Matthew 5:1-48
-
OGUN AGỌNỌMA TOLUMỌ YEBO (1-48)
-
Jesus ogun agọnọma kịmịotu tolumọmị (1, 2)
-
Kịmị mịẹ pọwẹị nanamịnị esena yeama (3-12)
-
Fụụ mọ tụkpa mọ (13-16)
-
Jesus oloko mịẹbeinmọ yọ ka bomị (17-20)
-
Bulukọn (21-26), tiri amú zịnị ụbọ mọ anga (27-30), nanawẹrịemi ụbọ paamọ (31, 32), avụọ fị (33-37), bara waị (38-42), bá egiren-otu tarị gbelemọ tolumọ yeama (43-48)
-
5 Jesus bịsẹ biin kịmịbo ẹrị ifiemị, serigha ogun agọnọ owoumị; ụ tịtẹdẹmị, wó tuuduo-otubo ụ dọụbomị.
2 Ómịnị wó bẹbẹ finiwẹrị koro á tolumọmị. Ụ gbaamị:
3 Pọwẹị Ayiba nimi agbẹị-emi bara kọn angọ-nimiwẹrịemi otubo laa,* tuumị agọnọ Daabụọ bị á laamịnị.
4 Pọwẹị buluịmbẹlẹgha otubo laa, tuumị kụrọmọye á laamịnị.
5 Pọwẹị bọụbọụ* inyenrinbụọ nanawẹrịemi otubo laa, tuumị ámịnị kiriogboma timi inyenrinmịnị.
6 Pọwẹị kịrịịye mịẹ dịsẹ kụrọmọemi otubo laa, tuumị Ayiba ánị dịsẹnana yọ mịẹbeinmọ á pịrịmịnị.
7 Pọwẹị dieneni mịẹdịamịnị otubo laa, tuumị kịmị dieneni mịẹ á dịamịnị.
8 Pọwẹị yalị adụdụ nanawẹrịemi otubo laa, tuumị ámịnị Ayiba ẹrịmịnị.
9 Pọwẹị dọọ mịẹpaamọmịnị otubo laa, tuumị Ayiba awọụama ka kị á tịịnmịnị.
10 Pọwẹị kịrịịye mịẹmịnị yọ duonị á pịrị ụyamọmịnị otubo laa, tuumị agọnọ Daabụọ bị á laamịnị.
11 Ine ẹrẹ kị duonị, kịmịama á weri, ánị ụyamọ bá ekpe egberiama kọn á gbaịnmọmịnị aba, pọwẹị á laa.
12 Ámịnị, ánị ụyamọ bara ka kị bụọdẹ ifie kpọ bụrụ-otubo ụyamọmị, anịduonị buluịmbẹlẹ kụrọmọ. Tuumị ánị gbẹẹmị agọnọ k’emi.
13 Ámịnị kị akpọma emi fụụ bị, anịa fụụ ba kụrọ nanagha aba, tebara ka kị ụ mịẹ waị kụrọ nanamịnị a? Ị́mịnị ba ụ kọn laa kẹnịye kpọ mịẹgha fa, anịduonị ụ kọn tangbẹịwẹrị kịmịotu pịrị daanbụọ kị kọọdẹ.
14 Ámịnị kị akpọma emi tụkpa bị. Ogun agọnọ-emi ama gaan kị timi kịmịotu pịrị ẹrịmịnị.
15 Kịmịotu tụkpa tọnị daba, ye akị tụkpa terigha, anịa akị tụkpa tịẹmọmịnị yọ ka wẹrịmịnị, anịkị tụkpa bị kẹrịị warịbuluma emi otubosẹ laadẹ.
16 Bịsẹ kpekẹnị baramị, pebịdá ánị tụkpa bị kẹrịị kịmịawọụ pịrị ẹrị, anịkị kịmịotu ánị ebi fịrịbo ẹrịwẹrị tokoni akị ánị agọnọ Daụ pịrịdẹ.
17 Ịmịnị Moses oloko bị, anịghakpọ bụrụ-otubo gẹẹwẹrịemi yebo seimọ yọ ka boemi bara irorokụmọ, anịa ịmịnị oloko mịẹbeinmọ yọ ka bomị.
18 Gesiimị, ị gbaa á pịrị, agọnọ mọ kịrị mọ kị bụọ fa kpọ, bei olokoma gẹẹwẹrịemi yebosẹ paabeinmịnị, zaụdẹịn ye kpọ paabeinmịnị.
19 Anịduonị, kịmị nẹ bei olokobo zaụdẹịn ye kị seimọ, bá zịnịotu tolumọwẹrị bịsẹbara mịẹmịnị ụbọsẹ, agọnọ Daabụọma sụọ agbẹịgha* bara ka kị ụbọ diimọmịnị. Anịa, bei olokobo koko, bá kọn kịmịotu tolumọmịnị ụbọsẹ, agọnọ Daabụọma sụọ agbẹị-emi* bara ka kị ụbọ dịịmọmịnị.
