Matthew 23:1-39
23 Jesus gbaa kịmị ikpudu mọ bá wó tuuduo-otubo mọ pịrịmị:
2 “Oloko tolumọ-otubo mọ, bá Farisi-otubo mọ ánị angọbo kọn Moses ịkasịma tịtẹdẹ.
3 Anịduonị, ámịnị gbaa á pịrịmịnị yebosẹ mịẹ, anịa ánị mịẹmịnị yebo diimịẹkụmọ, tuumị ámịnị ánị gbaamịnị yebo mịẹgha.
4 Ámịnị oku yeama fịnawẹrị kọn kịmịotu apeleama gbanawẹrị á pịrị sibemịnị, anịa ámịnị ánị bara-ịmgbịsa kpọ kọn yebo gbele dọụgha.
5 Ámịnị kịmịotu pịrị ẹrịmụ kị duonị ánị mịẹmịnị yebo mịẹmịnị, bá tọntọn fun bị yọama gẹẹ-tụawẹrịemi okodo kpa yebo mịẹ dụbamọmịnị, bá ánị bịdẹ bẹbẹbo mịẹ daanmọ dẹịnmịnị.
6 Ogetei ifie laa daba, ámịnị kịmịotu ánị ẹrịmụ yọama ka tịtẹmịnị, bá bẹnịị yetolumọmịnị yọma* bọlọụ ịkasịbo* ka tịtẹmịnị.
7 Bá ámịnị fọụtiribo kịmịotu pịrị kule, bá Rabbi* kọn á tịịnmụ yọ kị dịsẹ-emi.
8 Anịa, ámịnị kịmịotu bụọmọ Rabbi kọn á tịịnkụmọ, tuumị ámịnị kẹnị tolumọ-owei kị nanawẹrịemi, ásẹẹ bịnaotuama.
9 Ámịnị bei kirima daụ akị kẹnị ụbọ kpọ tịịnkụmọ, tuumị ámịnị kẹnị Daụ kị nanawẹrịemi, anị agọnọ bị emi owei bị.
10 Kịmịotu bụọmọ tịbịotu kọn á tịịnkụmọ, tuumị ámịnị kẹnị tịbịowei kị nanawẹrịemi, anị Christ bị.
11 Anịa ánị ovuruma dụbadẹịn kịmị bị odubo-gbaa kọọ otubo pịrịmụ kịmị ka paamịnị.
12 Ayiba angọ-serimọmịnị kịmị bị mịẹ iyerimọmịnị, bá angọ-iyerimọmịnị kịmị bị serimọ owoumọmịnị.
13 “Farisi-otuama, oloko tolumọ-otuama, ụya á laa, ámịnị agọnọ-beniyaị mịẹ otuama! ámịnị agọnọ Daabụọ ogugo teridẹ; tuumị, ámịnị sụọgha, bá sụọ dọụmịnị otubo kpọ bụọmọ sụọgha.
14 * ——
15 “Farisi-otuama, oloko tolumọ-otuama, ụya á laa, ámịnị agọnọ-beniyaị mịẹ otuama! Ámịnị abadị mọ, ogbo mọ duo yọụtimi kẹnị-ụbọ mịẹ Jew karịbụọma sụọ daba, ámịnị waị bịsẹ ụbọ mịẹ Gehenna asụọmịnị, bá ụbọ mịẹ kụrọ ánị seibo dẹịn yaị mịẹmịnị.
16 “Ụwọụ kọn zịnịotu dịamịnị tọrụbaan otu, ámịnị gbaa amọ, kịmị karịwarị ka kị bẹbẹ-pẹlẹwẹrịemi aba, mịẹbeinmọgha kpọ seigha, anịa karịwarịma emi Goldubo ka kị bẹbẹ-pẹlẹwẹrịemi aba, paabara paabara mịẹbeinmọ.’
17 Ayẹbẹ bá tọrụbaan otu! Goldubo mọ bá bịsẹ goldubo mịẹ yalịyalịmịnị karịwarị mọ tẹkẹ yelaadẹịn emi a o?
18 Ámịnị mọkpọ gbaa amọ, ‘kịmị ịkịankụn tana ka kị bẹbẹpẹlẹ daba, mịẹbeinmọgha kpọ seigha, anịa tanama emi dịẹpreye ka kị bẹbẹpẹlẹ daba paabara paabara mịẹbeinmọ.
19 Tọrụbaan otu! Tanama emi dịẹpreye mọ bá bịsẹ dịẹpreye mịẹ yalịyalịmịnị tana mọ tẹkẹ yelaadẹịn emi a o?
20 Anịduonị, tana ka kị bẹbẹ-pẹlẹmịnị kịmịsẹ, tana mọ bá tanama emi yebosẹ ka kị bẹbẹ-pẹlẹmịnị.
21 Bá karịwarị ka kị bẹbẹ-pẹlẹmịnị kịmịsẹ, karịwarị mọ bá karịwarị nanawẹrịemi Ayiba mọ ka kị bẹbẹ-pẹlẹmịnị.
22 Bá mọkpọ agọnọ ka kị bẹbẹ-pẹlẹmịnị kịmịsẹ, Ayiba pẹrẹ-ịkasị mọ bá pẹrẹ-ịkasịma tịtẹ-emi ụbọ mọ ka kị bẹbẹ-pẹlẹmịnị.
23 “Farisi-otuama, oloko tolumọ-otuama, ụya á laa, ámịnị agọnọ-beniyaị mịẹ otuama! tuumị, ámịnị mint, dill bá cumin* kọn oia yọ dịẹmọ daba, kẹnị anga kọn Ayiba pịrịmịnị, anịa ámịnị olokoma yelaadẹịn yebo akị ye diimọgha. Gbaamaba, kịrịị ụgụlapẹlẹ, dieneni, bá peibulu. Bọlọụ yebo mịẹmụ yọmị yelaa-emi, anịa bịsẹ yebo duonị mị kọọ yebo barafa agbẹịgha.
