Matthew 24:1-51
24 Jesus karịwarị duoserimịnị ifiemị, wó tuuduo-otubo bo ụ laawẹrị karịwarịma emi warịbo tọnmọ ụ dịamị.
2 Jesus gbaa á pịrịmị: “Bei yebo ámọ ẹrịwẹrịemi? Gesiimị ị gbaa á pịrị, ásẹẹ gbein-gọgọlọmịnị, kẹnị okuta kpọ zịnị okuta agbanaị-timigha fa.”
3 Ómịnị bẹtịbị Olive ogunma tịtẹtimi ifiemị, wó tuuduo-otubo bo ụ laawẹrị gbaamị: “Gbaa wo pịrị, bei yebosẹ te ifie ka paamịnị a o? Bá te lelei-ama kị iné waị bomụ ifie* mọ, bá akpọ kunumọ ifie* mọ apaamịnị a o?”
4 Jesus á parụmị: “Angọdii, kịmị bụọmọ á lẹlẹmọkụmọ.
5 Tuumị, biin kịmịama ine ẹrẹ kọn bowẹrị ‘ịmịnị kị Christ bị’ bara gbaawẹrị, biin kịmịama lẹlẹmọmịnị.
6 Ámịnị naịn yọama mọ, alaa yọama mọ sụụ paamịnị bara naamịnị. Mọabịkpọ malafakụmọ, bei yebosẹ paamịnị, anịa kunumọ bị naa laagha.
7 “Ibe mọ ibe mọ sụụmịnị, Daabụọ mọ Daabụọ mọ sụụmịnị, mọụn koromịnị, bá kirizigei kẹnị yọ duo mú kẹnị yọ apaamịnị.
8 Bei yebosẹ akpotu koro paadẹ bara kị mịẹdịamịnị.*
9 “Kịmịotu ánị ụyamọ bá á baamịnị, bá ine ẹrẹ duonị, ibebosẹ á golumịnị.
10 Mọkpọ, biin kịmịama adalaịmịnị, zọzọ yẹrịpaamọ, bá zọzọ kpọ golumịnị.
11 Biin ekpe bụrụ-otuama bowẹrị biin kịmịama lẹlẹmọmịnị;
12 bá oloko kekeregha inyenrinbụọ kụrọ-dẹịnmịnị duonị, biin kịmịama nanawẹrịemi tarị bị iyerifamịnị.
13 Anịa enetimi tuu laa ụbọ bị, zụọbụọmọye nanamịnị.
14 Bá bei Daabụọ ebiegberi gbaa akpọsẹ yọrẹịwẹrị, ibebosẹ egberi naadẹ kị kunumọ bị bomịnị.
15 “Anịduonị, bụrụ-owei Daniel gbaawẹrị baramị, ye seimọmịnị fẹdẹfẹdẹ ye bị, tọntọn yọma tịẹ-emi bara ámọ ẹrị daba (goomịnị ụbọ bị sụọtuu nimi),
16 Judea bọọ emi otubo baịn ogunbo amú.
17 Warị agọnọma emi ụbọ kpọ, koro bo wó warịma ye kọnkụmọ,
18 Bá kiribou emi owei kpọ, waị warị abowẹrị tụamụ aru kọnkụmọ.
19 Ụya bịsẹ ifiema ofuro-emi erebo mọ, bá tọbọụ bara emi otubo mọ laa!
20 Pebidá ánị baịnmụ erein bị osuo ifie anịghakpọ Sabbath erein apaakụmọ bara tẹẹ;
21 Tuumị, akpọ paasẹ naa paagha opu akpotu kị paamịnị. Bịsẹ paa akpotu ba benebene paagha fa.
22 Gesiimị, bịsẹ ereinbo mịẹ zaụmọghasẹ, kẹnị ụbọ kpọ tẹịgha fa; anịa sẹlẹwẹrịemi otubo duonị, bịsẹ ereinbo mịẹ zaụmọmịnị.
23 “Bịsẹ ifiemị, kịmị ‘Dii! Christ bị bei yọ k’emi’, anịghakpọ ‘anị yọ k’emi’ bara gbaa daba, peikụmọ.
24 Tuumị, ekpe Christ-ama mọ ekpe bụrụ-otuama mọ, bowẹrị biin lelei-ama mọ bá tamamaa* yeama mọ mịẹwẹrị kịmịotu lẹlẹmọmịnị, mịẹ ka paaemi aba, sẹlẹwẹrịemi otubo kpọ lẹlẹmọmịnị.
25 Dii! Ifie naa laagha timi, ịmịnị berifaanye kọn á pịrịmịnị.
26 Anịduonị kịmịotu, ‘Dii! Ómịnị ogbo-abadị* k’emi’ bara gbaa á pịrị kpọ, múkụmọ, ‘Dii! Ómịnị warịbulubo k’emi’ bara kị gbaa kpọ, peikụmọ.
27 Kịmịtọbọụ yaị bị bomụ ifiemị, osuofẹnị bị ụraụ paamịnị anga duo malụ mú ụraụ sụọfamịnị anga laamịnị bara kị paamịnị.
28 Dụwẹị* emi yọsẹ, ogebo kpọ bịsẹ yọma bẹnịịmịnị.
29 “Bịsẹ ereinbo apaamụ akpotubo bụọ daba, kirimọ-kirimọ ụraụ bị dukumịnị, agọnọwei* bị kẹrịgha fa, ịkịkaịbo* agọnọ duo korobomịnị, bá agọnọ kụrọbo kpọ zigeimịnị.
