Matthew 26:1-75
-
Ịkịankụn-otubo Jesus baamụ iroro tọnmị (1-5)
-
Fụrụ-ịmbẹlẹ pulou kọn Jesus deinmọmị (6-13)
-
Kunumọ asababẹịn-oge mọ, bá Jesus yẹrịpaamọ bara mọ (14-25)
-
Nanaowei buboru fịyaị fị oge mịẹpaamọ baramị (26-30)
-
Jesus Peter ụ piimụ bara gbaamị (31-35)
-
Jesus, Gethsemane amú tẹẹbịbị mịẹmị (36-46)
-
Jesus ámọ kẹrịmị (47-56)
-
Ámịnị ụgụlawarịma Jesus kẹrị ụgụlasụọmị (57-68)
-
Peter, Jesus piimị (69-75)
26 Jesus bei yebosẹ gbaasiindẹmị, ụ gbaa wó tuuduo-otubo pịrịmị:
2 “Á nimiwẹrịemi baramị, maa dein kị kọọdẹ, Asababẹịn-oge bị ámọ teimịnị, bá Kịmịtọbọụ yaị bị ámọ bụọmọ wó egiren-otu barama tụawẹrị, ámịnị wó akị tịn akaị baamịnị.”
3 Bịsẹ ifiemị, tịbị ịkịankụn-otubo mọ, bá Jew karịbụọ tịbịotubo mọ, tịbị ịkịankụn-owei Caiaphas warị tiri-angama bẹnịmị.
4 Ámịnị aritụawẹrị Jesus kẹrị, bá ụ baamụ iroro tọnmị.
5 Anịa ámịnị gbaamị: “Kịmịotu wo mọ mọ́ akpotu mịẹghamụ yọ duonị, omịnị oge teimịnị ifiema mịẹgha fa.”
6 Jesus Bethany ma, Simon pịnaki dọọn nanawẹrị angọ ebidẹ owei warịma timi ifiemị,
7 kẹnị ere ganị-emi fụrụ-ịmbẹlẹ pulou tụawẹrịemi ololo* sibe Jesus dọụbowẹrị, wó fịyaị fịmịnị ifiema, kọn wó tịbị deinmọmị.
8 Tuuduo-otubo yemị ẹrị ifiemị, bulukọnwẹrị gbaamị: “Tetuu kị duonị bei ganị pulou dẹsị tangbeimịnị a o?
9 Bei pulou yẹrịwẹrị a, biin sịlịama kị nanawẹrị kọn ụya otubo pịrịmụ timimị.”
10 Jesus ánị gbaatimi egberima sụọtuunimi ifiemị, ómịnị gbaa á pịrịmị: “Tetuu kị duonị ámịnị bei erema abụụdọọnmịnị a o? Bei erema ebiye kị mịẹ ị pịrịmị.
11 Ụya otubo ifiebosẹ á mọ mọ́ timimịnị, anịa ịmịnị ifiebosẹ á mọ mọ́ timigha fa.
12 Amịnị bei fụrụ-ịmbẹlẹ pulou kọn ine tịbị deinmọ yọmị, ị tọlọmọwẹrị ị dibimụ ifie kị korumịnị.
13 Gesiimị, ị gbaa á pịrị, akpọma, bei ebiegberi gbaamịnị yọbosẹ, bei erema mịẹ ye kpọ gbaa akị ánị ukiemịnị.”
14 Oi-maamụ fịnị fịrịmọpaa-otubo, Judas Iscariot tịịnmịnị owei, mú tịbị ịkịankụn-otubo laawẹrị
15 gbaamị: “Ịmịnị ụ yẹrị á pịrị daba, ámịnị te ka kị ị pịrịmịnị a o?” Ámịnị 30 silver sịlịama akị ụ pịrịmụ bara gbaamị.
