Matthew 18:1-35
18 Bịsẹ ifiemị, Jesus tuuduo-otubo bo ụ mọ mọ́ naịnwẹrị ụ biimị: “Te ụbọ kị agọnọ Daabụọma dụba-dẹịnmịnị a o?”
2 Ómịnị kẹnị kala owei-tọbọụ tịịn bowẹrị, ụ kọn ánị ovuruma tịẹmọmị.
3 Bá gbaamị: “Gesiimị, ị gbaa á pịrị, ámịnị angọ akị bei kala tọbọụ bara mịẹghasẹ, benebene agọnọ Daabụọma sụọgha fa.
4 Anịa bei kala tọbọụ bara angọ-iyerimọdẹ kịmị kị, agọnọ Daabụọma dụbạdẹịn kịmị apaamịnị;
5 bá ine ẹrẹ duonị, bei kala tọbọụ bara emi kịmịbo kẹrịakịmịnị kịmịsẹ, ịmịnị kpọ kẹrịakịdẹ.
6 Peibulu akị ina tụawẹrịemi angọ-iyerimọ otubo mịẹ adalaịmọdẹ kịmịsẹ, dụbaemi okuta* kọn wó kọọn fịnawẹrị ụ gbeinmọ abadị buluma tụamọ yọmị, ebi bịsẹ ụbọ pịrịdẹịnmịnị.
7 “Akpọ bị ụyamịnị, tuumị akpọ bị kịmị mịẹ adalaịmọmịnị yeama nanawẹrịemi. Kọkọ, omịnị laa kịmị mịẹ adalaịmọmịnị yebo duo baịntẹịgha fa, anịa weribịbị bịsẹ yebo mịẹpaamọmịnị ụbọ laa!
8 Anịduonị, iné bara, anịghakpọ iné bụọ kị ị́ mịẹ adalaịmọmịnị aba,* pẹlẹ tangbei. Ị́mịnị kẹnị bara anịghakpọ kẹnị bụọ fatimi ụndụ nanamụ yọmị ebi akị iné angọsẹ karaị-karaịtimi á pịrị ị́ gbeinmọ viingha fa fẹnịma tụamụ yọ dẹịn-emi.
9 Bá, iné tọrụ bị ị́ mịẹ adalaịmọmịnị aba,* sou tangbei. Ị́mịnị kẹnị tọrụ akị ụndụ nanamụ yọmị ebi akị, ị́mịnị maa tọrụ kị nanawẹrị á pịrị ị́ gbeinmọ Gehenna* atụamụ yọ dẹịn-emi.
10 Benebene bei kala awọụbo bara emi kịmịbo diiseimọkụmọ. Ị gbaa á pịrị, ánị angelị-otubo agọnọma ifiebosẹ ị Daụ tọrụyọma emi.
11 * ——
12 “Tebara kị ámọ iroroma o? Kịmị 100 anịna-ama nanawẹrị, kẹnị wẹnịfa daba, ómịnị 99 bo kọn ogunma wẹrịwẹrị, mú faemi ye dọụgha fa bara ámọ tọnmị?
13 Ị gbaa á pịrị, ómịnị bịsẹ fatimi kẹnịmị ẹrị daba, pọwẹị nana akị wẹnịfagha 99 bo dẹịnmịnị.
14 Bịsẹ kpekẹnị bara kị, ine agọnọ Daụ kpo bei angọ-iyerimọ kala awọụ bara emi kịmịbo, kẹnị ụbọ kpọ fịịbulu asụọmọ yọ dọụgha.
15 “Iné bịnakịmị sei mịẹ ị́ dọọnmọ daba, mú ụ laadá, ánị maakịmị egberi kẹrị ẹrẹtei. Wó ị́ pei daba ị́mịnị baratụa ụ pịrịwẹrị dei apaaemi.
16 Ómịnị ị́ peigha ifiesẹ, kẹnị anịghakpọ maa kịmị akị tụa mú. Maamụ anịghakpọ tara kịmị iseritịẹ daba,* egberi bị gaan-dẹịnmịnị.
17 Ómịnị á peigha ifiesẹ, egberi gbaa itu pịrị. Itu gbaa egberi kpọ ụ mọ peigha ifiesẹ, ụ kọn akpọ-bulu kịmị anịghakpọ tịbịsaa bii owei bara kị wẹrị.
18 “Gesiimị, ị gbaa á pịrị, ámịnị kirima kaịmịnị yesẹ, agọnọma kaị bụọmọdẹ. Bá ámịnị kirima finimịnị yesẹ, agọnọma fini bụọmọdẹ.
