Matthew 20:1-34
20 Jesus mọkpọ gbaamị: “Agọnọ Daabụọ bị, kiri nana kịmị nẹ pekei pekei wó vine kiribouma fịrịwẹnịmụ otu dọụyọ amú kịmị bara k’emi.
2 Ómịnị ereinma kẹnị denarius* kọn á gbẹẹmụ bara kọn á mọ mọ́ gbaapẹlẹ-siindẹmị, ómịnị á fịrịmọ wó vine kiribouma múmị.
3 Ómịnị waị pekei 9 o’clock* ovuruma paa ifiemị, kịmịotu fọụtirima fịrị fa bara tịẹtimi bara ụ mọ ẹrịmị.
4 Ómịnị gbaa bịsẹ otubo pịrịmị, ‘Á kpọ ine vine kiribouma mú fịrịwẹnị, ịmịnị agbẹị bara ka kị á gbẹẹmịnị.’
5 Bịsẹ otubo múmị. Kiri nana owei bị ereinbiri 12 o’clock* ovuru mọ, bá 3 o’clock* ovuru mọ, waị fọụtirima múwẹrị kpekẹnị bara mịẹmị.
6 Kunumọmị, kịmị bị 5 o’clock* ovuruma wẹnị paa ifiemị, zịnị kịmịama tịẹ-emi bara ẹrịmị. Ómịnị á biimị, ‘Tetuu kị duonị ámịnị ereinsẹ fịrịwẹnịgha bara bei yọma tịẹ-emi a o?’
7 Ámịnị gbaa ụ pịrịmị, ‘Kịmị na fịrị kọn wo pịrịgha kị duonị omịnị tịẹ-emi.’ Ụ gbaa á pịrịmị, ‘Á kpọ vine kiribouma mú fịrịwẹnị.’
8 “Buboru laadẹ ifiemị, kiri nana owei bị gbaa fịrị diimịnị owei pịrịmị, ‘Fịrịwẹnị otubo tịịndá á gbẹẹ, kunumọma bo otubo kị duo gbẹẹ mú timi bọlọụma bo otubo laa.’
9 Anịa buboru 5 o’clock ma bo otubo yọ laa ifiemị, kẹnị denarius* ka kị á gbẹẹmị.
10 Anịduonị bọlọụ kiribouma bo otubo bo yọ laa ifiemị, ánị gbẹẹmị dụbadẹịnmịnị bara kị ámịnị mọ irorowẹrịmị, anịa kẹnị denarius* ka kị á kpọ gbẹẹmị.
11 Ánị gbẹẹmị ánị bara laa ifiemị, ámịnị ụmbụbụrụ kiribou nana owei pịrịmị.
12 Bá gbaamị, ‘Kunumọma bo otubo kẹnị hour ka kị fịrịwẹnịmị, omịnị ereinsẹ ụraụbiri ka timi fịrịwẹnịmị, anịa ị́mịnị kẹnị bara ka kị kịmịsẹ gbẹẹmị!’
13 Anịa kiribọụ nana owei bị gbaa ánị ovuruma kẹnị ụbọ pịrịmị, ‘Ine kịmị, ịmịnị sei kọn ị́ mịẹgha. Omịnị kẹnị denarius* kị gbaapẹlẹ-wẹrịmị, bịsẹbara a?’
14 Iné gbẹẹ kọndá mú, ịmịnị ị́ gbẹẹ bara ka kị bei kunumọ otubo kpọ gbẹẹ dọụmịnị.
15 Ịmịnị ine nanawẹrịemi yebo kọn ine dọụbara mịẹmụ kụrọ nanagha? Anịghakpọ ịmịnị ebi mịẹmịnị* yọmị iná tọrụdọọnmịnị* a?
16 Bịsẹbara kị tuu-emi otubo bọlọụ bụọmịnị, bá bọlọụ-emi otubo tuu bụọmịnị.”
17 Ámịnị Jerusalem amúmịnị ifiemị, Jesus ụwọụma wó oi-maamụ fịnị tuuduo-otubo kọn aka bụọmọwẹrị gbaa á pịrịmị:
18 “Dii! Omịnị Jerusalem ka múmịnị. Bịsẹ yọ laa daba, Kịmịtọbọụ yaị bị ámọ bụọmọ akị tịbị ịkịankụn-otubo mọ, bá oloko tolumọ-otubo mọ barama tụamịnị. Ámịnị fịị pẹlẹ ụ pịrịmịnị,
19 bá ámịnị ụ bụọmọ akị ibe otubo barama tụawẹrị, ibe otubo ụ mịẹdẹrị, ụ vụrọ, bá ụ kọn tịn akaị baamịnị; Anịa tarụkaramọ erein laa daba, Ayiba ụ tịịn serimịnị.”
