Matthew 12:1-50
-
Jesus kị “Sabbath Nanaowei bị” (1-8)
-
Jesus bara fịịdẹ owei zụọmị (9-14)
-
Ayiba pịrị tarịwẹrịemi odubo-owei bị (15-21)
-
Ayiba kụrọ akị seitẹmẹ-ama duopaamọmị (22-30)
-
Bụọmọye nanagha fa sei (31, 32)
-
Tịn tụamịnị beinyaịbo ka kị wó emibara nimimịnị (33-37)
-
Jonah paamọ tamamaa ye bị (38-42)
-
Seitẹmẹ waị kịmị angọ duosụọ daba (43-45)
-
Jesus yin mọ wó bịnaotubo mọ (46-50)
12 Kẹnị ifie, Jesus mọ wó tuuduo-otubo mọ Sabbath ereinma, ye gborowẹrịemi kiribou duo wẹnị-bụọtimimị. Wó tuuduo-otubo mọụnkẹrịmịnị duonị, ámịnị gborowẹrịemi yebo* kadẹ fịmị.
2 Farisi-otubo bei ye ẹrị ifiemị, ámịnị gbaa Jesus pịrịmị: “Dii! Iné tuuduo-otubo Sabbath erein amịẹ agbẹịgha ye kị mịẹmịnị.”
3 Jesus gbaa á pịrịmị: “David mọ wó kịmịbo mọ mọụnkẹrị ifiemị, ámịnị naa ánị mịẹ yemị goo a?
4 David mọ wó kịmịbo mọ Ayiba warị duosụọwẹrị, tọntọn breadịbo fịmị. David mọ wó kịmịbo mọ bịsẹ breadịbo fị agbẹịgha, anịa ịkịankụn-otubo bẹtịbị kị fị agbẹị-emi.
5 Ámịnị naa Moses olokobo goo a o? Ịkịankụn-otubo Sabbath erein kpọ, karịwarịma fịrịwẹnịmịnị. Bịsẹ yọmị, ámịnị sei kị mịẹmịnị bara fa.
6 Anịa ị gbaa á pịrị, dụba karịwarị dẹịn-emi ye bodẹ.
7 Mọabịkpọ, ámịnị, ‘ịmịnị ánị ịkịanbo dọụgha, anịa ámịnị dieneni mịẹdịamụ yọ kị ị mọ dọụwẹrịemi’ gbaa egberima sụọtuu nimiwẹrị a, ámịnị mịẹkirigha otubo seimọghamụ timimị.
8 Tuumị Kịmịtọbọụ yaị kị Sabbath Nanaowei bị.”
9 Ómịnị bịsẹ yọ duo seri ifiemị, ómịnị ánị bẹnịị yetolumọmịnị yọma* múmị.
10 Anịa dii! Kẹnị bara fịịdẹ owei yọma timimị, ámịnị ye akị wó tịbị gbaịnmọ dọụmịnị duonị, ụ biimị: “Sabbath ereinma, dọọnmịnị kịmị zụọ agbẹị-emi a?”
11 Jesus gbaa á pịrịmị: “Kịmị kẹnị anịna nanawẹrị, bịsẹ anịna bị Sabbath ereinma ogugu akorosụọ daba, ogugu bulu duo bịsẹ anịna sibe paamọgha fa ụbọ ánị ovuruma emi a?
12 Kịmịtọbọụ yelaa akị anịna dẹịn-emi. Anịduonị, Sabbath ereinma ebi fịrịwẹnịmụ yọmị seigha.”
13 Anịduonị, ómịnị gbaa kịmị pịrịmị: “Iné bara sụnmọ.” Kịmị bị wó bara sụnmọ ifiemị, wó baramị ebiwẹrị kọọ yemị emibara kị paamị.
14 Anịa Farisi-otubo wẹnị tiri-paawẹrị ụ baamụ iroro tọnmị.
15 Jesus ánị tọnmịnị iroro nimi ifiemi, ómịnị bịsẹyọ duo serimị. Biin kịmịama wó atuuduomị, bá ómịnị ánị dọọnbosẹ zụọmị.
16 Anịa ómịnị kpookpoo bara, ámịnị ụ mịẹ zịnịotu pịrị nimikụmọ bara gbaa á pịrịmị.
17 Bei paa yemị bụrụ-owei Isaiah gbaawẹrị egberi kị mịẹbeinmọmị. Bụrụ-owei gbaawẹrịmị:
18 “Dii! Bei ine sẹlẹdẹ odubo-owei bị, ine tarịwẹrịemi owei bị, ịmịnị wó abarapoudẹ, bá ine tẹmẹ kọn wó agbanadẹ. Ómịnị baratụa kịmịotu pịrịwẹrị kịrịịye mịẹmụ bara nimimịnị.
