Matthew 8:1-34
8 Ómịnị ogun duo korobodẹ ifiemị, biin kịmị ikpudu wó atuuduomị.
2 Anịa dii! kẹnị pịnaki dọọn* nanawẹrịemi owei bo wó tọrụyọma okoiwẹrị* gbaamị, “Nanaowei, ị́ mịẹ dọụmịnị aba, ị́mịnị laa ine dọọnzụọ apaaemi.”
3 Jesus wó bara sụnmọwẹrị ụ gbelemị, bá gbaa ụ pịrịmị: “Ịmịnị mịẹ dọụmịnị! Wẹrị angọ kụrọ.” Bịsẹ tịẹkirimị, pịnaki dọọnmị kịmị angọ duo serimị.
4 Jesus gbaa ụ pịrịmị: “Gbaa kẹnị kịmị kpọ pịrịkụmọ, iné angọ kọn mú ịkịankụn-owei dịa, bá Moses gbaa yebo kọn ụ pịrị, anịkị ị́mịnị angọ ebidẹ bara ámọ nimimịnị.”
5 Ómịnị Capernaum duosụọdẹmị, kẹnị army opu-owei bo ụ laawẹrị ụ tẹẹmị.
6 Ụ gbaamị: “Nanaowei, ine odubo-owei bị dọọn kụrọmọmịnị duonị, nimi angọ serimọ kpọ paagha, dọọnmị ebibara ka kị wó ụyamọmịnị.”
7 Jesus gbaa ụ pịrịmị: “Ịmịnị mú yọ laa daba, ụ zụọmịnị.”
8 Army opu-owei bị gbaa ụ pịrịmị: “Nanaowei, ị́mịnị dụba akị ine warịma bomụyọ dẹịn-emi, ị́ múgha nẹ bẹbẹ ka kị gbaa kpọ, ine odubo-owei angọmị ebimịnị.
9 Ịmịnị tịbịowei nanawẹrịemi, ịmịnị kpọ tịbịowei ka paa zịnị army-otuama pịrịemi, anịduonị ịmịnị ‘wẹrị mú!’ gbaa daba, ụbọ bị mụmịnị, bá ‘wẹrị bo!’ gbaa zịnị ụbọ pịrị daba, ụbọ bị bomịnị. Bá ‘bei ye mịẹ!’ gbaa ine odubo-owei pịrị daba, ómịnị bịsẹbara kị dii mịẹmịnị.”
10 Jesus kịmị gbaa egberi naa ifiemị, yemị ụ mịẹ angọbọụmị, anịduonị ómịnị gbaa wó atuuduomịnị otubo pịrịmị: “Gesiimị, ị gbaa á pịrị, Israel ibesẹ, ịmịnị naa kụrọ peibulu nana bei kịmị laaemi ụbọ ẹrịgha.
11 Anịa ị gbaa á pịrị, biin kịmịama ụraụ duo paamịnị anga mọ, bá ụraụ sụọfamịnị anga mọ duobowẹrị, agọnọ Daabụọma Abraham, Isaac, bá Jacob mọ kẹnịyọ atịtẹwẹrị kẹnị tabulu atimi fịyaị fị gbeleimịnị.
12 Bá, Daabụọma sụọ agbẹịtimi otubo gbein duku-bulu ka tụamịnị, ámịnị bịsẹ yọma timi you bá ánị akabo fịmịnị.”*
13 Jesus gbaa army opu-owei pịrịmị: “Wẹrị mú. Iné nanawẹrịemi peibulu duonị, pebidá iné dọụbara paa.” Bịsẹ tịẹkirimị, odubo-owei angọ bị kụrọmị.
14 Jesus mú Peter warị laa ifiemị, Peter fuo-araụ osobo* dọọn pịrị kẹrịwẹrị bed abụnụemi bara ómịnị mọ ẹrịmị.
15 Anịduonị, ómịnị ánị bara gbelewẹrị osobo* bị ánị angọ duo serimị, bá amịnị seritịẹwẹrị odubo-gbaa* ụ pịrịmị.
16 Buboru laadẹmị, kịmịama seitẹmẹ pịrị ụyamọmịnị biin kịmịama kọn ụ yarịmị, ómịnị wó bẹbẹ ka kị seitẹmẹbo duopaamọmị, bá dọọnmịnị otubosẹ zụọmị.
17 Bei paayemị, bụrụ-owei Isaiah gbaawẹrị egberi kị mịẹbeinmọmị. Isaiah gbaawẹrịmị: “Ómịnị wo angọbo emi dọọnbosẹ serisiinmị, bá wo mịẹ ụyafịmịnị yebo kọnsiinmị.”
