Matthew 13:1-58
-
DAABỤỌ TỌNMỌDỊAYEAMA (1-52)
-
Kirigboro kịmị (1-9)
-
Jesus tọnmọdịayeama kọn kịmịotu tolumọ tuumị (10-17)
-
Kirigboro-owei tọnmọdịaye tuumị (18-23)
-
Witibo mọ, bá sei ụngbọụbo mọ (24-30)
-
Mustard ụngbọụ mọ, bá ye mịẹ vudomịnị ye mọ (31-33)
-
Tọnmọdịaye ka kị kịmịama tolumọ yọmị, bụrụ-egberi kị mịẹbeinmọmị (34, 35)
-
Witibo mọ, bá sei ụngbọụbo mọ tọnmọdịaye tuumị (36-43)
-
Sọwẹị-emi yelaa ye, bá yelaa okuta tọnmọdịaye (44-46)
-
Saakịrịsa dii (47-50)
-
Aya bá oru yelaa yeama (51, 52)
-
-
Jesus duo paa etemị ụ kẹrịakịgha (53-58)
13 Bịsẹ ereinmị, Jesus warị abarasiinwẹrị mú abadị akama tịtẹmị.
2 Biin kịmịama bo bịsẹ yọma ụ laamị. Anịduonị ómịnị arụ aleiwẹrị tịtẹmị, kịmịbo ba beni akama tịẹtimimị.
3 Ómịnị tọnmọdịayeama duo biin yeama kọn á tolumọmị, bá gbaamị: Dii! “Kẹnị kirigboro kịmị kirigboro yọ amúmị.
4 Ụ gboromịnị ifiemị, zụa ụngbọụ-ama* ụwọụbirima korowẹrị ofoniama bo á gbọlụ fịmị.
5 Zụa ba okuta-ama emi yọ ka koromị. Atọụ bị olomugha duonị ámịnị ifie famọgha bara sọụmị.
6 Ụraụ paawẹrị á yọụnmọ ifiemị, ámịnị ekemị* fa duonị kparẹfamị.
7 Zịnị yaị ba ịgbalịama-emi yọ ka koromị. Ịgbalịbo sọụwẹrị á terifamọmị.
8 Zụa ba ebi atọụ ka koromị, anịduonị ámịnị beinyaị tụamị. Zụayaị 100 ifieama akị biin gborowẹrị bara dẹịnmị, zụa ba 60 ifieama anịghakpọ 30 ifieama akị biin gborowẹrị bara dẹịnmị.
9 Beri nanawẹrịemi kịmịsẹ, pei.”
10 Tuuduo-otubo bo Jesus laawẹrị gbaamị: “Tetuu kị duonị ị́mịnị tọnmọdịayeama ka kị á mọ mọ́ ẹrẹmịnị a o?”
11 Jesus á parụmị, “agọnọ Daabụọ gbelemọ sọwẹị-emi tọntọn yebo nimimụ fomuun kọn á pịrịdẹ, anịa bịsẹ fomuun kọn bei kịmịbo pịrịgha.
12 Ye nanawẹrịemi kịmịsẹ, zịnị yeama tụa ụ pịrịmịnị, anịduonị ómịnị biin yeama nanamịnị; anịa ye nanagha kịmị bị, wó nanawẹrịemi dọlọye kpọ kọn wó bara duo serimịnị.”
13 Anịkịduonị, ịmịnị tọnmọdịayeama kọn á mọ mọ́ ẹrẹmịnị; ámịnị diimịnị kpọ, yọ ẹrịgha, peimịnị kpọ, kẹnị ye kpọ naagha, bá gbaamịnị yebo kpọ asụọtuu-nimigha.
14 Bei paamịnị yemị, bụrụ-owei Isaiah gbaawẹrị egberi kị mịẹbeinmọmịnị. Bụrụ-owei Isaiah gbaawẹrịmị: ‘Ámịnị naamịnị, anịa sụọtuu-nimigha fa, bá ámịnị diimịnị anịa yọ ẹrịgha fa.