19 Ómịnị kịmị mọ sụụgha fa, okukaịgha fa, bá biin kịmịama wẹnịmịnị ụwọụbo kpọ, kịmịotu wó okolo naagha fa.
20 Ómịnị yaịn dọụmịnị tuwo yaịnmọgha fa, bá viin dọụmịnị tụkpa kpọ viinmọgha timi ómịnị kịrịịgha yebosẹ mịẹ kịrịịmọmịnị ifie laamịnị.
21 Gesiimị, ibebosẹ ukiemọye akị wó ẹrẹ ka tụamịnị.”
22 Bịsẹ ifie bụọdẹmị, kịmịama seitẹmẹ angọemi owei kọn Jesus yarịmị, seitẹmẹ bị wó tọrụbo mịẹ baanmọ, bá ómịnị nimi ẹrẹ apaagha. Ómịnị bịsẹ owei zụọmị, anịduonị kịmị bị ẹrẹ, bá tọrụbo kpọ finimị.
23 Paa yemị kịmịbo mịẹ angọbọụwẹrị gbaamị: “Bei kị David tọbọụmị a?”
24 Farisi-otubo ye naa ifiemị, ámịnị gbaamị: “Beelzebub,* seitẹmẹbo daamịnị owei kị kụrọ kọn bei kịmị pịrịwẹrị seitẹmẹbo duopaamọmịnị.”
25 Jesus ánị iroromịnị yebo nimiwẹrịemi duonị, ómịnị gbaa á pịrịmị: “Daabụọ dịyẹị-dịyẹị daba, gbeingọgọlọ bulu ka sụọmịnị, bá ama, anịghakpọ warịbulu dịyẹị-dịyẹị daba, laa tịẹgha fa.
26 Bịsẹ kpekẹnị baramị, Satan kị waị wó seitẹmẹbo duopaamọ daba, wó daabụọ bị dịyẹị-dịyẹị kị paadẹ; anịduonị wó daabụọ bị tịẹmọ bara ámọ tọnma?
27 Bịsẹ yọ kị bụọmọ kpọ, ịmịnị Beelzebub kụrọ ka kị seitẹmẹbo duopaamọmịnị aba, ánị tuuduo-otubo ba tẹ ụbọ kụrọ ka kị seitẹmẹbo duopaamọmịnị a o? Anịkịduonị ámịnị kị ụgụlapẹlẹ á pịrịmịnị.
28 Anịa, ịmịnị Ayiba kụrọ ka kị seitẹmẹbo duopaamọmịnị aba, Ayiba Daabụọ bị á wẹrị bọlọụ amúdẹ.
29 Anịghakpọ, kịmị laa kụrọ nanawẹrịemi owei warị amúwẹrị, ụ fịnakoromọgha bara wó yebo furu apaaemi a? Ụ fịnakoromọdẹ kị laa wó yebo furu apaaemi.
30 Ine angama fa kịmịsẹ, ị goluemi, bá ị sụọmọ kịmịotu bẹnịmọgha kịmịsẹ, kịmịotu kị gagalamịnị.
31 “Anịduonị, ị gbaa á pịrị, kịmị sei mịẹ bá zịnịotu kị weri kpọ, bụọmọye nanamịnị. Anịa tọntọn tẹmẹ kị werimịnị kịmịsẹ, bụọmọye nanagha fa.
32 Gbaamaba, Kịmịtọbọụ yaị kị werimịnị kịmịsẹ, bụọmọye nanamịnị. Anịa tọntọn tẹmẹ kị werimịnị kịmịsẹ, mị tịẹkiri mọ bá bọlọụ kpọ, bụọmọye nanagha fa.
33 Ámịnị ebibara tịn kekere daba, tịn bị ebi beinyaị-ama kị nanamịnị. Anịa, ámịnị ebibara tịn kekeregha ifiesẹ, tịn bị sei beinyaị-ama kị nanamịnị. Tịn bị tụamịnị beinyaịbo ka kị wó emibara nimimịnị.
34 Dirimọ-owei awọụama, ámịnị bulusei-emi duonị, ebi yeama gbaa apaagha. Tuumị, adụdụma iroromịnị yebo kị bẹbẹ mọ gbaa paamọmịnị.
35 Ebi kịmị, wó gbaịnwẹrịemi ebi yebo kị duo ebi yeama paamọ bomịnị. Anịa, bulusei kịmị, wó gbaịnwẹrịemi sei yebo kị duo sei yeama paamọ bomịnị.
