Matthew 7:1-29
7 “Ụgụlapẹlẹ zịnịotu pịrịmịnị yọ tịẹmọ, anịkị Ayiba kpọ ụgụlapẹlẹ ị́ pịrịgha fa.
2 Ị́ kọn ụgụlapẹlẹ kịmịotu pịrịmịnị bara ka kị ụgụlapẹlẹ ị́ kpọ pịrịmịnị, bá ị kọn zịnịotu mịẹ bara kị ámọ diiwẹrị kọn ị́ kpọ mịẹmịnị.*
3 Tetuu kị duonị ị́mịnị iné bịna-ụbọ tọrụma emi opusu kị ẹrịwẹrị, iné tọrụma emi opu ogbolo bị ẹrịgha o?
4 Anịghakpọ, tetuu kị duonị opu ogbolo iné tọrụma emiaba, ị́mịnị iné bịna-ụbọ tọrụma emi opusu kọnsiinmụ bara gbaa ụ pịrịmịnị a o?
5 Agọnọbeniyaị mịẹ kịmị! Ị́mịnị bọlọụ iné tọrụma emi opu ogbolo kọnsiindẹ kị, iné bịna-ụbọ tọrụma emi opusumị ẹrịwẹrị kọnsiin apaadẹ.
6 “Tọntọn yeama kọn obiriama pịrịkụmọ, bá ánị yelaa yebo* kpọ gbeinmọ oporiopoama pịrịkụmọ. Anịkị, ámịnị ánị bụọbo kọn adan-seimọ, bá á dọụbọwẹrị ánị oweingha fa.
7 “Pẹlẹgha bara bii, kọn á pịrịmịnị; pẹlẹgha bara dọụ, ámịnị ẹrịmịnị; pẹlẹgha bara ogugo gbele, fini á pịrịmịnị.
8 Biimịnị kịmịsẹ nanamịnị, dọụmịnị kịmịsẹ ẹrịmịnị, bá ogugo gbelemịnị kịmịsẹ, fini bịsẹ ụbọ pịrịmịnị.
9 Ánị ovụrụmị te ụbọ kị wó tọbọụ breadị bii daba, okuta kọn bịsẹ tọbọụ pịrịmịnị a o?
10 Anịghakpọ indi bii daba, seiye* kọn tọbọụ pịrịmụ ụbọ emi a o?
11 Ámịnị seiyaị mịẹmịnị otu kpọ ebi yeama kọn ánị awọụbo pịrịmụ bara nimiwẹrịemi aba, ánị agọnọ Daụ kị ebi yeama kọn ụ biimịnị otubo pịrịgha fa bara ámọ tọnmị?
12 “Anịduonị, ánị mịẹmịnị yesẹ, kịmịotu kọn á mọ mọ́ inyenrin ámọ dọụmịnị baramị, á kpọ bịsẹbara ka kị á mọ mọ́ inyenrin. Bei oloko mọ, bụrụ-otubọ mọ tolumọtimi egberimị.
13 Gbabụụ* gayti kị duoṣụọ. Tuumị, opu gayti duosụọwẹrị, finii kụrọmọemi ụwọụ duo wẹnịmịnị otubọsẹ, gbeingọgọlọ bulu ka sụọmịnị. Biin kịmịama bịsẹ gayti kị dụọsụọmịnị.
14 Anịa, ụndụ ụwọụ duosụọmịnị gayti bị gbabụụ k’emi, bá ụwọụ kpọ wẹnịasei fa k’emi. Biingha kịmịama kị bịsẹ ụwọụ duo wẹnịmịnị.
15 Ekpe bụrụ-otubo gbelemọ yọmị angọdii, ámịnị gaantọrụmị anịna-ama bara k’emi. Anịa ánị adụdụ bulumị, ámịnị kịmị kaanfị dọụmịnị* bou-obiriama bara k’emi.
16 Ị́mịnị ánị beinyaịbo ka kị á nimimịnị. Ịgbalị tịn laa grapu beinyaị tụagha fa, anịghakpọ igbalị tuwo laa fig beinyaị tụagha fa, bịsẹbara a?
17 Bịsẹbara kị, ebi tịnsẹ, ebi tịn-beinyaị kị tụamịnị, bá sei tịnsẹ, sei tịn beinyaị kị tụamịnị.
18 Ebi tịn laa sei tịn-beinyaị tụagha fa bara kị, sei tịn kpọ laa ebi tịn beinyaị tụagha fa.
19 Sei tịn-beinyaị tụamịnị tịnsẹ, pẹlẹ-koromọwẹrị gbeinmọ fẹnị bulu ka tụamịnị.
20 Gesii baramị, ị́mịnị ánị beinyaịbo ka kị á nimimịnị.
21 “‘Nanaowei a! Nanaowei a!’ Akị ị tịịnmịnị otubosẹ kị, agọnọ Daabụọma sụọmịnị bara fa, anịa ine agọnọ Daụ dọụbara mịẹmịnị otubo bẹtịbị kị Daabụọma sụọmịnị.
22 Biin kịmịama bịsẹ erein laa daba gbaa ị pịrịmịnị: ‘Nanaowei a! Nanaowei a! Omịnị iné ẹrẹ kọn bụrụ-egberiama gbaa a? Bá iné ẹrẹ kọn seitẹmẹama duo, bá tamamaa* fịrịama wẹnị a?’
23 Anịa ịmịnị gbaa á pịrịmịnị: ‘Oloko kokogha otu! Ịmịnị benebene á nimigha, ine tọrụyọ duo seri!’
24 “Anịduonị, ine gbaamịnị egberibo naa bá kẹrị mịẹmịnị kịmịsẹ, okuta awarị kẹrị-wẹrịemi kịlịkịlị kịmị bara kị paamịnị.
25 Warị bị okuta ka kẹrịwẹrịemi duonị, osuo koro, opu beni bo, bá kime kị fọụn kpọ warị bị korogha.
26 Anịa, ine gbaamịnị egberibo naa bá kẹrị-mịẹgha kịmịsẹ, owun agọnọ awarị kẹrị-wẹrịemi ayẹbẹ kịmị bara kị paamịnị.
27 Osuo koro, opu beni bo, bá kime fọụn ifiemị, warị bị owun agọnọ ka kẹrịwẹrịemi duonị, korowẹrị gbọgbọlẹị famị.”
28 Jesus bei egberibo gbaasiindẹmị, wó akị kịmịotubo tolumọ baramị á mịẹ angọbọụ kụrọmọmị.
29 Ómịnị oloko tolumọ-otubo bara kọn á tolumọgha, anịa Ayiba kụrọ kọn pịrịwẹrịemi kịmị bara ka kị á tolumọmị.
