Matthew 21:1-46
21 Ámịnị Jerusalem mọ, Bẹtfegy mọ naịndẹmị, ámịnị Olive ogun agọnọ ka timi Jesus wó maa tuuduo-otu fịrịmọmị,
2 ụ gbaa á pịrịmị: “Ámịnị, ánị ẹrịmịnị kala-amama mú daba, kẹnị kịkaịwẹrịemi ịkịtịkịtị mọ, wó tọbọụ mọ ámọ ẹrịmịnị. Á kpụkpọdá* kọn ị yarị.
3 Kịmị á bii daba, gbaa ụbọ pịrị, ‘Nanaowei kị wo fịrịmọmị.’ Bịsẹbara gbaa daba, ụbọ bị ifie famọgha bara á bụọmọ kọn ị yarịmịnị.”
4 Bei paayemị bụrụ-owei gbaawẹrị egberi kị mịẹbeinmọmị, bụrụ-owei bị gbaawẹrịmị:
5 “Gbaa Zion tọbọụma pịrị: ‘Dii! Iné pẹrẹmị ị́ dọụbomịnị, ómịnị bọụbọụ inyenrinbụọ nanawẹrịemi, bá ịkịtịkitị agọnọ ka emi, iin-ye, ịkịtịkịtị tọbọụ ka tịtẹ-emi.’”
6 Anịduonị tuuduo-otubo múwẹrị Jesus gbaa bara mịẹmị.
7 Ámịnị ịkịtịkịtị mọ wó tọbọụ mọ kọn bomị, bá ána arubo kọn namabo agbanawẹrị, ómịnị ịkịtịkịtị tọbọụ agọnọma tịtẹmị.
8 Biin kịmịama bịsẹ yọma, ánị bịdẹbo kọn ụwọụma finimọmị, bá zụa otuama, ẹtọbọ* pomuama pẹlẹwẹrị kọn ụwọụma koromọmị.
9 Bá wó bọlọụma emi otubo mọ wó atuuduo wẹnịmịnị otubo mọ pẹlẹgha bara gịa paamọmị: “Wo ị́ tẹẹmịnị, David tọbọụ zụọ! Tarịama Jehovah* ẹrẹ kọn bo owei laadẹ! Agọnọma emi owei bị wo ị tẹẹmịnị, ụ zụọ.”
10 Ómịnị Jerusalem duosụọ ifiemị, ama bị yanrịnmị. Bá kịmịotu biimị: “Bei tẹ ụbọ a o?”
11 Kịmị ikpudu bị pẹlẹgha bara gbaamị: “Bei bụrụ-owei Jesus, ómịnị Galilee etema emi Nazareth kị duo paaemi.”
12 Jesus karịwarị duosụọwẹrị bịsẹ yọma ye yẹrị, bá ye fẹịtimi otubo duopaamọmị. Bá sịlị deitimi otu tabulubo mọ elekpukpu* yẹrịtimi otu ịkasịbo mọ gagalamị.
13 Bá ómịnị gbaa á pịrịmị: “Gẹẹwẹrịemi, ‘Ine warị kọn tẹẹbịbị mịẹmịnị warị kị tịịnmịnị.’ Anịa, ámịnị akị furu-otu sọwẹịmịnị yọ kị mịẹmịnị.”
14 Tọrụbaan otubo mọ okule otubo mọ karịwarịma bo ụ laawẹrị, ómịnị á zụọmị.
15 Tịbị ịkịankụn-otubo mọ oloko tolumọ-otubo mọ, Jesus mịẹ tamamaa fịrịbo ẹrị, bá owei awọụbo “David tọbọụ zụọ” bara gịamịnị bara ámọ naa ifiemị, ámịnị bulukọn kụrọmọmị.
16 Ámịnị ụ biimị: “Bei awọụbo gbaamịnị egberi bị, ị́ mọ naawẹrịemi?” Jesus á parụmị: “Naawẹrịemi. Anịa, ‘Ị́mịnị kala awọụbo mọ, ayapẹdẹbo mọ, mịẹwẹrị tokoni akị ị́ pịrịmịnị’ gbaa egberimị ámịnị naa mọ googha o?”
17 Ómịnị bịsẹ yọma ána barasiinwẹrị Jerusalem duo seri mú Bethany kị bụnụtimi baịmị.