30 Bịsẹ ifiemị Kịmịtọbọụ yaị lelei bị agọnọma paamịnị, bá kiriogboma emi ziituubosẹ eneni-kẹrịwẹrị ánị agbobubo titimịnị, bá ámịnị Kịmịtọbọụ yaị bị agọnọ obudubo duo, kụrọ mọ bá opu tokoni mọ abomịnị bara ẹrịmịnị.
31 Ómịnị kụrọ egbelegbele fie-poun ka kị wó angelị-otubo fịrịmọ paamọmịnị, bá ámịnị kiriogbo nia ịkọkịbo mọ, bá agọnọma kẹnị ịkọkị duo mú kọọ ịkọkị amúwẹrị sẹlẹdẹ otubo bẹnịmọmịnị.
32 “Wẹrị bei fig tịn tọnmọdịaye duo ye tolumọ akị: Kala tịnbarabo sọụwẹrị, tọbụtọbụ tuwo-pomubo paa daba, ụraụ ifie naịndẹ bara ámịnị mọ nimimịnị.
33 Bịsẹbara kị ámịnị bei yebo ẹrị daba, ómịnị bo ogugo mọ naịndẹ bara nimi.
34 Gesiimị, ị gbaa á pịrị, bei ziituu bị fịịsịịngha timi bei yebosẹ paamịnị.
35 Agọnọ mọ kiri mọ bụọfamịnị, anịa ine egberibo benebene bụọgha fa.
36 “Bịsẹ erein mọ ifie mọ gbelemọ yọmị, kẹnị ụbọ kpọ nimigha. Agọnọma emi angelịbo mọ, tọbọụ mọ kpọ nimigha, Daụ bẹtịbị kị nimiwẹrịemi.
37 Tuumị, Noah ereinbo apaa bara kị, Kịmịtọbọụ yaị bomụ ifie kpọ apaamịnị.
38 Bouwei-bẹnị bị naa boghatimi ifiemị, kịmịotu fịyaị fị, wuru bou, ere nana, bá ereama kpọ kọn yei pịrị nana timi Noah arụ* duosụọ erein laamị.
39 Bá ámịnị ịkịọụ akị paamịnị yebo atụaghatimi bouwei-bẹnị bowẹrị ásẹẹ baasiinmị. Kịmịtọbọụ yaị bomụ ifie kpọ bịsẹbara kị paamịnị.
40 Bịsẹ ifiemị, maa owei otu kiribou atimimịnị; kẹnị ụbọ kọnmịnị, kẹnị ụbọ kọngha fa.
41 Maa ereama ye-saanye kọn ye-saantimimịnị; kẹnị ụbọ kọnmịnị, kẹnị ụbọ kọngha fa.
42 Anịduonị, ámịnị ifiebosẹ letimi, tuumị ámịnị ánị Nanaowei bomụ erein nimigha.
43 “Anịa kẹnịye nimipẹlẹ: Warị nana ụbọ bị furu kịmị bomụ ifie* nimiwẹrịemisẹ, ómịnị kirinaawẹrị furuowei bụọmọ wó warị duosụọgha fa.
44 Bei tuu duonị, ámịnị kpọ angọ-tọlọmọwẹrị koru, tuumị Kịmịtọbọụ yaị bị ánị tọngha ifie ka bomịnị.
45 “Te ụbọ kị peibulu nana kịlịkịlị odubo-owei bị a o? Wó nanaowei bị ụ sẹlẹwẹrị ụ kọn wó odubo-otubosẹ dii, bá agbẹị ifie a, fịyaị mịẹpaamọ á pịrịmịnị.
46 Odubo-owei bị bịsẹ fịrị-wẹnịtimi, wó nanaowei bị bo wó ẹrị daba, pọwẹị ụ laa!
47 Gesiimị, ị gbaa á pịrị, ómịnị ụ sẹlẹwẹrị wó nanawẹrịemi yebosẹ diimịnị.
48 “Anịa bịsẹ odubo-owei bị buluseiwẹrị, ‘Ine nanaowei bị boghatimi alaadẹ’ bara gbaa angọ pịrịwẹrị,
49 koro wó timitimi odubo-otubo famọ, bá wuru boukẹrị olotubo mọ fịyaị fị bá wuru bou gbeleitimi daba,
50 Bei odubo-owei nanaowei bị, odubo-owei tọngha erein bá nimigha ifie ka waị bowẹrị,
51 ómịnị odubo-owei bị ụyamọ kụrọmọ, bá ụ kọn agọnọbeniyaị mịẹmịnị otubo emi yọ ka gbeintụamịnị. Ómịnị bịsẹ yọ ka timi you bá wó akabo fịmịnị.
Gbaatụayọama
^ Egberi ụngbọụ tuuama dii.
^ Egberi ụngbọụ tuuama dii.
^ Anị, ere-araụ ziikẹrị daba, dọọn naamịnị baramị.
^ Anịghakpọ “gelekụ-geleku.”
^ Egberi ụngbọụ tuuama dii.
^ Greek bẹẹlịmị, “fịịdẹ nama anịghakpọ fịịdẹ kịmị.”
^ Anịghakpọ “atọniye; akalụ.”
^ Anịghakpọ “agụraịbo.”
^ Greek bẹẹlịmị, “ekpedi baraemi opu arụ.”
^ Anịghakpọ “furu kịmị deinma bomụ ifie.”