16 Bịsẹ ifie duo músẹ, ómịnị Jesus yẹrịmụ fomuun dọụmị.
17 Vudogha Breadị oge* teimịnị bọlọụ ereinmị, Jesus tuuduo-otubo bo ụ laawẹrị, ụ biimị; “Te yọ kị wo mọ tọlọmọ ị́ pịrịwẹrị Asababẹịn-oge fịyaị fịmịnị a o?”
18 Ụ gbaa á pịrịmị: “Ama duo sụọdá, mú bei sụọ-sụọ kịmị laadá gbaa ụ pịrị, ‘Tolumọ-owei bị gbaamị: “Ine fịịmụ ifiemị naịndẹ; anịduonị, ị mọ ine tuuduo-otubo mọ iné warị ka asababẹịn-oge bị teimịnị.”’”
19 Tuuduo-otubo, Jesus gbaa á pịrị bara kị mịẹwẹrị asababẹịn-oge teimụ yọ tọlọmọmị.
20 Buboru laa ifiemị, Jesus mọ, wó oi-maa tuuduo-otu fịnịbo mọ tịtẹ tabulu yọrọmị.
21 Ámịnị fịyaị fịtimi ifiemị, Jesus gbaa á pịrịmị: “Gesiimị, ị gbaa á pịrị, ánị ovurumị kẹnị ụbọ ị yẹrịmịnị.”
22 Ye bị á mịẹ pọwẹịgha duonị, aná kẹnị ụbọ, kẹnị ụbọ, ụ biimị: “Nanaowei, ịmịnịgha kị tọn?”
23 Ụ gbaa á pịrịmị: “Ị mọ mọ́ bara kọn kẹnị panị atụamịnị ụbọ kị ị yẹrịmịnị.
24 Gesiimị, gẹẹwẹrịemi bara kị paamịnị, Kịmịtọbọụ yaị bị ámọ baamịnị. Anịa, ụya ụ yẹrịpaamọ kịmị laamịnị! Bịsẹ ụbọ ziigha wẹrị a, ebi ụ pịrịdẹịn mọ timimị.”
25 Judas, ụ yẹrị dọụmịnị owei bị ụ biimị: “Tolumọ-owei, ịmịnịgha kị tọn?” Jesus gbaa ụ pịrịmị: “Ị́mịnị parụbịbị nimiwẹrịemi.”*
26 Ámịnị mọkpọ fịyaị fịmịnị ifiemị, Jesus breadị akịwẹrị tẹẹbịbị mịẹmị. Bá ómịnị breadị yaịnmọwẹrị kọn wó tuuduo-otubo pịrịwẹrị gbaamị: “Akịdá fị, bei ine angọ ka tịbịtịẹmọ-wẹrịemi.”
27 Ómịnị wuru kọpụ kpọ akịwẹrị, tẹẹbịbị mịẹmị, bá kọn á pịrịwẹrị gbaamị: “Ásẹẹ, akịdá bou,”
28 Bei ine asịịn ka tịbịtịẹmọ-wẹrịemi, bei asịịn ka kị avụọ fịmịnị, bá dẹsị-paamọwẹrị biin otu sei-ama bụọmọmịnị.
29 Anịa ị́ gbaa á pịrị: “Ịmịnị ba benbene vine duo mịẹpaamọ-wẹrịemi wuru boughatimi, omịnị ị Daụ Daabụọma gbeleiwẹrị aya wuru boumụ ifie laamịnị.”
30 Kunumọmị, ámịnị duma tuun Ayiba tokoni-siindẹmị, wẹnị Olive ogunma múmị.
31 Ámịnị bịsẹ yọ laa ifiemị, Jesus gbaa á pịrịmị: “Bei deinmị, ásẹẹ ị paamọmụ ye duonị adalaịmịnị. Gẹẹwẹrịemi: ‘Ịmịnị anịna gbalịowei baa daba, anịnabosẹ wasaị famịnị.’