15 Bei kịmịbo adụdụ kụrọdẹ. Ámịnị naamịnị anịa peigha, bá yọ ẹrị dọụgha duonị ámịnị ánị tọrụbo gbaandẹ. Bá egberibo ánị adụdụbo gbelewẹrị ámịnị dei bá ịmịnị á zụọ ámọ dọụgha duonị, ámịnị ánị beribo kpọ teridẹ.’
16 “Anịa pọwẹị á laa, tuumị, ánị tọrụbo yọ ẹrịmịnị, bá ánị beribo kpọ yọ naamịnị.
17 Ị gbaa á pịrị, biin bụrụ-otuama mọ bá kịrịịye mịẹ-otuama mọ, ánị ẹrịmịnị yebo ẹrị dọụtimimị, anịa ẹrịgha, bá ánị naamịnị egberibo kpọ naa dọụtimimị, anịa laa naagha.
18 “Wẹrị kirigboro-owei tọnmọdịaye tuumị pei.
19 Kịmị Daabụọ egberi naa anịa egberima sụọtuu-nimighaba, bulusei-owei bị bowẹrị bịsẹ ụbọ adụdụma gborowẹrị ye kọnsiinmịnị; bịsẹ ụbọ kị ụwọụ akama koro ụngbọụ bị.
20 Okuta-ama emi kirima koro ụngbọụ* bị, anị kịmị nẹ egberi naa ifiemị, ifie famọgha bara pọwẹịwẹrị egberi kẹrịakị ụbọ.
21 Mọabịkpọ, wó ekemibo olomugha duonị, ómịnị dọlọ ifie ka kị sọụmị. Mị egberi duonị akpotu, bá penimọye ụ laa ifiemị, ómịnị adalaịmị.
22 Ịgbalịama emi yọ akoro ụngbọụ bị, anị egberi naa, anịa akpọma paamịnị bụụdọọnyebo mọ, bá sịlị kịmị lẹlẹmọ kụrọ mọ wó naadẹ egberi teri duonị, laa beinyaị tụagha ụbọ.
23 Ebi kirima koro ụngbọụ* bị, anị egberi naa, bá egberima sụọtuu nimiwẹrị beinyaị tụa ụbọ. Zụayaị 100 ifieama akị biin gborowẹrị bara dẹịnmị, zụa ba 60 ifieama anịghakpọ 30 ifieama akị biin gborowẹrị bara dẹịnmị.”
24 Jesus zịnị tọnmọdịaye gbaa á pịrịmị: “Agọnọ Daabụọ bị, ebi ụngbọụama akị wó kiribouma gborowẹrịemi kịmị bara k’emi.
25 Kịmịotu bụnụemi ifiemị, wó egiren-owei bowẹrị, sei ụngbọụ-ama kọn witi ovurubo agboro tụamị.
26 Witibo sọụwẹrị beinyaị tụa ifiemị, sei ụngbọụbo kpọ sọụmị.
27 Anịduonị, odubo-otubo mú kiribou nanaowei laawẹrị ụ biimị, ‘Nanaowei, ị́mịnị iné kiribouma ebi ụngbọụama kị gboro kị tọn? Anịa sei ụngbọụbo ba te yọ kị duobo ma o?’
28 Ómịnị gbaa á pịrịmị, ‘ine egiren-owei kị bei fịrị wẹnịmị.’ Odubo-otubo ụ biimị, ‘wo mú tuwobo dụnụ a?’
29 Ómịnị gbaamị, ‘dụnụkụmọ, ámịnị tuwobo dụnụmịnịmị, witibo kpọ tụa dụnụ apaaemi.
30 Ásẹẹ bụọmọ sọụtimi sou ifie laa. Sou ifie laa daba, ịmịnị gbaa fịyaị sou otubo pịrịmịnị: Bọlọụ tuwobo* bẹnịmọdá, á kọn mú yọụnmọ; bá witibo bẹnịmọdá, á kọn mú ine ye-gbaịn warịma tụa.’”
