Matthew 4:1-25
4 Bịsẹ yọ bụọdẹmị, tọntọn tẹmẹmị Jesus dịnẹmọ ogbo-abadịma múmị. Bịsẹ yọ ka Dẹvụlụ bo ụ dadimị.
2 Ómịnị mọụnkorutimi 40 erein-ama mọ, bá 40 dein-ama mọ baịdẹmị, mọụn ụ kẹrịmị.
3 Bịsẹ ifie kị dadiowei bị bowẹrị gbaa ụ pịrịmị: “Ị́mịnị kọkọ Ayiba tọbọụ aba, bei okutabo kọn breadị dei.”
4 Anịa ómịnị ụ parụmị: “Gẹẹwẹrịemi: ‘Kịmịtọbọụ fịyaị bẹtịbị kọn ụndụ nanagha, anịa Jehovah* egberibo ka kị ụndụ nanamịnị.’”
5 Bịsẹ yọ bụọdẹmị, Dẹvụlụ ụ kọn tọntọn opuama* bọọ múwẹrị, wó akị karịwarịma seridẹịn yọma tịẹmọmị,
6 bá gbaa ụ pịrịmị: “Ị́mịnị kọkọ Ayiba tọbọụ aba, bei yọ duo desikoro, ị́ gbelemọ yọmị gẹẹwẹrịemi: ‘Ómịnị wó angelị-otubo fịrịmọ baratụa ị́ pịrịwẹrị, ị́mịnị iné bụọbọ kọn okuta famọgha fa.’”
7 Jesus gbaa ụ pịrịmị: “Mọkpọ gẹẹwẹrịemi: ‘Ị́mịnị iné Ayiba Jehovah akị dadiye atụakụmọ.’”
8 Dẹvụlụ mọkpọ ụ kọn seri-kụrọmọemi ogun agọnọ amúwẹrị, akpọma emi daabụọbo mọ bá ánị dii-ebiemi barasẹ kọn ụ dịamị.
9 Bá gbaa ụ pịrịmị: “Ị́mịnị kẹnị ifie kọn okoi ị karị daba, ịmịnị bei yebosẹ kọn ị́ pịrịmịnị.”
10 Anịa Jesus gbaa ụ pịrịmị: “Satan, ine tọrụyọ duo seri! Gẹẹwẹrịemi: ‘Ị́mịnị Jehovah* iné Ayiba bẹtịbị kị karị, bá tọntọn odubo-gbaa* wó bẹtịbị kị pịrị.’”
11 Bịsẹbara paadẹmị, Dẹvụlụ wó abarasiinmị. Anịa dii! Angelị-otuama bo baratụa ụ pịrịmị.
12 John ámọ kẹrịkaịdẹ bara Jesus mọ naa ifiemị, ómịnị bịsẹ yọ duo seri Galilee amúmị.
13 Bịsẹ ifie bụọdẹmị, ómịnị Capernaum amụ́ inyenrinmị. Bịsẹ yọmị Zebulun mọ Naphtali mọ ogbo k’emi, bá yọmị tọrụ-aka k’emi.
14 Bei paa yemị bụrụ-owei Isaiah gbaawẹrị egberi kị mịẹbeinmọmị. Bụrụ-owei gbaawẹrịmị:
15 Zebulun ibe mọ Naphtali ibe mọ, kịmịotu ámịnị kị duo wẹnị abadịma múmịnị, ámịnị Jordan bẹịnmọ k’emi, anị Jew duopaagha otu inyenrinmịnị Galilee bị!
16 Duku bulu atimi otubo kẹrịkụrọmọ tụkpa ẹrịdẹ, bá tụkpa kọn fịị pịrị terifamọwẹrị otubo dịadẹ.
17 Bịsẹ ifie duo músẹ Jesus koro gbaa kịmịotu pịrịmị: “Buludei, tuumị agọnọ Daabụọ bị bo naịndẹ”
18 Ómịnị Galilee tọrụ-aka duo wẹnịtimi ifiemị maa bịnaotu ẹrịmị, Simon, Peter kpọ kọn ụ tịịnmịnị, bá Andrew wó bịnaowei. Ámịnị dii* kị koromọtimimị, ámịnị indi dọụ-otuama.
19 Ụ gbaa á pịrịmị: “Á bo ine tuuduo-otu apaa, ịmịnị á kọn kịmị dọụ-otu mịẹmịnị.”
20 Ámịnị ifie famọgha bara ánị diibo* abarasiinwẹrị, wó atuuduomị.
21 Ómịnị bịsẹ yọ duo wẹnị bọlọụ amú ifiemị, zịnị maa bịnaotu, anị James mọ John mọ, Zebedee owei awọụama ẹrịmị. Ámịnị á daụ Zebedee mọ arụ atimi ánị diibo* tọlọmọtimimị bara ụ mọ ẹrị ifiemị, ómịnị á tịịnmị.
22 Ámịnị kirimọ-kirimọ arụ mọ á daụ mọ abarasiinwẹrị wó atuuduomị.
23 Ómịnị Galilee etema yọbosẹ amúmị, ánị bẹnịị yetolumọmịnị yọbo* kpọ amúwẹrị, á tolumọ bá Daabụọ ebiegberi gbaa á pịrịmị. Ómịnị kịmịotu nanawẹrị dọọn apaabosẹ kpọ zụọmị.
24 Wó mịẹtimi yebo wasaị Syria ibema yọbosẹ laamị. Anịduonị, ámịnị bẹbẹpaa bẹbẹpaa dọọn-ama pịrị ụyamọmịnị otuama, seitẹmẹ pịrị ụyamọmịnị otuama, egirikoromịnị otuama, bá bara mọ bụọ mọ fịịdẹ otu kọn ụ yarịmị. Ómịnị ásẹ zụọmị.
25 Bịsẹ paayebo duonị biin kịmịama, Galilee, Decapolis, Jerusalem, Judea, bá Jordan bẹịnmọ angama emi amabo duo paabowẹrị wó atuuduomị.
Gbaatụayọama
^ Egberi ụngbọụ tuuama dii.
^ Anị “Jerusalem” kị bẹmọwẹrịemi.
^ Egberi ụngbọụ tuuama dii.
^ Anịghakpọ “odubo-gbaan.”
^ Anịghakpọ “ariri; ịbọrọ.”
^ Anịghakpọ “ariribo; ịbọrọbo.”
^ Anịghakpọ “ariribo; ịbọrọbo.”
^ Greek bẹẹlịmị, “Synagogue.” Egberi ụngbọụ tuuama dii.