20 Ị gbaa á pịrị, ámịnị kịrịịye mịẹ akị Farisi-otubo mọ, oloko tolumọ-otubo mọ dẹịngha ifiesẹ, ámịnị benbene agọnọ Daabụọma sụọgha fa.
21 “Ámịnị kpọ nimiwẹrịemi baramị, oruseri ifiemị gbaawẹrịmị: ‘Kịmị baakụmọ, anịa kịmị baadẹ ụbọsẹ kẹrị ụgụlawarị amúmịnị.’
22 Mọabịkpọ ị gbaa á pịrị, bulukọn wó bịna-ụbọ pịrịwẹrị bịsẹ bulukọnyọ kọnsiingha ụbọ bị, kẹrị ụgụlawarị amúmịnị. Kịmị-dọọn egberi kọn wo bịna-ụbọ werimịnị ụbọ bị, kẹrị dụbadẹịn ụgụlawarị ka múmịnị. Anịa, ‘ị́mịnị ayẹbẹ’ kọn kịmị werimịnị ụbọsẹ, gbein Gehenna* fẹnịbụrọ ka tụamịnị.
23 Ị́mịnị ye akị ịkịankụn yọ abotimi, ịkịankụn tana laadẹ kị iné bịna-ụbọ buluịmbẹlẹ ị́ pịrịgha bara ị́ mọ ukie daba,
24 iné kọn bo yemị akị tana bọlọụma wẹrịdá mú iné bịna-ụbọ laa. Bọlọụ ụ mọ mọ́ dọọ mịẹdẹ kị waịbo iné ịkịan kụn.
25 Ị́ mọ kịmị mọ ụgụla nanawẹrịemi aba, ámịnị ụgụlawarịma múmịnị ifiemị, saramọ saramọ ụbọ mọ zọzọnaa. Anịkị, ụbọ bị ị́ kọn ụgụlapẹlẹ-owei tọrụyọma tịẹmọgha fa, ụgụlapẹlẹ-owei kpọ ị́ kọn ụgụlawarịma fịrịwẹnịmịnị owei pịrịgha fa, bịsẹ owei kpọ ba ị kọn ikoliwarị akaịgha fa.
26 Gesiimị, ị gbaa ị́ pịrị, ị́mịnị ikoliwarịma timi, iné fịwẹrịemi saabosẹ gbẹẹsiindẹ kị paabomịnị.
27 “Ámịnị kpọ nimiwẹrịemi baramị, gbaawẹrịmị: ‘Tiri amú zịnị ụbọ mọ angakụmọ.’
28 Anịa ị gbaa á pịrị, kịmị nẹ ere-araụ diiwẹrị á mọ mọ́ anga dịsẹmịnị ụbọ bị, wó adụdụma á mọ mọ́ angasiindẹ.
29 Anịduonị, iné amabara tọrụ bị ị́ dịnẹmọ sei mịẹmịnị aba,* sou tangbei. Ị́mịnị kẹnị tọrụ fa yọmị ebi akị iné angọsẹ ámọ gbeinmọ Gehenna* atụamụ yọ dẹịn-emi.
30 Bá, iné amabara kị ị́ dịnẹmọ sei mịẹmịnị aba,* pẹlẹ tangbei. Ị́mịnị kẹnị bara fa yọmị ebi akị iné angọsẹ á mọ gbeinmọ Gehenna* atụamụ yọ dẹịn-emi.
31 “Bịsẹ yọ bụọmọ kpọ, gbaawẹrịmị: ‘Kịmị wó nanawẹrịemi ere paamọ dọụmịnị aba, ómịnị ba á nanagha fa fun kọn á pịrị.’
32 Anịa ị gbaa á pịrị, iné nanawẹrịemi ere, zịnị kịmị mọ bụnụghatimi ị́mịnị á paamọ daba, erema mịẹ mú zịnị kịmị mọ bụnụ apaaemi. Bá bịsẹbara kọn paamọdẹ ere nanamịnị ụbọsẹ, sei mịẹdẹ.
33 “Mọkpọ ánị nimiwẹrịemi baramị, oruseri ifiemị gbaawẹrịmị: ‘Ị́ laa mịẹgha fa avụọ fịkụmọ. Ánịa ị́ mọ Jehovah* mọ avụọ fị daba, mịẹbeinmọ.’
34 Anịa ị gbaa á pịrị, benebene bịẹn-tịịnkụmọ.* Agọnọ kpọ kọn bịẹn-tịịnkụmọ,* tuumị agọnọ bị Ayiba pẹrẹ-ịkasị;
35 kiriogbo kpọ kọn bịẹn-tịịnkụmọ,* tuumị, anị Ayiba bụọgbana yọ; Jerusalem kpọ kọn bịẹn-tịịnkụmọ,* tuumị, anị kụrọ nanawẹrịemi Ibe-daaowei opuama.
