Matthew 11:1-30
11 Jesus mịẹmụyeama gbaa wó oi-maa tuuduo-otubo fịnịbo pịrị-siindẹmị, ómịnị bịsẹ yọ mọ naịn-emi amabo amúwẹrị, kịmịotu tolumọ bá egberigbaa á pịrịmị.
2 John ikoliwarị atimi Christ wẹnịmịnị fịrịbo naa ifiemị, ómịnị wó tuuduo-otubo fịrịmọ
3 mú Jesus biimị: “Ị́mịnị kị bomịnị owei bị a, anịghakpọ ị́ bụọmọ daba zịnị ụbọ bomịnị a?”
4 Jesus á parụmị: “Múdá ánị naamịnị yebo mọ, bá ẹrịmịnị yebo mọ gbaa John pịrị:
5 Mị tịẹkirimị, tọrụbaan-otubo, yọ ẹrịmịnị, wẹnịgha otubo, wẹnịmịnị, pịnaki dọọn nanawẹrịemi otubo, angọ kụrọmịnị, beri yọ-naagha otubo, yọ-naamịnị, fịịdẹ otubo, fịịduo waịserimịnị, bá ụya otubo kpọ ebiegberi naamịnị.
6 Pọwẹị ị gbelemọ yọmị tamanaịnyọ* nanagha kịmị laa.”
7 John tuuduo-otubo waị múmịnịmị, Jesus, John gbelemọ yọmị gbaa biin kịmị ikpudu pịrịmị: “Ámịnị ogbo-abadịma* mú teeki ẹrịma? Afọrụ pịrị fọụn yanrịnmịnị tuwo kị ẹrịma?
8 Ámịnị mú teeki ẹrịma o? Ebi bịdẹ* tụawẹrịemi owei kị ẹrịma? Anịa, ebi bịdẹ tụamịnị otubo ibe-daaotu warịama ka timi inyenrinmịnị.
9 Tetuu kị duonị ámịnị bịsẹ yọma múma o? Bụrụ-owei ẹrị yọ ka múma? Kọkọ ómịnị bụrụ-owei. Anịa ị gbaa á pịrị, ómịnị dụba bụrụ-owei kpọ dẹịn-emi.
10 Ụ gbelemọ yọmị gẹẹwẹrịemi: ‘Dii! Ịmịnị iné bọlọụma* ịsọmụwẹnị-owei fịrịmọ múmịnị. Ómịnị ụwọụ tọlọmọwẹrị ị́ kọrụmịnị.’
11 Gesiimị, ị gbaa á pịrị, ere-araụ pịrị ziiwẹrịemi kịmịbosẹ, dụba akị kịmị kọn benibilemọ owei John laaemi ụbọ naa fa. Anịa agọnọ Daabụọma zaụdẹịn ụbọ kpọ dụba ụ dẹịn-emi.
12 Kịmị kọn benibilemọ owei John koro fịrịwẹnị ifie duobo bei tịẹkiri laasẹ, kịmịama pẹlẹgha bara angọtụawẹrị agọnọ Daabụọma sụọ dọụmịnị. Bá pẹlẹgha bara angọtụamịnị otubo laa sụọmịnị.
13 Bụrụ-otubo mọ Moses oloko mọ, bọlọụ apaamụ yeama gbaadẹ kị John ifie laamị.
14 Ámịnị pei, bá peigha kpọ, John kị bomụ gbaawẹrịemi Elijah bị.
15 Beri nanawẹrịemi kịmịsẹ, pei.
16 “Ịmịnị bei ifie kịmịbo kọn te otu kị tọnmọmịnị a o? Ámịnị fọụtiri atịtẹwẹrị zịnị kala awọụama tịịnmịnị awọụama bara k’emi.
17 Awọụbo gbaamị: ‘Omịnị duma farị* kpọ, ámịnị sẹịgha; omịnị you kpọ, ámịnị agbobu titiwẹrị enenikẹrịgha.’
18 Bịsẹbara kị John bo ifiemị, ómịnị fịyaị kpọ fịgha, bá wuru kpọ bougha, anịa kịmịama gbaamị: ‘Ómịnị seitẹmẹ kị nanawẹrịemi.’
