Matthew 28:1-20
28 Sabbath erein bụọdẹmị, weekima bọlọụ ereinmị, deinbaịmịnị ifiemị, Mary Magdalene mọ kọọ Mary mọ, mú dụwẹị-ogugu diimị.
2 Anịa dii! Kẹnị opu kirizigei paabụọmọdẹ-wẹrịmị, tuumị Jehovah* angelị-owei agọnọ duo korobomị, bá duwẹị-ogugu teriwẹrị okuta bị ekpiri seriwẹrị, bịsẹ okutama tịtẹtimimị.
3 Wó angọmị gbene-gbene kị kẹrịịtimimị, bá wó bịdẹbo kpọ pịna kụrọmọmị.
4 Yọ letimi otubo angelị-owei bị esiin yọ duonị, bo fịịdẹ otuama bara kị paamị.
5 Anịa, Angelị-owei bị gbaa erebo pịrịmị: “Malafakụmọ, ámịnị Jesus, á pịrị tịnma kaị baa owei kị dọụmịnị bara ị mọ nimiwẹrịemi.
6 Ómịnị ba bei yọma fa. Wó gbaawẹrị baramị, Ayiba ụ tịịnseridẹ. Bo ụ sụnwẹrị yọ dii.
7 Kịalị múdá, Ayiba fịịduo ụ tịịn seridẹ bara gbaa wó tuuduo-otubo pịrị. Ómịnị ána bọlọụ Galilee amúmịnị. Ámịnị bịsẹ yọma wó ẹrịmịnị. Dii! Ịmịnị gbaa á pịrịdẹ.”
8 Anịduonị, ámịnị kirimọ-kirimọ dụwẹị-oguguma barasiinmị. Ámịnị malafamịnị kị gbaa kpọ, pọwẹị kụrọmọ bara ka kị baịn paaye gbaa wó tuuduo-otubo pịrị yọ amúmị.
9 Anịa dii! Jesus bo á mọ mọ́ gbeleiwẹrị gbaa á pịrịmị: “Á doo!” Ámịnị mú ụ laawẹrị, okoi wó bụọbo kẹrịmị.
10 Anịa Jesus gbaa á pịrịmị: “Malafakụmọ! Mú gbaa ine bịnaotubo pịrị, anịkị ámịnị Galilee amúwẹrị bịsẹ yọma ine ẹrịmịnị.”
11 Erebo múmịnịmị, yọ letimi otubo, zụa, ama duosụọwẹrị mú paayebosẹ gbaa tịbị ịkịankụn-otubo pịrịmị.
12 Anịa tịbị ịkịankụn-otubo mọ, Jew karịbụọ tịbịotubo mọ gbelei ẹrẹtei-siindẹmị, ámịnị biin silver sịlịama kọn army-otubo pịrịmị.
13 Bá gbaa á pịrịmị: “‘Omịnị deinma bụnụtimi ifie ka, wó tuuduo-otubo bowẹrị wó angọ furu akịmị’ bara kị gbaa.”
14 Malafakụmọ, governor-owei bị egberi naa daba, omịnị ụ mọ mọ́ ẹrịmịnị.*
15 Anịduonị army-otubo silver sịlịbo akịwẹrị gbaa á pịrị bara kị mịẹmị. Bá bịsẹ ifie duobosẹ, Jew-otubo bịsẹbara ka kị bei egberi gbaatimi bei tịẹkiri laadẹ.
16 Anịa oi-kẹnị tuuduo-otu fịnịbo Galilee amúwẹrị, Jesus á mọ mọ́ gbeleimụ bara gbaapẹlẹwẹrị ogunma múmị.
17 Ámịnị wó ẹrị ifiemị, ámịnị okoi ụ pịrịmị, anịa zụa tamanaịnyọ nanamị.
18 Jesus wẹnị á dọụmúwẹrị gbaamị: “Agọnọ mọ, kịrị mọ emi kụrọbosẹ kọn ị pịrịdẹ.
19 Anịduonị, ibebosẹ amú tuuduo-otu dọụdá, Daụ ẹrẹ mọ, Tọbọụ ẹrẹ mọ, bá tọntọn tẹmẹ ẹrẹ mọ, á kọn benibilemọ.
20 Bá ị kọn á tolumọdẹ yebosẹ mịẹmụ bara akị á tolumọ. Anịa dii! Ị́mịnị á mọ mọ́ timi akpọ kunumọ ifie* laamịnị.”
Gbaatụayọama
^ Egberi ụngbọụ tuuama dii.
^ Greek bẹẹlịmị, “ụ gbaa bọụmọmịnị.”
^ Egberi ụngbọụ tuuama dii.
