Matthew 3:1-17
3 Bịsẹ ifie bụọdẹmị, John kịmị akị benibilemọ owei Judea ogbo-abadịma* egberigbaa-timimị.
2 Ụ gbaamị: “buludei, agọnọ Daabụọ bị bo naịndẹ.”
3 Gbẹsịmị, bei kị bụrụ-owei Isaiah gbaawẹrị kịmị bị. Ụ gbaawẹrịmị: “Okolo ogbo-abadị duo gbaa paamọmị: ‘Jehovah* ụwọụ tọlọmọ, ụwọụbo mịẹ gọmụ.’”
4 John konubiri-undoku* ịtama-ama* kọn mịẹwẹrịemi bịdẹ kị tụa-timimị, bá nama-aparan* kọn mịẹwẹrịemi tuukpaye kị kpatimimị. Ómịnị ịkpaịkpaị mọ, bá bou duo akịwẹrịemi bọụn* mọ kị fịtimimị.
5 Jerusalem otubo mọ, Judea otubo mọ, bá Jordan etema emi otubo kpọ ụ dọụ bomị.
6 Ámịnị ánị seibo gbaa paamọmị, bá ómịnị á kọn Jordan tọrụma benibilemị.
7 Biin Farisi-otuama mọ, Sadusi-otuama mọ, John kịmịotu kọn benibilemọmịnị yọma bo ifiemị, ụ gbaa á pịrịmị: “Ámịnị dirimaowei awọụama, tẹ ụbọ kị Ayiba bulukọn erein bị bomịnị bara gbaa á pịrị ma o?
8 Á wẹrị buludeidẹ bara mịẹdịa.
9 ‘Abraham á daụ’ bara akị angọ lẹlẹmọkụmọ. Ị́ gbaa á pịrị, Ayiba, bei okutabo duo awọụ mịẹpaamọ Abraham pịrị apaaemi.
10 Ogoun bị tịntuuma emi. Ebi tịnbeinyaị tụagha tịnsẹ, pẹlẹ koromọwẹrị kọn fẹnị bulu agbein tụamịnị.
11 Ịmịnị ána kị beni ka bilemọmịnị, tuumị, ámịnị buludeidẹ. Anịa bomịnị owei bị, tọntọn tẹmẹ mọ, bá fẹnị mọ, ka kị á bilemọmịnị. Bịsẹ oweimị kụrọ ị dẹịn-emi, ịmịnị kụrọ nanawẹrị wó tụawẹrịemi agbakabo kpọ siingha fa.
12 Ye-fọụn shọvẹlị wó bara ma emi. Bá ómịnị witibo sẹlẹmịnị yọ mịẹ yalịwẹrị kẹnị ịlọlị kpọ timigha fa. Ómịnị witibo bẹnịmọwẹrị kọn yegbaịn-warị ma tụamịnị. Anịa aparanbo kọn viingha fẹnị bulu agbein tụamịnị.”
13 Jesus, John pịrị benibilemụ yọ duonị, Galilee duo wẹnị Jordan tọrụma mú John laamị.
14 Anịa John ụ tịẹmọ dọụmị, ụ gbaa amọ: “Ị́mịnị kị ị kọn benibilemọ agbẹị-emi, anịa tetuu kị duonị ị́mịnị kị ba ị dọụbo ma o?”
15 Jesus ụ parụmị: “Ị tịẹmọkụmọ, omịnị bịsẹbara mịẹdẹ kị Ayiba dọụwẹrịemi yebosẹ mịẹbeinmọmịnị.” Bịsẹbara naa ifiemị, John ụ kọn benibilemọmị.
16 Jesus benibile siinwẹrị benibulu duo paabodẹmị, dii! Agọnọtọrụ finimị, ómịnị Ayiba tẹmẹ bị elekpukpu bara agọnọ duo korobo wó agbanaị bara ẹrịmị.
17 Bá okolo agọnọ duo gbaamị: “Bei ine tọbọụ, ine tarịwẹrịemi tọbọụmị, ịmịnị wó abarapoudẹ.”
Gbaatụayọama
^ Egberi ụngbọụ tuuama dii.
^ Egberi ụngbọụ tuuama dii.
^ Anịghakpọ “camel.”
^ Anịghakpọ “ịtẹmaị; tẹmẹ.”
^ Anịghakpọ “nama-ozun.”
^ Anịghakpọ “tabaị.”