31 Ómịnị zịnị tọnmọdịaye gbaa á pịrịmị: “Agọnọ Daabụọ bị, mustard ụngbọụ akị wó kirima gborowẹrịemi kịmị bara k’emi.
32 Ụngbọụbosẹ ómịnị kị zaụdẹịn-emi. Anịa ụ sọụ daba, ómịnị dụba kụrọmọwẹrị tịn apaamịnị, bá agọnọ ofonibo kpọ bo wó barabo awarị kẹrịwẹrị inyenrinmịnị.”
33 Ómịnị zịnị tọnmọdịaye gbaa á pịrịmị: “Agọnọ Daabụọ bị, ye mịẹ vudomịnị ye bara k’emi. Anị ere-araụ flawer tọn akị ye atụawẹrị, ye mịẹ vudomịnị ye tụa ifiemị, flawerbosẹ mịẹ vudomụ bara k’emi.”
34 Jesus tọnmọdịaye ka kị bei yebosẹ gbaa á pịrịmị. Gbẹsịmị, ómịnị tọnmọdịaye bẹtịbị ka kị á mọ mọ ẹrẹmị.
35 Bei paaye bị, bụrụ-owei gbaawẹrị egberi kị mịẹbeinmọmị, bụrụ-owei gbaawẹrịmị: “Ịmịnị ine bẹbẹ finiwẹrị tọnmọdịayeama gbaamịnị; bá bọlọụsẹ* sọwẹị-emi yeama gbaa paamọmịnị.”
36 Bịsẹ kịmịbo warị amúdẹmị, Jesus kpọ warị duosụọmị. Anịa wó tuuduo-otubo gbaa ụ pịrịmị: “kiribouma gboro sei ụngbọụbo tọnmọdịayema tuugbaa wo pịrị.”
37 Ụ gbaa á pịrịmị: “Kịmịtọbọụ yaị kị ebi ụngbọụbo gboro-owei bị;
38 Kiribou bị, anị akpọ bị. Ebi ụngbọụbo, anị Daabụọ awọụbo, anịa sei ụngbọụbo, anị bulusei-owei awọụbo,
39 bá sei ụngbọụbo gboro egiren-owei bị, anị Dẹvụlụ. Fịyaịsou ifiemị, anị akpọ kunumọ ifiemị,* angelị-otubo kị sou fịrị wẹnịmịnị.
40 Sei tuwobo bẹnịmọwẹrị fẹnị ayọụnmọ baramị, akpọ kunumọ ifie* kpọ bịsẹbara kị paamịnị.
41 Kịmịtọbọụ yaị bị wó angelị-otubo fịrịmọ mú, wó Daabụọma kịmị mịẹ adalaịmịnị otubo mọ, bá oloko kekeregha otubo mọ bẹnịmọmịnị.
42 Bá á gbeinmọ kẹrịị kụrọmọmịnị fẹnịbụrọma tụamịnị, ámịnị bịsẹ yọ ka timi you bá ánị akabo fịmịnị.
43 Bịsẹ ifie laa daba, kịrịịye mịẹmịnị otubo á Daụ Daabụọma ụraụ bara kị kẹrịị kụrọmọmịnị. Beri nanawẹrịemi kịmịsẹ, pei.
44 “Agọnọ Daabụọ bị kiribou asọwẹị-emi yelaa ye nẹ kịmị ẹrịwẹrị, waị bịsẹ yelaa ye kọn sọwẹị bara k’emi; wó buluịmbẹlẹ yọ duonị, ómịnị wó nanawẹrịemi yebosẹ yẹrịwẹrị mú bịsẹ kiribou fẹịmị.
45 “Mọkpọ, Agọnọ Daabụọ bị fọụ yọụmịnị kịmị nẹ ebi yelaa okuta-ama* dọụmịnị ụbọ bara k’emi.
46 Ómịnị kẹnị ganị yelaa okuta ẹrị ifiemị, mú wó nanawẹrịemi yebosẹ yẹrịwẹrị bo bịsẹ okuta fẹịmị.
