Matthew 15:1-39
15 Zụa Farisi-otuama mọ, oloko tolumọ-otuama mọ, Jerusalem duo bo Jesus laawẹrị ụ biimị:
2 “Tetuu kị duonị iné tuuduo-otubo wo opudaụ-otu tolumọyebo seimọmịnị a o? Gbaamaba, ámịnị bara kpọ sụrụghatimi* fịyaị fịmịnị.”
3 Ómịnị á parụmị: “Tetuu kị duonị ámịnị kịmịawọụ tolumọyebo kị duonị Ayiba oloko diiseimọmịnị a o?
4 Gbaamaba, Ayiba gbaamị, ‘Ị́ daụ mọ yin mọ diidụbamọ, anịa daụ mọ yin mọ weridẹ ụbọsẹ kọn mú baa.’
5 Anịa ámịnị gbaamị, ‘kịmị, “ị kọn baratụa á pịrị dọụtimi yebo ịmịnị mọ dịẹ Ayiba pịrịdẹ” bara gbaa daụ mọ yin mọ pịrị daba,
6 bịsẹ ụbọmị ba benbene ụ daụ barịị agbẹịgha.’ Ámịnị, ánị opudaụ-otu tolumọyebo kị diidụbamọ Ayiba egberi dẹịn-emi.
7 Agọnọbeniyaị mịẹ otu, Isaiah á gbelemọ yọma gbaawẹrị egberimị kịrịị-emi. Isaiah gbaawẹrịmị:
8 ‘Bei kịmịbo ánị bẹbẹ-aparanbo ka kị ị tokonimịnị, anịa ánị adụdụbo zịnị yọ k’emi.
9 Ámịnị afẹn ka kị ị karịmịnị, tuumị, ámịnị kịmịawọụ olokoama kị tolumọmịnị.’”
10 Jesus paakị kịmị ikpudu tịịn ụ mọ mọ́ naịnwẹrị gbaa á pịrịmị: “Ine gbaamịnị egberi peidá, egberima sụọtuunimi.
11 Kịmị bẹbẹ duo sụọmịnị yebo kị ụ mịẹ Ayiba tọrụyọma ịlọlịmịnị bara fa, anịa wó bẹbẹ duo paabomịnị yebo kị ụ mịẹ Ayiba tọrụyọma ịlọlịmịnị.”
12 Jesus tuuduo-otubo bo ụ laawẹrị ụ biimị: “Iné gbaa egberibo Farisi-otubo mịẹ bulukọn bara ị́ mọ nimiwẹrịemi?”
13 Ụ gbaa á pịrịmị: “Ine agọnọ Daụ gborogha yesẹ, sou tangbeimịnị.
14 Á peikụmọ. Ámịnị tọrụbaan otu kị ụwọụ kọn zịnịotu dịamịnị. Tọrụbaan kịmị, zịnị tọrụbaan kịmị bara kẹrịwẹrị, ụwọụ kọn ụ dịamịnịsẹ, ánị maa kịmịbosẹ ogugu bulu ka korosụọmịnị.”
15 Peter gbaa ụ pịrịmị: “Bei tọnmọdịaye mịẹgaan wo pịrị.”
16 Anịa Jesus gbaa Peter pịrịmị: “Ị́mịnị kpọ naa sụọtuu-nimigha?
17 Bẹbẹ duosụọdẹ yesẹ, biribulu kị duosụọmịnị. Bá biribulu laadẹ yesẹ, bịẹn-paamọmịnị bara ị́mịnị mọ nimigha?
18 Anịa bẹbẹ duo paamịnị yebosẹ, adụdụ kị duo paabomịnị, bịsẹ yebo kị Ayiba tọrụyọma kịmị mịẹ ịlọlịmịnị.
19 Sei iroro-yebosẹ adụdụ kị duo bomịnị, gbaamaba: kịmị baa, tiri amú zịnị ụbọ mọ anga, lịkaị-lịkaị zọzọ anga inyenrinbụọama,* furu, ekpe iseritịẹ, ba kịmị gbaaseimọ inyenrinbụọ.
20 Bei yebo kị Ayiba tọrụyọma kịmị mịẹ ịlọlịmịnị, bara sụrụgha* timi fịyaị fịmịnị yọmị kịmị mịẹ Ayiba tọrụyọma ịlọlịgha.”
21 Jesus bịsẹ yọma barasiinwẹrị Tyre mọ Sidon mọ, ete ka múmị.
22 Dii! Bịsẹ etema emi Foenicia ere, bowẹrị youpaamọmị: “Dieneni akị ina nana, Nanaowei, David tọbọụ. Ine tọbọụma seitẹmẹ pịrị ụyamọ kụrọmọmịnị.”