32 Anịa ịmịnị fịịyọ duo seri daba, ịmịnị ána bọlọụ mú Galilee laamịnị.”
33 Anịa, Peter gbaa ụ pịrịmị: “Ị́ paamọmụ ye duonị kọọ otubosẹ kị adalaị kpọ, ịmịnị benebene adalaịgha fa!”
34 Jesus gbaa ụ pịrịmị: “Gesiimị, ị gbaa ị́ pịrị, bei deinmị, ị́mịnị tara ifie akị ị piidẹ kị owei ofoni fiemịnị.”
35 Peter gbaa ụ pịrịmị: “Ịmịnị ị́ mọ mọ́ kị fịịmịnị kpọ, ịmịnị benebene ị́ piigha fa.” Kọọ tuuduo-otubo kpọ bịsẹ kpekẹnị bara kị gbaamị.
36 Jesus á mọ mọ́ Gethsemane tịịnmịnị yọ laa ifiemị, ómịnị gbaa wó tuuduo-otubo pịrịmị: “Bei yọma tịtẹtimi ị koru, ịmịnị anị yọma tẹẹbịbị mịẹ yọ amúmịnị.”
37 Ómịnị Peter mọ Zebedee maa owei awọụbo mọ kọn angọtụamọ múmị, bá ómịnị enenikẹrị-kụrọmọmị.
38 Ómịnị gbaa á pịrịmị: “Ịmịnị eneni-kẹrịtimi fịịyọ kị laadẹ. Bei yọma timi, bụnụkụmọ, ị mọ mọ́ kirinatimi.”
39 Ómịnị dọlọ wẹnị bọlọụ amúdẹmị, ómịnị okoi, bá wó andẹ* kọn kiri dịawẹrị tẹẹmị: “Ị Daụ, mịẹ ka paawẹrị a, ine bou dọụmịnị kọpụ kọnsiin. Mọabịkpọ, ine dọụbara paakụmọ, iné dọụbara kị paa.”
40 Ómịnị waị bo tuuduo-otubo laa ifiemị, ámịnị bụnụfa-emi bara ómịnị mọ ẹrịmị. Jesus paakị gbaa Peter pịrịmị: “Ámịnị kẹnị hour ovuru akị bụnụgha bara ị mọ mọ́ kirinatimi apaagha?
41 Kirinatimi bá pẹlẹgha bara tẹẹbịbị mịẹ, anịkị ámịnị ba dadiye akoro-sụọgha fa. Tẹmẹ bị mịẹdịsẹ-emi, anịa angọmẹnẹ bị suu-emi.”
42 Ómịnị waị maamụkaramọ ifiema mú tẹẹwẹrị gbaamị: “Ị Daụ, ịmịnị bei kọpụ boudẹ kị bụọmịnị aba, pebidá iné dọụbara kị paa,”
43 Jesus mọkpọ waị bo ifiemị, sịyaịn mọkpọ ánị tọrụbo emi duonị, ámịnị bụnụ-emi bara ụ mọ ẹrịmị.
44 Ómịnị ána barasiinwẹrị, tarụkaramọ ifiemị mú kpekẹnị tẹẹbịbị kị mịẹmị.
45 Jesus waị bowẹrị gbaa wó tuuduo-otubo pịrịmị: “Bei embafou bá bụnụ agbẹị-emi ifiegha! Dii! Kịmịtọbọụ yaị bị ámọ yẹrị akị seiyaị mịẹ-otu pịrịmụ ifiemị naịndẹ.
46 Á seritịẹdá, wo mú. Dii! Ị yẹrịmụ owei bị bo naịndẹ.”
47 Ómịnị mọkpọ ẹrẹmịnị ifiemị, Dii! Judas bomị, ụ kpọ oi-maamụ fịnị fịrịmọpaa-otubo kẹnị ụbọ. Agbọdọama, bá ogboloama sibewẹrịemi biin kịmịama kpọ ụ sụọmọ bomị. Tịbị ịkịankụn-otubo mọ, Jew karịbụọ tịbịotubo mọ kị bịsẹ otubo fịrịmọ bomị.
48 Ụ yẹrịpaamọ owei bị wo mịẹmụ lelei gbaa á pịrịdẹ-wẹrịmị, ụ gbaamị: “Ine otụtụmụ kịmị kị ómịnị; ụ kẹrịakị mú.”