47 “Mọkpọ, Agọnọ Daabụọ bị, saakịrịsa dii* nẹ kọn abadịma koromọwẹrị indi apaabosẹ kẹrịmịnị dii* bara k’emi.
48 Saakịrịsa beindẹmị, ámịnị saakịrịsa seri bụmọụma koromọmị, bá tịtẹwẹrị ebi indibo sẹlẹ akị ye atụamị bá ebigha indibo tangbeimị.
49 Akpọ kunumọ ifie* kpọ bịsẹbara kị paamịnị. Angelị-otubo múwẹrị kịrịịye mịẹmịnị otubo ovuru duo bulusei otubo sẹlẹ-paamọmịnị.
50 Bá á gbeinmọ kẹrịị kụrọmọmịnị fẹnịbụrọma tụamịnị, ámịnị bịsẹ yọ ka timi you bá ánị akabo fịmịnị.
51 “Ámịnị ine gbaamịnị yebo asụọtuu nimiwẹrịemi?” Ámịnị ụ parụmị: “Iin”
52 Jesus gbaa á pịrịmị: “Ámịnị sụọtuu nimiwẹrịemi duonị, nimi angọ pịrị, kịmị tolumọmịnị ụbọ nẹ agọnọ Daabụọ tolumọ nimiwẹrịemi kịmịsẹ, warị tịbịowei nẹ, wó ye gbaịn warịbulu duo wó nanawẹrịemi yelaa oru yebo mọ, bá aya yebo mọ paamọ bomịnị kịmị bara k’emi.”
53 Jesus tọnmọdịayebo gbaasiindẹmị, ómịnị bịsẹ yọ duo serimị.
54 Ómịnị mú ụ timi sọụpaa ama laadẹmị, ómịnị ánị bẹnịị yetolumọmịnị yọma* múwẹrị, á tolumọmị. Tolumọ yebo á mịẹ angọ-bọụmọ duonị, ámịnị gbaamị: “Bei kịmị bị te yọ kị duo bei nimiye mọ bá kụrọ mọ nanawẹrị bei tamamaa fịrịbo wẹnịmịnị a o?
55 Bei yekaị-owei tọbọụmị a? Ụ yin ẹrẹmị Mary kị tọn? Bá James, Joseph, Simon, Judas wó bịnaotuama a?
56 Bá wó bịna-erebo, ásẹẹ wo mọ mọ́ emi kị tọn? Bịsẹbara aba, ómịnị ba tẹyọ kị duo wó nimiye mọ bá wó kụrọ mọ nana ma o?”
57 Anịduonị ámịnị peibulu kọn wó atụagha.* Anịa Jesus gbaa á pịrịmị: Bụrụ-owei wó ama mọ, wó warịbulu mọ á pịrị diidụbamọgha, anịa zịnị yọ amú daba á pịrị diidụbamọmịnị.
58 Ánị peibulu nanagha yọ duonị, ómịnị bịsẹ yọma biin tamamaa fịrịama wẹnịgha.
Gbaatụayọama
^ Anịghakpọ “fụmụama.”
^ Anịghakpọ “ekemu.”
^ Anịghakpọ “fụmụ.”
^ Anịghakpọ “fụmụ.”
^ Sei ụngbọụbo kị gbaamịnị.
^ Anịghakpọ kaanghaba “akpọ paasẹ.”
^ Egberi ụngbọụ tuuama dii.
^ Egberi ụngbọụ tuuama dii.
^ Pearl kị kọn mị okuta tịịnmịnị. Pearl kẹrịị kụrọmọmịnị ela bá ganịfa k’emi. Zụa abadị emi gbou-ama kị duo ánị ẹrịmịnị.
^ Anịghakpọ “ariri; ịbọrọ.”
^ Anịghakpọ “ariri; ịbọrọ.”
^ Egberi ụngbọụ tuuama dii.
^ Greek bẹẹlịmị, “synagogue.” Egberi ụngbọụ tuuama dii.
^ Greek bẹẹlịmị, “ámịnị adalaịmị.”
