẹ mọ ẹrẹ mọ kị emi.” Jesus gbaa á pịrịmị: “Caesar yebo kọn Caesar pịrị, bá Ayiba yebo kọn Ayiba pịrị.”
22 Ámịnị wó gbaa egberi naa ifiemị, angọbọụmị, bá wó abarasiinwẹrị yọ duo wẹnị serimị.
23 Bịsẹ ereinmị fịịduo seribo ukiemọye emi bara peigha Sadusi-otubo, bo Jesus biimị:
24 “Tolumọ-owei, Moses gbaawẹrịmị: ‘Kịmị ere nanawẹrị, tọbọụ ziigha timi fịị daba, wó bịnaowei erema nanadá, tọbọụ zii ụ pịrị bara kị gbaamị.’
25 Sọnọma bịnaotu wo mọ mọ́ timimị, bọlọụ owei bị ere nanawẹrị tọbọụ ziigha timi fịịmị. Wo bịnaowei kị erema nanamị.
26 Bịsẹ kpekẹnị ye kị sọnọma bịnaotubosẹ paamọmị.
27 Kunumọ bị, erema kpọ fịịmị.
28 Sọnọma bịnaotubosẹ á nanawẹrị duonị, fịịyọ duo seribo ifie laa daba, amịnị te ụbọ ere ka paamịnị a o?”
29 Jesus á parụmị: “Ámịnị naa paamịnị ye nimigha, tuumị, ámịnị Ayiba egberi mọ, bá wó nanawẹrịemi kụrọ mọ nimigha;
30 fịịyọ duo seribo ifie laa daba, oweibo ba ere nanagha fa, erebo kpọ ba yei nanagha fa. Anịa ásẹẹ bo agọnọma emi angelị-otubo bara kị paamịnị.
31 Ámịnị fịịduo seribo egberi goodẹ-wẹrịmị. Ámịnị naa Ayiba gbaa á pịrị egberi googha? Ayiba gbaamị:
32 ‘Ịmịnị Abraham, Isaac bá Jacob Ayiba.’ Ómịnị fịịdẹ otu Ayiba-gha, anịa inyenrinmịnị otu kị Ayiba.”
33 Kịmị ikpudu bị wó tolumọ egberibo naa ifiemị, angọbọụmị.
34 Sadusi-otubo laa Jesus parụgha bara Farisi-otubo mọ naa ifiemị, ámịnị kẹnị sụọmọwẹrị bo Jesus laamị.
35 Ánị ovurumị, kẹnị oloko nimi kụrọmọwẹrịemi owei, Jesus dadịmụ yọ duonị ụ biimị:
36 “Tolumọ-owei, te oloko kị dụba dẹịn-emi a o?”
37 Jesus gbaa ụ pịrịmị: “‘Ị́mịnị iné adụdụsẹ, iné ụndụsẹ bá iné ịkịọụsẹ akị Jehovah* iné Ayiba tarị.’
38 Bei kị dụbadẹịn, bá bọlọụ oloko bị.
39 Maamụkaramọ ye ba: ‘Iné angọ tarị bara ka kị iné ọvị-ụbọ kpọ tarị.’
40 Oloko mọ bụrụ-otubo gẹẹwẹrịemi yebo mọ, bei maa olokobo ka sẹsẹrẹ-emi.”
41 Farisi-otubo mọkpọ bịsẹ yọma bẹnịị-emi ifiemị, Jesus á biimị:
42 “Christ gbelemọ yọmị tebara kị ámọ tọnma? Ómịnị te ụbọ tọbọụ a?” Ámịnị gbaa ụ pịrịmị: “David tọbọụ.”
43 Jesus á biimị: “Tetuu kị duonị, tọntọn tẹmẹ David dịnẹmọwẹrị Nanaowei kọn ụ tịịnma o? David gbaamị,
44 ‘Jehovah* gbaa ine Nanaowei pịrịmị: “Ine amabara angama tịtẹtimi, ịmịnị iné egiren-otubosẹ kọn iné bụọ gbanaye mịẹmụ ifie koru.”’
45 David ụ kọn Nanaowei tịịnwẹrịemi aba, ómịnị ba tebara kị mịẹtimi David tọbọụ apaa ma o?”
46 Kẹnị kịmị kpọ laa ụ parụgha. Bá bịsẹ erein duo músẹ, kẹnị kịmị kpọ ba benebene biibịbị kọn ụ biigha.
Gbaatụayọama
^ Egberi ụngbọụ tuuama dii.
^ Anịghakpọ “koro.”
^ Egberi ụngbọụ tuuama dii.
^ Egberi ụngbọụ tuuama dii.