49 Ómịnị wẹnị mú Jesus laawẹrị gbaamị: “Tolumọ-owei, doo!” bá ómịnị paakị Jesus otụtụmị.
50 Anịa Jesus ụ biimị: “Ine kịmị, teeki ị́ mọ mịẹ yọ abo ma?” Jesus bịsẹbara gbaasịịndẹmị, ámịnị paakị wẹnị mú ụ laawẹrị, ụ kẹrịakị múmị.
51 Anịa dii! Jesus mọ timi otubo, kẹnị ụbọ wó agbọdọ kpụn-paamọ bowẹrị, tịbị ịkịankụn-owei odubo-owei beri pẹlẹ koromọmị.
52 Jesus paakị gbaa ụ pịrịmị: “Iné agbọdọ waịmọ akị timi yọma wẹrị, agbọdọ ka kị sụụmịnị kịmị bị, agbọdọ kị pịrị baamịnị.
53 Ịmịnị ị Daụ tẹẹwẹrị, ómịnị bei tịẹkirimị biin* angelị-otuama kọn ị pịrị apaagha bara ị́ mọ tọn ma o?
54 Bịsẹbara mịẹ daba, tọntọn fun gbaawẹrịemi egberimị tebara ka kị paabeinmịnị a o?”
55 Jesus bịsẹ tịẹkịrịma gbaa kịmị ikpudu pịrịmị: “Ámịnị agbọdọama mọ, bá ogboloama mọ sibewẹrị furu kịmị kẹrịmịnị bara ka kị ị kẹrị yọ abo ma? Ịmịnị erein duo mú erein laasẹ, karịwarịma tịtẹwẹrị kịmịama tolumọtimimị, anịa ámịnị ị kẹrịgha.
56 Anịa bei paamịnị yebosẹ bụrụ-otubo gẹẹwẹrị yebo kị mịẹbeinmọmị.” Bịsẹ ifiemị wó tuuduo-otubosẹ, ụ gbein-koromọwẹrị baịn famị.
57 Jesus kẹrịakị otubo, ụ kẹrị tịbị ịkịankụn-owei Caiaphas yọ ka múmị. Oloko tolumọ-otubo mọ, Jew karịbụọ tịbịotubo mọ, bịsẹ yọ kạ bẹnịịtimimị.
58 Anịa Peter alaayọ kị duo wó atuuduomị, ómịnị wó atuuduo mú tịbị ịkịankụn-owei Caiaphas warị tirianga laamị, bá warịbulu duosụọwẹrị, warịma fịrị wẹnịmịnị otubo mọ tịtẹtimi paamụ yemị ẹrị dọụmị.
59 Tịbị ịkịankụn-otubo mọ, bá ụgụlawarịma-emi otubo mọ ekpe egberiama akị Jesus gbaịnmọwẹrị, ụ baamụ yọ dọụmị.
60 Anịa, biin kịmịama kị bo ekpe egberiama gbaamị, anịa, ánị gbaa yebo kịrịịgha. Tuu ifiemị maa kịmị paa bowẹrị,
61 gbaamị: “Bei kịmị bị, ‘Ómịnị Ayiba karịwarị gbein-gọgọlọwẹrị, taradẹịn kọn waị karịwarị kẹrị-tịẹmọmịnị bara gbaa timimị.’”
62 Tịbị ịkịankụn-owei bị seritịẹwẹrị gbaa ụ pịrịmị: “Bei kịmịbo kọn ị́ gbaịnmọmịnị egberibo ị́ mọ naawẹrịemi? Ị́mịnị kẹnị gbaamụ egberi kpọ fa?”