18 Jesus biin kịmịama ụ yọrọ-emi bara ẹrị ifiemị, wó tuuduo-otubo ụ mọ mọ́ bẹịnmọ angama mú bara gbaamị.
19 Anịa, kẹnị oloko tolumọ-owei bo ụ laawẹrị gbaa ụ pịrịmị: “Tolumọ-owei, ị́ múdẹ yọsẹ, ị kpọ ị mọ mọ́ múmịnị.”
20 Jesus gbaa ụ pịrịmị: “Fox namabo sụọmụ opoloama nanawẹrịemi, bá agọnọ ofonibo kpọ warịama nanawẹrịemi, anịa Kịmịtọbọụ yaị bị, tịbị akị tụawẹrị embafoumụ yọ fa.”
21 Wó tuuduo-otubo, zịnị ụbọ gbaa ụ pịrịmị: “Nanaowei, ị bụọmọ bọlọụ mú ị́ daụ dibidẹ kị.”
22 Jesus gbaa ụ pịrịmị: “Pẹlẹgha bara ina tuuduo. Pebidá fịịdẹ otubo, ánị fịịdẹ otubo dibi.”
23 Bịsẹ yọ bụọdẹmị, Jesus arụ aleimị, wó tuuduo-otubo kpọ ụ mọ mọ́ bịsẹ arụma leimị.
24 Anịa dii! kẹnị kụrọ kime tọrụma paamị, adụọnbo* duonị arụ bị bile dọụtimimị. Bịsẹ ifiemị Jesus bụnụ kị bụnụtimimị.
25 Ámịnị bo ụ tịịnseriwẹrị gbaamị: “Nanaowei, wo zụọ, omịnị bile-famọdẹ!”
26 Anịa, ómịnị gbaa á pịrịmị: “Ámịnị tetuu kị duonị malafamịnị a, ámịnị peibulu nanagha?” Ómịnị kime mọ, adụọnbo* mọ pẹlẹ gbaa ifiemị, yọbosẹ dọọmị.
27 Paayemị wó tuuduo-otubo mịẹ angọbọụ duonị, ámịnị gbaamị: “Bei ba te paa kịmị a o? Kime mọ, bá adụọnbo* kpọ wó gbaabara mịẹmịnị.”
28 Ómịnị bẹịn mú Gadara-otu inyenrinmịnị ete laa ifiemị, seitẹmẹ angọemi maa owei-ama, dụwẹị dibi yọ duo paabo ụ laamị. Bei kịmịbo akpotu-gbein kụrọmọmịnị duonị, kịmịotu bịsẹ ụwọụ duo wẹnịbụọgha.
29 Ámịnị gịawẹrị gbaamị: “Ayiba tọbọụ, omịnị ị́ mọ mọ́ wẹnịmụ fịrị nanawẹrịemi a? Wo ifie kpọ naa laaghatimi ị́mịnị bo wo ụyamọ dọụmịnị a?”
30 Oporiopoama alayọ atimi fịyaị fịtimi bara ámọ ẹrịmị.
31 Anịduonị, seitẹmẹbo ụ tẹẹwẹrị gbaa ụ pịrịmị: “Ị́mịnị wo duopaamọ daba, wo bụọmọ oporiopo angọbo duosụọ.”
32 Ómịnị gbaa á pịrịmị: “Á wẹrị mú!” Bịsẹbara ụ mọ gbaa ifiemị, ámịnị bịsẹ maa kịmị angọbo duo paabowẹrị, oporiopobo angọbo duosụọmị. Anịa, dii! oporiopobosẹ baịn mú kokolo* yọ duo desi benima koro sụọwẹrị fịịsiinmị.
33 Oporiopo gbalịtimi otubo baịn ama duosụọwẹrị paayebosẹ gbaamị. Bá seitẹmẹ angọma timi otubo paamọ ye kpọ gbaamị.
34 Ama otubosẹ Jesus dọụbomị. Ámịnị wó ẹrị ifiemị, ómịnị ánị ete duo seri bara gbaa ụ pịrịmị.
Gbaatụayọama
^ Anịghakpọ “pina dọọn.”
^ Anịghakpọ “tịbị oboimọ.”
^ Aka fịmị akị boloukọn anịghakpọ malafa yọkị mịẹdịamịnị.
^ Anịghakpọ “angọ afịrị; ereamaovin.”
^ Anịghakpọ “angọ afịrị; ereamaovin.”
^ Anịghakpọ “fịyaị mịẹ ụ pịrị fịmị.”
^ Anịghakpọ “adawaịnbo; ọdụọnbo.”
^ Anịghakpọ “adawaịnbo; ọdụọnbo.”
^ Anịghakpọ “adawaịnbo; ọdụọnbo.”
^ Anịghakpọ “baịn mú seri-kụrọmọemi yọ.”