36 Iné ụndụ* kpọ kọn bịẹn-tịịnkụmọ,* tuumị, ị́mịnị laa kẹnị tịbị-dumu kpọ mịẹ pịnamọ anịghakpọ dirimọgha fa.
37 Pebidá iné mịẹmụyesẹ, ‘iin-ye’ gbaa daba iin-ye, ‘ẹn-ẹn’ gbaa daba, ẹn-ẹn. Iné gbaawẹrịemi egberi mịẹbeinmọgha inyenrinbụọmị, bulusei owei kị duobomịnị.
38 “Ámịnị kpọ nimiwẹrịemi baramị, gbaawẹrịmị: ‘Tọrụ kọn tọrụ gbẹẹ, bá aka kọn aka gbẹẹ.’
39 Anịa ị gbaa á pịrị: Benebene bulusei kịmị mọ sụụkụmọ, kịmị iné amabara amgba polo daba, kọnọbara amgba kpọ waị ụbọ pịrị polo.
40 Kịmị ị́ kọn ụgụlawarị amúwẹrị iné buluma tụawẹrịemi bịdẹ akị dọụmịnịsẹ, ine tiri bịdẹ kpọ siin ụ pịrị.
41 Bá, yọ daamịnị kịmị ị́ penimọwẹrị okuye sibe kẹnị maịlị wẹnị dọụmịnịaba, ụ mọ mọ́ maamụ wẹnị.
42 Kịmị ine bara duo ye bii daba, ụbọ pịrị. Bá kịmị ine bara duo sịlị kị bọlẹị dọụmịnị kpọ, ụbọ pịrị.*
43 “Ámịnị kpọ nimiwẹrịemi baramị, gbaawẹrịmị: ‘Iné ọvị-ụbọ tarị, bá iné egiren-ụbọ golu.’
44 Anịa, ị gbaa á pịrị: Ifiebosẹ ánị egiren-otubo tarị, bá tẹẹ akị ánị ụyamọmịnị otubo pịrị.
45 Ámịnị bịsẹbara mịẹ daba, ámịnị ánị agọnọ Daụ ạwọụama bara kị mịẹdịamịnị. Ómịnị ụraụ mịẹpaamọ bulusei otu mọ, ebi otu mọ pịrịmịnị. Bá osuo mịẹpaamọ kịrịịye mịẹmịnị otu mọ, kịrịịye mịẹgha otu mọ pịrịmịnị.
46 Ámịnị á tarịwẹrịemi otubo bẹtịbị kị tarị daba, te gbẹẹ kị á laamịnị a o? Tịbịsaa bii otubo kpọ bịsẹ kpekẹnị bara kị mịẹmịnị kị tọn?
47 Bá ámịnị ánị bịnaotubo bẹtịbị kị kulemịnị aba, ánị mịẹmịnị yemị bẹbẹ paa yọ emi a? Zịnị ibe otubo kpọ bịsẹ kpekẹnị bara kị mịẹmịnị.
48 Ánị agọnọ Daụ bị beinmọ-beinmọ tarị kị mịẹdịamịnị, ámịnị kpọ bịsẹbara kị diimịẹ.
Gbaatụayọama
^ Anịghakpọ “tẹmẹ nanamụ yọ tẹẹmịnị otubo.”
^ Anịghakpọ “angọ-iyerimọ.”
^ Greek bẹẹlịmị, “Daabụọma zaụdẹịn kịmị.”
^ Greek bẹẹlịmị, “Daabụọma opu kịmị.”
^ Anị Jerusalem tiriangamị sei yeama yọụnmọmịnị yọ. Egberi ụngbọụ tuuama dii.
^ Anịghakpọ “ị́ mịẹ adalaịmọmịnị aba.”
^ Egberi ụngbọụ tuuama dii.
^ Egberi ụngbọụ tuuama dii.
^ Anịghakpọ “ị́ mịẹ adalaịmọmịnị aba.”
^ Egberi ụngbọụ tuuama dii.
^ Anịghakpọ “bịẹn-kaankụmọ; bịẹnfịkụmọ; bịẹn-peikụmọ.”
^ Anịghakpọ “bịẹn-kaankụmọ; bịẹnfịkụmọ; bịẹn-peikụmọ.”
^ Anịghakpọ “bịẹn-kaankụmọ; bịẹnfịkụmọ; bịẹn-peikụmọ.”
^ Anịghakpọ “bịẹn-kaankụmọ; bịẹnfịkụmọ; bịẹn-peikụmọ.”
^ Greek bẹẹlịmị, “tịbị.”
^ Anịghakpọ “bịẹn-kaankụmọ; bịẹnfịkụmọ; bịẹn-peikụmọ.”
^ Anị, sịlị gbanagha bara ka kị ụbọ pịrị kị bẹmọwẹrịemi.
