Matthew 17:1-27
17 Sondịa erein bụọdẹmị, Jesus, Peter, James, bá James bịnaowei John mọ kọnwẹrị kẹnị seri ogun owoumị.
2 Ámịnị bịsẹ yọma wó angọ dei bara ẹrịmị. Wó andẹ* bị ụraụ bara kị kẹrịmị, bá wó tụawẹrị bịdẹbo kpọ tụkpa bara ka gbene-gbene pịnakụrọmị.
3 Anịa dii! Moses mọ Elijah mọ, Jesus mọ ẹrẹteimịnị bara ámịnị mọ ẹrịmị.
4 Anịduonị Peter gbaa Jesus pịrịmị: “Nanaowei, omịnị bei yọma emi yọmị ebikamị. Ị́ dịsẹ-emi aba, ịmịnị tara ẹtọbọ-warịama kọn bei yọma kẹrịmịnị, kẹnị iné ye, kẹnị Moses ye, kẹnị bá Elijah ye.”
5 Peter mọkpọ ẹrẹmịnị ifiemị, dii! kẹnị pịna kụrọmọ obudou á terimị, bá okolo obudou duo gbaa paamọmị: “Bei ine tọbọụ, ine tarịwẹrịemi tọbọụmị, ịmịnị wó abarapoudẹ. Wó gbaa bara mịẹ.”
6 Tuuduo-otubo okolo naa ifiemị, malafa kụrọmọ duonị, ánị andẹbo* kọn kiri dịawẹrị koromị.
7 Jesus bo á mọ mọ́ naịnmị, bá á gbelewẹrị gbaamị: “Seritịẹ, malafakụmọ.”
8 Ámịnị tịbị serimọ agọnọ dii ifiemị, zịnị ụbọ ẹrịgha, Jesus bẹtịbị kị ẹrịmị.
9 Ámịnị ogun duo koro bomịnị ifiemị, Jesus gbaa á pịrịmị: “Ánị ẹrị yemị gbaa kẹnị ụbọ kpọ pịrịkụmọ timi, Kịmịtọbọụ yaị bị fịị duo seribomụ ifie laa.”
10 Anịa, Jesus tuuduo-otubo ụ biimị: “Tetuu kị duonị oloko tolumọ-otubo Elijah kị bọlọụ bomịnị bara gbaa ma o?”
11 Jesus á parụmị: “Elijah kọkọ bomịnị, ómịnị yebosẹ mịẹ waị agbẹịbara timimịnị.
12 Anịa ị gbaa á pịrị, Elijah bo kpọ bodẹ. Anịa kịmịbo ụ leleigha duonị, ánị dịsẹdẹ barasẹ ka kị ụ mịẹmị. Bịsẹ kpekẹnị bara kị, bei bọlọụmị Kịmịtọbọụ yaị kpọ ánị barama ụyafịmịnị.”
13 Bịsẹ ifie ka Jesus tuuduo-otubo, ómịnị John kịmị akị benibilemọ owei egberi kị gbaamịnị bara nimimị.
14 Ámịnị mú biin kịmịbo mọ naịnmịnị ifiemị, kẹnị owei bo Jesus tọrụyọma okoiwẹrị gbaa ụ pịrịmị:
15 “Nanaowei, ine tọbọụ dieneni, ómịnị dọọn kụrọmọmịnị. Ómịnị egiri dọọn kị nanawẹrịemi duonị, biin ifie-ama fẹnị bulu, bá beni kpọ akorosụọmịnị.”
16 Ịmịnị ụ kọn iné tuuduo-otubo yarịmị, anịa ámịnị kụrọ nanawẹrị ụ zụọgha.
17 Jesus gbaamị: “Peibulu nanagha bá seifadẹ kịmịama, ịmịnị á mọ mọ́ timi te ifie kị laamịnị a o? Ịmịnị ánị mịẹmịnị yebo enetimi tẹ ifie kị laamịnị a o? Tọbọụ kọn ị yarị.”
18 Jesus, seitẹmẹ bị saramọ tọbọụ ango duo seri bara gbaa ifiemị, seitẹmẹ bị paakị tọbọụ angọ duo paamị. Bịsẹ tịẹkirimị, tọbọụ angọmị ebimị.
19 Jesus tuuduo-otubo bo kịmị fa yọ ụ laawẹrị ụ biimị: “Tetuu kị duonị omịnị laa seitẹmẹ duo apaagha o?”
20 Ụ gbaa á pịrịmị: “Ánị nanawẹrịemi kala peibulu kị duonị bịsẹbara paamị. Gesịịmị, ị gbaa á pịrị, ánị peibulumị mustard ụngbọụ bara k’emi kpọ, ámịnị ‘bei yọ duo seri ánị yọma mú’ gbaa bei ogun pịrị daba, ómịnị múmịnị. Kẹnị ye kpọ kụrọ á pịrịgha fa.”
21 * ——
22 Ámịnị Galilee abẹnịtimi ifie kị Jesus gbaa á pịrịmị: “Kịmịtọbọụ yaị bị ámọ yẹrị wó egiren-otubo pịrịmịnị,
23 bá ámịnị ụ baawẹrị tarụkaramọ erein laa daba, Ayiba ụ tịịn serimịnị.” Jesus gbaa egberimị wó tuuduo-otubo mịẹ eneni kẹrịkụrọmọmị.
24 Ámịnị bo Capernaum laa ifiemị, karịwarịma tịbịsaa* biimịnị-otubo bo Peter laawẹrị ụ biimị: “Ánị tolumọ-oweimị karịwarị tịbịsaa gbẹẹgha o?”
25 Peter á parụmị: “Gbẹẹmịnị.” Anịa Peter warị duo sụọ ifiemị, Jesus bọlọụ Peter biimị: “Simon tebara kị ị́ mọ tọn ma? Akpọ daamịnị-otubo te otu bara kị duo bẹbẹ bẹbẹ tịbịsaabo akịmịnị a? Ána awọụbo bara kị duo akịmịnị a, anịghakpọ egeni-otu bara kị duo akịmịnị a?”
26 Peter gbaa amọ: “Egeni-otu bara kị duo akịmịnị,” ụ bịsẹbara gbaa ifiemị, Jesus gbaa ụ pịrịmị: “Bịsẹbara aba, awọụbo tịbịsaa gbẹẹ agbẹịgha.
27 Anịa omịnị á mịẹ bulukọnghamụ yọ duonị, mú tọrụma daye koromọdá, iné bọlọụ baamụ indi bẹbẹ fini. Ị́mịnị silver ogu sịlị* ẹrịmịnị, bịsẹ sịlị kọn wo maakịmị tịbịsaabo gbẹẹ.”