20 Anịa Zebedee taa, ánị maa owei awọụbo mọ bo Jesus laawẹrị tịbị-oboimọ ụ kule, bá wó barama ye biimị.
21 Ómịnị erema biimị: “Teeki ị mọ mịẹ ị́ pịrị a?” Amịnị gbaa ụ pịrịmị: “Pebidá ị́mịnị iné Daabụọ laa daba, ine maa owei awọụbo, kẹnị ụbọ kọn iné amabara angama tịtẹ, bá kẹnị kọn iné kọnọbara angama tịtẹ.”
22 Jesus gbaa á pịrịmị: “Ámịnị naa ánị biimịnị yema sụọtuu-nimigha. Ámịnị kpọ laa ine bou dọụmịnị ye boumịnị?” Ámịnị ụ parụmị: “Omịnị laa boumịnị.”
23 Ómịnị gbaa á pịrịmị: “Ámịnị laa ine bou dọụmịnị ye boumịnị, anịa ịmịnị, ine amabara anga mọ bá iné kọnọbara anga mọ atịtẹmụ ụbọ sẹlẹmụ kụrọ nanagha. Ị Daụ sẹlẹdẹ otubo kị bịsẹ yọma tịtẹmịnị.”
24 Kọọ oia tuuduo-otubo egberi naa ifiemị, ámịnị bulukọn maa bịnaotubo pịrịmị.
25 Anịa, Jesus á tịịnwẹrị gbaa á pịrịmị: “Akpọ daamịnị otubo ifiebosẹ angọ akị tịbịotu bara kị mịẹmịnị, bá opu-otubo ánị kụrọ kọn kịmịotu kị penimọmịnị.”
26 Mị timi-timi ye ánị ovuruma paakụmọ; Anị ovuruma dụbadẹịn ụbọ apaa dọụmịnị kịmịsẹ odubo-gbaa kọọ otubo pịrịmịnị,
27 bá ánị ovuruma bọlọụ atimi dọụmịnị ụbọ bị, odubo-owei ka paa kọọ otubo pịrị.
28 Bịsẹbara kị, Kịmịtọbọụ yaị bị, kịmịotu odubo-gbaa ụ pịrịmụ yọ duonị bogha, anịa ómịnị odubo-gbaa kịmịotu pịrị, bá wó ụndụ kọn biin kịmịama parụ-bụọmọmụ yọ kị duonị bomị.
29 Ámịnị Jericho duo wẹnị paamịnị ifiemị, biin kịmịama Jesus atuuduomị.
30 Anịa dii! Maa tọrụbaan-otu ụwọụ akama tịtẹtimi Jesus wẹnị bụọmịnị bara naa ifiemị, ámịnị gịa paamọmị: “Nanaowei, David tọbọụ, dieneni akị wo anana!”
31 Anịa kịmịbo á darịmọ bá ámịnị ánị bẹbẹbo teri bara gbaamị; ámịnị bịsẹ ifie ka okukaị-dẹịnwẹrị gbaamị: “Nanaowei, David tọbọụ, dieneni akị wo anana!”
32 Jesus pẹlẹmị, ómịnị á tịịnwẹrị á biimị: “Teeki ị mọ mịẹ á pịrị kị ámọ dọụmịnị a?”
33 Ámịnị gbaa ụ pịrịmị: “Nanaowei, wo tọrụbo fini wo pịrị.”
34 Jesus á dieneniwẹrị ánị tọrụbo gbelemị. Ánị tọrụbo kirimọ-kirimọ finimị, bá ámịnị wó atuuduomị.
Gbaatụayọama
^ Anị, Rome-otu silver ogu sịlị. Egberi ụngbọụ tuuama dii.
^ Greek bẹẹlịmị, ụraụ paabo ifie duo kịẹn daba, “tarukaramọ hour.”
^ Greek bẹẹlịmị, ụraụ paabo ifie duo kịẹn daba, “sondiekaramọ hour.”
^ Greek bẹẹlịmị, ụraụ paabo ifie duo kịẹn daba, “esekaramọ hour.”
^ Greek bẹẹlịmị, ụraụ paabo ifie duo kịẹn daba, “oi-kẹnị fini karamọ hour.”
^ Anị, Rome-otu silver ogu sịlị. Egberi ụngbọụ tuuama dii.
^ Anị, Rome-otu silver ogu sịlị. Egberi ụngbọụ tuuama dii.
^ Anị, Rome-otu silver ogu sịlị. Egberi ụngbọụ tuuama dii.
^ Anịghakpọ “barafinimọmịnị.”
^ Greek bẹẹlịmị, “tọrụ sei-emi.”
