Matthew 14:1-36
14 Bịsẹ ifiemị, Herod Galilee ete daamịnị-owei, Jesus gbelemọ egberiama naamị.
2 Ómịnị gbaa wó odubo-otubo pịrịmị: “Bei John kịmị akị benibilemọ owei. Ómịnị waị fịị duo seridẹ, anịkịduonị ómịnị laa kụrọ nanawẹrị bei tamamaa fịrịbo wẹnịmịnị.”
3 Bụọdẹ ifiemị, Herod* wó bịnaowei taa Herodias duonị John kẹrị ikoliwarị akaịmị. Herodias, Philip kị nanawẹrịmị.
4 John ifiebosẹ gbaa ụ pịrịtimimị: “Ị́mịnị á nana agbẹịgha.”
5 Anịduonị Herod ụ baa dọụtimimị, anịa kịmịbo John kọn bụrụ-owei kị diimọwẹrịemi duonị, ómịnị ụ baamụ yọmị malafamị.
6 Anịa Herod zii-erein oge ámọ teitimi ifiemị, Herodias tọbọụma sẹị Herod mịẹ pọwẹị kụrọmọmị.
7 Anịduonị, Herod ánị biidẹ yesẹ mịẹ á pịrịmụ bẹbẹpẹlẹmị.
8 Ámịnị á yin kọn á tolumọ egberi peiwẹrị gbaamị: “John kịmị akị benibilemọ owei tịbị pẹlẹ akị panị atụa bo ị pịrị.”
9 Yemị ụ mịẹ pọwẹịgha kị gbaa kpọ, Herod wó igeni-otubosẹ tọrụyọ ka bẹbẹpẹlẹwẹrị duonị, ómịnị anị gbaa bara mịẹmị.
10 Ómịnị wó odubo-otubo kẹnị ụbọ fịrịmọwẹrị ikoliwarị amú John tịbị pẹlẹmị.
11 Odubo-owei bị John tịbị kọn panị atụawẹrị tọbọụma pịrịmị. Tọbọụma kpọ tịbị sibe mú á yin pịrịmị.
12 Tuu ifie laamị, John tuuduo-otubo dụwẹị kọn mú dibimị, bá paaye gbaa Jesus pịrịmị.
13 Jesus egberi naa ifiemị, bẹtịbị timimụ yọ duonị, arụ aleiwẹrị kịmị fa yọ amúmị. Anịa kịmị ikpudubo, Jesus arụ aleiwẹrị múmịnị bara naa ifiemị, ámịnị anị amabo duo wẹnị ụ dọụ múmị.
14 Jesus arụ duo korobo ifiemị, biin kịmị ikpudu ẹrịmị. Ómịnị á dienenimị, bá dọọnmịnị otubosẹ zụọmị.
15 Buboru laadẹ ifiemị, Jesus tuuduo-otubo ụ laawẹrị gbaa ụ pịrịmị: “Ifie múdẹ, bá bei yọ kpọ ama mọ naịngha, anịduonị gbaa bei kịmịbo pịrịdá ámịnị mú, anịkị ámịnị gbenebo duosụọwẹrị ánị fịmụ fịyai fẹị angọ pịrị apaadẹ.”
16 Anịa, Jesus gbaa á pịrịmị: “Kịmịbo abarasiin, ánị fịmụ fịyaị dọụ á pịrị.”
17 Á gbaa ụ pịrịmị: “Omịnị kẹnịye kpọ nanagha, sọnran breadị mọ, bá maa indi mọ bẹtịbị k’emi.”
18 Ụ gbaa á pịrịmị: “A kọn bo.”
19 Ómịnị gbaa kịmịbo pịrịwẹrị tuwobo a tịtẹmị. Ómịnị sọnran breadịbo mọ, maa indibo mọ kọnwẹrị agọnọ dii tẹẹmị. Bá ómịnị breadịbo yaịnmọwẹrị kọn wó tuuduo-otubo pịrịmị. Ámịnị kpọ bụọmọ akị kịmị ikpudu pịrịmị.
20 Kịmịsẹ fị biribeinmị. Tuuduo-otubo kọọemi yaịbo bẹnịmọ ifiemị, oi-maa kana* fịnịama beinmị.
21 Erebo mọ kala awọụbo mọ tụa kịẹngha baramị, fịyaị fị otubo 5,000 owei-ama bara laa-emi.
22 Jesus ifie faamọgha baramị, wó tuuduo-otubo arụ aleidá bẹịnmọ angama mú timi ụ koru bara gbaamị. Tuuduo-otubo múmịnịmị, biin kịmị ikpudu kpọ warị amú bara Jesus mọ gbaamị.
23 Kịmịsẹ warị amúdẹmị, Jesus ogun owouwẹrị tẹẹbịbị mịẹ yọ amúmị. Ómịnị bẹtịbị bịsẹ yọma timi dein dụbamị.
24 Bịsẹ ifiemị, arụ bị tọrụbiri* laadẹ. Bá afọrụ bị á kọn sei kị fọụnmọ timi duonị, adụọnbo* kpọ ánị ụyamọtimimị.
25 Anịa deinbiri* bụọdẹmị, Jesus tọrụ duo wẹnị á dọụ múmị.
26 Ómịnị beni agọnọ duo wẹnịmịnị bara ámọ ẹrị ifiemị, tuuduo-otubo malafawẹrị gịa paamọmị: “Paagha paagha ye kị paamịnị o!”
27 Anịa Jesus ifie faamọgha bara gbaa á pịrịmị: “Ịmịnị e, malafakụmọ!”
28 Peter gbaa ụ pịrịmị: “Nanaowei, ị́mịnị kị bomịnị aba, ịmịnị kpọ beni agọnọ duo wẹnị ị́ dọụbo bara gbaa.”
29 Jesus gbaamị: “Bo!” Anịduonị, Peter arụ duo korowẹrị, paakị beni agọnọ duo wẹnị Jesus dọụmúmị.
30 Anịa Peter kime bị ẹrị ifiemị, ómịnị malafamị. Peter bilemịnị ifiemị, ómịnị gịa paamọmị: “Nanaowei, ị zụọ!”
31 Jesus kirimọ-kirimọ, wó bara sụnmọ Peter kẹrịwẹrị gbaamị: “Kala peibulu nana owei, tetuu kị duonị, ị́mịnị tamanaịnyọ nana ma o?”
32 Ámịnị arụma lei ifiemị, kime pẹlẹmị.
33 Arụma emi otubo tịbị-oboimọ ụ pịrịwẹrị gbaamị: “Ị́mịnị kọkọ Ayiba tọbọụ.”
34 Ámịnị tọrụbẹịn mú Gennesaret egbemị.
35 Bịsẹ ama kịmịbo Jesus lelei ifiemị, ámịnị gbaa bịsẹ yọ mọ naịn-emi amabosẹ pịrịmị. Anịduonị, bịsẹ kịmịbo dọọnmịnị otubosẹ kọn ụ yarịmị.
36 Bá ámịnị wó bịdẹ kirianga bẹtịbị kị gbelemụ bara kọn ụ tẹẹmị. Wó bịdẹ kirianga gbele otubosẹ angọ ebimị.