18 Ómịnị pekei pekei waị Jerusalem amúmịnị ifiemị, mọụn ụ kẹrịmị.
19 Ómịnị ụwọụbirima kẹnị fig tịn ẹrịmị, bá wẹnị tịn dọụ múmị, anịa tịn bị pomuama bẹtịbị kị nanawẹrịemi, beinyaị fa. Anịduonị, ómịnị gbaa tịn pịrịmị: “Ị́mịnị ba benebene beinyaị tụagha fa.” Bịsẹ tịẹkirimị, tịn bị fịị famị.
20 Wó tuuduo-otubo paayemị ẹrị ifiemị, angọbọụwẹrị gbaamị: “Tebara kị mịẹtimi bei tịn bị tịẹkiri tịẹkirima fịị fa ma o?”
21 Jesus á parụmị: “Gesiimị, ị gbaa á pịrị, ámịnị peibulu nana, bá tamanaịnyọ fa ifiesẹ, ịmịnị kọn bei fig tịn mịẹ ye bẹtịbị ámịnị mọ mịẹgha fa. Anịa, ámịnị gbaa bei ogun pịrị amọ, ‘Bei yọ duo seridá mú abadịma sụọ’ gbaa daba, bịsẹbara kị paamịnị.
22 Bá ámịnị peibulu nanawẹrịemi ifiesẹ, ámịnị tẹẹwẹrị biidẹ yesẹ, ánị bara laamịnị.”
23 Ómịnị wẹnị karịwarị duosụọwẹrị kịmịbo tolumọmịnị ifiemị, tịbị ịkịankụn-otubo mọ Jew karịbụọ tịbịotubo mọ bo ụ laawẹrị ụ biimị: “Ị́mịnị te kụrọ kị nanawẹrị bei yebo mịẹmịnị a o? Te ụbọ kị ị́ fịrịmọ ma o?”
24 Jesus gbaa á pịrịmị: “Ị kpọ kẹnị ye kọn á biimịnị, ámịnị ị parụ daba, ị fịrịmọ bei yebo mịẹmịnị ụbọ bị ị mọ gbaa á pịrịmịnị:
25 Te ụbọ kị John fịrịmọ kịmịotu kọn benibilemọ timi ma o? Ayiba a, anịghakpọ kịmịawọụ a?” Ámịnị gbaa zọzọ pịrịmị: “‘Ayiba’ wo mọ gbaa daba, ómịnị wo biimịnị, ‘Tetuu kị duonị ámịnị ụ peigha o?’
26 Anịa ‘Kịmịawọụ’ wo mọ gbaa daba, bei kịmịbo John kọn bụrụ-owei kị diimọwẹrịemi duonị á kọn wo mịẹmụye wo mọ nimigha.”
27 Anịduonị ámịnị ụ parụmị: “Omịnị nimigha.” Jesus kpọ gbaa á pịrịmị: “Ịmịnị kpọ ị fịrịmọ ụbọ bị gbaa á pịrịgha fa.”
28 “Tebara kị ámọ tọnma o? Kẹnị kịmị maa awọụ nanawẹrịemi. Ómịnị mú bọlọụ owei laawẹrị gbaa ụ pịrịmị, ‘Tọbọụ, mị ereinmị mú vine kiribouma fịrịwẹnị.’
29 Tọbọụ bị ụ parụwẹrị gbaamị, ‘Ịmịnị múgha fa.’ Anịa tuu ifie laamị, ómịnị ịkịọụ deiwẹrị múmị.
30 Daụ bị mú maamụkaramọ owei kpọ laawẹrị bịsẹ kpekẹnị bara gbaa ụ pịrịmị. Tọbọụ bị gbaamị, ‘Papa, ịmịnị múmịnị,’ anịa ómịnị múgha.
31 Bei maa awọụbo, te ụbọ kị daụ dọụbara mịẹ ma o?” Á gbaamị: “Bọlọụ owei bị.” Jesus gbaa á pịrịmị: “Gesiimị, ị gbaa á pịrị, tịbịsaa bii otubo mọ, amawẹnịmịnị* otubo mọ, ána bọlọụ Ayiba Daabụọma sụọmịnị.
