Matthew 10:1-42
10 Jesus wó oi-maa tuuduo-otu fịnịbo tịịnwẹrị, seitẹmẹ dẹịnmọmụ kụrọ kọn á pịrịmị. Anịkị ámịnị laa seitẹmẹ-ama duopaamọ, bá dọọn apaabosẹ zụọ apaadẹ.
2 Bei wó oi-maamụ fịnị fịrịmọpaa-otu ẹrẹbo: Simon, Peter kpọ kọn ụ tịịnmịnị, bá wó bịnaowei Andrew. James, Zebedee tọbọụ, bá John wó bịnaowei;
3 Philip, Bartholomew, Thomas, Matthew tịbịsaa bii-owei, James, Alphaeus tọbọụ bá Thaddaeus mọ;
4 Simon, angọtụa fịrị wẹnịmịnị owei,* bá Judas Iscariot, Jesus yẹrịpaamọ owei bị.
5 Jesus wó oi-maamụ fịnị fịrịmọpaa-otubo fịrịmọ egberigbaa yọ amú dọụtimi ifiemị, ómịnị gbaa á pịrịmị: Benebene Jew duopaagha otu etebo duosụọkụmọ, bá kẹnị Samaria opuama kpọ duosụọkụmọ;
6 Anịa pẹlẹgha bara Israel warị duo fadẹ anịnabo bẹtịbị kị dọụ.
7 Á múmịnịmị, gbaa á pịrị: ‘Agọnọ Daabụọ bị bo naịndẹ.’
8 Dọọnmịnị otubo zụọ, fịịdẹ otubo tịịnseri, pịnaki dọọn nanawẹrịemi otubo zụọ, seitẹmẹbo duopaamọ. Ámịnị ye gbẹẹghatimi nana baramị, ámịnị kpọ ye biigha bara ka kị mịẹ á pịrị.
9 Goldu sịlị, silver sịlị, anịghakpọ zịnị ogu sịlịama kpọ kọn ánị sịlịtụa akpama tụạkụmọ.
10 Bá fịyaị tụa akpa, zịnị tụabịdẹ,* agbaka, anịghakpọ akọlọ kpọ sibekụmọ, tuumị fịrịwẹnịmịnị owei bị wó fịmụ fịyaị nana agbẹị-emi.
11 Á mú laadẹ amasẹ anịghakpọ laadẹ gbenesẹ, á kẹrịakịmụ ụbọ dọụ, bá bịsẹ ụbọ warịma timi ánị múmụ ifie laa.
12 Ámịnị warị duosụọ daba, warị nana ụbọ kule.
13 Warịnana otubo á kẹrịakị daba, ánị nanawẹrịemi dọọmị bịsẹ warịma timi, anịa ámịnị á kẹrịakịgha ifiesẹ, bịsẹ dọọmị waị á dọụbo.
14 Kẹnị kịmị kpọ á kẹrịakịgha, bá ánị egberibo kpọ peigha ifiesẹ, ámịnị bịsẹ warị anịghakpọ ama duo paamịnị ifiemị, ánị bụọbo emi ịlọlịbo kpukpu koromọ.
15 Gesiimị, ị gbaa á pịrị, ụgụlapẹlẹ erein laa daba, bọụbọụ Sodom mọ Gomorrah mọ pịrị akị bịsẹ ama dẹịnmịnị.
16 “Dii! Ịmịnị á fịrịmọ-paamọmịnịmị, ámịnị bou-obiriama ovuru a emi anịna-ama bara k’emi; anịduonị seiye* bara kịlịkịlịtimi, anịa ye akị kịmị mịẹgha* elekpukpu bara kị timi.
17 Mọabịkpọ angọdii, tuumị, kịmịama á kẹrị ụgụla-warịama amúmịnị, bá ánị bẹnịị yetolumọmịnị yọbo* kpọ á vụrọmịnị.
18 Ine ẹrẹ duonị, kịmịotu á kọn Governor otuama mọ ibe-daa otuama mọ tọrụyọ atịẹmọmịnị. Anịkị ámịnị, ánị peibulu gbaa bịsẹ otubo mọ, bá Jew duo paagha otubo mọ pịrịmịnị.
19 Anịa, kịmịotu á kẹrị ụgụlawarị amú daba, ámịnị ánị ẹrẹmụ egberibo mọ, bá ẹrẹmụ bara mọ kọn angọ solokụmọ. Tuumị, ámịnị bịsẹ tịẹkirimị ẹrẹmụ egberi nimimịnị;
20 ánị bẹtịbị kị ẹrẹmịnị bara fa, anịa á Daụ tọntọn tẹmẹ kị baratụa á pịrịwẹrị ẹrẹmịnị.
21 Kịmị wó bịna-ụbọ paamọwẹrị kịmịotu pịrị baamịnị, bá daụ kpọ wó tọbọụ paamọwẹrị á pịrị baamịnị, awọụama kpọ tịbịkụrọ á daụ mọ yin mọ otu pịrịmịnị, bá á baamịnị.
22 Ine ẹrẹ duonị kịmịsẹ á golumịnị, anịa enetimi tuu laa kịmị kị zụọbụọmọye nanamịnị.
23 Ámịnị kẹnị ama kịmịotu pịrị ụyamọ daba, baịn zịnị ama amú; ị gbaa á pịrị, ámịnị mú Israel amabosẹ laasingha timi, Kịmịtọbọụ yaị bị bomịnị.