19 Kịmịtọbọụ yaị bị bo ifiemị, ómịnị fịyaị fị bá wuru boumị, anịa kịmịama gbaamị: ‘Dii! Bei mẹnẹmọtu tụa, bá wuru bou kụrọmọmịnị kịmị, bá tịbịsaa bii otubo mọ, seiyaị mịẹ otubo mọ ikie-owei.’ Mọabịkpọ kịlịkịlị kịmị bị, wó wẹnị fịrịbo ka kị ụ nimimịnị.”*
20 Bịsẹ yọ bụọdẹmị, Jesus tamamaa fịrị wẹnịdẹịn amabo emi otubo, dei dọụgha duonị ómịnị á werimị:
21 “Weribịbị Korazin laa! Weribịbị Bethsaida kpọ laa! Ị mịẹ á pịrị tamamaa yebo kọn Tyre mọ Sidon mọ ka mịẹwẹrị a, ámịnị orukụmọsẹ buludeiwẹrị enenikẹrị bịdẹ-ama tụa, bá fọụn-ama kpọ atịtẹmụ timimị.
22 Anịa ị gbaa á pịrị, ụgụlapẹlẹ erein laa daba, bọụbọụ Tyre mọ Sidon mọ pịrị akị á dẹịnmịnị.
23 Anịa Capernaum, ị́mịnị á pịrị sibe agọnọ amúmịnị bara kị iroromịnị a? Ị́mịnị dụwẹị-ogugu ka sụọmịnị, tuumị, ị mịẹ á pịrị tamamaa fịrịbo akị Sodom ka mịẹwẹrị a, ámịnị gbeingọgọlọ bulu asụọghamụ timimị.
24 Anịa ị gbaa á pịrị, ụgụlapẹlẹ erein laa daba, bọụbọụ Sodom pịrị akị ị́ dẹịnmịnị.”
25 Bịsẹ ifiemị, Jesus gbaamị: “Agọnọ mọ kiri mọ nana Daụ, ị́mịnị bei yebo akị kịlịkịlị, bá ye nimiwẹrịemi otubo duo sọwẹịwẹrị akị kala awọụbo kị dịa yọmị, ịmịnị kịmịsẹ emi yọ ị́ tokonimịnị.
26 Ị Daụ, kọkọ bei kị iné dọụwẹrịemi baramị.
27 Daụ bị yebosẹ kọn ị pịrịdẹ. Daụ bụọmọ daba, kẹnị ụbọ kpọ ebibara tọbọụ nimigha; tọbọụ mọ, bá tọbọụ bị Daụ emibara kọn tolumọdẹ otubo bẹtịbị kị ebibara Daụ nimiwẹrịemi.
28 Ye dẹịndẹ otubo mọ, bá okuye sibewẹrịemi otubo mọ, ị dọụ bo. Ịmịnị á mịẹ waị kụrọ nanamịnị.
29 Ine takịye* sibedá ị duo yetolumọ akị. Ịmịnị bọụbọụ bá angọ-iyerimọ inyenrinbụọ nanawẹrịemi duonị, ámịnị waị kụrọ nanamịnị.
30 Ine takịye* bị sibe aseigha, bá ine sibeye bị okugha.”
Gbaatụayọama
^ Anịghakpọ “adalaịyọ.”
^ Egberi ụngbọụ tuuama dii.
^ Greek bẹẹlịmị, “bọụbọụ bịdẹ.”
^ Greek bẹẹlịmị, “iné andẹma.”
^ Flute tịịnmịnị ye ka kị duma farịmị.
^ Anịghakpọ “wó wẹnị fịrịbo ka kị, ụ gbaịnmọwẹrị yebo duo peree nanamịnị.”
^ Anịghakpọ “epiyanye; akpeye.” Egberi ụngbọụ tuuama dii.
^ Anịghakpọ “epiyanye; akpeye.” Egberi ụngbọụ tuuama dii.