36 Ị́ gbaa á pịrị, ụgụlapẹlẹ erein laa daba, kịmịotu ẹrẹdẹ sei egberibo kị diiwẹrị, ụgụlapẹlẹ á pịrịmịnị.
37 Tuumị, ánị ẹrẹmịnị egberibo kị diiwẹrị, ámịnị kịrịịye mịẹmịnị otu, anịghakpọ bulusei otu kọn á tịịnmịnị.”
38 Oloko tolumọ-otubo mọ Farisi-otubo mọ ụ parụwẹrị gbaamị: “Tolumọ-owei, omịnị ị́ duo lelei ẹrị dọụmịnị.”
39 Jesus gbaa á pịrịmị: “Bulusei bá Ayiba abarasiindẹ otuama ifiebosẹ lelei kị dọụmịnị. Anịa bụrụ-owei Jonah paamọ tamamaa ye bụọmọ daba, ámịnị zịnị lelei ẹrịgha fa.
40 Jonah opu indi biribuluma* timi tara dein mọ tara erein mọ baị bara kị, Kịmịtọbọụ yaị kpọ dụwẹị oguguma timi tara dein mọ tara erein mọ baịmịnị.
41 Ụgụlapẹlẹ ereinmị, Nineveh otubo mọ, bei ifie otubo mọ seribo daba, Nineveh otubo, bei ifie otubo mịẹ yebo sei-emi bara gbaa á pịrịmịnị. Tuumị, Jonah egberigbaa Nineveh otubo pịrị ifiemị, ámịnị buludeimị. Anịa dii! dụba Jonah dẹịn-emi ye bodẹ.
42 Ụgụlapẹlẹ ereinmị, Sheba daatimi erema mọ, bá bei ifie otubo mọ seribo daba, amịnị bei ifie otubo mịẹ yebo sei-emi bara gbaa á pịrịmịnị. Tuumị, bei erema Solomon kịlịkịlị-nimiye naa dọụmịnị duonị, amịnị alayọ kị duobo ụ laamị. Anịa dii! dụba Solomon dẹịn-emi ye bodẹ.
43 “Seitẹmẹ kịmị angọ duo paa daba, embafoumụ yọ duonị, ómịnị beni fa yọama kị dọụ wẹnịmịnị, ómịnị ẹrịgha ifiesẹ,
44 gbaa angọ pịrịmịnị, ‘ịmịnị waị ine duobo warịma múmịnị.’ Ómịnị waị bịsẹ warị laa ifiemị, warị bị ámọ afịn, tọlọmọ bá kẹnị kịmị kpọ fa bara ụ mọ ẹrị ifiemị,
45 ómịnị waị múwẹrị sei ụ dẹịn-emi sọnọma seitẹmẹ-ama tịịn angọ tụamọ bomị. Ámịnị kịmị angọ duosụọwẹrị timi inyenrinmị. Anịduonị, bịsẹ kịmị paamọmụ yemị, sei bọlọụ ifie dẹịnmịnị. Bịsẹbara kị, bei ifie bulusei otubo kpọ paamọmịnị.”
46 Jesus mọkpọ biin kịmị ikpudu mọ ẹrẹtimi ifiemị, ụ yin mọ wó bịnaotubo mọ ụ dọụbomị. Ámịnị tirima tịẹtimi ụ mọ mọ́ ẹrẹmụ ụwọụ dọụmị.
47 Anịduonị kịmị gbaa ụ pịrịmị: “Dii! Ị́ yin mọ, iné bịnaotubo mọ tirima tịẹ-emi, ámịnị ị́ mọ mọ́ ẹrẹ dọụmịnị.”
48 Jesus kịmị parụmị: “Te ụbọ kị ị yin a o, bá te otu kị ine bịnaotuama o?”
49 Ómịnị wó bara kọn wó tuuduo-otubo sụnmọwẹrị gbaamị: “Dii! Ánị otubo kị ị yin, bá ine bịnaotuama!
50 Tuumị, ine agọnọ Daụ dọụbara mịẹmịnị kịmị kị ine bịnaowei, ine bịnaraụ, bá ị yin.”
Gbaatụayọama
^ Bible ifiemị, kịmịotu bịsẹ gborowẹrịemi ye kị kọn breadị mịẹtimimị.
^ Greek bẹẹlịmị, “synagogue.” Egberi ụngbọụ tuuama dii.
^ Bei kọn Satan tịịnmịnị zịnị ẹrẹ.
^ Anịghakpọ “ambabuluma; furouma.”