23 Anịa ómịnị a parụgha. Anịduonị wó tuuduo-otubo bo ụ laawẹrị gbaa ụ pịrịmị: “Amịnị you wo atuuduomịnị duonị, á bịị bei yọ duo seri.”
24 Jesus gbaamị: “Ị fịrịmọ Israel warị duo fadẹ anịnabo bẹtịbị kị dọụ yọ abomị.”
25 Anịa, erema bo wó tọrụyọma okoiwẹrị gbaamị: “Nanaowei, baratụa ị pịrị!”
26 Jesus gbaa erema pịrịmị: “Kala awọụbo fịmụ breadị kọn obiri awọụbo pịrị agbẹịgha.”
27 Erema gbaamị: “Nanaowei, ị́mịnị kịrịị-emi, anịa obiri awọụbo kpọ ánị nana otu tabulubo duo koromịnị breadị aparanbo fịmịnị.”
28 Jesus á parụmị: “Ere-araụ, iné kụrọ peibulu duonị, pebidá iné dọụbara kị paa ị́ pịrị.” Bịsẹ tịẹkirimị ánị tọbọụma angọmị ebimị.
29 Jesus bịsẹ yọ duo seri ifiemị, ómịnị Galilee tọrụ mọ naịn-emi yọ amúmị. Ómịnị bịsẹ yọma ogun owouwẹrị tịtẹmị.
30 Bịsẹ ifiemị, biin kịmịama bo ụ laamị. Ámịnị okule-otu, angọmị yọ sẹị-emi otu, tọrụbaan-otu, ẹrẹdẹgha otu, bá zịnị dọọn-ama nanawẹrịemi otu kọn wó tọrụyọma bo koromọmị. Ómịnị ásẹẹ zụọmị.
31 Ẹrẹdẹgha otubo, ẹrẹ. Angọmị yọ sẹị-emi otubo, angọ ebi. Okule-otu, wẹnị. Bá tọrụbaan-otubo kpọ yọ ẹrịmịnị bara kịmịbo mọ ẹrị ifiemị, ámịnị angọbọụmị, anịduonị ámịnị Israel Ayiba bị tokonimị.
32 Jesus wó tuuduo-otubo tịịnwẹrị gbaa á pịrịmị: “Bei kịmịbo ina tọrụ-enenimị, tuumị, ámịnị ye fịgha* bara ị mọ mọ́ timi tara dein laadẹ. Bei kịmịbo ye fịgha timi ịmịnị á bịị warị amú daba, kịmị ụwọụbirima fọmọ kpọ paaemi.”
33 Anịa wó tuuduo-otubo gbaamị: “Bei yọmị ama mọ naịngha, anịduonị omịnị te yọ kị duo bei biin kịmịbosẹ fịwẹrị biribeinmụ breadị nanamịnị a?”
34 Jesus á biimị: “Ámịnị ẹndẹna breadị kị nanawẹrịemi a o?” Ámịnị ụ parụmị: “sọnọma breadị mọ biingha kala indiama mọ.”
35 Ómịnị kịmịbo bịị kirima tịtẹdẹ ifiemị,
36 Jesus sọnọma breadịbo mọ, bá indibo mọ kọnwẹrị tẹẹsiindẹmị, ómịnị breadịbo yaịnmọwẹrị kọn wó tuuduo-otubo pịrịmị. Bá ámịnị bụọmọ akị kịmịbo pịrịmị.
37 Kịmịsẹ fị biribeinmị. Tuuduo-otubo kọọ yaịbo bẹnịmọ ifiemị, sọnọma kana* beinmị.
38 Erebo mọ kala awọụbo mọ tụa kịẹngha baramị, fịyaị fị otubo 4,000 owei-ama.
39 Jesus kịmị ikpudu bịị warị amú-siindẹmị, ómịnị arụ aleiwẹrị Magadan etema múmị.
Gbaatụayọama
^ Farisi-otubo mọ, zịnị Jew-otuama mọ ánị ye mịẹ mịẹmịnị bara kị diiwẹrị ánị barabo sụrụtimimị.
^ Greek bẹẹlịmị porneia gbaa daba, biin lịkaị-lịkaị inyenrinbụọama kị bẹmọwẹrịemi. Egberi ụngbọụ tuuama dii.
^ Farisi-otubo mọ, zịnị Jew-otuama mọ ánị ye mịẹ mịẹmịnị bara kị diiwẹrị ánị barabo sụrụtimimị.
^ Anịghakpọ “mọụnkoru.”
^ Anịghakpọ “fịyaị tụa basketị.”