24 Ụwọụ kọn zịnịotu dịamịnị tọrụbaan otu, ámịnị kọpụ bulu duosụọmịnị ịtalị* kịya serimịnị, anịa konubiri-undoku* mẹnẹmịnị!
25 “Farisi-otuama, oloko tolumọ-otuama, ụya á laa, ámịnị agọnọ-beniyaị mịẹ otuama! Tuumị, ámịnị kọpụ mọ bá panị mọ tirianga sụrụmịnị, anịa mẹnẹmọtu tụa bá angọ dọụyọ mịẹ inyenrinbụọ kị kọpụ bulu bein-emi.
26 Tọrụbaan Farisi-otu, bọlọụ kọpụ bulu mọ, panị bulu mọ sụrụ, anịkị, tirianga kpọ bo yalị apaadẹ.
27 “Farisi-otuama, oloko tolumọ-otuama, ụya á laa, ámịnị agọnọ-beniyaị mịẹ otuama! tuumị ámịnị pịna-ada kọn painti-wẹrịemi dụwẹị-ogugu bara k’emi, tiriangamị dii-ebiemi, anịa bulumị fịịdẹ otu umgbou-ama mọ bá bụrụdẹ yeama mọ k’emi.
28 Ámịnị kpọ bịsẹ kpekẹnị bara ka, kịmịawọụ tọrụyọ bị, ámịnị kịrịịyẹ mịẹmịnị otuama, anịa ánị adụdụbo gesii ye fa, bá oloko kekeregha inyenrinbụọ kị nanawẹrịemi.
29 “Farisi-otuama, oloko tolumọ-otuama, ụya á laa, ámịnị agọnọ-beniyaị mịẹ otuama! tuumị ámịnị bụrụ-otubo dibimụ ogugu-ama sou, bá kịrịịye mịẹ otu dibiwẹrịemi yọbo mịẹ ebimọmịnị.
30 Bá ámịnị gbaamịnị, ‘omịnị wo opudaụ-otubo timi ifie ka inyenrintimi wẹrị a, omịnị á sụọmọ bụrụ-otubo baaghamụ timimị.’
31 Anịa ámịnị kị bẹtịbị ánị bẹbẹbo kọn, omịnị bụrụ-otu baa otubo awọụama bara gbaamịnị.
32 Anịduonị ámịnị ánị opudaụ-otubo mịẹtimi yebo mịẹ mú tuu laa.
33 “Seiye* bá dirimaowei awọụama, ámịnị tebara kị mịẹtimi ụgụlapẹlẹ ifie laa daba Gehenna* duo tẹịmịnị a o?
34 Bei tuu kị duonị, ịmịnị bụrụ-otu, kịlịkịlị otu, bá kịmị tolumọ otu fịrịmọ á yarịmịnị. Ámịnị zụa baawẹrị akị tịn-ama solomịnị, zụa akị ánị bẹnịị yetolumọmịnị yọbo* avụrọ, bá ama duo mú ama laasẹ zụa ụyamọmịnị.
35 Anịkị akpọma baadẹ kịrịịye mịẹ otu asịịnbosẹ bo ánị tịbịma gbanaịmịnị. Kịrịịye mịẹ owei Abel duo bo Barachiah tọbọụ Zechariah nẹ ámịnị kọn karịwarị mọ, bá tana mọ ovuruma baa owei asịịnbo*, ánị tịbịma gbanaịmịnị.
36 Gesiimị, ị gbaa á pịrị, bei yebosẹ mị ziitu kị paamọmịnị.
37 “Jerusalem, Jerusalem, bụrụ-otubo mọ, bá fịrịmọ ị́ yarị otubo mọ gbein-baamịnị araụ, ịmịnị biin ifie-ama ka ofoni yin ána awọụbo benimọmịnị bara kọn iné awọụbo benimọ dọụmị, anịa ị́mịnị bọụgha.
38 Dii! ánị warị gbeinkoromọ á pịrịdẹ.*
39 Ị́ gbaa á pịrị, ámịnị ba ina ẹrịgha timi, ‘Tarịama Jehovah* ẹrẹ kọn bo owei laadẹ’ gbaadẹ kị ámịnị ina ẹrịmịnị!”
Gbaatụayọama
^ Greek bẹẹlịmị, “synagogue.” Egberi ụngbọụ tuuama dii.
^ Anịghakpọ “ebidẹịn yọbo.”
^ Anịghakpọ “Tolumọ-owei.”
^ Oruseri ifiemị, bara kọn gẹẹwẹrịemi Greek Baịbụlụ-bo, zụa yelaa yaị dii daba, bei Baịbụlụ yọmị fa.
^ Mint, dill, bá cumin mọ anị kọn fịyaị mịẹ ịmbẹlẹmọ bá fụrụpaamịnị yeama.
^ Greek bẹẹlịmị, “otongbolo bara emi ye.”
^ Anịghakpọ “camel.”
^ Anịghakpọ “dawaịn; gbalaowei.”
^ Egberi ụngbọụ tuuama dii.
^ Greek bẹẹlịmị, “synagogue-bo.” Egberi ụngbọụ tuuama dii.
^ Anịghakpọ “ịsọmọ.”
^ Anịghakpọ kaanghaba “ánị seifadẹ warị bụọmọ á pịrịdẹ.”
^ Egberi ụngbọụ tuuama dii.
