Matthew 2:1-23
2 Ibe-daaowei Herod* daatimi ifiemị, Jesus akị Judea ete bọọ Bethlehem tịịnmịnị ama bọọ ziidẹmị. Dii! Ịkịkaị* goo-otu ụraụ duopaamịnị anga duo Jerusalem abowẹrị,
2 gbaamị: “Tẹ kẹ á ziidẹ Jew-otu ibe-daaowei bị a o? Omịnị ụraụ duopaamịnị angama timi ifiema wó ịkịkaị* ẹrị kị duonị tịbị-oboimọ ụ pịrịyọ abomị”
3 Ibe-daaowei Herod, bá Jerusalem ma emi otubosẹ egberi naa ifiemị bulukọn kụrọmọmị.
4 Ómịnị tịbị ịkịankụn-otubo mọ, bá oloko tolumọ-otubo mọ bẹnịmọwẹrị, Christ* ziimụ yọ kọn á biimị.
5 Ámịnị gbaa ụ pịrịmị: “Judea ibe ma emi Bethlehem ka ụ ziimịnị, tuumị bụrụ-owei bị mọ kị gẹẹwẹrịmị:
6 ‘Ha Bethlehem! Judah ibe emi ama, Judah daamịnị otubosẹ ị́mịnị kị zaụ dẹịn-emi bara fa, tuumị, ine Israel otubo daamụ kịmị bị ị́mịnị kị duo bomịnị.’”
7 Herod lẹẹ ịkịkaị* goo-otubo bẹtịbị tịịnwẹrị, ámịnị ịkịkaị* paa ifie gbaa ụ pịrị bara gbaamị.
8 Ámịnị múmịnị ifiemị, ómịnị gbaa á pịrịmị: “Múdá, ebibara kala tọbọụ dọụ. Wó ẹrị daba, waịbo gbaa ị pịrị. Anịkị, ịmịnị kpọ mú tịbị-oboimọ ụ pịrịmịnị.”
9 Ibe-daaowei gbaa egberimị ámọ naadẹmị, ámịnị múmị. Anịa, ámịnị ụraụ paabomịnị angama ẹrịwẹrị ịkịkaị* bị wẹnị á bụọwẹrị, mú kala tọbọụmị emi yọma pẹlẹmị.
10 Ịkịkaị* bị pẹlẹdẹ bara ámọ ẹrị ifiemị, ámịnị buluịmbẹlẹ kụrọmọmị.
11 Ámịnị mú yọ laa ifiemị, warị duosụọwẹrị tọbọụ mọ, ụ yin Mary mọ ẹrịmị. Ámịnị okoi tịbị-oboimọ ụ pịrịmị, bá ánị yelaa yebo paamọ bowẹrị, Goldu mọ, frankincense mọ, bá myrrh mọ kọn tọbọụ pịrịmị.
12 Anịa, Ayiba dawaịtọrụ duo, ámịnị waị Herod dọụmú-kụmọ bara gbaa á pịrịwẹrị duonị, ámịnị zịnị ụwọụ kị duo waị ánị ibema múmị.
13 Amịnị múdẹmị, Jehovah* angelị-owei dawaịtọrụ duo gbaa Joseph pịrịmị: “Seritịẹdá kala tọbọụ mọ, ụ yin mọ kọndá baịn Egypt amú. Bịsẹ yọma timi ịmịnị mịẹmụye gbaa ị́ pịrịmụ ifie koru. Tuumị, alaghatimi Herod tọbọụ dọụwẹrị ụ baa dọụmịnị.”
14 Anịduonị, bịsẹ deinmị, Joseph tọbọụ mọ, bá tọbọụ yin mọ akịwẹrị baịn Egypt amúmị.
15 Ómịnị bịsẹ yọma timi Herod fịị ifie laamị. Bịsẹ paayemị, Jehovah* wó bụrụ-owei duo gbaawẹrị egberi kị mịẹbeinmọmị. Bụrụ-owei bị gbaawẹrịmị: “Ịmịnị ine tọbọụ tịịn akị Egypt duo paabomịnị.”
16 Herod, ịkịkaị* goo-otubo ụ lẹlẹmọdẹ bara nimi ifiemị, bulukọn kụrọmọmị. Anịduonị, ómịnị Bethlehem mọ, bá bịsẹ ete yọrọemi amabosẹ, maa kụraị, bá, naa maa kụraị laagha owei awọụbosẹ baasiin bara gbaamị. Ịkịkaị* goo-otubo, ịkịkaị* bị ẹrịwẹrị gbaa ụ pịrị ifie kị, ómịnị mọ diiwẹrị bịsẹbara gbaamị.
17 Bịsẹ paayemị, Ayiba wó bụrụ-owei Jeremiah duo gbaawẹrị egberi kị mịẹbeinmọmị. Jeremiah gbaawẹrịmị:
18 “Kịmị Ramah atimi you kụrọmọtimi bara wo mọ naamị. Rachel kị ánị awọụbo duonị youtimimị. Kịmịotu ánị awọụbo baasiindẹ duonị, á kẹrị kpọ ámịnị pẹlẹ dọụgha.”
19 Herod fịịdẹmị, Jehovah* angelị-owei Egypt ma dawaịtọrụ a Joseph paamọmị.
20 Bá gbaa ụ pịrịmị: “Seritịẹdá, kala tọbọụ mọ, bá ụ yin mọ akịdá waị Israel amú. Tụụmị, tọbọụ baa dọụtimi otubo fịịdẹ.”
21 Anịduonị ómịnị kala tọbọụ mọ, bá yin mọ akịwẹrị waị Israel amúmị.
22 Herod fịịdẹmị, wó tọbọụ Akẹlaus kị Judea daamịnị bara Joseph mọ naa ifiemị, ómịnị Judea amúmụ yọmị malafamị. Anịa, Ayiba dawaịtọrụ duo mịẹmụ bara gbaa ụ pịrịwẹrị duonị, ómịnị Galilee ete ka múmị.
23 Ómịnị Nazareth tịịnmịnị opu ama ka mú inyenrinmị, bịsẹ paayemị, ómịnị bụrụ-otubo gbaawẹrị egberi kị mịẹbeinmọmị. Bụrụ-otubo gbaawẹrịmị: “Nazareth owei* ka kị ụ tịịnmịnị.”
Gbaatụayọama
^ Egberi ụngbọụ tuuama dii.
^ Anịghakpọ “agụraị.”
^ Anịghakpọ “agụraị.”
^ Anịghakpọ “Messiah; sẹlẹdẹ owei.”
^ Anịghakpọ “agụraị.”
^ Anịghakpọ “agụraị.”
^ Anịghakpọ “agụraị.”
^ Anịghakpọ “agụraị.”
^ Egberi ụngbọụ tuuama dii.
^ Egberi ụngbọụ tuuama dii.
^ Anịghakpọ “agụraị.”
^ Anịghakpọ “agụraị.”
^ Anịghakpọ “agụraị.”
^ Egberi ụngbọụ tuuama dii.
^ Kaanghaba, bei egberimị “sọụpaamịnị tịịnbara” kị bẹmọwẹrịemi, anị Hebrew egberi ụngbọụ.