24 Fịrị tolumọmịnị ụbọ bị dụba akị wó teacher-owei dẹịngha, bá odubo-owei kpọ dụba akị wó nanaowei dẹịngha.
25 Kịmịama teacher-owei mọ inyenrin bara ka kị fịrị tolumọmịnị ụbọ mọ kpọ inyenrinmịnị, bá akị tịbịowei mọ inyenrinmịnị bara ka kị odubo-owei mọ kpọ inyenrinmịnị.* Kịmịama Beelzebub* kọn warị-tịbịowei kpọ tịịnmịnị aba, akị wó wạrị otubo kị tịịngha fa bara ámọ tọnmị?
26 Bịsẹbara kị gbaa kpọ, ánị esiinkụmọ. Teriwẹrịemi ye nẹ, finighamụ ye fa, bá sọwẹị-emi ye nẹ, bo gaan paa kịmịotu pịrị nimighamụ ye fa.
27 Ịmịnị duku yọ agbaa á pịrị egberibo, kọn gaan yọ agbaa, bá ịmịnị berifiemọ gbaa á pịrị egberibo, kọn warị agọnọbo kị duo gbaa paamọ.
28 Á baa daba, kụrọ nanawẹrị ánị bọlọụma nanamụ ụndụ tịẹmọgha fa otubo esiinkụmọ, anịa kụrọ nanawẹrị á kọn Gehenna* agbein-gọgọlọ apaaemi ụbọ kị esiin.
29 Ye apaagha sịlịbiri* ka kị maa sparrow ofoniama feimịnị, bịsẹbara a? Mọabịkpọ, bei ofonibo kẹnị kị kiri akoro kpọ, á Daụ nimiwẹrịemi.
30 Bá ómịnị ánị tịbịdumụbo kịẹnbiri kpọ nimiwẹrịemi.
31 Anịduonị malafakụmọ, ámịnị yelaa biin sparrow ofoniama dẹịn-emi.
32 “Kịmịsẹ tọrụyọma peibulu kọn ina tụawẹrịemi bara mịẹgaan paamọ ụbọ bị, ị́ kpọ ine agọnọ Daụ tọrụyọma bịsẹ ụbọ piigha fa.
33 Anịa, kịmịsẹ tọrụyọma ị pii ụbọ bị, ị kpọ ine agọnọ Daụ tọrụyọma bịsẹ ụbọ piimịnị.
34 Ịmịnị kiriogboma dọọ kị mịẹpaamọ yọ abo bara irorokụmọ. Ịmịnị dọọ mịẹpaamọ yọ abogha, anịa agbọdọ kị kọn bomị.
35 Ịmịnị, owei tọbọụ mọ ụ daụ mọ, ere tọbọụ mọ á yin mọ, bá nịataa mọ á yei-yin mọ ovuru pumọ yọ ka bomị.
36 Gesiimị, iné egiren-ụbọmị iné warịbulu kị duo bomịnị.
37 Daụ, yin, anịghakpọ awọụ kị tarị ị dẹịn-emi kịmịsẹ, ine tuuduo-kịmị apaa agbẹịgha.
38 Bá wó ụyafị tịn* sibewẹrị ina tuuduogha kịmịsẹ, ine tuuduo-kịmị apaa agbẹịgha.
39 Wó ụndụ kị zụọ dọụmịnị kịmịsẹ, fịị kị fịịmịnị. Anịa, ine ẹrẹ kị duonị fịị ụbọ bị, waị ụndụ nanamịnị.
40 Á kẹrịakịmịnị kịmịsẹ, ị kpọ kẹrịakịmịnị. Bá ị kẹrịakịmịnị kịmịsẹ, ị fịrịmọ bo owei kpọ kẹrịakịmịnị.
41 Kịmị bụrụ-owei kị duonị, bịsẹ ụbọ kẹrịakịdẹ kịmịsẹ, bụrụ-owei gbẹẹ kị ụ laamịnị, bá kịmị kịrịịye mịẹmịnị kị duonị, bịsẹ ụbọ kẹrịakịdẹ kịmịsẹ, kịrịịye mịẹmịnị kịmị gbẹẹ kị ụ laamịnị.
42 Bei kala kịmịbo ine tuuduo-otuama duonị, dọọ beni tụa akị aná kẹnị ụbọ kị pịrị kịmị kpọ, ị gbaa á pịrị, bịsẹ ụbọ laamụ gbẹẹmị ụ pẹlẹbụọgha fa.”
Gbaatụayọama
^ Ómịnị Canaan anịghakpọ Cana duopaaemi bara gbaagha.
^ Greek bẹẹlịmị, “maa tụabịdẹ.”
^ Anịghakpọ “dawaịn; gbalaowei.”
^ Anịghakpọ “anịa adụdụ yalịemi, gerede kịmị.”
^ Greek bẹẹlịmị, “synagogue-bo.” Egberi ụngbọụ tuuama dii.
^ Greek bẹẹlịmị, “Fịrị tolumọmịnị kịmị, bo fịrị kọn ụ tolumọmịnị owei bara paamụ yọmị seigha. Bá odubo-owei kpọ bo wó tịbịowei bara paamụ yọmị seigha.”
^ Bei kọn Satan tịịnmịnị zịnị ẹrẹ. Anị seitẹmẹbo daamịnị-owei.
^ Egberi ụngbọụ tuuama dii.
^ Greek bẹẹlịmị, “assarion.”
^ Egberi ụngbọụ tuuama dii.