63 Anịa Jesus kẹnị egberi kpọ gbaagha. Anịduonị tịbị ịkịankụn-owei bị seritịẹwẹrị gbaa ụ pịrịmị: “Ịmịnị gbaa ị́ pịrịmịnị, wẹrị inyenrinmịnị Ayiba tọrụyọma, ị́mịnị kị kọkọ Christ bá Ayiba tọbọụ bara akị bịẹn-tịịn!”*
64 Jesus gbaa ụ pịrịmị: “Ị́mịnị kị iné bẹbẹ kọn gbaamịnị. Anịa ị gbaa á pịrị. Bei erein duo músẹ, ámịnị Kịmịtọbọụ yaị bị kụrọ nanawẹrịemi owei amabara kirima tịtẹ-emi, bá agọnọma emi obudoubo duo bomịnị bara ámọ ẹrịmịnị.
65 Tịbị ịkịankụn-owei bị wó aru kpụnkaan-wẹrị gbaamị: “Ómịnị Ayiba gbaaseimọdẹ! Omịnị ba zịnị iseriotuama dọụgha. Dii! Á kpọ, ómịnị Ayiba gbaaseimọdẹ bara naadẹ.
66 Ámịnị tebara kị iroro ma?” Á gbaamị: “Ómịnị fịị kị fịị agbẹị-emi.”
67 Ámịnị fịla kọn wó andẹ* gbein, ụ famọ, bá wó andẹ* polowẹrị,
68 gbaami: “Ị́mịnị kị Christ aba, wẹrị ị́ polo ụbọ gbaa wo pịrị.
69 Peter oloko warị tiriangama tịtẹtimi ifiemị, kẹnị odubo-araụ wẹnị bo ụ laawẹrị gbaamị: Ị́mịnị kpọ Jesus Galilee-owei mọ timiwẹrịmị!”
70 Anịa ómịnị kịmịsẹ tọrụyọma ụ piiwẹrị, gbaamị: “Ịmịnị iné gbaamịnị egberima sụọtuu-nimigha.”
71 Ómịnị wẹnị mú oloko warị duosụọmịnị yọ laa ifiemị, zịnị odubo araụ kpọ wó ẹrịwẹrị gbaa yọma emi otubo pịrịmị: “Bei owei kpọ Jesus Nazareth-owei mọ timiwẹrịmị.”
72 Ómịnị mọkpọ bịẹn-tịịn* ụ piiwẹrị gbaamị: “Ịmịnị ánị kịmị nimigha!”
73 Ifie dọlọ bụọdẹmị, yọma tịẹ-emi otubo bo Peter laawẹrị gbaa ụ pịrịmị: “Ị́ kpọ kọkọ ána kẹnị ụbọ, tuumị iné ẹrẹmịnị baramị bịsẹbara mịẹdịamịnị.”
74 Ómịnị gesii gbaagha ifiesẹ ụya ụ laabara kọn bịẹn-tịịnwẹrị* gbaamị, “Ịmịnị ánị kịmị nimigha!” Bịsẹ tịẹkirimị, owei ofoni fiemị.
75 Peter, Jesus gbaawẹrị egberimị ukiemị, Jesus gbaawẹrịmị: “Ị́mịnị tara ifie akị ị piidẹ kị owei ofoni fiemịnị.” Bịsẹ ye duonị, ómịnị tiri amú you kụrọmọmị.
Gbaatụayọama
^ Greek bẹẹlịmị, “alabaster ololo.” Egberi ụngbọụ tuuama dii.
^ Egberi ụngbọụ tuuama dii.
^ Greek bẹẹlịmị, “ị́mịnị kị iné bẹbẹ kọn gbaamị.”
^ Anịghakpọ “koro.”
^ Greek bẹẹlịmị, “oi-maa legion fịnị.” Rome daabụọ bị, kẹnị legion ikpudumị, 4,000 duomú 6,000 army-otuama k’emi.
^ Anịghakpọ “bịẹn-kaan; bịẹnfị; bịẹn-pei.”
^ Anịghakpọ “koro.”
^ Anịghakpọ “koro.”
^ Anịghakpọ “bịẹn-kaan; bịẹnfị; bịẹn-pei.”
^ Anịghakpọ “bịẹn-kaanwẹrị; bịẹnfịwẹrị; bịẹn-peiwẹrị.”