32 Tuumị, John kịrịịye mịẹmụ bara kọn á dịa yọ abo ifiemị, ámịnị ụ peigha. Anịa tịbịsaa bii otubo mọ, amawẹnị otubo mọ ụ peimị. Bá ámịnị bịsẹbara kị ẹrị kpọ, ịkịọụ deiwẹrị ụ peigha.
33 “Mọkpọ á wẹrị zịnị tọnmọdịaye pei: Kẹnị owei ogbo nanawẹrịemi, ómịnị ogbo fanị yọrọwẹrị, buluma vine-ama gboromị, wuru mịẹmịnị yọ* kpọ soumị, bá yọ-lewarị kpọ kọn buluma kẹrịmị. Anịa, ómịnị kiribou kọn kirigboro-otu* bara atụawẹrị yọụ zịnị ibe amúmị.
34 Tịn beinyaịbo kadị ifie laamị, ómịnị wó odubo-otubo fịrịmọ kirigboro-otubo dọụ múwẹrị, wó laa yaịbo kọn yọ amúmị.
35 Anịa kirigboro-otubo kẹnị ụbọ famọ, kẹnị ụbọ baa, bá yeama akị kẹnị ụbọ gbeinmị.
36 Ómịnị waị biin bọlọụ otubo dẹịn odubo-otuama fịrịmọ múmị, anịa kirigboro-otubo kpekẹnị bara ka kị bịsẹ otubo kpọ mịẹmị.
37 Kunumọmị ómịnị wó tọbọụ fịrịmọ múmị, ómịnị gbaa angọ pịrịmị, ‘Ámịnị ine tọbọụ diidụbamọmịnị.’
38 Kirigboro-otubo tọbọụ bị ẹrị ifiemị, ámịnị gbaa zọzọ pịrịmị, ‘Kiribou dịẹ bei owei kị pịrịmịnị. Bodá, wo ụ baadá, ụ laamụ yebosẹ akị!’
39 Anịduonị, ámịnị ụ kpụụn kiribou duo paamọwẹrị ụ baamị.
40 Anịa, kiribou nanaowei bị bo daba, ómịnị te ye ka kị kirigboro-otubo mịẹmịnị a o?”
41 Ámịnị gbaa ụ pịrịmị: “Kịmịbo bulusei-emi duonị, ómịnị á baawẹrị kiri kọn zịnị kirigboro-otu bara ka tụamịnị. Tịn beinyaịbo kadị ifie laa daba, bịsẹ otubo ụ laa yaịbo kọn ụ pịrịmịnị.”
42 Jesus gbaa á pịrịmị: “Tọntọn fun bị gbaamị, ‘Warị kẹrị otubo kọn ye-diimọgha okuta kị, bo yelaadẹịn okuta* apaamị. Bei okuta bị Jehovah* kị duo bomị, bá okuta bị wo tọrụma tamamaa-emi.’* Ámịnị naa bịsẹ yọ googha wẹrịma?
43 Anịduonị ị́ gbaa á pịrị, Ayiba wó Daabụọ kọn ánị bara duo kọnsiinwẹrị, akị wó dọụbara mịẹmịnị otubo kị pịrịmịnị.
44 Bịsẹ yọ bụọmọ kpọ, okutama korodẹ kịmịsẹ, ẹnọụ sụọ-kụrọmọmịnị. Bá okuta bị koro poudẹ ụbọsẹ, yaịn gịsịfamịnị.”
45 Tịbị ịkịankụn-otubo mọ Farisi-otubo mọ, wó tọnmọdịayebo naa ifiemị, Jesus ánị egberi kị gbaamịnị bara ámịnị mọ nimimị.
46 Ámịnị ụ kẹrị dọụmị, anịa kịmị ikpudu bị wó akị bụrụ-owei kị diimọwẹrịemi duonị, ámịnị malafamị.
Gbaatụayọama
^ Anịghakpọ “fụngbọdá.”
^ Anịghakpọ “tịn.”
^ Egberi ụngbọụ tuuama dii.
^ Anịghakpọ “dove.”
^ Anịghakpọ “amafịmịnị.”
^ Anị grape apịpịwẹrị kọn wuru mịẹmịnị yọ.
^ Greek bẹẹlịmị, “kirigboro dịẹ-otu.”
^ Bei akị maa warị akpakpa kẹrị-tịẹmọmịnị okuta.
^ Egberi ụngbọụ tuuama dii.
^ Anịghakpọ “geleku-geleku.”