19 Mọkpọ ị gbaa á pịrị, ánị ovurumị maa kịmị kị yelaa ye duonị, zọzọ naawẹrị tẹẹ kpọ, ine agọnọ Daụ bị mịẹ á pịrịmịnị.
20 Ine ẹrẹ duonị, maa kịmị anịghakpọ tara kịmị bẹnịị-emi yọsẹ, ịmịnị kpọ ánị ovuruma-emi.”
21 Anịa Peter bo ụ laawẹrị gbaamị: “Nanaowei, ine bịna-ụbọ ye mịẹ ị dọọnmọ daba, ịmịnị ẹndẹna ifie kị kọn ụ bụọmọmịnị a o? Sọnọma ifie laamịnị a?”
22 Jesus gbaa ụ pịrịmị: “Ị gbaa ị́ pịrị, sọnọma ifie bẹtịbịgha, anịa sọnọma-oi mọ sọnọma ifie* mọ kị laamịnị.
23 “Anịkịduonị, agọnọ Daabụọ bị ibe-daaowei nẹ, wó odubo-otubo bara duo ánị fịwẹrịemi saabo biimịnị ibe-daaowei bara k’emi.
24 Ómịnị wó saabo biitimi ifiemị, ámịnị wó barama 10,000 talẹntị* saa fịwẹrị kịmị kọn ụ yarịmị.
25 Anịa kịmị bị sịlị nanawẹrị ụ gbẹẹgha duonị, kịmị mọ, ụ taa mọ, wó awọụbo mọ, bá wó nanawẹrịemi yebosẹ yẹrịwẹrị kọn saa gbẹẹ bara ibe-daaowei mọ gbaamị.
26 Anịduonị, odubo-owei bị okoiwẹrị ụ tẹẹmị, ‘sisei ifie dọlọ akị ị pịrị, ịmịnị iné barama fịwẹrịemi saabosẹ gbẹẹsinmịnị.’
27 Ibe-daaowei bị ụ dieneniwẹrị wó abarasiinmị, ómịnị bá saabo kpọ gbẹẹkụmọ bara gbaa ụ pịrịmị.
28 Anịa bịsẹ odubo-oweimị bịsẹ yọ duo seridẹmị, ómịnị wó timi-timi odubo-owei nẹ wó barama 100 denarii saa fịwẹrịemi owei ẹrịmị, Ómịnị bịsẹ odubo-owei kọọn kẹrị palịmọwẹrị gbaa ụ pịrịmị, ‘ine barama fịwẹrịemi saabọsẹ gbẹẹsiin.’
29 Anịduonị, bịsẹ odubo-oweimị okoiwẹrị ụ tẹẹmị, ‘sisei ifie dọlọ akị ị pịrị, ‘ịmịnị ị́ gbẹẹmịnị.’
30 Anịa bịsẹ odubo-oweimị bọụgha, ómịnị wó timi-timi odubo-owei kẹrị ikoliwarị akaịwẹrị, odubo-owei bị saabosẹ gbẹẹsiindẹ kị, ụ paamọ bomụ bara gbaamị.
31 Anịa kọọ odubo-otubo paa yemị ẹrị ifiemị, ámịnị pọwẹịgha, anịduonị ámịnị mú paa yebosẹ gbaa ibe-daaowei pịrịmị.
32 Ibe-daaowei bị ụ tịịn bowẹrị gbaa ụ pịrịmị: ‘Ị́mịnị bulusei odubo-owei, ị́mịnị ị tẹẹ ifiemị, ịmịnị iné fịwẹrị saabosẹ kọnsiinmị.
33 Ịmịnị dieneni mịẹ ị́ dịa baramị, ị́mịnị kpọ dieneni mịẹ iné timi-timi odubo-owei dịa agbẹị a?’
34 Bịsẹbara gbaasiindẹmị, ibe-daaowei bị bulukọnwẹrị ụ kọn ikoliwarị akaịwẹrị,* ómịnị wó saabosẹ gbẹẹsiindẹ kị ụ bụọmọ paabo bara gbaamị.
35 Ámịnị ána adụdụbo duo ánị bịna-ụbọ bụọmọgha ifiesẹ, ine agọnọ Daụ kpọ bịsẹ kpekẹnị bara ka kị á mịẹmịnị.”
Gbaatụayọama
^ Mị kọn witi sanmịnị okuta.
^ Anịghakpọ “ị́ mịẹ sei mịẹmịnị aba.”
^ Anịghakpọ “ị́ mịẹ sei mịẹmịnị aba.”
^ Anị Jerusalem tiriangamị sei yeama yọụntimi yọ. Egberi ụngbọụ tuuama dii.
^ Oruseri ifiemị, bara kọn gẹẹwẹrịemi Greek Baịbụlụ-bo, zụa yelaa yaị dii daba, bei Baịbụlụ yọmị fa.
^ Greek bẹẹlịmị, “Bẹbẹ duo naa daba.”
^ Anịghakpọ “77 ifie.”
^ 10,000 talentịbo, 60,000,000 denarii laaemi. Egberi ụngbọụ tuuama dii.
^ Greek bẹẹlịmị, “ụ kọn ikoliwarị diimịnị otubo pịrịwẹrị.”
